Баянхонгор аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Н.Баасанбат даргалж,

Улсын яллагч Д.Эрдэнэсоёл, 

Нарийн бичгийн дарга А.Батдорж,

Хохирогч Ж.Бат-Өлзий,

Насанд хүрээгүй шүүгдэгч М.Хосбаяр, түүний хууль ёсны төлөөлөгч Д.Оюунгэрэл,

Шүүгдэгч М.Лхагва-Очир,

Шүүгдэгч нарын өмгөөлөгч Г.Дуламсүрэн нарыг оролцуулан Баянхонгор аймгийн прокурорын газраас Эрүүгийн хуулийн тусгай ангийн 145 дугаар зүйлийн 145.2 дахь хэсэгт зааснаар яллах дүгнэлт үйлдэж ирүүлсэн М.Лхагва-Очир, М.Хосбаяр нарт холбогдох 201605000178 дугаар эрүүгийн хэргийг 2016 оны 08 дугаар сарын 18-ны өдөр хүлээн авч хаалттай хянан хэлэлцэв.

Шүүгдэгч нарын биеийн байцаалт

Монгол улсын иргэн, 1998 оны 07 дугаар сарын 28-ны өдөр Баянхонгор аймгийн Баянхонгор суманд төрсөн, 18 настай, эрэгтэй, бүрэн бус дунд боловсролтой, мэргэжилгүй, ам бүл 5, эцэг, эх, эгч, дүү нарын хамт Баянхонгор аймгийн Жинст сумын 1 дүгээр багт оршин суудаг, малчин, улсаас авсан гавъяа шагналгүй, урьд ял шийтгэлгүй, хэрэг хариуцах чадвартай, ВЮ98072810 тоот регистрийн дугаартай, Боржигин овогт Мөнхбатын Лхагва-Очир,.

Монгол улсын иргэн, 1999 оны 04 дүгээр сарын 18-ны өдөр Баянхонгор аймгийн Жинст суманд төрсөн, 17 настай, эрэгтэй, бүрэн бус дунд боловсролтой, мэргэжилгүй, ам бүл 7 эцэг, эх, дүү нарын хамт Баянхонгор аймгийн Жинст сумын 4 дүгээр багт оршин суудаг, малчин, улсаас авсан гавъяа шагналгүй, урьд ял шийтгэлгүй, хэрэг хариуцах чадвартай, ВН99041815 тоот регистрийн дугаартай, Хошууд овогт Мөнхтөрийн Хосбаяр,

Үйлдсэн хэргийн талаар:

Шүүгдэгч М.Лхагва-Очир нь М.Хосбаяртай урьдчилан үгсэж тохиролцож бүлэглэн, шунахайн сэдэлтээр, ашиг олох зорилгоор, машин механизм ашиглан 2016 оны 05 дугаар сарын 16-наас 17-нд шилжих шөнө Баянхонгор аймгийн Жинст сумын 4 дүгээр багийн нутаг "Тээг" гэх газар нутаглаж байсан иргэн Ж.Бат-Өлзийгийн гэрт хууль бусаар нэвтэрч 50 килограммын шуудайнд савласан 15,5 килограмм ноолуурыг хулгайлж бусдад 837.000 төгрөгийн буюу бага бус хэмжээний хохирол учруулсан,

Насанд хүрээгүй шүүгдэгч М.Хосбаяр нь М.Лхагва-Очиртой урьдчилан үгсэж тохиролцож бүлэглэн, шунахайн сэдэлтээр, ашиг олох зорилгоор, машин механизм ашиглан 2016 оны 05 сарын 16-наас 17-нд шилжих шөнө Баянхонгор аймгийн Жинст сумын 4 дүгээр багийн нутаг "Тээг" гэх газар нутаглаж байсан иргэн Ж.Бат-Өлзийгийн гэрт хууль бусаар нэвтэрч 50 килограммын шуудайнд савласан 15,5 килограмм ноолуурыг хулгайлж бусдад 837.000 төгрөгийн буюу бага бус хэмжээний хохирол учруулсан гэмт хэрэгт тус тус холбогджээ.  /яллах дүгнэлтэнд бичигдсэнээр/ 

                                                                                                                     ТОДОРХОЙЛОХ НЬ:

Шүүхийн хэлэлцүүлэгт яллах, өмгөөлөх талаас шинжлэн судлуулахаар санал болгосон  болон тухайн хэрэгт хуульд заасан үндэслэл журмын дагуу цугларсан дараах нотлох баримтуудыг шинжлэн судлаад дүгнэхэд: 

Шүүгдэгч М.Лхагва-Очир нь насанд хүрээгүй шүүгдэгч М.Хосбаяртай бүлэглэн, машин механизм хэрэглэж 2016 оны 05 дугаар сарын 16-наас 17-нд шилжих шөнө Баянхонгор аймгийн Жинст сумын 4 дүгээр багийн нутаг "Тээг" гэх газар нутаглаж байсан иргэн Ж.Бат-Өлзийгийн гэрт хууль бусаар нэвтэрч 15,5 килограмм ноолуурыг хулгайлсан,

Насанд хүрээгүй шүүгдэгч М.Хосбаяр нь М.Лхагва-Очиртой бүлэглэн, машин механизм ашиглан 2016 оны 05 сарын 16-наас 17-нд шилжих шөнө Баянхонгор аймгийн Жинст сумын 4 дүгээр багийн нутаг "Тээг" гэх газар нутаглаж байсан иргэн Ж.Бат-Өлзийгийн гэрт хууль бусаар нэвтэрч 15,5 килограмм ноолуурыг хулгайлсан гэмт хэрэг үйлдсэн болох нь хэрэгт авагдсан:

Хохирогч Ж.Бат-Өлзийгийн мөрдөн байцаалтын шатанд өгсөн

...2016 оны 05 сарын 16-наас 17-нд шилжих шөнө гэрт хулгай орж шуудайтай 15,5 кг ноолуур хулгайд алдагдсан. Хулгай ордог өдрийн шөнө буюу 2016 оны 05 сарын 16-ны орой 23 цагийн үед Төмөртогоо гэх айлруу мотоциклиор хүүхэдтэйгээ хоёулаа явсан юм. Гэрт хүн үлдээгүй. Тэгээд айлд жаахан байж байгаад хүүхэд бид хоёр буцаж ирсэн. Тэр өдрийн өглөө ээж аймгийн төвөөс ирсэн юм. Ээж аймгаас ирчихээд нэг шуудайтай ноолуур орны хөлд харагдаж байна гэж хэлсэн. Тэгээд аймгийн төв орж цагдаад мэдэгдсэн юм. Манай ах Баярсайхан хулгай орсоны өглөө манай гэрээс ойролцоох газруудаар мөр харж алхаж байгаад израйль гутлын мөрийг олж харсан гэсэн. Хосбаяр гэх хүүхэд манайхаар байнга орж гардаг байсан. Гэтэл ноолуур алдагдсанаас хойш ирэхээ байсан. Хосбаяр манайд ноолуур байгаа гэдгийг мэдсэн байх. Орж гарах үед нь ноолуур нүдэн дээр нь ил байсан юм. Манай гэр цоожгүй байсан хаалгаа даавуугаар уяад орхисон байсан…гэх мэдүүлэг. /хх-ийн 52-56 /

Хөрөнгийн үнэлгээний төв ХХК-ийн үнэлгээчний 2016 оны 05 дугаар сарын 24-ний өдрийн: ямааны ноолуур 15.5 килограммыг 837000 төгрөг болохыг тодорхойлов гэх эд зүйлс үнэлсэн тухай тайлан  / хх-ийн 75-77/

Баянхонгор аймгийн ЗДТГ-ийн дэргэдэх эд зүйлийн үнэлгээний орон тооны бус комиссын 2016 оны 08 сарын 01-ний өдрийн: хуучин мустанг-5 маркийн мотоцикль 90.000 төгрөгийн үнэтэй гэх эд зүйл үнэлсэн тухай шинжээчийн дүгнэлт  /хх-ийн 81-82/

-хэрэг учралын газарт үзлэг хийсэн тэмдэглэл, гэрэл зургийн үзүүлэлт /хх-ийн 5-10/,

-хураан авах тогтоол, тэмдэглэл /хх-ийн 48-49/,

-эд мөрийн баримтаар тооцож, хэрэгт хавсаргах тогтоол /хх-ийн 50/

- насанд хүрээгүй шүүгдэгч М.Хосбаярын иргэний үнэмлэхний хуулбар /хх-ийн 126/,

-Жинст сумын 4-р багийн Засаг даргын тодорхойлолт/хх-ийн 127/,

-насанд хүрээгүй шүүгдэгч М.Хосбаярын насыг тогтоосон тэмдэглэл /хх-ийн 128/,

-насанд хүрээгүй шүүгдэгч М.Хосбаярын урьд ял шийтгэгдсэн эсэхийг шалгах хуудас/хх-ийн 129/,

-Жинст сумын 4-р багийн Засаг даргын тодорхойлолт/хх-ийн 131/,

- шүүгдэгч М.Лхагва-Очирын иргэний үнэмлэхний хуулбар /хх-ийн 132/,

- шүүгдэгч М.Лхагва-Очирын насыг тогтоосон тэмдэглэл /хх-ийн 133/,

- шүүгдэгч М.Лхагва-Очирын урьд ял шийтгэгдсэн эсэхийг шалгах хуудас /хх-ийн 134/,

-Баянхонгор аймгийн хүүхэд, гэр бүлийн хөгжлийн хэлтсийн хүсэлт /хх-ийн 139-144/

-эд хөрөнгө битүүмжлэх тогтоол, тэмдэглэл/хх-ийн 144-145/

Насанд хүрээгүй шүүгдэгч М.Хосбаяр мөрдөн байцаалтын шатанд өгсөн:

Би Лхагва-Очиртой очиж Бат-Өлзий гэх айлын өвөлжөөн дээр байх гэрээс нь ноолуур хулгайлж аваагүй. Лхагва-Очир худал мэдүүлж байна гэх мэдүүлэг /хх-ийн 106-111/

Шүүгдэгч М.Лхагва-Очирын мөрдөн байцаалтын шатанд өгсөн:

Миний хувьд 2016 оны 05 сарын 16-наас 17-нд шилжих шөнө Хосбаяртай хамт явж байгаад Бат-Өлзий гэх айлын гэрээс ноолуур хулгайлсан. Тэднийх эзэнгүй, гэрээ цоожлоогүй даавуугаар уяад орхисон байсан, гэрт орохдоо хөлдөө гялгар цаас углаж орсон, Хосбаяр гэрээс зайтай мотоцикль дээрээ байсан, ноолуурыг хулгайлаад хээр хаданд нуучихаад 2016 оны 05 сарын 30-ны өдөр зах дээр ноолуураа  авчирч нэг ченжид өгсөн. Хосбаяр ноолуур хулгай хийж авахад хамт явсан, түүнийг яваагүй байхад явсан гэж худал мэдүүлж буй зүйл байхгүй. Би ноолуурын мөнгөнөөс Хосбаярт 130000 төгрөг, ээждээ 140000 төгрөг өгсөн. Хосбаярыг эмээлийн гөлөм худалдаж авахад 20000 төгрөг өгсөн. 20000 төгрөгөөр хэд хэдэн удаа бензин шахуулж авсан, мөн хувцас хунар авч тамхи авсан гэх мэтчилэн зарцуулсан. Хосбаяр нь 2016 оны 05 сарын 16-ны орой надад ярихдаа Бат-Өлзий ахынд ноолуур байгаа, ноолуурыг нь авчих уу гэхээр нь би зөвшөөрсөн. Тэгээд Мөнхөө ахынд оччихоод буцах замдаа ноолуурыг Бат-Өлзий ахын гэрээс хулгайлсан. Хосбаяр надад "Бат-Өлзий ахын шуудайтай ноолуур орных нь дээр байна уу доор нь байна уу энэ хоёрын аль нэгэнд байх ёстой гэдгийг урьдчилан хэлсэн. Шуудайтай ноолуур хулгайлахад миний эзэмшлийн Мустанг-5 маркийн мотоцикпиор явсан гэх мэдүүлэг /хх-ийн 118-121, 124-125 / болон хэрэгт авагдсан бусад нотлох баримтуудаар нотлогдон тогтоогдож байна.

Дээрх хэрэгт цугларч, шүүх хуралдаанаар хэлэлцэгдсэн нотлох баримтууд нь тухайн хэрэгт хамааралтай, хуулийн дагуу цуглуулж, бэхжүүлсэн байх ба шүүгдэгчийг сэжигтэн, яллагдагчаар болон хохирогч, гэрч нарыг байцаахдаа Эрүүгийн байцаан шийтгэх хуулийн 144, 146, 147 дугаар зүйлд заасан хуулийн шаардлага хангасан, нотлох баримтууд нь агуулгын хувьд зөрүүгүй, үйл баримтыг хангалттай тогтоож чадсан байх тул хэргийг хянан шийдвэрлэхэд хангалттай гэж шүүх үнэлэв.

Шүүгдэгч нь тухайн гэмт хэргийг үйлдээгүй гэж үзэх үндэслэл, нотолгоогүй, мөн тус хэргийн нотлох баримтыг цуглуулах, бэхжүүлэх, шалгахдаа Эрүүгийн байцаан шийтгэх хуулийг зөрчсөн гэж үзэх үндэслэл, нотолгоо тогтоогдоогүй байна.   

Насанд хүрээгүй шүүгдэгч М.Хосбаяр нь шүүх хуралдааны хэлэлцүүлэгийн үед гэмт хэрэг үйлдсэн гэм буруутай болохоо хүлээн зөвшөөрсөн болно.

Шүүгдэгч М.Лхагва-Очир нь насанд хүрээгүй шүүгдэгч М.Хосбаяртай бүлэглэн, машин механизм хэрэглэж 2016 оны 05 дугаар сарын 16-наас 17-нд шилжих шөнө Баянхонгор аймгийн Жинст сумын 4 дүгээр багийн нутаг "Тээг" гэх газар нутаглаж байсан иргэн Ж.Бат-Өлзийгийн гэрт хууль бусаар нэвтэрч 15,5 килограмм ноолуурыг хулгайлсан,

Насанд хүрээгүй шүүгдэгч М.Хосбаяр нь шүүгдэгч М.Лхагва-Очиртой бүлэглэн, машин механизм ашиглан 2016 оны 05 сарын 16-наас 17-нд шилжих шөнө Баянхонгор аймгийн Жинст сумын 4 дүгээр багийн нутаг "Тээг" гэх газар нутаглаж байсан иргэн Ж.Бат-Өлзийгийн гэрт хууль бусаар нэвтэрч 15,5 килограмм ноолуурыг хулгайлсан гэмт хэрэг үйлдсэн нь дээрх нотлох баримтуудаар тогтоогдож байна.

Иймд шүүгдэгч М.Лхагва-Очир, насанд хүрээгүй шүүгдэгч М.Хосбаяр нарыг бүлэглэн, машин механизм хэрэглэж, орон байранд нэвтэрч  бусдын эд хөрөнгийг хулгайлах гэмт хэрэг үйлдсэн гэм буруутай гэж шүүх үзэв.      

Баянхонгор аймгийн Прокурорын газраас яллах дүгнэлт үйлдэж ирүүлсэн хэргийн зүйлчлэл шүүгдэгч нарын гэмт үйлдэлд тохирсон, хэргийн бүрдэл хангагдсан байх тул шүүгдэгч М.Лхагва-Очир, насанд хүрээгүй шүүгдэгч М.Хосбаяр нарт Эрүүгийн хуулийн тусгай ангийн 145 дугаар зүйлийн 145.2 дахь хэсэгт заасан гэмт хэрэгийг үйлдсэн гэм буруутайд тус тус тооцож, эрүүгийн хариуцлага хүлээлгэх хууль зүйн үндэслэлтэй байна гэж дүгнэв.

Шүүгдэгч М.Лхагва-Очир, насанд хүрээгүй шүүгдэгч М.Хосбаяр нар нь урьд ял шийтгэгдсэн эсэхийг шалгах хуудсаар ял шийтгүүлж байгаагүй байх тул тэднийг анх удаа хүндэвтэр гэмт хэрэг үйлдсэн гэж үзэх үндэслэлтэй байна. 

Насанд хүрээгүй шүүгдэгч М.Хосбаярт хүмүүжлийн чанартай албадлагын арга хэмжээ авах үндэслэлтэй болох нь түүний насанд хүрээгүй байдал, анх удаа хүндэвтэр гэмт хэрэг үйлдсэн нөхцөл, гэмт хэргийн улмаас бусдад төлөх төлбөргүй, үйлдсэн хэргийн нийгмийн аюулын шинж чанар, түүний хувийн байдал, урьд ял шийтгэлгүй байдал, ар гэрийн нөхцөл байдал, Баянхонгор аймгийн Хүүхэд, гэр бүлийн хөгжлийн хэлтсийн хүсэлт зэрэг хавтаст хэрэгт авагдсан нотлох баримтуудаар нотлогдож байна.

Шүүх шүүгдэгч М.Лхагва-Очирын үйлдсэн гэмт хэргийн нийгмийн аюулын шинж чанар, хэр хэмжээ, хувийн байдал, гэмт хэрэг үйлдсэн нөхцөл байдал, хохирлын хэр хэмжээ, хохирол нөхөн төлсөн байдал, хариуцлагыг хөнгөрүүлэх нөхцөл байдал, үйлдлийн шинж, чанар, хэр хэмжээ зэргийг харгалзан эд хөрөнгө хураахгүйгээр ял оногдуулах нь зүйтэй гэж дүгнэв.   

Шүүгдэгч М.Лхагва-Очирт ял шийтгэл оногдуулахдаа Эрүүгийн хуулийн 55-р зүйлд заасан тохиолдлын шинжтэй нөхцөл байдлын улмаас анх удаа хөнгөн, хүндэвтэр гэмт хэрэг үйлдсэн, гэмт хэрэг үйлдэж учруулсан хохиролоо сайн дураараа нөхөн төлсөн буюу гэм хорыг арилгасан, үйлдсэн хэрэгтээ чин санаанаасаа гэмшиж байгаа байдал,  үйлдсэн гэмт хэргийн нийгмийн аюулын шинж чанар, хэр хэмжээ, хэргээ хүлээн мэдүүлж байгаа байдал, хохирол төлсөн байдал, ял хөнгөрүүлэх болон хүндэрүүлэх нөхцөл байдал, түүний хувийн байдлыг хөнгөрүүлэх үндэслэл болгож, хохирогчийн хохирлыг бүрэн барагдуулсан тул санал гомдолгүй зэргийг харгалзан шүүгдэгчид оногдуулах ял шийтгэлийг биечлэн эдлүүлэх шаардлагагүй гэж үзэв.

Гэмт хэргийн улмаас шүүгдэгч М.Лхагва-Очир, насанд хүрээгүй шүүгдэгч М.Хосбаяр нар нь бусдад учруулсан хохирлоо бүрэн төлсөн, хохирогч Ж.Бат-Өлзий нь “хохиролоо бүрэн барагдуулж авсан, гомдол саналгүй” гэж байх тул шүүгдэгч нарыг бусдад төлөх төлбөргүй гэж үзлээ.

Хэрэгт эд мөрийн баримтаар хураагдсан насанд хүрээгүй шүүгдэгч М.Хосбаярын өмсөж явсан хагас түрийтэй, үдээстэй гутал 1 хосыг буцаан олгож, шүүгдэгч М.Лхагва-Очир, насанд хүрээгүй шүүгдэгч М.Хосбаяр нар нь бусдад төлөх төлбөргүй байх тул шүүгдэгч М.Лхагва-Очирын өмчлөлийн эр ямаа 2 ширхэгийг битүүмжилсэн эд хөрөнгө битүүмжлэх тогтоолыг хүчингүй болгож шийдвэрлэв.

Эрүүгийн байцаан шийтгэх хуулийн 283, 284, 286, 290 дугаар зүйлийн 290.3, 297 дугаар зүйлийн 297.1.1-297.1.4, 298, 299 дугаар зүйлүүдэд заасныг удирдлага болгон

                                                                                                                                ТОГТООХ  нь:

1. Шүүгдэгч Боржигин овогт Мөнхбатын Лхагва-Очир, насанд хүрээгүй шүүгдэгч Хошууд овогт Мөнхтөрийн Хосбаяр нарыг бүлэглэн, машин механизм хэрэглэж, орон байранд нэвтэрч  бусдын эд хөрөнгийг хулгайлах гэмт хэрэг үйлдсэн гэм буруутайд тус тус тооцсугай.

2. Эрүүгийн хуулийн тусгай ангийн 145 дугаар зүйлийн 145.2 дахь хэсэгт зааснаар шүүгдэгч М.Лхагва-Очирыг эд хөрөнгө хураахгүйгээр хоёр жилийн хугацаагаар хорих ялаар шийтгэсүгэй.

3. Эрүүгийн хуулийн ерөнхий ангийн 52 дугаар зүйлийн 52.5 дахь хэсэгт зааснаар шүүгдэгч М.Лхагва-Очирт оногдуулсан хоёр жилийн хугацаагаар хорих ялыг жирийн дэглэмтэй эрэгтэйчүүдийн хорих  ангид эдлүүлсүгэй.

4.Эрүүгийн хуулийн ерөнхий ангийн 69 дүгээр зүйлийн 69.1.1 дэхь хэсэгт зааснаар насанд хүрээгүй шүүгдэгч М.Хосбаярт нэг жилийн хугацаагаар засарч хүмүүжихийг даалгасугай.

5. Эрүүгийн хуулийн ерөнхий ангийн 59 дүгээр зүйлийн 59.1 дэхь хэсэгт зааснаар шүүгдэгч М.Лхагва-Очир, насанд хүрээгүй шүүгдэгч М.Хосбаяр нарын цагдан хоригдсон хоёр хоногийг ял эдэлсэн хугацаанд нь тус тус оруулан тооцсугай.

6. Эрүүгийн хуулийн ерөнхий ангийн 61 дүгээр зүйлийн 61.1, 61.4, 61.5 дахь хэсэгт зааснаар шүүгдэгч М.Лхагва-Очирт оногдуулсан хоёр жилийн хугацаагаар хорих ялыг тэнсэж, нэг жилийн  хугацаагаар хянан харгалзаж, тэнсэгдсэн ялтан М.Лхагва-Очирт хяналт тавихыг Баянхонгор аймгийн цагдаагийн газарт даалгаж, тэнсэгдсэн ялтан хянан харгалзах хугацаанд захиргааны шийтгэл хүлээсэн бол цагдаагийн байгууллагын саналыг үндэслэн хорих ялыг биечлэн эдлүүлэх эсэхийг шүүх шийдвэрлэхийг ялтан М.Лхагва-Очирт сануулсугай.

7. Эрүүгийн хуулийн ерөнхий ангийн 69 дүгээр зүйлийин 69.2 дахь хэсэгт зааснаар насанд хүрээгүй шүүгдэгч М.Хосбаярт оногдуулсан хүмүүжлийн чанартай албадлагын арга хэмжээ авагдсаны дараа засарч хүмүүжихгүй байвал шүүх уг арга хэмжээг насанд хүрээгүй хүмүүсийн сургалт-хүмүүжлийн тусгай байгууллагад явуулах арга хэмжээгээр сольж болохыг мэдэгдсүгэй.

8. Эрүүгийн хуулийн ерөнхий ангийн 49 дүгээр зүйлийн 49.2 дахь хэсэгт зааснаар шүүгдэгч М.Лхагва-Очироос гэмт хэрэг үйлдэхдээ хэрэглэсэн мустанг-5 маркийн мотоциклийн үнэ 90.000 төгрөгийг гаргуулж улсын орлого болгосугай.

9. Шүүгдэгч М.Лхагва-Очир, насанд хүрээгүй шүүгдэгч М.Хосбаяр нар нь бусдад төлөх төлбөргүй болохыг дурдсугай.

10. Эрүүгийн байцаан шийтгэх хуулийн 88 дугаар зүйлийн 88.1.3 дахь хэсэгт зааснаар эд мөрийн баримтаар хураагдсан шүүгдэгч М.Хосбаярын 38 размерын хуучин, үдээстэй, хагас түрүүтэй, арзгар хээтэй гутал 1 ширхэгийг эзэмшигч М.Хосбаярт буцаан олгосугай.

11. Эрүүгийн байцаан шийтгэх хуулийн 134 дүгээр зүйлийн 134.10 дахь  хэсэгт зааснаар шүүгдэгч М.Лхагва-Очирын өмчлөлийн эр ямаа 2 ширхэгийг битүүмжилсэн мөрдөн байцаагчийн тогтоолыг хүчингүй болгосугай.

12. Эрүүгийн байцаан шийтгэх хуулийн 297 дугаар зүйлийн 297.1.4 дэхь хэсэгт  зааснаар шүүгдэгч М.Лхагва-Очир, насанд хүрээгүй шүүгдэгч М.Хосбаяр нарт урьд авсан батлан даалтанд өгөх таслан сэргийлэх арга хэмжээг тус тус хэвээр үргэжлүүлсүгэй.

13. Эрүүгийн байцаан шийтгэх хуулийн 299 дүгээр зүйлийн 299.3, 303 дугаар зүйлийн 303.1, 304 дүгээр зүйлийн 304.1 дэхь хэсэгт зааснаар шийтгэх тогтоол танилцуулан сонсгосноор хуулийн хүчинтэй болохыг дурьдаж, шийтгэх тогтоолд давж  заалдах гомдол гаргах, эсэргүүцэл бичих эрх бүхий этгээд тогтоолыг гардаж авснаас хойш 14 хоногийн дотор Баянхонгор аймгийн эрүү, иргэний хэргийн давж заалдах шатны шүүхэд  давж  заалдах гомдол гаргах, эсэргүүцэл бичих эрхтэйг дурьдсугай.

14. Эрүүгийн байцаан шийтгэх хуулийн 306 дугаар зүйлийн 306.1 дэхь хэсэгт зааснаар давж заалдах гомдол, эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол биелүүлэх хүртэл шүүгдэгч М.Лхагва-Очир, насанд хүрээгүй шүүгдэгч М.Хосбаяр нарт авсан батлан даалтанд өгөх таслан сэргийлэх арга хэмжээг тус тус хэвээр үргэлжлүүлсүгэй.

ДАРГАЛАГЧ ШҮҮГЧ Н.БААСАНБАТ