МОНГОЛ УЛСЫН НЭРИЙН ӨМНӨӨС

 

Баянзүрх дүүргийн Иргэний хэргийн анхан шатны шүүхийн шүүгч Э.Энэбиш даргалж тус шүүхийн шүүх хуралдааны танхимд хийсэн хуралдаанаар

Нэхэмжлэгч: Д.Д

Хариуцагч: С.Б

Зээлийн гэрээний үүрэгт 6,700,000 төгрөг гаргуулах нэхэмжлэлтэй иргэний хэргийг хянан хэлэлцэв.

Шүүх хуралдаанд: *******, *******, нарийн бичгийн даргаар Б.Ганчимэг нар оролцов.

 

ТОДОРХОЙЛОХ нь:

 

******* шүүхэд гаргасан нэхэмжлэл болон шүүх хуралдаанд гаргасан тайлбартаа: Нэхэмжлэгч: Анх бид 2020 оны 4 дүгээр сарын 10-ны өдөр 6 сарын хугацаатай 5,000,000 төгрөгийн зээлийн гэрээ хийсэн. Энэ хугацаанд хариуцагч хүүгийн төлбөрөө сардаа багтаад төлдөг байсан. 2020 оны 10 дугаар сарын 10-ны өдрөөс гэрээг 3 сарын хугацаагаар сунгах хүсэлт гаргаад бид сунгасан. 2021 01 15-ны өдрийг хүртэл. Тэр хугацаанд ямар ч хүү төлбөр төлөөгүй. Үндсэн төлбөр болох 5,000,000 төгрөг, 3 сарын хүүгийн төлбөр 1,500,000 төгрөг, алданги 1,000,000 төгрөг, нийт 6,700,000 төгрөг нэхэмжилж байна гэв.

Хариуцагч С.Батжаргал шүүхэд болон шүүх хуралдаанд гаргасан тайлбартаа: Би нэхэмжлэгчээс 5,000,000 төгрөг зээлсэн нь үнэн. Би Нарантуул захад бэлэн хувцас зардаг байсан. Гэхдээ Корона вирустай холбоотойгоор ажилгүй болсон. Тиймээс төлбөрөө төлж чадаагүй. Бодитоор 5,500,000 төгрөг төлөх боломжтой. Үүнийг ажил эхлэхээр төлнө гэв.

 

ҮНДЭСЛЭХ нь:

 

*******, *******д холбогдуулан зээлийн гэрээний үүрэгт 6,700,000 төгрөг гаргуулах нэхэмжлэлийг шүүхэд гаргаснаас хариуцагч 5,500,000 төгрөгийн шаардлагыг хүлээн зөвшөөрч, 1,200,000 төгрөгөөс татгалзжээ.

Нэхэмжлэлийн шаардлагын зарим хэсгийг хангаж шийдвэрлэв.

Зохигчийн шүүхэд, шүүх хуралдаанд гаргасан тайлбар, хэрэгт нотлох баримтаар авагдсан бичгийн баримтуудаас үзэхэд зохигчийн хооронд Иргэний хуулийн 281 дүгээр зүйлийн 281.1-д зааснаар зээлийн гэрээний харилцаа үүссэн гэж үзэхээр байна.

Хэрэгт 2020 оны 04 дүгээр сарын 10-ны өдрийн зээлийн гэрээ нотлох баримтаар авагдсан ба тус гэрээгээр нэхэмжлэгч, хариуцагчид 5,000,000 төгрөгийг 6 сарын хугацаатай, сарын 10 хувийн хүүтэйгээр зээлдүүлжээ. Талууд гэрээний хугацааг 2020 оны 10 дугаар сарын 11-ний өдрөөс 2021 оны 01 дүгээр сарын 11-ний өдрийг хүртэл мөн нөхцөлөөр 3 сарын хугацаагаар сунгажээ. Хариуцагч шүүх хуралдаанд гаргасан тайлбартаа нэхэмжлэлээс 5,500,000 төгрөгийг төлөхийг зөвшөөрч үлдэх 1,200,000 төгрөгийг төлөх санхүүгийн боломж цар тахлын нөлөөгөөр үгүй болсон, өмнө нь хүүнд 3,000,000 төгрөг төлсөн гэж тайлбарласан.

Хариуцагчийн энэхүү тайлбар, татгалзлыг нэхэмжлэгч баримтаар үгүйсгээгүй бөгөөд зохигчийн хооронд байгуулсан гэрээний 3.1, 3.3-т заасны дагуу зээл 5,000,000 төгрөг, гэрээг сунгасан хугацааны хүү 1,500,000 төгрөг, мөн өмнө хугацааны хүүгийн төлбөрөөс дутуу төлсөн /зохигч энэ талаар маргаагүй/ гэх 100,000 төгрөгийг тус хариуцагчаас гаргуулан нэхэмжлэгчид олгох нь зүйтэй. Зохигч зээлийн гэрээний 3.3-т нэг сарын хүүг 10 хувь байхаар тохиролцсон нь банк, банк бус санхүүгийн байгууллагаас олгох зээлийн нэг сарын дундаж хэмжээнээс илт өндөр байна. Иргэний хуулийн 282 дугаар зүйлийн 282.2-т зээлийн хүүгийн хэмжээ зээлдэгчид илт хохиролтой тогтоогдсон бол зээлдэгч буюу хариуцагчийн хүсэлтээр шүүх зээлийн хүүг багасах эрхтэй. Хариуцагч энэ талаар шүүх хуралдаанд тайлбарлаагүй, хүүгийн хэмжээний талаар шүүхэд хүсэлт гаргаагүй.

Нэхэмжлэгч гэрээний алдангийг 100,000 төгрөгөөр тооцон хариуцагчаас нэхэмжилсэн ба мөн хуулийн 232 дугаар зүйлийн 232.8-д зааснаар хариуцагчийн зээлийн хүү төлсөн хугацаа, хүүгийн хэмжээ зэрэг хэргийн нөхцөл байдлыг харгалзан хариуцагчаас анз гаргуулах үндэслэлгүй гэж үзэхээр тул нэхэмжлэгчийн энэ шаардлагыг хэрэгсэхгүй болгон шийдвэрлэв.

Иймд хариуцагчаас 6,600,000 төгрөг гаргуулан нэхэмжлэгчид олгож, нэхэмжлэлээс 100,000 төгрөгийн шаардлагыг хэрэгсэхгүй болгон шийдвэрлэв.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.2, 116, 118 дугаар зүйлүүдэд заасныг удирдлага болгон

 

ТОГТООХ нь:

 

1.      Иргэний хуулийн 281 дүгээр зүйлийн 281.1, 232 дугаар зүйлийн 232.8-т заасныг баримтлан *******аас 6,600,000 төгрөг гаргуулан нэхэмжлэгч Д.Даваадоржид олгож, нэхэмжлэлээс 100,000 төгрөгийн шаардлагыг хэрэгсэхгүй болгосугай.

2.      Иргэний хэрэг шүүхэд хянан шийдвэрлэх тухай 56 дугаар зүйлийн 56.2, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчийн улсын тэмдэгтийн хураамжид төлсөн 122,150 төгрөгийг улсын орлогод үлдээж, *******аас 120,550 төгрөг нөхөн гаргуулж нэхэмжлэгч Д.Даваадоржид олгосугай.

3.      Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

ДАРГАЛАГЧ ШҮҮГЧ Э.ЭНЭБИШ