МОНГОЛ УЛСЫН НЭРИЙН ӨМНӨӨС

 

Булган аймаг дахь Захиргааны хэргийн анхан шатны шүүхийн Ерөнхий шүүгч Б.Мөнхжаргал даргалж тус шүүхийн хуралдааны танхимд нээлттэй хийсэн шүүх хуралдаанаар

            Нэхэмжлэгч: Борнууд овгийн Лхагвасүрэнгийн Нарантунгалаг,

            Нэхэмжлэгчийн итгэмжлэгдсэн төлөөлөгч: Ч.Амарбаяр,

            Хариуцагч: Булган аймгийн Улсын бүртгэлийн хэлтэс,

Хариуцагчийн итгэмжлэгдсэн төлөөлөгч: А.Раднаабаяр,

Гуравдагч этгээд П.Эрдэнэбат нарын хоорондын ““Шинэ Амжилт” ХХК-ийн дүрэм, дүрмийн дагуу томилогдсон гүйцэтгэх захирлын бүртгэл, хуулийн этгээдийн мэдээлэлд орсон өөрчлөлтийн улсын бүртгэлийг илт хууль бус болохыг тогтоолгох” шаардлагатай маргааныг хянан хэлэлцэв.

            Шүүх хуралдаанд нэхэмжлэгчийн итгэмжлэгдсэн төлөөлөгч Ч.Амарбаяр, итгэмжлэгдсэн төлөөлөгчийн өмгөөлөгч Б.Энхболд, хариуцагчийн итгэмжлэгдсэн төлөөлөгч А.Раднаабаяр, гуравдагч этгээд П.Эрдэнэбат, шүүх хуралдааны нарийн бичгийн дарга М.Сувд-Эрдэнэ нар оролцов.

ТОДОРХОЙЛОХ нь:

1. Нэхэмжлэгч Л.Нарантунгалагийн итгэмжлэгдсэн төлөөлөгч Ч.Амарбаяр нь Булган аймгийн Улсын бүртгэлийн хэлтэст холбогдуулан “2020 оны 3 дугаар сарын 22-ны өдрийн “Шинэ Амжилт” ХХК-ийн дүрэм, дүрмийн дагуу томилогдсон гүйцэтгэх захирлын бүртгэл, хуулийн этгээдийн мэдээлэлд орсон өөрчлөлтийн улсын бүртгэлийг илтэд хууль бус болохыг тогтоож, хүчингүй болгуулах” нэхэмжлэлийг гаргасан.

 

2. Булган аймгийн Улсын бүртгэлийн хэлтэс нь 2020 оны 3 дугаар сарын 31-ний өдөр Пүрэвсүрэнгийн Эрдэнэбатыг гүйцэтгэх захирлаар сонгосныг 2105799 дугаарын регистрийн дугаартай “Шинэ Амжилт” ХХКомпанийн улсын бүртгэлийн 411002100 дугаарт бүртгэгдсэн Улсын бүртгэлийн гэрчилгээний Хуулийн этгээдийн үүсгэн байгуулах баримт бичигт оруулсан нэмэлт, өөрчлөлтийн бүртгэлд бүртгэжээ .

 

3. Нэхэмжлэгч талаас маргаан бүхий Хуулийн этгээдийн Улсын бүртгэлд оруулсан өөрчлөлтийн бүртгэлийг илт хууль бусад тооцуулж, хүчингүй болгуулахаар шүүхэд  2022 оны 01 дүгээр сарын 21-ний өдөр нэхэмжлэл гаргасан байна.
4. Нэхэмжлэлийн үндэслэл:
   1. “Шинэ Амжилт” ХХКомпани нь 4 гишүүнтэй хязгаарлагдмал хариуцлагатай компани бөгөөд компанийн гүйцэтгэх захирал ба хувь нийлүүлэгч Пүрэвдорж овогтой Цэрэнбат нь 2019 оны 12 дугаар сарын 30-ны өдөр нас барсан. Хувь нийлүүлэгчийг нас барснаас хойш өв залгамжлалын гэрчилгээ авахаас өмнө компанийн хувь нийлүүлэгчдийн хурлыг хуралдуулан дүрмийг өөрчилсөн,
   2. Компанийн гүйцэтгэх захирлыг томилсон нь өв хүлээн авагчийн эрхийг зөрчсөн илт хууль бус шийдвэр тул дээрх өөрчлөлтийг бүртгэсэн улсын бүртгэл нь Захиргааны ерөнхий хуулийн 47 дугаар зүйлийн 47.1.6-д заасныг зөрчсөн илт хууль бус захиргааны акт гэж тодорхойлсон.
5. Хариуцагч Улсын бүртгэлийн хэлтэс нэхэмжлэлийн шаардлагад холбогдуулан дараах тайлбарыг шүүхэд ирүүлсэн байна. Үүнд:

5.1. “Шинэ Амжилт” ХХК-ийн дүрэм болон гүйцэтгэх захирал томилсон өөрчлөлтийн бүртгэлийг тухайн компанийн хувьцаа эзэмшигчдийн 2020 оны 3 дугаар сарын 22-ны өдрийн хурлын тэмдэглэл, тогтоолыг үндэслэсэн.

 

5.2. Компанийн хувьцаа эзэмшигчдийн бүртгэлд өв залгамжлал болон бусад байдлаар ямар нэгэн өөрчлөлт ороогүй. Иймд нэхэмжлэлийг хүлээн авах боломжгүй гэжээ.  

 

6. Хариуцагчийн итгэмжлэгдсэн төлөөлөгч А.Раднаабаяр хариуцагчийн гаргасан тайлбарыг дэмжиж шүүх хуралдаанд гаргасан тайлбартаа: “Нэхэмжлэгч болон гуравдагч этгээд нарын хооронд өв залгамжлалтай холбоотой, компанийн хувь нийлүүлэгчдийн маргаан байх шиг байна. Энэ маргаанаа дотроо шийдээд шийдэлд хүрэх хэрэгтэй. Манай зүгээс хуульд заасны дагуу хуулийн этгээдийн хувь нийлүүлэгчдийн хуралдаанаас гарсан тэмдэглэл, шийдвэрт нь үндэслэж бүртгэл хийсэн. Тухайн үед хувь нийлүүлэгчид нь гарын үсгээ зурсан хурлын тэмдэглэл ирснийг өөрийн дотоод итгэлээр үнэлээд үнэн зөв гэж үзээд бүртгэл хийсэн байгаа. Ер нь өвлөх эрхийн асуудлаа шийдвэрлэх хэрэгтэй” гэв.    

7. Гуравдагч этгээд П.Эрдэнэбатаас шүүхэд ирүүлсэн тайлбартаа: “Нэхэмжлэгчийн нэхэмжлэлийн шаардлагыг дараах үндэслэлээр хүлээн зөвшөөрөхөөс татгалзаж байна. Үүнд:

7.1. “Шинэ Амжилт” ХХК-ийн өдөр тутмын үйл ажиллагааг тасралтгүй явуулах шаардлагын улмаас хувьцаа эзэмшигчдийн ээлжит бус хурлыг зарлан хуралдуулж, дүрмийн зарим нэг өөрчлөлт болон гүйцэтгэх захирлыг шинээр томилох асуудлыг хэлэлцэж шийдвэрлэсэн.

7.2. Хувьцаа эзэмшигчдийн дээрх хурлаар компанийн хувьцааны эрхтэй холбоотой ямар нэг асуудал шийдвэрлээгүй, мөн компанийн хөрөнгөтэй холбоотой ямар нэг шийдвэр гаргаагүй.

7.3. Гүйцэтгэх захирлыг томилохгүй байх нөхцөлд маш олон төрлийн сөрөг үр дагавар гарч улмаар компанийн хувьцаа эзэмшигчдийн эрх, ашиг сонирхолд муугаар нөлөөлөх байсан учраас гүйцэтгэх захирлыг хугацаа алдахгүй томилох шаардлагатай байсан. Иймд нэхэмжлэлд дурдсан үндэслэлүүд нь нэхэмжлэлийн шаардлагыг хангах үндэслэл болохгүй тул хэрэгсэхгүй болгож өгнө үү” гэжээ.    

8. Нэхэмжлэгчийн итгэмжлэгдсэн төлөөлөгчийн өмгөөлөгч М.Энхболд дүгнэлтдээ: “Өвлөх эрхтэй холбоотой асуудал байгаа. Компанийн хувь нийлүүлэгч Цэрэнбат нас барснаар түүний өв эхнэр Нарантунгалаг, охин Эгшиглэн нарт шилжих ёстой. Энэхүү өвийн асуудал шийдэгдээгүй, өвлөх эрх нээгдээгүй байхад компанийн хувь нийлүүлэгчдийн хурал хийсэн нь хууль бус юм. Хувь, хувьцааны бүртгэл нь улсын бүртгэл дээр хийгдэх ёстой. Хууль ёсоороо хийгдээд явна. Өв нээгдээгүй байхад тухайн хуулийн этгээдийн хувь нийлүүлэгчдийн хуралдааныг хийж, компанийн дүрэм болон гүйцэтгэх захирлыг өөрчилж, улсын бүртгэлд бүртгүүлсэн байгаа. Энэ нь өв залгамжлагч нарын эрхийг зөрчсөн байгаа тул тэдний эрх, ашиг сонирхолд халдах үндэслэл байхгүй байхад захиргааны байгууллагаас бүртгэл хийснийг илт хууль бус болохыг тогтоолгохоор нэхэмжлэл гаргасан. Энэхүү нэхэмжлэлийг дэмжиж байгаа ”гэв.

ҮНДЭСЛЭХ нь:

1. Нэхэмжлэгч Л.Нарантунгалагийн итгэмжлэгдсэн төлөөлөгч Ч.Амарбаяраас Булган аймгийн Улсын бүртгэлийн хэлтэст холбогдуулан “2020 оны 3 дугаар сарын 22-ны өдрийн “Шинэ Амжилт” ХХК-ийн дүрэм, дүрмийн дагуу томилогдсон гүйцэтгэх захирлын бүртгэл, хуулийн этгээдийн мэдээлэлд орсон өөрчлөлтийн улсын бүртгэлийг илтэд хууль бус болохыг тогтоож, хүчингүй болгуулах”-ыг хүссэн шаардлага бүхий нэхэмжлэлийг гаргасан бөгөөд дээрх нэхэмжлэлээр захиргааны хэрэг үүсгэн, хэрэг хянан шийдвэрлэх ажиллагаа явуулж, нэхэмжлэгч тал шүүх хуралдаанд нэхэмжлэлийн шаардлагаа ““Шинэ Амжилт” ХХК-ийн дүрэм, дүрмийн дагуу томилогдсон гүйцэтгэх захирлын бүртгэл, хуулийн этгээдийн мэдээлэлд орсон өөрчлөлтийн улсын бүртгэлийг илт хууль бус болохыг тогтоолгох” гэж өөрчилсөн байна. 

2. Нэхэмжлэлийн шаардлагын хүрээнд иргэн П.Эрдэнэбатын хууль ёсны эрх, ашиг сонирхол хөндөгдөж болзошгүй гэж үзэн 2022 оны 02 дугаар сарын 09-ний өдрийн 32 дугаартай захирамжаар түүнийг бие даасан шаардлага гаргаагүй гуравдагч этгээдээр татаж, хэрэг хянан шийдвэрлэх ажиллагаанд оролцуулжээ.

3. Нэхэмжлэгч талаас нэхэмжлэлийн шаардлага үндэслэлээ “”Шинэ Амжилт” ХХКомпанийн хувь нийлүүлэгч П.Цэрэнбатын өв өвлөх эрх бүхий этгээдэд шилжээгүй, өв нээгдээгүй байхад хувь нийлүүлэгчдийн хурлыг хийсэн нь өвлөгчийн эрхийг зөрчсөн, энэхүү хууль бус хурлын шийдвэрт үндэслэж, хуулийн этгээдийн мэдээлэлд орсон өөрчлөлтийг бүртгэсэн нь Захиргааны ерөнхий хуулийн 47 дугаар зүйлийн 47.1.6-д заасныг зөрчсөн” гэж;

4. Хариуцагч талаас “хуулийн этгээдийн мэдээлэлд өөрчлөлт оруулах өргөдөл болон холбогдох материалыг хуульд заасны дагуу Улсын бүртгэлийн хэлтэст ирүүлснийг хүлээн авч бүртгэл хийсэн. Хувь нийлүүлэгчдийн хурлаас гарсан шийдвэр, хурлын тэмдэглэлд хувь нийлүүлэгчид гарын үсгээ зурж, тамга тэмдэг дарж баталгаажуулсан байсан” гэж;

5. Гуравдагч этгээдийн талаас “өв залгамжлагчийн эрх, ашиг сонирхол зөрчигдөөгүй. Хувь нийлүүлэгчдийн хуралдааныг хийх зайлшгүй нөхцөл үүссэн учраас хурлаа хийж, асуудлыг шийдвэрлэсэн байгаа. Өв нээгдэх хүртэл тухайн асуудлыг шийдвэрлэхгүй байх нь эрсдэлтэй, компани дампуурах нөхцөл байсан учраас нэхэмжлэгч Л.Нарантунгалаг өөрөө хуралд оролцож, асуудлыг шийдвэрлэсэн” гэж тус тус маргажээ.

6. “Шинэ Амжилт” ХХКомпани нь 2020 оны 3 дугаар сарын 22-ны өдөр хувь нийлүүлэгчдийн хуралдааныг хийж, уг хурлаар компанийн дүрэм болон гүйцэтгэх захирлыг шинээр томилж, хуулийн этгээдийн бүртгэлд өөрчлөлт оруулахаар шийдвэрлэсэн 01 дугаартай шийдвэрийг /ХХ-ийн 182 дугаар тал/, хурлын тэмдэглэлийн /ХХ-ийн 183-185 дугаар тал/ хамт улсын бүртгэлийн байгууллагад хүргүүлснээр хуулийн этгээдийн өөрчлөлтийн улсын бүртгэл хийгдсэн байна.

7. Нэхэмжлэгчийн шүүхэд гаргасан нэхэмжлэлийг бүхэлд нь хэрэгсэхгүй болгож шийдвэрлэх үндэслэлтэй байна.

8. 1992 оны 3 дугаар сарын 30-ны өдрийн Булган аймгийн Ардын хурлын гүйцэтгэх захиргааны өмч хувьчлалын комиссын 28 дугаартай тогтоолоор Тэшиг сумын “Шинэ-Амьдрал” нэгдлийг “Шинэ-Амьдрал” нэртэй хувьцаат компани болгох шийдвэр /хх-ийн 88 дугаар тал/ гарч, үүсгэн байгуулагчдын гэрээг хийж, улсын бүртгэлд бүртгүүлж, улсын бүртгэлийн 55 дугаартай гэрчилгээг /хх-ийн 106 дугаар тал/  авч баталгаажуулан үйл ажиллагааг эхлүүлжээ. 1993 оны 12 дугаар сарын 25-ны өдрийн бүх гишүүдийн хурлаар хувьцаат компанийг татан буулгаж, “Шинэ-Амьдрал” ББХКомпани болгон өөрчилхөөр шийдвэрлэсэн байна. /хх-ийн 108 дугаар тал/

 Улмаар 1996 оны 4 дүгээр сарын 18-ны өдрийн бүх гишүүдийн хурлаар нэрийг “Шинэ Амжилт” болгон, хэлбэрийг бүрэн бус хариуцлагатай компаниас хязгаарлагдмал хариуцлагатай компани болгон өөрчилж, дүрмээ батлан, улсын бүртгэлд бүртгүүлэхээр хүсэлт /хх-ийн 138 дугаар тал/ гарган, 1996 оны 5 дугаар сарын 07-ны өдөр улсын бүртгэлд шинэчлэн бүртгүүлсэн байна.

9. Хариуцагч Улсын бүртгэлийн хэлтэст хадгалагдаж байгаа хуулийн этгээдийн улсын бүртгэлийн хувийн хэрэгт авагдсан 1998 оны 8 дугаар сарын 14-ны өдрийн улсын бүртгэлийн гэрчилгээнд /хх-ийн 164 дүгээр тал/ Пүрэвдоржийн Цэрэнбат нь “Шинэ-Амжилт” ХХКомпанийн гүйцэтгэх удирдлага гэж бүртгэгджээ. “Шинэ Амжилт” ХХКомпани нь Дамдинсүрэнгийн Цэен-Ойдов, Лхагвасүрэнгийн Нарантунгалаг, Пүрэвдоржийн Цэрэнбат, Пүрэвсүрэнгийн Эрдэнэбат гэх 4 хувь нийлүүлэгчтэй /хх-ийн 189 дүгээр тал/  байсан байх ба хувь нийлүүлэгч, гүйцэтгэх захирал П.Цэрэнбат нь 2019 оны 12 дугаар сарын 30-ны өдөр өвчний улмаас нас барж, “Шинэ-Амжилт” ХХКомпаний бусад хувь нийлүүлэгчид 2020 оны 3 дугаар сарын 22-ны өдөр хувь нийлүүлэгчдийн хуралдааныг хийж, уг хурлаар компанийн дүрэмд өөрчлөлт оруулан, гүйцэтгэх захирлыг санал нэгтэйгээр сонгож, шийдвэрт гарын үсгээ зурж баталгаажуулсан байна. Энэхүү хувь нийлүүлэгчдийн хуралдаанаас гарсан шийдвэрийг улсын бүртгэлийн байгууллагад хүргүүлснээр маргаан бүхий өөрчлөлтийг бүртгэх ажиллагаа хийгдсэн нь хувийн хэрэгт авагдсан “Шинэ-Амжилт” ХХК-ийн хувь нийлүүлэгчдийн хурлын 01 дугаартай шийдвэр /хх-ийн 182 дугаар тал/, хурлын тэмдэглэл /хх-ийн 183-185 дугаар тал/ зэргээр нотлогдож байна.

 

10. Хариуцагч Улсын бүртгэлийн хэлтсийн хуулийн этгээдийн улсын бүртгэгчээс хуулийн этгээдийн өөрчлөлтийг бүртгэсэн үйл ажиллагаа нь Захиргааны ерөнхий хуулийн 37 дугаар  зүйлд заасан захиргааны акт ба уг маргаан бүхий бүртгэлийн үйл ажиллагааг нэхэмжлэгч талаас хуулийн 47 дугаар зүйлд заасан захиргааны илт хууль бус акт гэж маргажээ. Захиргааны Ерөнхий хуулийн 47 дугаар зүйлийн 47.1.6-д “иргэн, хуулийн этгээдийн эрх, хууль ёсны ашиг сонирхолд халдах хуульд заасан үндэслэл байгаагүй бол захиргааны акт илт хууль бус болно” гэсэн байх ба дээрх бүртгэлийн үйл ажиллагаа нь “Шинэ-Амжилт” ХХКомпанийн хувьцаа эзэмшигч нарын эрх ашигт сөргөөр нөлөөлөх захиргааны акт гэдэг нь тогтоогдохгүй байна. Өөрөөр хэлбэл 2020 оны 3 дугаар сарын 22-ны өдрийн хурлаар баталсан “Шинэ Амжилт” ХХКомпанийн дүрэмд компанийн үүсгэн байгуулагч болон хувьцаа эзэмшигч нарын мэдээлэлд өөрчлөлт оруулаагүй, мөн хувь нийлүүлэгч нарын эзэмшиж буй хувьцааны үнэ, хэмжээнд өөрчлөлт оруулаагүй бөгөөд тухайн өдрийн хувь нийлүүлэгчдийн хурлаас гарсан шийдвэр болон хурлын тэмдэглэлд хувь нийлүүлэгч Д.Цэен-Ойдовоос П.Эрдэнэбатад олгосон итгэмжлэлийн дагуу, Л.Нарантунгалаг, П.Эрдэнэбат нар биечлэн оролцож гарын үсгээ зурсан байх ба энэхүү шийдвэр болон тэмдэглэлийн талаар нэхэмжлэгч, гуравдагч этгээд нараас маргаан үүсгээгүй зэргээс харахад бүртгэл нь “Шинэ Амжилт” ХХКомпанийн хувь нийлүүлэгч, хувьцаа эзэмшигч нарын эрх, ашиг сонирхлыг хөндөөгүй гэж дүгнэлээ. 

 

11. Нэхэмжлэгч талаас улсын бүртгэлийн байгууллагын бүртгэлийн үйл ажиллагаа нь хувь нийлүүлэгч П.Цэрэнбатын охин Ц.Эгшиглэн болон эхнэр Л.Нарантунгалаг нарын өв нээгдээгүй байхад хийгдсэн бүртгэл тул илт хууль бус гэж маргаж байгаа боловч бүртгэл хийлгэхээр ирүүлсэн хувь нийлүүлэгчдийн хурлын шийдвэр, хуралдааны тэмдэглэлээс харахад хувь нийлүүлэгч П.Цэрэнбатын “Шинэ Амжилт” ХХК-д эзэмшдэг хувьцааны үнэ, хэмжээ, тоо ширхэгт өөрчлөлт ороогүй байна. Компанийн дүрэм болон гүйцэтгэх захирал сонгосныг бүртгэсэн бүртгэл хийгдсэнээр хувь нийлүүлэгч асан П.Цэрэнбатын эзэмшиж байсан хувьцаа, эд хөрөнгө нь өв залгамжлалын дагуу өв хүлээн авагчид шилжихэд өөрчлөгдөхгүй, өв хүлээн авагчийн өвлөх эрхтэй хөрөнгөнд ямар нэг байдлаар өөрчлөлт орохгүй юм. Иймд улсын бүртгэлийн байгууллагаас хийгдсэн маргаан бүхий бүртгэл нь нэхэмжлэгч Л.Нарантунгалаг болон охин Ц.Эгшиглэн нарын өв залгамжлалаар хүлээн авах өв болон тухайн өвтэй холбоотой эдлэх эрх, ашиг сонирхолд харшлах үндэслэл тогтоогдохгүй байна.

 

12. Улсын бүртгэлийн ерөнхий хуулийн 4 дүгээр  зүйлд улсын бүртгэл хийхэд баримтлах зарчмыг хуульчилж, 4.1.5-д “нотлох баримтад үндэслэж, хуульд заасан журмын дагуу хөтлөх” гэж заасан байх ба 7 дугаар зүйлийн 7.1-д “Хуулийн этгээдийн улсын бүртгэл дараах төрөлтэй байна” гээд 7.1.3-т “хуулийн этгээдийн мэдээлэлд орсон өөрчлөлтийн бүртгэл” гэж заасны дагуу улсын бүртгэлийн байгууллага нь хүсэлт гаргагчийн ирүүлсэн баримт бичигт үндэслэн хуульд заасан бүртгэлийг хийх учиртай.  Хуулийн этгээдийн улсын бүртгэлийн тухай хуулийн 22 дугаар зүйлийн 22.1-д “Хуулийн этгээдийн мэдээлэлд оруулсан өөрчлөлтийг улсын бүртгэлд бүртгүүлэхэд дараах баримт бичгийг бүрдүүлнэ: “ гээд хэд хэдэн баримт бичгийг бүрдүүлэхээр шаардсан байх ба 22.1.3-т “үүсгэн байгуулах баримт бичигт өөрчлөлт оруулах тухай үүсгэн байгуулагч, эрх бүхий байгууллагын шийдвэр /тогтоол/, хурлын тэмдэглэл” ... гэжээ. Дээрх хуулийн заалтуудаас харахад хуулийн этгээдийн мэдээлэлд оруулсан өөрчлөлтийг хийхэд гол үндэслэл болгох баримт бичиг нь үүсгэн байгуулагч буюу хувь нийлүүлэгчдийн хурлаас гарсан шийдвэр, хурлын тэмдэглэл байхаар заажээ. Хүсэлт гаргагчаас бүртгэлийн байгууллагад хувь нийлүүлэгчдийн хурлын тэмдэглэл, хурлаас гаргасан шийдвэрийг хавсарган хүсэлтээ гаргасны дагуу Улсын бүртгэлийн байгууллага нь бүртгэл хийсэн байх бөгөөд энэхүү бүртгэлийг хийхдээ хэн нэгний эрх, ашиг сонирхлыг хөндөж, үндэслэлгүйгээр, хуульд заасан зарчим болон хуулиар тавигдах шаардлагыг зөрчин бүртгэл хийсэн гэж улсын бүртгэгчийг буруутгах нөхцөл байдал тогтоогдохгүй байна.  

   

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.3.14 дэх хэсэгт заасныг удирдлага болгон

ТОГТООХ нь:

1. Захиргааны ерөнхий хуулийн 37 дугаар зүйлийн 37.1, 47 дугаар зүйлийн 47.1.6, Улсын бүртгэлийн Ерөнхий хуулийн 4 дүгээр зүйлийн 4.1.5, 7 дугаар зүйлийн 7.1.3, Хуулийн этгээдийн улсын бүртгэлийн тухай хуулийн 22 дугаар зүйлийн 22.1-д заасныг тус тус баримтлан нэхэмжлэгч Л.Нарантунгалагийн итгэмжлэгдсэн төлөөлөгч Ч.Амарбаяраас Булган аймгийн Улсын бүртгэлийн хэлтэст холбогдуулан гаргасан ““Шинэ Амжилт” ХХК-ийн дүрэм, дүрмийн дагуу томилогдсон гүйцэтгэх захирлын бүртгэл, хуулийн этгээдийн мэдээлэлд орсон өөрчлөлтийг бүртгэсэн улсын бүртгэлийг илт хууль бус болохыг тогтоолгох”-ыг хүссэн нэхэмжлэлийн шаардлагыг бүхэлд нь хэрэгсэхгүй болгосугай.

 

 

2. Захиргааны хэрэг шүүхэд хянан шийдвэрлэх тухай хуулийн 48 дугаар зүйлийн 48.1-д зааснаар нэхэмжлэгчээс улсын тэмдэгтийн хураамжид урьдчилан төлсөн 70200 /далан мянга хоёр зуун/ төгрөгийг улсын орлогод хэвээр үлдээсүгэй.   

Захиргааны хэрэг шүүхэд хянан шийдвэрлэх тухай хуулийн 114 дүгээр зүйлийн 114.1-д заасны дагуу нэхэмжлэгч, хариуцагч, гуравдагч этгээд, тэдгээрийн төлөөлөгч, өмгөөлөгч шийдвэрийг эс зөвшөөрвөл шүүхийн шийдвэрийг гардан авсан өдрөөс хойш 14 хоногийн дотор Захиргааны хэргийн давж заалдах шатны шүүхэд давж заалдах журмаар гомдол гаргах эрхтэй.

 

 

 

     ДАРГАЛАГЧ, ЕРӨНХИЙ ШҮҮГЧ                           Б.МӨНХЖАРГАЛ