МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь сум дундын эрүүгийн хэргийн анхан шатны шүүхийн шүүх хуралдааныг шүүгч Н.Нямсүрэн даргалж,

Нарийн бичгийн дарга П.Ундрах,

Улсын яллагч Д.Оюунбилэг,

Хохирогч Б.Н-,

Шүүгдэгч С.Б- нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Аймгийн прокурорын газраас Эрүүгийн хуулийн тусгай ангийн 99 дүгээр зүйлийн 99.1-д зааснаар яллагдагчаар татах тогтоол баталж ирүүлсэн С.Б-д холбогдох эрүүгийн 201722000164 дугаартай хэргийг 2017 оны 04 дүгээр сарын 19-ний өдөр хүлээн авч хянан хэлэлцэв.

Шүүгдэгч: Монгол Улсын иргэн, С.Б-,

Шүүгдэгч С.Б- нь 2017 оны 03 дугаар сарын 15-ны өдөр Б.Н-ийн эрүүг хутгаар зүсч бие махбодид нь хөнгөн гэмтэл санаатай учруулсан гэмт хэргийг үйлдсэнд холбогджээ.

Шүүхийн хэлэлцүүлгээр яллах, цагаатгах болон бусад нотлох баримтуудыг шинжлэн судлаад

ТОДОРХОЙЛОХ нь:

Шүүгдэгч С.Б- нь 2017 оны 03 дугаар сарын 15-ны өдөр Хөвсгөл аймгийн Мөрөн сумын 13 дугаар багийн 54-17 тоот өөрийн гэртээ Б.Н-той маргалдаж, түүний эрүүг хутгаар зүсч бие махбодид нь эрүүнд зүсэгдсэн шарх, зөөлөн эдийн няцрал бүхий хөнгөн гэмтэл санаатай учруулсан гэмт хэргийг үйлдсэн болох нь:

Шүүгдэгч С.Б-ын хэрэг бүртгэлтийн болон шүүхийн хэлэлцүүлгийн шатанд өгсөн: 2016 оны 08-р сард би дүү Б.Н-оос Мустанг маркийн мотоциклийг нь хөдөө явна гэж гуйж авсан юм. Тэгээд мотоциклийг Улаан-Уул сумын харьяат Э- гэх залууд өгч явуулсан чинь Э- мотоциклийг нь унагаагаад эвдээд хаячихсан байсан. Тэгэхээр нь Б.Н-ид хүнд өгөөд явуулсан чинь эвдэлчихсэн байна гэж хэлэхэд би эвдэрчихсэн мотоцикль авахгүй мөнгийг нь олж өгөөрэй гэсэн. Тухайн үед хэдэн төгрөг гэдгээ тохиролцоогүй байсан. Тэгээд би Э-г мөнгийг нь өгөөд мотоциклио өөрөө ав би хүнд нь мөнгийг нь өгнө гэж хэлэхэд Э- надад 150.000 төгрөг өгчихөөд бусдыг нь нэхэхээр нь олж өгнө гэж хэлсэн. Түүнээс хойш Э-тэй одоо хүртэл уулзаагүй. Надад олдохгүй байгаа юм. Би Э-гээс авсан мөнгөн дээрээ самар жимсэнд явж мөнгө олоод Б.Н-ид мотоциклийн оронд 400.000 төгрөг өгье гэхэд Б.Н- 1.000.000 төгрөг өг гэхээр нь би өгч чадахгүй, явах газраараа яваад аваарай гэж хэлсэн юм. Түүнээс хойш Б.Н- надтай огт уулзаагүй байж байгаад 2017.03.13-ны өдөр айл цай уулгаад гэртээ байж байтал гаднаас Б.Н- согтуу Гончигоо гэх залуутай гэрт орж ирэхээр нь би Б.Н-ийг гадаа гаргаж уулзаад ах нь мөнгийг нь 2017.03.15-ны орчим өгье хүүхэд гадаадаас мөнгө өгч явуулна гэсэн гээд салсан юм. Тэгээд 2017.03.15-ны үдээс хойш гэртээ унтаж байсан чинь эхнэр дуудаад сэрээхээр нь босоод хартал Ц-, Б.Н- хоёр ирчихсэн сууж байсан. Тэгснээ Б.Н- би мөнгөө авмаар байна гэхээр нь би хүүхэдтэйгээ утсаар ярьж чадаагүй байна гэхэд Ц- эгч би чиний хүүхдийг хоолонд нь хүргэж өгсөн, чи муу ингэж болохгүй, цагдаагийн газар руу хамт явна гэхээр нь би за тэгье гээд хувцсаа өмсөөд цагдаагийн газар руу явах гээд гэрийн гадна гартал Б.Н- би танай гэрийг чинь шатаана гэхээр нь би эргэж гэртээ ороод утсаа аваад гарах гэтэл шургуулганы хажууд хутга харагдахаар нь аваад айлгах санаатай гартал Ц- Б.Н-ийг аваад хашааны хаалган дээр очиж байхаар нь араас нь очоод Б.Н-ийн мөрнөөс татаад хутгаа далайтал Б.Н- надтай барьцалдаж аваад гараараа хутгыг дээш нь саваад эрүүгээ зүсчихсэн юм. Тэгээд тэр хоёр гэрт ороод эхнэрийн утсаар цагдаа дуудна гэхээр нь би зугтаагаад явчихсан юм...гэх мэдүүлэг,

Хохирогч Б.Н-ийн хэрэг бүртгэлтийн болон шүүхийн хэлэлцүүлгийн шатанд өгсөн: 2016 оны 06-р сард би 13-р багт айлын хашаанд мотоциклио тавиад ажил хийж байсан юм. Гэтэл С.Б- намайг байхгүйд гэрт очоод эхнэрт нь энэ манай дүүгийн мотоцикль байна, би хөдөө явж ямаа дөхүүлчихээд аваад ирье гэж хэлээд мотоциклийг аваад явсан байсан. Би араас нь очоод С.Б- ахаа мотоциклио авъя гэтэл ах нь хөдөө явж ямаа авч ирчихээд өгье гэж хэлэхээр нь би за өгчих байх гэж бодоод явсан. Тэгээд би Галт сум руу явж 1 сар орчим болчихоод Мөрөнд ирээд С.Б-тай уулзах гэсэн чинь гэртээ байхгүй байсан. Тэгэхээр нь би хот руу барилгын ажилтай болоод явчихаад 2016 оны 11-р сард ирсэн юм. Тэгээд С.Б-тай уулзахад чиний мотоциклийг хүн унагаагаад сэг болчихсон ах нь мөнгийг нь төлж барагдуулна гэсэн. Тэгээд 2017.03.13-ны өдөр С.Б-ын гэрт очиход хүмүүс цай уулгаж байхаар нь С.Б-ас мөнгөө нэхэхэд 2 хоногийн дараа хүрээд ир 400.000 төгрөг өгье гэхээр нь зөвшөөрөөд явсан. Тэгээд 2017.03.15-ны өдөр эгч Цэдэндамбын хамт С.Б-ын гэрт очсон. Бид хоёрыг гэрт ороход С.Б- орондоо унтаж байсан. Тэгснээ сэрээд босохоор нь эгч Ц- би танай хүүхдийг хоолонд нь хүргэж байхад чи манай дүүгийн мотоциклийг алга болгоод байхдаа яадаг юм гэсэн чинь тэр хоёр хоорондоо маргалдаад байсан. Тэгсэн чинь Ц- эгч цагдаа дуудлага өгнө гэтэл С.Б- босч ирснээ миний цээж рүү өшиглөхөөр нь би С.Б-тай барьцалдаж авсан. Намайг цохихоор нь би С.Б-ын дээр нь дарж унасан. Ц- эгч чи хүн цохиж болохгүй шүү гэхээр нь за гээд би гадаа гарсан. Гэрээс гараад явж байтал С.Б- миний араас гараа атгачихсан хүрээд ирэхээр нь бид хоёр барьцалдаж аваад байж байтал Ц- эгч наадахын чинь гарт нь хутга байна гэхээр нь хартал С.Б- хутгаараа миний эрүүг зүсчихсэн. Тэгээд Ц- эгч цагдаагийн газар руу дуудлага өгсөн..." гэх мэдүүлэг /ХХ-ийн 11-12 дугаар хуудас/,

Гэрч Г.Цэдэндамбын хэрэг бүртгэлтийн шатанд өгсөн: ...2017.03.15-ны өдрийн 15 цагийн орчимд би дүү Б.Н-ийн хамт Мөрөн сумын ... тоотод С.Б-ын гэрт очсон юм. Бид хоёр С.Б-ас мотоциклийн мөнгө авах гэж очсон. С.Б- өөрөө манай дүү Б.Н-ид 400.000 төгрөг ирж ав гэж хэлсэн байсан. Бид хоёрыг гэрт ороход С.Б- гэртээ унтаж байсан. Тэгснээ хөнжлөө сөхөөд сэрээд над руу харсан. Тэгэхээр нь би С.Б-д чи манай дүүг дуудсан байна. Мотоцикль нь хаана байна, мөнгийг нь авахгүй чи хэд хоногийн өмнө надтай уулзаад мотоцикль нь байгаа гэж хэлж байсан, мотоциклийг нь авъя гэтэл С.Б- тэр мотоцикль нь одоо сэг болчихсон, би Б.Н-ид 400.000 төгрөг өгнө гэж тохирсон гэхээр нь миний дургүй хүрээд би чиний охиныг хоолонд нь хүргэж өгсөн. Төрийн сангийн зээлээр сургаж тус болж байхад чи миний ядарч яваа дүүгийн эд хөрөнгийг авч алга хийдэг хэн юм гэж хэлэхэд С.Б- уурлаад орноосоо босож ирээд Б.Н-ийн аав, ээж ирээгүй байхад та юу юм, та бос гар гэж хөөсөн. С.Б- босч ирээд хувцсаа өмсөөд бид хоёр хоорондоо маргалдсан. Тэгэхээр нь цагдаа дуудлаа гээд цагдаа руу залгаад дуудлага өгөх гэтэл С.Б- Б.Н-ийн алцаа руу нь өшиглөсөн. Тэгсэн чинь С.Б-, Б.Н- хоёр хоорондоо ноцолдсон, эхнэр нь гараад явсан. Тэр хоёр барилцаж аваад маргалдаад байсан. Тэгэхээр нь Б.Н-ийг аваад гадаа гарсан. Би Б.Н-ийг аваад хашаанаас гарах гээд явж байтал С.Б- гартаа хар өнгийн иштэй балиус хутга барчихсан явж байхаар нь наадах чинь хутгатай байна, Б.Н-оо гэж хэлсэн чинь Б.Н-, С.Б- хоёр татаж чангаалцаад байснаа С.Б- хутгаад далайж байснаа нэг мэдсэн чинь Б.Н-ийг эрүүнээс цус гоожчихсон. Бид хоёр С.Б-ын хашаанаас гараад Б.Н-ийн ах Лхамсүрэнг болон цагдаа дуудсан...гэх мэдүүлэг /хх-ийн 15-17 дугаар хуудас/,

Гэрч Д.Т.н хэрэг бүртгэлтийн шатанд өгсөн: 2017.03.15-ны өдрийн 15 цагийн орчимд гэртээ байж байтал гаднаас Б.Н- орж ирээд С.Б- ахтай уулзана гэхээр нь би С.Б- унтаж байна, битгий сэрээгээрэй гэхэд Б.Н- миний утсыг аваад хүнтэй утсаар яриад байсан. С.Б- сэрээд орноос босоход  Ц- би чиний хүүхдийг сургуульд сургаж хоолонд нь хүргэж өгсөн. Чи намайг тэглээ гэж миний дүүгийн эд хөрөнгийг авч  байгаа юм уу гээд С.Б- тэр хоёр хоорондоо маргалдсан. Тэгсэн чинь Ц- би цагдаа дуудна, гурвуулаа цагдаа дээр очно гэсэн чинь С.Б- босч ирээд Б.Н- тэр хоёр хоорондоо барьцалдаж аваад байхаар нь би гэрээс гараад явсан. Гадаа гараад байж байтал Б.Н-, С.Б- нар гэрээс гарч ирээд хоорондоо маргалдаад байснаа Б.Н- нохойны сав барьж аваад С.Б-ыг цохих шиг болсон. С.Б-ын завжнаас нь цус гарчихсан байсан. Тэгсэн чинь Ц- чи энэ нөхрөө ав гээд байсан. Нэг харсан чинь Б.Н-ийн эрүүнээс цус гарчихсан байсан...гэх мэдүүлэг /хх-ийн 13-14 дүгээр хуудас/,

Хөвсгөл аймгийн Шүүхийн шинжилгээний албаны 2017 оны 03 дугаар сарын 21-ний өдрийн 194 дугаартай дүгнэлтэнд:

1. Б.Н-ийн биед гэмтэл тогтоогдлоо.

2. Б.Н-ийн биед зүүн эрүүнд зүсэгдсэн шарх, зөөлөн эдийн няцрал бүхий гэмтэл тогтоогдлоо.

3. Дээрх гэмтэл нь ир ирмэгтэй зүйлийн 2 удаагийн үйлчлэлээр үүсгэгдэнэ.

4. Дээрх гэмтэл нь хэрэг учрал болсон гэх хугацаанд үүсгэгдсэн байна.

5. Дээрх гэмтэл нь ШЭГЗТЖ-ын 2.4.1-д зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна.

6. Цаашид хөдөлмөрийн чадвар алдангид нөлөөлөхгүй гэх дүгнэлт /хх-ийн 20 дугаар хуудас/ зэрэг шүүх хуралдаанаар хэлэлцэгдсэн дээрх нотлох баримтуудыг Эрүүгийн байцаан шийтгэх хуульд заасан арга хэрэгслийн дагуу цуглуулж бэхжүүлсэн, хэргийг шийдвэрлэхэд хангалттай байх тул шүүгдэгч С.Б-д Эрүүгийн хуулийн тусгай ангийн 99 дүгээр зүйлийн 99.1-д зааснаар эрүүгийн хариуцлага хүлээлгэх үндэслэлтэй байна.

Шүүгдэгч нь урьд ял шийтгүүлж байгаагүй болох нь ял шийтгэгдсэн эсэхийг шалгах хуудас /хх-ийн 34 дүгээр хуудас/-аар тогтоогдож байна.

Шүүгдэгч С.Б- нь анх удаа хөнгөн гэмт хэрэг үйлдсэн, учруулсан хохирол 200.000 төгрөгийг нөхөн төлснийг ял хөнгөрүүлэх нөхцөл байдалд, согтуугаар гэмт хэрэг үйлдснийг ял хүндрүүлэх нөхцөл байдалд тус тус тооцон үзлээ.

Хохирогч нь цаашид гарах эмчилгээний зардал болон С.Б-д өгсөн гэх мотоциклийг иргэний журмаар жич нэхэмжлэх эрхтэй болно.

Эрүүгийн хэрэгт эд мөрийн баримтаар хураагдан ирсэн 25.5 см урттай, ажлын хэсэг нь 13 см урттай, 2.5 см өргөнтэй, хар өнгийн хуванцар иштэй хутга 1 ширхэгийг шийтгэх тогтоол хүчин төгөлдөр болмогц устгахыг шүүгчийн туслах О.Уранчимэгт даалгаж, энэ хэрэгт битүүмжлэгдсэн эд хөрөнгөгүй, шүүгдэгч нь цагдан хоригдоогүй, бусдад төлөх төлбөргүй болохыг тус тус дурдах нь зүйтэй байна.

Эрүүгийн байцаан шийтгэх хуулийн 283, 284, 286, 290, 294-298 дугаар зүйлүүдэд заасныг удирдлага болгон

ТОГТООХ нь:

1. Шүүгдэгч С.Б-ыг бусдын бие махбодид хөнгөн гэмтэл санаатай учруулсан гэмт хэргийг үйлдсэнд гэм буруутайд тооцсугай.

2. Эрүүгийн хуулийн тусгай ангийн 99 дүгээр зүйлийн 99.1-д зааснаар шүүгдэгч С.Б-д 1 /нэг/ сар 20 /хорь/ хоногийн баривчлах ялаар шийтгэсүгэй.

3. Эрүүгийн байцаан шийтгэх хуулийн 88 дугаар зүйлийн 88.1.1-д зааснаар хэрэгт эд мөрийн баримтаар хураагдан ирсэн 25.5 см урттай, ажлын хэсэг нь 13 см урттай, 2.5 см өргөнтэй, хар өнгийн хуванцар иштэй хутга 1 ширхэгийг шийтгэх тогтоол хүчин төгөлдөр болмогц устгахыг шүүгчийн туслах О.Уранчимэгт даалгаж, энэ хэрэгт битүүмжлэгдсэн эд хөрөнгөгүй, шүүгдэгч нь цагдан хоригдоогүй, хохирогч нь цаашид гарах эмчилгээний зардал болон С.Б-д өгсөн гэх мотоциклийг иргэний журмаар жич нэхэмжлэх эрхтэйг дурдсугай.

4. Шийтгэх тогтоол нь танилцуулан сонсгомогц хүчинтэй болох ба давж заалдах гомдол, эсэргүүцэл гаргасан тохиолдолд тогтоолын биелэлтийг түдгэлзүүлж, шийтгэх тогтоол хуулийн хүчин төгөлдөр болтол шүүгдэгч С.Б-д урьд авсан оршин суугаа газраасаа гадагш явж болохгүй тухай баталгаа авсан таслан сэргийлэх арга хэмжээг өөрчилж, энэ өдрөөс эхлэн цагдан хорьсугай.

5. Эрүүгийн байцаан шийтгэх хуулийн 303 дугаар зүйлийн 303.1, 304 дүгээр зүйлийн 304.1-д зааснаар шийтгэх тогтоолыг гардуулснаас хойш 14 хоногийн дотор ялтан, хохирогч, тэдгээрийн өмгөөлөгч, хууль ёсны төлөөлөгч давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

ДАРГАЛАГЧ, ШҮҮГЧ                                    Н.НЯМСҮРЭН