МОНГОЛ УЛСЫН НЭРИЙН ӨМНӨӨС

Сүхбаатар аймаг дахь Сум дундын эрүүгийн хэргийн анхан шатны шүүхийн шүүгч Д.Алтаннавч даргалж,

Шүүх хуралдааны нарийн бичгийн дарга Д.Номин-Эрдэнэ,

Улсын яллагч Б.Жамъяндорж,

Шүүгдэгчийн өмгөөлөгч Ж.Цээсүрэн,

Шүүгдэгч Ч.******* нарыг оролцуулан тус шүүхийн шүүх хуралдааны “А” танхимд нээлттэй явуулсан эрүүгийн шүүх хуралдаанаар Сүхбаатар аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Ч.*******т холбогдох эрүүгийн 2430000000047 дугаартай хэргийг 2024 оны 04 дүгээр сарын 30-ны өдөр хүлээн авч, хянан хэлэлцэв.

Шүүгдэгчийн биеийн байцаалт:

Монгол Улсын иргэн, .... оны .... дугаар сарын ....-ны өдөр Сүхбаатар аймгийн Баруун-Урт суманд төрсөн, ... настай, эрэгтэй, бүрэн бус дунд боловсролтой, цахилгаанчин мэргэжилтэй, хувиараа хөдөлмөр эрхэлдэг,  Сүхбаатар аймгийн Баруун-Урт сумын ... дугаар баг .... тоотод оршин суух, урьд эрүүгийн хариуцлага хүлээж байгаагүй, Ж овогт Ч-н Б

Холбогдсон хэргийн талаар /яллах дүгнэлтэд дурдсанаар/:

Шүүгдэгч Ч.******* нь “хүний эрүүл мэндэд хөнгөн хохирол санаатай учруулсан” буюу Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэгт холбогджээ.                                            

ТОДОРХОЙЛОХ нь:

Шүүхийн хэлэлцүүлэгт дараах мэдүүлэг, нотлох баримтуудыг шинжлэн судлав. Үүнд:

Шүүгдэгч Ч.******* шүүх хуралдаанд мэдүүлэхдээ: “2024 оны 02 дугаар сарын 02-ны шөнө “*******” баарны гадаа дүүтэйгээ уулзахаар очсон. Тэнд Төрболд надтай таараад “чи яах гээд байгаа юм, чи түүний юу нь юм” гэхээр нь “би ах нь байна” гэсэн. Тэгсэн чинь над руу “би дүүг чинь танина” гээд бид хоёр маргалдсан. Төрболд намайг боож унагахаар нь би босож ирээд хавирч унагаагаад хоёр, гурав өшиглөсөн.” гэв.

Эрүүгийн 2430000000047 дугаартай хэргээс:

• Шүүгдэгч Ч.******* мөрдөн шалгах ажиллагааны явцад мэдүүлэхдээ “Тухайн орой 21 цаг өнгөрөөгөөд Баруун-Урт сумын 3 дугаар багт үйл ажиллагаа явуулдаг “*******” баар луу ганцаараа орсон. Тэр үед “*******” бааранд манай үеэл болох ******* сууж байсан. Би *******той уулзах гээд очиход хажууд нь сууж байсан ******* гэх хүн намайг “яах гэж байгаа юм, энэ танай дүү юм уу?, би мэдэж байна.” гэх зэргээр үг хэлээд намайг *******той уулзуулахгүй байсан. Тэгэхээр нь би *******ыг “гаръя” гээд баарнаас авч гарсан. Тэгээд тухайн үед баарнаас гараад *******ад “би дүүтэйгээ уулзах гээд байна” гэхэд ******* намайг гараараа шатан дээрээс түлхэхээр нь би шатнаас буусан. Тэгээд эргэж шат руу гараад *******ын хажууд очоод зогсоход ******* намайг өмссөн хувцаснаас зуураад миний хоолойг боосон. Би *******ад “намайг тавь” гэхэд тавихгүй байсан. Тэгэхээр нь би *******ыг тонгорч унагаагаад нүүр лүү нь 2-3 удаа цохисон. Тэгээд баарны гадаа байгаа хүмүүс бид хоёрыг салгасан.” гэх (хх 38-39 дүгээр хуудас),
• Хохирогч Б.*******ын мөрдөн байцаалтын шатанд мэдүүлсэн: “...би нэг дүүтэйгээ бие засах өрөө рүү хамт явсан. Тэгээд бид хоёрыг тамхи татаад бие засах өрөөнөөс гарч ирэхэд үүдэнд ******* гэдэг залуу надтай хамт явж байсан залуугийн хувцаснаас зуураад явуулахгүй байсан. Тэгэхээр нь би хажуугаас нь “яах гээд байгаа юм” гээд хамт явсан залуугаа холдуулаад авч явсан. Тэр үед ******* миний араас “би хамаатантайгаа юм ярьж байна” гээд миний ар дагз руу гараараа 1 удаа цохисон. Тэгэхээр нь би эргэж хараад ******* гээд залуутай муудах гэхэд хамт явж байсан залуу намайг болиулаад ширээнд суусан. Тэгээд хэсэг сууж байгаад гэнэт ******* дахиж манай ширээнд ирсэн. Тэр үед ******* намайг “гарах уу” гэж хэлсэн. Тэгэхээр нь би “тэгье” гээд хамт “*******” баарнаас гарсан. Гадаа гараад би *******ыг намайг бааран дотор цохисон болохоор нь тухайн үйлдэл нь санаанд ороод өмссөн хувцаснаас нь заамдаж аваад хавирч унагасан. Тэгээд бид хоёр хамт газар унасан. Тэгээд ноцолдож байгаад ******* миний дээр гараад миний нүүрэн тус газар 2-3 удаа гараараа цохисон. Удалгүй цагдаа ирсэн байсан.” гэх (хх 6-8 дугаар хуудас),
• Гэрч Х.*******ын “...******* ах ******* ахын өөдөөс нь уурлаад тэр 2 нэг нэгийгээ заамдалцаад авсан. Тэгээд тэр хоёр баарнаас гарсан. Харин намайг 10 минут орчмын дараа баарнаас гарах гэж байхад ******* ах баар луу орж байсан. Надтай үүдэнд зөрсөн. Харин намайг гадаа гарахад ******* ахын баруун нүд нь хөхөрсөн, хамраас нь цус гарсан байсан. Би тухайн үед ******* ахаас “яасан юм” гэж асуухад ******* ах надад “танай ******* ах чинь намайг цохичихлоо, би цагдаа дуудсан” гэж хэлсэн...” гэх (хх 11-13 дугаар хуудас),

• Шинжээж эмч А.Болор-Эрдэнийн “Хүний гар нь мохоо хүчин зүйлчлэл гэдэг ангилалд хамаарна.” гэх  (хх 23 дугаар хуудас) мэдүүлэг,
• Хохирогч Б.*******ад үзлэг хийсэн эмчийн үзлэгийн тэмдэглэл (хх 16-18 дугаар хуудас),
• Сүхбаатар аймаг дахь Шүүх шинжилгээний хэлтсийн 2024 оны 02 дугаар сарын 07-ны өдөр 63 дугаартай “1. Б.*******ын биед тархи доргилт, баруун нүдний алимны доргилт, дээд доод зовхинд цус хуралт, дээд уруулын зөөлөн эдийн няцрал бүхий гэмтэл учирчээ.

2. Учирсан гэмтэл нь мохоо ирмэгтэй хүчин зүйлийн үйлчлэлээр үүсгэгдсэн байна.

3. Учирсан гэмтлүүд нь Шүүх эмнэлгийн гэмтлийн зэрэг тогтоох журмын 2.4.1-т зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна.” гэх шинжээчийн дүгнэлт (хх 19-20 дугаар хуудас),

• Шүүгдэгч Ч.*******т холбогдох эрүүгийн хариуцлага хүлээж байсан эсэхийг шалгах хуудас, мөрдөн байцаалтын үед хийсэн тодорхойлолт, Захиргааны зөрчлийн шийдвэрлэлтийн бүртгэл (хх 40-42 дугаар хуудас),
• Шүүгдэгч Ч.*******ын иргэний үнэмлэхийн лавлагаа, иргэний оршин суугаа газрын хаягийн бүртгэлийн лавлагаа, нийгмийн даатгалын шимтгэл төлөлтийн талаарх тодорхойлолт (хх 44-46 дугаар хуудас),
• Сүхбаатар аймгийн Эрүүл мэндийн даатгалын хэлтсийн 2024 оны 03 дугаар сарын 07-ны өдрийн 21/32 дугаартай “хохирогч Б.******* нь аймгийн Нэгдсэн эмнэлгээс тусламж үйлчилгээ авч, эрүүл мэндийн даатгалын сангаас зардал 115,000 төгрөг гаргуулсан” гэх албан тоот, эмчилгээний зардлын баримт (хх 48-49 дүгээр хуудас) зэрэг нотлох баримт хэрэгт авагдсан болно.

Дээрх нотлох баримтууд нь хэрэгт хамааралтай, хуульд заасан үндэслэл журмын дагуу цуглуулж бэхжүүлэгдсэн, Эрүүгийн хэрэг хянан шийдвэрлэх ажиллагааны журам зөрчөөгүй, мөрдөн шалгах ажиллагааны явцад оролцогчийн хуулиар хамгаалагдсан эрхийг хассан, хязгаарласан зөрчил тогтоогдоогүй тул шүүх тэдгээр баримтыг хэрэг хянан шийдвэрлэхэд ач холбогдолтой, хамаарал бүхий талаас нь үнэлж, прокуророос шүүхэд шилжүүлсэн хэргийн хүрээнд хэргийг хянан шийдвэрлэх боломжтой гэж үзлээ.

1. Гэм буруугийн талаар:

• Шүүгдэгч Ч.******* нь 2024 оны 02 дугаар сарын 03-ны шөнийн 01 цагийн орчим Сүхбаатар аймгийн Баруун-Урт сумын 3 дугаар багт үйл ажиллагаа явуулдаг “*******” баарны гадна хохирогч Б.*******тай тухайн үед үүссэн хувийн таарамжгүй харилцааны улмаас маргалдаж улмаар түүний нүүрэн тус газар нь гараараа цохиж эрүүл мэндэд нь “тархи доргилт, баруун нүдний алимны доргилт, дээд доод зовхинд цус хуралт, дээд уруулын зөөлөн эдийн няцрал гэмтэл” бүхий хөнгөн хохирол санаатай учруулсан болох нь шүүгдэгчийн гэм буруугаа хүлээн зөвшөөрч мэдүүлсэн мэдүүлгээс гадна хохирогч Б.*******, гэрч Х.*******, шинжээж эмч А.Болор-Эрдэнэ нарын мэдүүлэг, хохирогч Б.*******ад үзлэг хийсэн эмчийн үзлэгийн тэмдэглэл, Сүхбаатар аймаг дахь Шүүх шинжилгээний хэлтсийн 2024 оны 02 дугаар сарын 07-ны өдөр 63 дугаартай шинжээчийн дүгнэлт, Сүхбаатар аймгийн Эрүүл мэндийн даатгалын хэлтсийн 2024 оны 03 дугаар сарын 07-ны өдрийн 21/32 дугаартай албан тоот, эмчилгээний зардлын баримт зэрэг нотлох баримтуудаар нотлогдож байна.

Шүүгдэгч нь хэргийн зүйлчлэл, гэм буруугийн талаар маргаагүй, өөрийн гэм бурууг хүлээн зөвшөөрсөн болохыг тэмдэглэх нь зүйтэй.

2. Эрх зүйн дүгнэлт:

2.1. Хүний эрүүл мэндэд хөнгөн хохирол санаатай учруулах гэмт хэрэгт: Бусдын бие махбодод хөнгөн гэмтэл санаатай учруулах нь эрүүл мэндийг түр хугацаагаар сарниулсан буюу хөдөлмөрийн чадварыг бага хэмжээгээр алдагдуулах, эсхүл энэ хоёр үр дагаварт нэгэн зэрэг хүргэж буй үйлдлийг ойлгохоор хуульчилсан.

 Тодруулбал, шүүгдэгч Ч.******* нь мохоо зүйл буюу гараараа хохирогч Б.*******ын нүүр хэсэгт цохиж эрүүл мэндэд хөнгөн гэмтэл учруулж, эрүүл мэндийг түр хугацаагаар сарниулсан нь хор уршиг бүхий гэмт үйлдлийн болон үр дагаврын хоорондох шалтгаант холбоог бүрдүүлж байна.

2.2. Шүүгдэгч Ч.******* нь өөрийн үйлдлийн хууль бус шинжтэй болохыг ухамсарлаж мэдсээр байж, согтууруулах ундаа хэрэглэсэн үедээ хохирогч Б.*******ын биед халдаж эрүүл мэндэд нь “биед тархи доргилт, баруун нүдний алимны доргилт, дээд доод зовхинд цус хуралт, дээд уруулын зөөлөн эдийн няцрал” бүхий хөнгөн хохирол санаатай учруулсан гэмт хэргийг гэм буруугийн шууд санаатай хэлбэрээр үйлдсэн гэж үзэх үндэслэлтэй байна.

2.3. Прокуророос шүүгдэгч Ч.*******ын дээрх үйлдлийг Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдсэн нь хэргийн бодит байдалд нийцсэн, шүүгдэгчийн үйлдэл тухайн гэмт хэргийн бүрэлдэхүүний шинжийг бүрэн агуулсан, хэргийн зүйлчлэл зөв байх тул “бусдын эрүүл мэндэд хөнгөн хохирол санаатай учруулсан” гэмт хэрэг үйлдсэн гэм буруутайд тооцох үндэслэлтэй гэж шүүх дүгнэлээ.

3. Эрүүгийн хариуцлагын талаар:

3.1. Шүүхээс шүүгдэгч Ч.*******ыг “хүний эрүүл мэндэд хөнгөн хохирол санаатай учруулсан” буюу Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг үйлдсэн гэм буруутайд тооцсон тул Эрүүгийн хуулийн ерөнхий ангийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ” гэж зааснаар эрүүгийн хариуцлага хүлээлгэх үндэслэлтэй байна.

Шүүгдэгч Ч.*******т эрүүгийн хариуцлага хүлээлгэхэд Эрүүгийн хуулийн ерөнхий ангийн 6.5 дугаар зүйлд заасан “эрүүгийн хариуцлагыг хөнгөрүүлэх”, 6.6 дугаар зүйлд заасан “эрүүгийн хариуцлагыг хүндрүүлэх” нөхцөл байдал тогтоогдоогүй болно.

3.2. Шүүгдэгч Ч.*******ын холбогдсон Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг нь “дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял” шийтгэхээр хуульчилсан гэмт хэрэг бөгөөд шүүгдэгчид оногдуулах эрүүгийн хариуцлагын талаар улсын яллагч шүүхийн хэлэлцүүлэгт:

“Шүүгдэгч Ч.*******т эрүүгийн хариуцлага хүлээлгэхэд Эрүүгийн хуулийн ерөнхий ангид заасан эрүүгийн хариуцлагыг хөнгөрүүлэх болон хүндрүүлэх нөхцөл байдал тогтоогдохгүй байна. Шүүгдэгч Ч.*******ын хувийн байдал анх удаа хөнгөн хэрэгт холбогдсон, гэм буруугаа сайн дураараа хүлээн зөвшөөрсөн, мөрдөн шалгах ажиллагааны явцад үнэн зөв мэдүүлэг өгч гэмт хэргийг нотлоход дэмжлэг үзүүлсэн зэргийг харгалзан Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 630 нэгжтэй тэнцэх хэмжээний буюу 630,000 төгрөгөөр торгох ял оногдуулах саналтай байна. Хохирогч мөрдөн шалгах ажиллагааны үед хохирол нэхэмжилсэн баримт гаргаж өгөөгүй, шүүгдэгчийг цагдан хориогүй, баривчлаагүй тул эдлэх ялд оруулан тооцох саналгүй. Шүүгдэгчээс гаргуулах хэрэг хянан шийдвэрлэх ажиллагааны зардалгүй, шүүгдэгчид прокурорын шатанд урьд авсан хувийн баталгаа гаргах таслан сэргийлэх арга хэмжээг шийтгэх тогтоол хүчин төгөлдөр болтол хэвээр үргэлжлүүлэх” гэх санал, дүгнэлтийг гаргаж мэтгэлцэв.

3.3. Шүүгдэгч Ч.******* нь Эрүүгийн хуулийн ерөнхий ангийн 2.6 дугаар зүйлийн 2 дахь хэсэгт заасан “хөнгөн” ангиллын гэмт хэрэгт холбогдсон, тохиолдлын шинжтэй нөхцөл байдлын улмаас анх удаа гэмт хэрэг үйлдсэн, үйлдсэн гэмт хэрэгт оногдуулах ялыг хүндрүүлэх нөхцөл байдал тогтоогдоогүй зэргийг харгалзан 600 нэгжтэй тэнцэх хэмжээний буюу 600,000 төгрөгийн торгох ялаар шийтгэж,  түүний цалин хөлс, бусад орлого олох боломж, торгуулийн хэмжээ зэргийг харгалзан дээрх ялыг 90 хоногийн хугацаанд хэсэгчлэн төлөхөөр тогтоов.

4. Хохирол, хор уршгийн талаар

4.1. Эрүүгийн хуулийн 2.5 дугаар зүйлийн 1 дэх хэсэгт “Энэ хуулийн тусгай ангид заасан гэмт хэргийн улмаас хүний амь нас, эрүүл мэнд, эд хөрөнгө, бусад эрх, эрх чөлөө, нийтийн болон үндэсний ашиг сонирхол, аюулгүй байдалд шууд учирсан үр дагаврыг гэмт хэргийн хохиролд тооцно.” гэж заасан бөгөөд хохирогч Б.******* нь гэмт хэргийн улмаас учирсан гэм хор, сэтгэл санааны хохиролтой холбоотой нэхэмжлэл гаргаагүй, “...Надад гаргах нэхэмжлэл зүйл, гомдол байхгүй.” (хх 66) гэснийг дурдах нь зүйтэй.

Хохирогч энэ гэмт хэргийн улмаас учирсан хохирол, хор уршигтай холбоотой зардлын нотлох баримтаа бүрдүүлж, иргэний хэрэг шүүхэд хянан шийдвэрлэх журмаар нэхэмжлэх эрхийг нээлттэй орхих нь зүйтэй гэж үзлээ.

4.2. Хохирогч Б.******* нь өөрт учирсан гэмтэлтэй холбоотойгоор эмнэлгээс 115,000 төгрөгийн тусламж үйлчилгээ авсан бөгөөд Эрүүл мэндийн даатгалын тухай хуулийн 12.1 дүгээр зүйлийн 12.1.1-т “гэмт хэрэг, зөрчлийн улмаас эрүүл мэнд нь хохирсон даатгуулагчийн эрүүл мэндийн тусламж, үйлчилгээний зардлын төлбөрийг холбогдох хууль хяналтын байгууллага хариуцан буруутай этгээдээр эрүүл мэндийн даатгалын байгууллагад нөхөн төлүүлнэ” гэж зааснаар Сүхбаатар аймгийн Эрүүл мэндийн даатгалын хэлтсээс нэхэмжилсэн хохирогч Б.*******ын эмчилгээний төлбөр 115,000 төгрөгийг шүүгдэгч Ч.*******аас гаргуулж, Эрүүл мэндийн даатгалын санд нөхөн төлүүлэх нь зүйтэй.

5. Бусад асуудлаар:

Энэ хэрэгт битүүмжлэгдсэн эд зүйлгүй, иргэний бичиг баримтыг эх хувиар нь хавсаргаж ирүүлээгүй, хэрэг хянан шийдвэрлэх ажиллагааны зардалгүй, шүүхийн шатанд түүнд таслан сэргийлэх арга хэмжээ авагдаагүй болно.

Монгол Улсын Эрүүгийн хэрэг хянан шийдвэрлэх тухай хуулийн 36 дугаар бүлгийн 36.2, 36.3, 36.5, 36.8, 36.10 дугаар зүйлүүдэд заасныг тус тус удирдлага болгон ТОГТООХ нь:

1. Шүүгдэгч Жамц овогт Чулуунбаатарын *******ыг “хүний эрүүл мэндэд хөнгөн хохирол санаатай учруулсан” буюу Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг үйлдсэн гэм буруутайд тооцсугай.

2. Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч Чулуунбаатарын *******ыг 600 (зургаан зуу) нэгжтэй тэнцэх хэмжээний буюу 600 (зургаан зуун мянга) төгрөгөөр торгох ялаар шийтгэсүгэй.

3. Эрүүгийн хуулийн ерөнхий ангийн 5.3 дугаар зүйлийн 4 дэх хэсэгт заасныг баримтлан шүүгдэгч Ч.*******т оногдуулсан торгох ялыг 90 (ер) хоногийн хугацаанд хэсэгчлэн төлөхөөр тогтоосугай.

4. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар шүүгдэгч Ч.******* торгох ялыг шүүхээс тогтоосон хугацаанд биелүүлээгүй тохиолдолд шүүх биелэгдээгүй торгох ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солихыг мэдэгдсүгэй.

5. Шүүгдэгч Ч.*******т шүүхийн шатанд таслан сэргийлэх арга хэмжээ авагдаагүй болохыг дурдсугай.

6. Шүүгдэгч Ч.******* нь энэ хэргийн улмаас цагдан хоригдоогүй, хэрэгт битүүмжлэгдсэн хөрөнгөгүй, шүүгдэгчээс гаргуулах хэрэг хянан шийдвэрлэх ажиллагааны зардалгүй, хохирогч Б.******* гомдолгүй, нэхэмжлэх зүйлгүй гэснийг дурдсугай. 

7. Иргэний хуулийн 497 дугаар зүйлийн 497.1, Эрүүл мэндийн даатгалын тухай хуулийн 12.1 дүгээр зүйлийн 12.1.1 дэх хэсэгт зааснаар шүүгдэгч Ч.*******аас 115,500 (нэг зуун арван таван мянга таван зуу) төгрөгийг гаргуулж Сүхбаатар аймгийн Эрүүл мэндийн даатгалын санд олгосугай.

8. Хохирогч Б.******* нь гэмт хэргийн улмаас учирсан хохирол, хор уршигтай холбоотой зардлаа нотлох баримтаа бүрдүүлж, иргэний хэрэг шүүхэд хянан шийдвэрлэх журмаар нэхэмжлэх эрхтэй болохыг дурдсугай.

9. Шийтгэх тогтоол уншиж сонсгосноор хүчинтэй болохыг мэдэгдсүгэй.

10. Шүүгдэгч, хохирогч, түүний хууль ёсны төлөөлөгч, тэдгээрийн өмгөөлөгч, улсын яллагч, дээд шатны прокурор шийтгэх тогтоолыг эс зөвшөөрвөл гардан авсан болон хүргүүлснээс хойш 14 хоногийн дотор Сүхбаатар аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах, эсэргүүцэл бичих эрхтэй болохыг дурдсугай.

11. Эрүүгийн хэрэг хянан шийдвэрлэх тухай хуулийн 37.1 дүгээр зүйлийн 2 дахь хэсэгт зааснаар энэ тогтоолд давж заалдах гомдол, эсэргүүцэл гаргасан тохиолдолд тогтоолын биелэлтийг түдгэлзүүлсүгэй.

 

ДАРГАЛАГЧ ШҮҮГЧ                                Д.АЛТАННАВЧ