МОНГОЛ УЛСЫН НЭРИЙН ӨМНӨӨС

            Орхон аймаг дахь Сум дундын Иргэний хэргийн анхан шатны шүүхийн шүүх хуралдааныг шүүгч Б.Бямбасүрэн даргалж хийсэн шүүх хуралдаанаар

             Нэхэмжлэгч: 1962 онд төрсөн, эрэгтэй, Орхон аймаг, Баян-өндөр сум, Дэнж багийн СӨХ-ийн 2 дугаар байрны 78 тоотод оршин суух, Данжин овгийн Жамъяансүрэнгийн Чулууны нэхэмжлэлтэй

“Ажилласан байдал сэргээн тогтоолгох”-ыг хүссэн  нэхэмжлэлийг 2016-10-21-ний өдөр хүлээн авч хянан хэлэлцэв.

            Шүүх хуралдаанд нэхэмжлэгч Ж.Чулуун, шүүх хуралдааны нарийн бичгийн дарга Д.Оюунбилэг нар оролцов.

ТОДОРХОЙЛОХ нь:

             Нэхэмжлэгч Ж.Чулуун шүүхэд гаргасан нэхэмжлэл, хүсэлтдээ: Ж.Чулуун миний бие нь Монгол ажилчдын захиргааны харъяа Авто тээврийн комбинатад 1987оны 5 дугаар сарын 29-ний өдрөөс 1996 оны 10 дугаар сарын 14-ний өдрийг хүртэл 9 жил 4 сар хүнд даацын краз шланз маркийн машин барьж байсан. Одоо хүнд нөхцөлд 55 насаар тэтгэвэрт орох гэтэл хөдөлмөрийн дэвтэр дээр маань энгийн жолоочоор 9 жил 4 сар ажиллаж байна гэж бичсэн байна. Иймд нийгмийн даатгалын хэлтэсээс хүнд даацын машин 9 жил 4 сар барьж байсан гэсэн шүүхийн магадлагаа хэрэгтэй гэсэн тэр үед надтай цуг краз шланзын жолоогоор ажиллаж байсан 2 хүн шүүхэд тодорхойлолт бичиж өгсөн. Иймд миний гаргаж өгсөн материалыг үндэслэн хүнд нөхцөлд ажиллаж байсныг минь тогтоож өгнө үү гэжээ.

            Шүүхийн хэлэлцүүлэгт Иргэний үнэмлэхний хуулбар, нийгмийн даатгалын дэвтрийн хуулбар, Зэсмолибден барилга удирдах газрын дэргэдэх монгол ажилчдын захиргааны даргын 1991 оны 12 дугаар сарын 26-ны өдрийн А/326 дугаартай тушаал, хавсралтын хамт, Монгол ажилчдын захиргааны даргын 1997 оны 06 дугаар сарын 02-ны өдрийн 191 дугаартай тушаал, гэрч Д.Хүрэлдорж, Ч.Мондоон нарын мэдүүлэг зэргийг нотлох баримтаар шинжлэн судлав.

ҮНДЭСЛЭХ нь:

Данжин овгийн Жамъяансүрэнгийн Чулуун нь Авто тээврийн байгууллагад 1987 оны 05 дугаар сарын 29-ний өдрөөс 1991 оны 12 дугаар сарын 31-ний өдрийг хүртэл краз шланзын жолоочоор, 1992 оны 01 дүгээр сарын 02-ны өдрөөс 1996 оны 10 дугаар сарын 14-ний өдрийг хүртэл Совинвест-2 компанид краз шланзын жолоочоор тус тус ажиллаж байсан болох нь Иргэний үнэмлэхний хуулбар, нийгмийн даатгалын дэвтрийн хуулбар, Зэсмолибден барилга удирдах газрын дэргэдэх монгол ажилчдын захиргааны даргын 1991 оны 12 дугаар сарын 26-ны өдрийн А/326 дугаартай тушаал, хавсралтын хамт, Монгол ажилчдын захиргааны даргын 1997 оны 06 дугаар сарын 02-ны өдрийн 191 дугаартай тушаал, гэрч Д.Хүрэлдорж, Ч.Мондоон нарын мэдүүлэг зэргийг бичгийн нотлох баримтаар тогтоогдож байна.

           Шүүх хуульд заасан үндэслэл журмын дагуу цуглуулж бэхжүүлсэн дээрх нотлох баримтуудыг хэрэгт ач холбогдолтой үнэн зөвд тооцож шийдвэрийн үндэслэл болголоо.

            Монгол Улсын  Иргэний Хэрэг Шүүхэд Хянан Шийдвэрлэх тухай хуулийн  115 дугаар зүйлийн 115.2.1,116,118 дугаар зүйлүүдэд заасныг удирдлага болгон

ТОГТООХ нь:

1.Монгол Улсын Иргэний хэргийг шүүхэд хянан шийдвэрлэх тухай хуулийн 135 дугаар зүйлийн 135.2.6-д заасныг баримтлан Данжин овгийн Жамъяансүрэнгийн Чулуун нь Авто тээврийн байгууллагад  1987 оны 05 дугаар сарын 29-ний өдрөөс 1991 оны 12 дугаар сарын 31-ний өдрийг хүртэл краз шланзын жолоочоор, Совинвест-2 компанид 1992 оны 01 дүгээр сарын 02-ны өдрөөс 1996 оны 10 дугаар сарын 14-ний өдрийг хүртэл краз шланзын жолоочоор тус тус ажиллаж байсан байдлыг тогтоосугай.

2. Монгол Улсын ИХШХШ тухай хуулийн 58 дугаар зүйлийн 58.3-д заасны  дагуу нэхэмжлэгчээс улсын тэмдэгтийн хураамжинд төлсөн 70.200 төгрөгийг Төрийн санд хэвээр үлдээсүгэй.

3.Энэ шийдвэрийг зохигч эс зөвшөөрвөл гардан авснаас хойш 14 хоногийн дотор Орхон аймгийн Иргэний хэргийн давж заалдах шатны шүүхэд гомдол гаргах эрхтэй

 

 

 

ДАРГАЛАГЧ, ШҮҮГЧ                          Б.БЯМБАСҮРЭН