МОНГОЛ УЛСЫН НЭРИЙН ӨМНӨӨС

 

Орхон аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Ш.Эрдэнэцэцэг даргалж, шүүгч Ц.Алтангадас, шүүгч Ж.Байгалмаа нарын бүрэлдэхүүнтэй

Нарийн бичгийн дарга Н.Хулан,

Улсын яллагч Ц.Идэрмөнх,

Иргэдийн төлөөлөгч  Ц.Зоя,

Шүүгдэгч нарын өмгөөлөгч Н.Батбаяр, Р.Бямбажав, Д.Оюунчимэг, Р.Цэрэнханд,

Шүүгдэгч М.Хосбаяр, Ю.Амарсайхан, Х.Баяндүүрэн, М.Гантулга,

Шүүгдэгч М.Хосбаярын хууль ёсны төлөөлөгч Б.Мөнхсүлд,

Шүүгдэгч Ю.Амарсайханы хууль ёсны төлөөлөгч Т.Энхжаргал,

Шүүгдэгч Х.Баяндүүрэнгийн хууль ёсны төлөөлөгч О.Хишигсүрэн,

Шүүгдэгч М.Гантулгын хууль ёсны төлөөлөгч П.Мөнхцэцэг нарыг оролцуулан тус шүүхийн хуралдааны танхимд хаалттай хийж

 

Орхон аймгийн Прокурорын газраас Эрүүгийн хуулийн тусгай ангийн 147 дугаар зүйлийн 147.2-д заасан гэмт хэрэгт яллах дүгнэлт үйлдэж ирүүлсэн М.Хосбаяр, Ю.Амарсайхан, Х.Баяндүүрэн, М.Гантулга нарт холбогдох 201714000114 тоот эрүүгийн хэргийг 2017 оны 04 дүгээр сарын 13-ны өдөр хүлээн авч хянан хэлэлцэв.

 

                                                     Шүүгдэгч нарын биеийн байцаалт

 

Монгол Улсын иргэн, 2000 оны 06 дугаар сарын 16-ны өдөр Булган аймагт төрсөн, 16 настай, эрэгтэй, бурэн бус дунд боловсролтой, мэргэжилгүй, эрхэлсэн тодорхой ажилгүй, “Эрдэм” ахлах сургуулийн 11з бүлэгт суралцдаг, ам бүл 4, ээж, дүү нарын хамт Орхон аймаг Баян-Өндөр сум Шанд баг Манханы 8-2 тоотод оршин суух, ял шийтгэлгүй, гавъяа шагналгүй, Хард овгийн Мөнхцэцэгийн Гантулга /ГЖ00261618/.

 

Монгол Улсын иргэн, 1999 оны 08 дугаар сарын 11-ний өдөр Орхон аймагт төрсөн, эрэгтэй, 17 настай, бүрэн дунд боловсролтой, мэргэжилгүй, Мэргэжилт сургалт үйлдвэрлэлийн төвийн 2 дугаар дамжаанд сурдаг, ам бүл 5, эцэг, эх, ах нарын хамт Орхон аймаг Баян-Өндөр сум Даваат баг Ундрагын 22-7 тоотод оршин суух, ял шийтгэлгүй, гавъяа шагналгүй,  Хольдог овгийн Юмжаагийн Амарсайхан /ФБ99081111 /.

 

Монгол Улсын иргэн, 2001 оны 02 дугаар сарын 22-ны өдөр Орхон аймагт төрсөн, эрэгтэй, 16 настай, бүрэн бус дунд боловсролтой, мэргэжилгүй, “Эрдэм” ахлах сургуулийн 11м бүлэгт сурдаг, ам бүл 2, ээжийн хамт Орхон аймаг Баян-Өндөр сум Наран баг 39-9а тоотод оршин суух, ял шийтгэлгүй, гавъяа шагналгүй,  Шар нохойт овгийн Хишигсүрэнгийн Баяндүүрэн /ФД01222212/.

 

Монгол Улсын иргэн, 2001 оны 02 дугаар сарын 14-ний өдөр Орхон аймагт төрсөн, эрэгтэй, 16 настай, бүрэн бус дунд боловсролтой, мэргэжилгүй, “Эрдэм” ахлах сургуулийн 11м бүлэгт сурдаг, ам бүл 4, эцэг, эх, дүүгийн хамт Орхон аймаг Баян-Өндөр сум Наран баг 55-1а тоотод оршин суух, ял шийтгэлгүй, гавъяа шагналгүй, Бэсүүд овгийн Мөнхсүлдийн Хосбаяр /ФД01221419/.

 

                                                           Холбогдсон гэмт хэргийн талаар:

 

Шүүгдэгч М.Гантулга, Ю.Амарсайхан, Х.Баяндүүрэн, М.Хосбаяр нар нь бүлэглэн 2017 оны 02 дугаар сарын 03-ны орой Орхон аймгийн Баян-Өндөр сум Цагаанчулуут багийн нутаг дэвсгэрт Т.Цагаандоржийн эд хөрөнгийг авах зорилгоор хүч хэрэглэн довтолж Iphone-4s /Айпоне/ загварын гар утсыг дээрэмдэж 110 000 төгрөгийн хохирол учруулсан хэрэгт холбогджээ.

 

ТОДОРХОЙЛОХ нь :

 

   Шүүхийн хэлэлцүүлэгт дараах нотлох баримтуудыг шинжлэн судлав.Үүнд :

 

  Шүүгдэгч М.Гантулга шүүхийн хэлэлцүүлэгт мэдүүлэхдээ ...Бид 3 Амарсайхантай таарч “Шинэ сар” тоглоомын газар тоглож байгаад харих гэж яваад согтуу хүнтэй таарсан. Баяндүүрэн унагааж, Амарсайхан халааснаас нь утсыг нь авсан. Тэр утсаа эгч Шоовдорт 120 000 төгрөгөөр зарж мөнгөө гуч, гучин мянган төгрөгөөр хувааж авсан. Би тэнд нэг согтуу хүн унаж тусаад яваад байна л гэж хэлсэн гэв.

 

   Шүүгдэгч Ю.Амарсайхан шүүхийн хэлэлцүүлэгт мэдүүлэхдээ: Мөрдөн байцаалтанд бүгдийг нь үнэн зөвөөр ярьсан тул мэдүүлэг өгөхгүй. Согтуу хүн явж байна гэж М.Гантулга хэлсэн. Би утсыг нь авсан. Гантулгын хоолой шиг дуутай хүн халаасанд нь юм байна уу үз дээ гэж хэлсэн. Хохирогчид түрүүлж Баяндүүрэн очсон гэв.

 

       Шүүгдэгч Х.Баяндүүрэн шүүхийн хэлэлцүүлэгт мэдүүлэхдээ ...Би мөрдөн байцаалтанд мэдүүлэгээ үнэн зөв өгсөн учир мэдүүлэг өгөхгүй. Би хохирогчийг өшиглөөд зугтсан гэв.

 

       Шүүгдэгч М.Хосбаяр шүүхийн хэлэлцүүлэгт өгсөн мэдүүлэхдээ... Би утсыг нь 120 000 төгрөгөөр эгчдээ зарсан. Яг юу авсныг хараагүй, гэхдээ ямар нэг зүйл авсныг харсан гэв.

 

      Хохирогч Т.Цагаандоржийн мөрдөн байцаалтын шатанд өгсөн ... 2017 оны 02 дугаар сарын 03-ны шөнө 23 цаг өнгөрч байхад Цагаанчулуут багийн нутаг дэвсгэрт байрлах Гал унтраах ангийн ертөнцийн зүгээр зүүн талын гудамж руу ороод явж байхад араас нуруу руу жийсэн, жийлгүүлж газар унаад босох гээд өндийх үед зүүн шанаа руу цохиж газар унагасан. Яг энэ үед халааснаас гар утас аваад ертөнцийн зүгээр баруун чигтээ хүмүүс гүйлдэх үед нь араас нь хальт харахад миний анзаарснаар 3 залуу харагдсан. Утсаа хүлээн авсан хэвийн ажиллагаатай байна. Надад гомдол санал байхгүй тул шүүх хуралдаанд оролцмооргүй байна гэсэн мэдүүлэг /хх-ийн 18-19 тал/

2017 оны 02 дугаар сарын 20-ны өдрийн 02/27 дугаартай Далай ван аудит ХХК-ийн Айпоне-4 маркийн гар утасны үнэлгээ 110 000 төгрөг гэх дүгнэлт /хх-ийн 36-38 тал/

 

Эд зүйлд үзлэг хийсэн тэмдэглэл, гэрэл зургийн үзүүлэлт / хх-ийн131-132 тал/

 

Эд зүйл хураан авч, хүлээлгэн өгсөн тэмдэглэл /хх-ийн 133-134 тал/

 

Хохирлын мөнгө хураан авч, иргэний нэхэмжлэгч П.Шоовдорт хүлээлгэн өгсөн тэмдэглэл /хх-ийн 137-138 тал/

 

             Шүүгдэгч нарын ял шийтгэгдсэн эсэхийг шалгах хуудас зэрэг болно.

 

Насанд хүрээгүй шүүгдэгч М.Гантулга, Ю.Амарсайхан, Х.Баяндүүрэн, М.Хосбаяр нар нь бүлэглэн 2017 оны 02 дугаар сарын 03-ны орой Орхон аймгийн Баян-Өндөр сум Цагаанчулуут багийн нутаг дэвсгэрт Т.Цагаандоржийн эд хөрөнгийг авах зорилгоор амь биед нь аюултайгаар хүч хэрэглэн довтолж Iphone-4s /Айпоне/ загварын гар утсыг дээрэмдэж 110 000 төгрөгийн хохирол учруулсан гэмт хэрэг үйлдсэн болох нь шүүгдэгч нарын үйлдсэн хэргээ хүлээн мэдүүлсэн мэдүүлэг, хохирогчийн мэдүүлэг, Айпоне-4 загварын гар утасыг үнэлсэн шинжээчийн дүгнэлт  гар утсанд үзлэг хийсэн тэмдэглэл, гэрэл зургийн үзүүлэлт,  эд зүйл хүлээлгэн өгсөн тухай тэмдэглэл,  хохирогч Т.Цагаандоржийн мөрдөн байцаалтын шатанд өгсөн ...газар унаад босох гээд өндийх үед зүүн шанаа руу цохиж газар унагасан. Яг энэ үед халааснаас гар утас аваад ертөнцийн зүгээр баруун чигтээ хүмүүс гүйлдэх үед нь араас нь хальт харахад миний анзаарснаар 3 залуу харагдсан гэх мэдүүлэг зэрэг хавтаст хэрэгт авагдаж, шүүх хуралдаанд шинжлэн судлагдсан бичгийн нотлох баримтуудаар нотлогдон тогтоогдож байна.

 

Шүүхийн хэлэлцүүлэгт шинжлэн судлагдсан дээрх нотлох баримтууд нь Эрүүгийн байцаан шийтгэх хуульд заасан үндэслэл журмын дагуу цуглуулж бэхжүүлсэн байх тул энэ хэрэгт хамааралтай, хэрэг хянан шийдвэрлэхэд хангалттай байна гэж шүүх бүрэлдэхүүн үзлээ.

 

Шүүгдэгч М.Гантулга, Ю.Амарсайхан, Х.Баяндүүрэн, М.Хосбаяр нарт холбогдох хэргийн зүйлчлэл зөв, тэднийг бусдын эд хөрөнгийг авах зорилгоор амь биед нь аюултайгаар хүч хэрэглэн дээрэмдсэн гэмт хэрэг үйлдсэн гэм буруутайд тооцож, эрүүгийн хариуцлага хүлээлгэх үндэслэлтэй байна.

 

Шүүгдэгч нарт ял шийтгэл оногдуулахдаа анх удаа гэмт хэрэг үйлдсэн, үйлдсэн хэрэгтээ чин санаанаасаа гэмшиж байгаа, гэмт хэрэг үйлдэж учруулсан хохирлоо төлж барагдуулсан, шүүгдэгч нар нь насанд хүрээгүй байхдаа гэмт хэрэг үйлдсэн зэргийг хөнгөрүүлэх нөхцөл байдалд тооцож, шүүгдэгч нарт хуульд заасан хорих ялын доод хэмжээнээс доогуур хорих ял  оногдуулж, тэдэнд оногдуулсан хорих ялыг заавал биечлэн эдлүүлэх шаардлагагүй гэж дүгнэлээ.

 

Шүүгдэгч М.Хосбаярын өмгөөлөгч Н.Батбаяр  нь шүүгдэгчийн мэдүүлэг тууштай, М.Гантулгын мэдүүлэгтэй тохирдог. Дээрмийн гэмт хэрэгт оролцоогүй, санаа сэдэлт алга. М.Хосбаяр нь гэмт хэрэг үйлдэхэд хажууд нь байсан боловч биечлэн оролцоогүй. Мөрдөн байцаалтын шатанд хамжигч уу, гүйцэтгэгч үү гэдгийг ер нь нотлоогүй. Иймд насанд хүрээгүй шүүгдэгч М.Хосбаярт холбогдох хэргийг Эрүүгийн хуулийн тусгай ангийн 155 дугаар зүйлийн 155.1.д зааснаар өөрчлөн зүйлчилж хэргийг хэрэгсэхгүй болгож өгнө үү. 

 

         Шүүгдэгч М.Гантулгын өмгөөлөгч Д.Оюунчимэг нь шүүгдэгч М.Гантулга нь энэ гэмт хэрэгт оролцоогүй тул түүнд холбогдох хэргийг хэрэгсэхгүй болгож өгнө үү гэж тус тус мэтгэлцэж байх боловч хохирогч болон шүүгдэгч нарын мэдүүлэг, шүүхийн хэлэлцүүлэгт шинжлэн судлагдсан дээрхи баримтууд нь тэднийг дээрмийн гэмт хэрэгт оролцсон болохыг хангалттай нотлон тогтоосон гэж шүүх бүрэлдэхүүн дүгнэлээ.

 

Хохирогч Т.Цагаандорж нь нэхэмжлэх зүйл гомдол санал байхгүй тул намайг оролцуулахгүйгээр шүүх хуралдааныг хийж өгнө үү гэсэн хүсэлтийг шүүхэд бичгээр ирүүлсэн болно.

 

Энэ хэрэг эд мөрийн баримтаар хураагдсан зүйлгүй, битүүмжлэгдсэн хөрөнгөгүй, шүүгдэгч нар нь бусдад төлөх төлбөргүй, тэдний бичиг баримт шүүхэд ирээгүй, шүүгдэгч нар цагдан хоригдсон хоноггүй болохыг тус тус дурьдав.

 

Монгол улсын Эрүүгийн Байцаан Шийтгэх Хуулийн 283, 286, 290, 294, 297, 298 дугаар зүйлд тус тус заасныг удирдлага болгон

ТОГТООХ нь :

 

1. Шүүгдэгч Хард овгийн Мөнхцэцэгийн Гантулга,  Хольдог овгийн Юмжаагийн Амарсайхан, Шар нохойт овгийн Хишигсүрэнгийн Баяндүүрэн, Бэсүүд овгийн Мөнхсүлдийн Хосбаяр нарыг бүлэглэн амь биед нь аюултайгаар хүч хэрэглэж бусдын эд хөрөнгийг дээрэмдэх гэмт хэрэг үйлдсэн гэм буруутайд тооцсугай.

 

2. Эрүүгийн хуулийн ерөнхий хуулийн 551 дүгээр зүйлийн 551.1.д заасныг журамлан Эрүүгийн хуулийн тусгай ангийн 147 дугаар зүйлийн 147.2-д зааснаар шүүгдэгч М.Гантулга, Ю.Амарсайхан, Х.Баяндүүрэн, М.Хосбаяр нарын эд хөрөнгийг хураахгүйгээр тус бүрийг 3 жил 5 сарын хугацаагаар хорих ялаар тус тус шийтгэсүгэй.

 

3. Эрүүгийн хуулийн ерөнхий ангийн 52 дугаар зүйлийн 52.8.д  зааснаар шүүгдэгч М.Гантулга, Ю.Амарсайхан, Х.Баяндүүрэн, М.Хосбаяр нарт оногдуулсан тус бүрийн 3 жил 5 сарын хорих ялыг насанд хүрээгүйчүүдийн жирийн дэглэмтэй хорих ангид тус тус эдлүүлсүгэй.

 

4. Энэ хэрэгт хураагдаж  ирсэн эд мөрийн баримтгүй, битүүмжилсэн хөрөнгөгүй, шүүгдэгч нар нь цагдан хоригдоогүй, бусдад төлөх төлбөргүй, тэдний иргэний бичиг баримт шүүхэд ирээгүйг тус тус дурдсугай.

 

5.  Эрүүгийн хуулийн ерөнхий ангийн 62 дугаар зүйлийн 62.1., 62.2.т зааснаар шүүгдэгч М.Гантулга, Ю.Амарсайхан, Х.Баяндүүрэн, М.Хосбаяр нарт тус бүр 3 жил 5 сарын хорих ял оногдуулсан шүүхийн шийтгэх тогтоол биелүүлэхийг тус тус 1 жилийн хугацаагаар хойшлуулж, тэдний засрал хүмүүжилд дөхөм үзүүлэх хяналт тавихыг Орхон аймгийн цагдаагийн газарт даалгаж, хараа хяналтандаа байлгаж хүмүүжүүлэхийг тэдний хууль ёсны төлөөлөгч П.Мөнхцэцэг, Т.Энхжаргал, О.Хишигсүрэн, Б.Мөнхсүлд нарт хариуцуулсугай.

 

6. Шийтгэх тогтоол хүчин төгөлдөр болтол шүүгдэгч М.Гантулга, Ю.Амарсайхан, Х.Баяндүүрэн, М.Хосбаяр нарт авсан  даалтанд өгөх таслан сэргийлэх арга хэмжээг хэвээр үлдээсүгэй.

 

7. Шийтгэх тогтоол танилцуулан сонсгосноор хүчинтэй болох бөгөөд ялтан, хохирогч, тэдгээрийн өмгөөлөгч, хууль ёсны төлөөлөгч нар тогтоолыг эс зөвшөөрвөл түүнийг  гардан авснаас хойш 14 хоногийн дотор Орхон аймгийн Эрүүгийн хэргийн давж заалдах шатны  шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй.

 

 

                         ДАРГАЛАГЧ ШҮҮГЧ                         Ш.ЭРДЭНЭЦЭЦЭГ         

                         ШҮҮГЧИД                                          Ц.АЛТАНГАДАС   

                                                                                    Ж.БАЙГАЛМАА