2021         07         20

182/ШШ2021/01510

МОНГОЛ УЛСЫН НЭРИЙН ӨМНӨӨС

 

Чингэлтэй дүүргийн иргэний хэргийн анхан шатны шүүхийн иргэний шүүх хуралдааныг Ерөнхий шүүгч С.Буд даргалж, тус шүүхийн шүүх хуралдааны танхимд явуулж

Нэхэмжлэгч: “ГБ” ХХК

Хариуцагч: Ж.Г

зээлийн гэрээний үүрэгт 1,903,662.01 төгрөг гаргуулах тухай нэхэмжлэлтэй иргэний хэргийг хянан хэлэлцэв.

Шүүх хуралдаанд: Нэхэмжлэгчийн төлөөлөгч Н.Булганчимэг, шүүх хуралдааны нарийн бичгийн дарга А.Хонгорзул нар оролцов.

ТОДОРХОЙЛОХ нь:

 

Нэхэмжлэгч шүүхэд гаргасан нэхэмжлэл, шүүх хуралдаанд гаргасан тайлбартаа: Зээлийн эрх бүхий карт эзэмшигч Ж.Г нь ГБтай 2018 оны 02 сарын 19-ний өдөр ЗГ/110760794 тоот кредит карт эзэмшигчтэй байгуулах гэрээ байгуулан 1,500,000 төгрөгийг жилийн бэлэн бус гүйлгээний 24 хувь, бэлэн мөнгө авсны хүү 42 хувийн хүүтэй 2 жилийн хугацаатай зохих хүүгийн хамт эргүүлэн төлөх үүргийг хүлээн зээлийн эрхтэй карт нээлгэн зарцуулалтыг хийсэн болно. Зээлдэгч нь кредит карт ашиглан гүйлгээ хийсэн зарцуулалтын төлбөрөө гэрээний нөхцөлд заасны дагуу 26 сар төлөхгүй банкийг хохироож байгаа ба иргэн Ж.Гэд холбогдуулан зээлийн гэрээний үүргийн гүйцэтгэлд 2021 оны 05 сарын 22-ны өдрийн байдлаар зээлийн үндсэн төлбөр 1,122,785.50 төгрөг, зээлийн хүү 521,602.47 төгрөг, нэмэгдүүлсэн хүү 259,274.04 төгрөг, нийт 1,903,662.01 төгрөгийг гаргуулахаар нэхэмжлэл гаргаж байна гэв.

 

Хариуцагч шүүхэд ирүүлсэн хариу тайлбартаа: Ж.Г миний бие ГБны нэхэмжлэлтэй иргэний хэрэгт хариуцагчаар оролцож байна. ГБ өнөөдрийг хүртэл дундын тооцоог нийлж зээлийн хүү, нэмэгдүүлсэн хүү зэрэг нэхэмжлэлийн дүнг эцэслэн шийдэх талаар намайг оролцуулж, тооцооллыг танилцуулаагүй. Иймд би нэхэмжлэлийн үнийн дүнг хүлээн зөвшөөрөх боломжгүй гэжээ.

            Шүүх нэхэмжлэл, кредит карт эзэмшигчтэй байгуулах гэрээ, зээл картны хүү тооцооллын хүснэгт, компанийн улсын бүртгэлийн гэрчилгээ зэрэг бичгийн баримтыг шинжлэн судлаад

 

                                                                                                                 ҮНДЭСЛЭХ НЬ:

 

            Нэхэмжлэгч “ГБ” ХХК нь хариуцагч Ж.Гэд холбогдуулж зээлийн гэрээний үүрэгт нийт 1,903,662.01 төгрөг гаргуулах тухай нэхэмжлэлийг 2021 оны 05 дугаар сарын 28-ны өдөр шүүхэд гаргажээ.

Хариуцагч Ж.Г нь “ГБ” ХХК-тай 2018 оны 02 сарын 19-ний өдөр ЗГ/110760794 тоот кредит карт эзэмшигчтэй байгуулах гэрээ байгуулан 1,500,000 төгрөгийг жилийн бэлэн бус гүйлгээний 24 хувь, бэлэн мөнгө авсны хүү 42 хувийн хүүтэй 2 жилийн хугацаатай зээлийн эрх нээлгэсэн байна. Хариуцагч зээлийг эргэн бүрэн төлөөгүй ба нэхэмжлэгч “ГБ” ХХК нь хариуцагчийг үндсэн зээл 1,122,785.50 төгрөг, зээлийн хүү 521,602.47 төгрөг, нэмэгдүүлсэн хүү 259,274.04 төгрөг, нийт 1,903,662.01 төгрөгийг төлөх ёстой гэж тооцоолжээ.

“ГБ” ХХК-тай 2018 оны 02 сарын 19-ний өдөр байгуулсан хэрэглээний зориулалттай кредит карт эзэмшигчтэй байгуулах гэрээний дагуу зээл төлсөн баримтыг Ж.Г шүүхэд ирүүлээгүй тул “ГБ” ХХК-ийн зээлийн өр нэхэмжилсэн нэхэмжлэлийн шаардлагыг хангаж шийдвэрлэх нь зүйтэй байна.

Харин нэмэгдүүлсэн хүүгийн хэмжээ Иргэний хуулийн 452 дугаар зүйлийн 452.2-т заасныг зөрчиж үндсэн хүүгийн 20 хувиас хэтэрсэн байх тул хариуцагчаар төлүүлэх нэмэгдүүлсэн хүүгийн хэмжээг үндсэн хүүгийн 20 хувиар хязгаарлав. Иймд Ж.Гээс үндсэн зээлийн 1,122,785.50 төгрөгийг,  зээлийн хүү 521,602.47 төгрөг, нэмэгдүүлсэн хүү 104,320 төгрөгийн хамт гаргуулан нэхэмжлэгчид олгож, үлдэх нэхэмжлэлийн шаардлагыг хэрэгсэхгүй болгож шийдвэрлэв.

Хариуцагч Ж.Г шүүх хуралдааны товыг мэдэж мэдэгдэх хуудсанд гарын үсэг зурсан боловч шүүх хуралдаанд хүрэлцэн ирж мэтгэлцээгүй, шүүх хариуцагчийн эзгүйд хэргийг хэлэлцсэн болно.

 

Монгол улсын Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.2, 116, 118 дугаар зүйлийг удирдлага болгон  

 

                                                                                                         ТОГТООХ НЬ:

 

1. Иргэний хуулийн 451 дүгээр зүйлийн 451.1, 453 дугаар зүйлийн 453.1-ийг баримтлан Ж.Гээс 1,748,707.97 төгрөгийг гаргуулж “ГБ” ХХК-д олгож, нэхэмжлэлээс 154,954.04 төгрөгийн шаардлагыг хэрэгсэхгүй болгосугай.

 

2. Иргэний хэрэг шүүхэд хянан шийдвэрлэх тухай хуулийн 60 дугаар зүйлийн 60.1, 56 дугаар зүйлийн 56.2-т зааснаар нэхэмжлэгч тэмдэгтийн хураамжинд төлсөн 45,409 төгрөгийг улсын орлогод үлдээж, хариуцагчаас 42,929 төгрөгийг гаргуулж нэхэмжлэгч “ГБ” ХХК-д олгосугай.

 

3. Иргэний хэрэг шүүхэд хянан шийдвэрлэх тухай хуулийн 119-р зүйлийн 119.2, 120-р зүйлийн 120.2-д зааснаар шийдвэр танилцуулан сонсгомогц хуулийн хүчинтэй болох ба зохигч, тэдгээрийн төлөөлөгч, өмгөөлөгч 14 хоногт бэлэн болох шийдвэрийг 14 хоногт гардан авах үүрэгтэй, гардан авснаас хойш 14 хоногийн дотор Нийслэлийн иргэний хэргийн давж заалдах шатны шүүхэд давж заалдах гомдол гаргах эрхтэй.

            

 

 

                        ДАРГАЛАГЧ                                         С. БУД