МОНГОЛ УЛСЫН НЭРИЙН ӨМНӨӨС

 

 

Чингэлтэй дүүргийн Иргэний хэргийн анхан шатны шүүхийн шүүгч Н.Баярмаа даргалж, тус шүүхийн шүүх хуралдааны танхимд хийсэн шүүх хуралдаанаар,

 

Нэхэмжлэгч: М.Б-ын нэхэмжлэлтэй

 

Хариуцагч: Р.Г-д холбогдох,

 

Нэхэмжлэлийн шаардлага: Хүүхдийн тэтгэлэг тогтоолгох тухай хэргийг хянан хэлэлцэв.

 

Шүүх хуралдаанд: Нэхэмжлэгч М.Б, шүүх хуралдааны нарийн бичгийн дарга М.Д нар оролцов. /Хариуцагч Р.Г шүүх хуралдаанд оролцох боломжгүй байгаа ба өөрийн эзгүйд хэргийг хянан шийдвэрлүүлэхэд татгалзах зүйлгүй гэдгээ утсаар шүүгчийн туслахад мэдэгдсэн болно./

 

ТОДОРХОЙЛОХ нь:

 

1. Нэхэмжлэгч М.Бнь Р.Гэд холбогдуулан хүүхдийн тэтгэлэг тогтоолгохоор нэхэмжлэлийн шаардлага гаргасан байна.

Нэхэмжлэгч нь шүүхэд гаргасан нэхэмжлэлдээ: Миний бие Р.Гтэй 2013 онд танилцаж, нэг гэрт хамтран амьдрах болсон. Хамтран амьдрах хугацаанд 2015 оны 11 дүгээр сарын 12-ны өдөр хүү Б.Чтөрсөн. Бид тодорхой шалтгааны улмаас гэрлэлтээ батлуулаагүй байсан ба зан харилцааны таарамжгүй байдлын улмаас хамтран амьдрах боломжгүй болж, 2017 оноос салж тусдаа амьдрах болсон бөгөөд хүү маань миний асрамжид өсөн торниж байна. Иймд эцэг Р.Гээс хүү Б.Чд тэтгэлэг тогтоолгож өгнө үү гэв.

2. Хариуцагч О.Г шүүхэд бичгээр гаргасан хариу тайлбартаа: Миний бие нэхэмжлэлийн шаардлагыг бүхэлд нь хүлээн зөвшөөрч байна. Хүүхдийн тэтгэлэг төлөхөд татгалзах зүйлгүй боловч одоогоор санхүүгийн асуудалтай байгаа учир нөхцөл байдлыг харгалзан үзнэ үү гэжээ.

 

3.Нэхэмжлэгчээс иргэний үнэмлэхийн хуулбар,

-Чингэлтэй дүүргийн 13 дугаар хорооны Засаг даргын тодорхойлолт,

-хүү Б.Чийн төрсний гэрчилгээний хуулбар, 

-хүүхэд эрүүл бойжиж байгаа талаарх эмчийн тодорхойлолт,

-Нийслэлийн 17 дугаар сургуулийн тодорхойлолт зэрэг баримтуудыг, хариуцагчаас нэхэмжлэлийн шаардлагыг хүлээн зөвшөөрсөн талаарх тайлбарыг бичгээр шүүхэд гаргаж өгсөн байна.

 

Хэрэгт авагдсан болон шүүх хуралдаанаар хэлэлцэгдсэн дээрх нотлох баримтуудыг шинжлэн судлаад

ҮНДЭСЛЭХ нь:

 

1. Нэхэмжлэгчийн шүүхэд гаргасан нэхэмжлэлийн шаардлагыг бүхэлд нь хангаж шийдвэрлэх үндэслэлтэй байна гэж үзэв.

 

2. М.Б, Р.Г нар нь 2013 онд танилцаж, хэсэг хугацаанд хамтран амьдарсан байх бөгөөд 2015 оны 11 дүгээр сарын 12-ны өдөр хүү Б.Чтөрсөн байна. Зохигчид гэрлэлтээ албан ёсоор бүртгүүлээгүй, Б.Чэхээрээ овоглон төрсний гэрчилгээ авсан хэдий ч хүү Б.Чийн эцэг болох үйл баримтын тухайд хариуцагч маргаагүй болох нь түүний тайлбараар тогтоогдож байна. /хх-ийн 5 дугаар тал, хх-ийн 18 дугаар тал/

 

3.  Зохигчид зан харилцааны таарамжгүй байдлын улмаас 2017 оноос тусдаа амьдарсан байх бөгөөд энэ цагаас хүүхэд эх М.Бийн асрамжид үлдэж, одоо эрүүл өсөн бойжиж байгаа талаар зохигчид харилцан маргахгүй байна. Дурдсан үйл баримтууд зохигчдын гаргасан тайлбар, хүүхдийн төрсний гэрчилгээний хуулбар, эрүүл мэндийн талаарх өрхийн эмчийн тодорхойлолт зэрэг баримтуудаар тус тус тогтоогдов.

 

4.  Хариуцагч Р.Г нь хүүхдийн эцэг мөн болохоо хүлээн зөвшөөрч байх ба тэрээр хүүхдийн тэтгэлэг төлөх нэхэмжлэлийн шаардлагын талаар маргаагүй болно. Гэр бүлийн тухай хуулийн 21 дүгээр зүйлийн 21.5-д “Гэрлэлтээ бүртгүүлээгүй хүмүүсийн дундаас төрсөн хүүхэд нь гэрлэлтээ бүртгүүлсэн гэр бүлээс төрсөн хүүхдийн адил эрх эдэлж, үүрэг хүлээнэ”, 35 дугаар зүйлийн 35.1-д “гэрлэгчид бие биеэ, эцэг, эх нь хүүхдээ, хүүхэд нь эцэг, эхээ, төрөл садангийн хүмүүс бие биеэ энэ хуульд заасны дагуу тэжээн тэтгэх үүрэгтэй”, 38.1-д “эцэг эх нь насанд хүрээгүй болон насанд хүрсэн боловч хөдөлмөрийн чадваргүй хүүхдээ тэжээн тэтгэх үүрэгтэй” гэж тус тус заасан.  

 

5. Иймд зохигчдын хамтын амьдралын явцад төрсөн хүүхэд Б.Чнь Гэр бүлийн тухай хуулийн 21 дүгээр зүйлийн 21.5-д зааснаар гэрлэлтээ бүртгүүлсэн гэр бүлээс төрсөн хүүхдийн адил эрх эдэлж, үүрэг хүлээх бөгөөд эцэг Р.Г нь мөн хуулийн 35 дугаар зүйлийн 35.1, 38 дугаар зүйлийн 38.1-д зааснаар хүүхдээ тэжээн тэтгэх үүрэгтэй байна. Иймд Гэр бүлийн тухай хуулийн 40 дүгээр зүйлийн 40.1-д заасан хэмжээгээр тэтгэлэг тогтоож, хариуцагч Р.Гээр хүү Б.Чийг тэжээн тэтгүүлэх хууль зүйн үндэслэлтэй. Үндэсний статистикийн хорооны даргын 2021 оны 01 дүгээр сарын 28-ны өдрийн А/02 тоот тушаалаар 2021 онд мөрдөх Хүн амын амьжиргааны доод түвшинг Улаанбаатар хотод 238,700 төгрөгөөр тогтоосон байх тул хариуцагчаас гаргуулах хүүхдийн тэтгэлэгт ногдох тэмдэгтийн хураамжийн хэмжээг уг дүнгээс тооцов. 

 

6. Иргэний хэрэг шүүхэд хянан шийдвэрлэх тухай хуулийн 77 дугаар зүйлийн 77.1, 77.5-т заасан журмын дагуу 2022 оны 02 дугаар сарын 24-ний өдрийн 15 цаг 30 минутад товлогдсон шүүх хуралдааны товыг шүүхийн мэдэгдэх хуудсаар болон хариуцагч Р.Гэд мэдэгдсэн, шүүх хуралдаанд оролцох боломжгүй тухайгаа шүүгчийн туслахын холбогдох дугаарт мэдэгдсэн байх тул Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.3-т зааснаар нэхэмжлэгчийн хүсэлтийг үндэслэн хариуцагчийн эзгүйд хэргийг хянан шийдвэрлэсэн болохыг дурдах нь зүйтэй байна.

Иргэний хэрэг шүүхэд хянан шийдвэрлэх тухай хуулийн 115.2.1, 116, 118 дугаар зүйлд заасныг удирдлага болгон

 

ТОГТООХ нь:

 

1. Гэр бүлийн тухай хуулийн 40 дүгээр зүйлийн 40.1.1, 40.1.2-т заасныг баримтлан 2015 оны 11 дүгээр сарын 12-ны өдөр төрсөн хүү Б.Ч-ийг 11 нас хүртэл тухайн бүс нутагт тогтоогдсон амьжиргааны баталгаажих доод түвшингийн 50 хувиар, 11-16 нас /суралцаж байгаа бол 18 нас/ хүртэл тухайн бүс нутагт тогтоогдсон амьжиргааны баталгаажих доод түвшингийн хэмжээгээр сар бүр тэтгэлэг гаргуулж эцэг Р.Гээр тэжээн тэтгүүлсүгэй.

 

2. Улсын тэмдэгтийн хураамжийн тухай хуулийн 41дүгээр зүйлийн 41.1.1, 44 дүгээр зүйлийн 44.1.2, Иргэний хэрэг шүүхэд хянан шийдвэрлэх тухай хуулийн 57дугаар зүйлийн 57.3-т зааснаар нэхэмжлэгч М.Бийн нэхэмжлэл нь улсын тэмдэгтийн хураамжаас чөлөөлөгддөг болохыг дурдаж, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 63 дугаар зүйлийн 63.1.5-д заасныг баримтлан хариуцагч Р.Гээс нэг жилийн хугацаанд төлбөл зохих хүүхдийн тэтгэлгийн нийлбэр дүнгээс улсын тэмдэгтийн хураамжид 41,619 төгрөг гаргуулж, улсын төвлөрсөн төсвийн дансанд олгосугай.

 

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4, 119.5, 119.7-д зааснаар шийдвэрийг танилцуулан сонсгомогц хүчинтэй болох бөгөөд зохигчид 14 хоногийн хугацаа өнгөрснөөс хойш 14 хоногийн дотор шүүхэд хүрэлцэн ирж шүүхийн шийдвэрийг өөрөө гардан авах үүргээ биелүүлээгүй нь давж заалдах журмаар гомдол гаргах хугацааг тоолоход саад болохгүй болохыг дурдсугай.

 

4. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигчид шийдвэрийг гардан авсан, хүргүүлсэн өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргах эрхтэй болохыг дурдсугай.

 

 

 

 

                             ДАРГАЛАГЧ, ШҮҮГЧ                               Н.БАЯРМАА