МОНГОЛ УЛСЫН НЭРИЙН ӨМНӨӨС

 

Нийслэл дэх Захиргааны хэргийн анхан шатны шүүхийн шүүх хуралдааныг шүүгч Б.Мөнх-Эрдэнэ даргалж, тус шүүхийн шүүх хуралдааны 5 дугаар танхимд нээлттэй хийсэн хуралдаанаар,

Нэхэмжлэгч: Т ХХК

Хариуцагч: Сүхбаатар дүүргийн Татварын хэлтэс

Нэхэмжлэлийн шаардлага: Сүхбаатар дүүргийн Татварын хэлтсийн 2019 оны 12 дугаар сарын 23-ны өдрийн татвар суутгасан захиргааны актыг илт хууль бус болохыг тогтоолгох шаардлага бүхий захиргааны хэргийг хянан хэлэлцэв.

Шүүх хуралдаанд: нэхэмжлэгчийн итгэмжлэгдсэн төлөөлөгч М.Ж, хариуцагчийн итгэмжлэгдсэн төлөөлөгч Б.Э, Н.Х, шүүх хуралдааны нарийн бичгийн дарга Б.Н нар оролцов.

ТОДОРХОЙЛОХ нь:

Нэхэмжлэгчийн итгэмжлэгдсэн төлөөлөгч М.Ж шүүхэд болон шүүх хуралдаанд гаргасан тайлбартаа: ...Нэхэмжлэгч хуулийн этгээд нь авто ломбард буюу тээврийн хэрэгслийг барьцаалан зээлдүүлэх үйл ажиллагаа явуулдаг. Барьцаалан зээлдүүлэхдээ Иргэний хуулийн дагуу фидуцийн гэрээ байгуулан өөрсдийн өмчлөлд шилжүүлэн унаж явах зорилгоор зээлийн үйл ажиллагаа явуулдаг хуулийн этгээд юм. Тухайн хуулийн этгээдээс 2019 оны 12 дугаар сарын 23-ны өдөр Сүхбаатар дүүргийн Татварын хэлтсээс 16.337.699 төгрөгийн татварыг суутгахдаа Захиргааны ерөнхий хуулийн 47 дугаар зүйлд заасан илт хууль бус актын шинж агуулсан байна гэж үзсэн. Захиргааны ерөнхий хуулийн 47 дугаар зүйлийн 47.3 дахь хэсэгт заасны дагуу өөрийн эрх хэмжээнд үл хамаарах асуудлаар захиргааны акт гаргасан буюу Баянзүрх дүүрэгт татварын бүртгэлтэй хуулийн этгээдийн данснаас Сүхбаатар дүүргийн Татварын хэлтэс суутган авсан нь илт хууль бус актын шинжийг агуулсан байна. Мөн Захиргааны ерөнхий хуулийн 47 дугаар зүйлийн 47.6 дахь хэсэгт заасан иргэн хуулийн этгээдийн эрх хууль ёсны ашиг сонирхолд халдах хуульд заасан үндэслэл байгаагүй үед захиргааны акт гаргасан буюу тухайн авто машиныг бодитойгоор эзэмшээгүй, эзэмшигч бус этгээдээс автомашины татварыг суутган авсан. Учир нь фидуцийн гэрээний дагуу тухайн автомашиныг өөрт шилжүүлж авахад өмчлөгч гэсэн агуулгад хамаарахгүй.

Учир нь Иргэний хуулийн 286 дугаар зүйлд заасны дагуу тухайн автомашиныг зөвхөн эзэмших эрх бүхий этгээдийг хэлж байна.

Өөрөөр хэлбэл тухайн фидуцийн гэрээний үндсэн дээр шилжүүлж авсан эд хөрөнгийг нэхэмжлэгчийн зүгээс ямар нэг байдлаар шууд захиран зарцуулах, бусдад худалдах, шилжүүлэх эрх эдлэхгүй бөгөөд авто машин нь зөвхөн фидукцийн гэрээний барьцаа болгон шилжүүлж авсан эд хөрөнгө юм. Мөн тухайн эд хөрөнгийн хувьд үүрэг биелэгдээгүй буюу зээлээ буцаан төлөөгүй тохиолдолд тухайн эд хөрөнгийг шүүхийн журмаар худалдан борлуулах, өөрсдийн өмчлөлд шилжүүлэх эрх үүсэх боломжтой болдог.

Нийслэлийн Татварын хэлтсийн даргын тушаалаар ажлын хэсэг байгуулагдсан ажлын хэсэгт багтсан гишүүд татварын өр төлбөр барагдуулах ажиллагаа явуулсан гэдэг зүйл ярьсан. Үүнтэй холбоотойгоор татварыг суутгах үйл ажиллагаа хамаарч байгаа юм уу гэдэг байдлаар нотлох баримт гаргуулах үүднээс шүүх хуралдаан хойшилсон.

Гэтэл өнөөдөр нотлох баримтууд нь хавтаст хэрэгт авагдсаны дараа өмнөх ярьсан зүйлээсээ өөр зүйл ярьж байна. Өмнө нь ярихдаа ажлын хэсгээр татвар суутгах бүх юмаа хийсэн гэдэг байдлаар ярьсан бол өнөөдөр энэ ажлын хэсэг нь тооцоолсон гэсэн байдлаар татварын үлдэгдэл хэд байсан тэрийг нь гаргасан гэж ярьж байна. Уг ажлын хэсэг нь татварыг суутгах бүрэн эрхтэй этгээд биш гэдэг нь харагдаж байна. Дээрээс нь нийслэлийн хэмжээнд нэгдсэн байдлаар татварыг суутгасан гэдэг зүйл яриад байна. Татварын ерөнхий хуульд тухайн тээврийн хэрэгслүүдийг бүртгүүлсэн этгээд нь татвараа төлнө гээд хуульчилсан байгаа. Иймд татварын хэлтэс нь өөрөө манайд бүртгэлгүй байж Нийслэлийн Татварын ерөнхий газраас авдаг юм гэдэг зүйл хэлээд байна. Энэ талаар маргаагүй ба авах ёстой этгээд нь аваагүй буюу эрх хэмжээнийхээ дагуу аваагүй учир маргаад байгаа.

Иргэний хуульд заасан фидуцийн гэрээ нь ашиглаж болохуйц байх ёстой. Явуулж байгаа үйл ажиллагаанаасаа хамаараад авто ломбард эрхэлж байгаа этгээд нь фидуцийн гэрээгээ ашиглаад зээл олгож, мөн дээрээс нь авто замын төлбөрийг төлнө гэдэг нь үндэлслэлгүй. Эцэст нь энэ автомашины төлбөрийг хэн

 

төлөх ёстой вэ, энэ агаарын бохирдлын төлбөрийг хэн төлөх ёстой вэ гэвэл машин унаж байгаа этгээд нь төлөх ёстой болохоос биш нэр дээр нь бүртгэлтэй байгаа этгээд төлөх нь үндэслэлгүй. Тухайн унаж байгаа этгээдүүдээс татварын хэлтэс нь татварыг суутгах бүрэн боломжтой.

Захиргааны ерөнхий хуулийн 24 дүгээр зүйлд нөхцөл байдлыг тодруулах үйл ажиллагаа буюу сонсох ажиллагаа хийгдэх явцад тухайн этгээдийн бүх мэдээлэл нь банк бус санхүүгийн байгууллагуудад байгаа. Энэ бүх мэдээллийг аваад авто тээврийн хэрэгслийг унаж байгаа, автозамын хэрэглэж байгаа, агаарыг бохирдуулж байгаа этгээдээс татварыг бүрэн суутгаж боломж байсан. Татварын хэлтэс нь нийтэд нь суутгаж, ажлаа хөнгөвчилсөн байдлаар татварыг суутган авсан. Мөн Сүхбаатар дүүрэгт бүртгэлтэй гэж ярьж байгаа.

Гэтэл Баянзүрх дүүрэгт ч бүртгэлтэй байна. Өмнө-Говь аймаг, Дархан-Уул аймаг, Сонгино-Хайрхан дүүрэгт бүртгэлтэй байна. Эдгээр дүүргүүдээс манай байгууллагын татварыг суутгаж авах боломжтой гэж харагдаад байна. Гэвч энэ нь хууль зөрчсөн зүйл болоод байна. Учир нь Татварын ерөнхий хуульд татвар төлөгч, суутгагчаар бүртгэлтэй байна гэдэг хуулийн зохицуулалттай юм. Сүхбаатар дүүргээс хамаарал бүхий этгээдүүдийн татварын үлдэгдлээ авах байсан. Мөн дээрээс нь ажлын хэсэгтэй холбоотой татварын өр төлбөрийг суутгах ажиллагаа явагдсан гэж ярьдаг боловч энэ ажлын хэсэгт Баянзүрх дүүргийн ажлын хэсэг н.Б гэдэг хүн байсан. Яагаад энэ хүн татварыг суутгах болоогүй юм бэ? Иймд нэхэмжлэлийн шаардлагыг бүхэлд нь хангаж өгнө үү гэжээ.

Хариуцагчийн итгэмжлэгдсэн төлөөлөгч Б.Э шүүхэд болон шүүх хуралдаанд гаргасан тайлбартаа: Нийслэлийн Татварын газраас 2019 оны 11 дүгээр сард А/84 тушаалаар ажлын хэсэг байгуулагдаж, татварын төлөлт, орлогын хяналтад бүртгэл хийж, төлөгдөөгүй татварыг төлүүлэх ажил хийгдсэн. Энэхүү ажлын хүрээнд Сайн авто ломбард гэх нэртэй хуулийн этгээдийн хэд хэдэн машины автотээврийн үлдэгдэл төлөгдөөгүй байсан. Тухайн асуудлаар судалгаа, мэдээлэл гаргаад татвар төлөгдөөгүй этгээдүүдээс хугацаанд нь төлүүлэхээр мэдэгдэх хуудас хүргүүлсэн. Мэдэгдэх хуудаст татварыг төлөөгүй тохиолдолд данснаас нь шууд татан авах талаар мэдэгдсэн байсан. Уг үйл ажиллагаа нь татварын улсын байцаагчийн бүрэн эрх хэмжээнд явагдсан юм. Нийтдээ татвар төлөгдөөгүй байсан авто машинуудын 60 хувиар татварын суутгалыг татан авсан. Хуулийн хугацаанд 6 дугаар сард татвар төлөх ёстой байсан ч оны эцэс болтол хугацаагаар хангасан. Мөн тус хугацаанд торгууль алданги, ямар нэгэн бусад хариуцлагын ажиллагаа хийгдээгүй. Гол маргаан болоод байгаа асуудалд нэхэмжлэгч байгууллага нь иргэдийн машиныг барьцаалан зээлдүүлдэг. Монгол Улсын автотээврийн болон өөрөө явагч хэрэгслийн албан татварын хуульд автотээврийг эзэмшигч тухайн татварыг хариуцна гэсэн заалттай. Тухайн хэдэн зуун автомашин нэхэмжлэгч байгууллагын нэр дээр нь шилжсэн байхад татварын байгууллагаас олж тогтоогоод барагдуулах боломжгүй байсан. Авто машины дугаар дээр татвар нь автоматаар үүссэн байгаа. Нийслэлийн татварын удирдлагын нэгдсэн систем нь нэг данстай болсон тухай өмнөх шүүх хуралдаануудад ч бас ярьж байсан. Өмнө нь дандаа тус тусдаа данстай байдаг байсан. Нийслэлийн хэмжээнд аль ч дүүрэгт машины дугаар хэлэхэд тухайн дансанд орно. Ажлын хэсэг байгуулагдаад, мэдээллийн судалгааг бий болгоод, татварын байцаагч нар нь чиг үүргийнхээ хүрээнд татвар татсан.

Нийслэлийн Татварын газрын ажлын хэсгийн хүрээнд хийгдсэн байх тул. нэхэмжлэлийн шаардлагыг бүхэлд нь хэрэгсэхгүй болгож өгнө үү гэв.

Хариуцагчийн итгэмжлэгдсэн төлөөлөгч Н.Х шүүхэд болон шүүх хуралдаанд гаргасан тайлбартаа: ...Банк бус санхүүгийн байгууллагад бүртгэлтэй тээврийн хэрэгслийн мэдээллийг банк бус санхүүгийн байгууллага машин унаж байгаа хүмүүсээс татварыг татах хэрэгтэй гэж ярьсан.

Татварын ерөнхий хуулийн 62 дугаар зүйлийн 62.2 дахь хэсэгт зааснаар Өртэй татвар төлөгчийн хөрөнгийн байдлыг тогтоох үед бэлэн мөнгө илэрсэн тохиолдолд татварын өрөөс илүүгүй хэмжээгээр хураан авч нэн даруй татварын орлогын дансанд шилжүүлнэ. Шилжүүлсэн мөнгөн дүнгийн хэмжээгээр тухайн татвар төлөгчөөс татварын өрийг хураасан гэж үзнэ гэж заасан байдаг гэв.

 

ҮНДЭСЛЭХ нь:

Шүүх хавтаст хэрэгт авагдсан бичгийн нотлох баримтуудыг шинжлэн судлаад шүүхэд болон шүүх хуралдаанд гаргасан хэргийн оролцогчдын тайлбар зэргийг үндэслэн дараах хууль зүйн үндэслэлээр нэхэмжлэгчийн нэхэмжлэлийн шаардлагыг бүхэлд нь хэрэгсэхгүй болгож шийдвэрлэлээ.

Нэхэмжлэгч ТХХК нь тус шүүхэд Сүхбаатар дүүргийн Татварын хэлтэст холбогдуулан Сүхбаатар дүүргийн Татварын хэлтсийн 2019 оны 12 дугаар сарын 23-ны өдрийн татвар суутгасан захиргааны актыг илт хууль бус болохыг тогтоолгох шаардлага бүхий нэхэмжлэл гаргасан байх бөгөөд нэхэмжлэлийн үндэслэлээ ...Сүхбаатар дүүргийн Татварын хэлтсээс 16.337.699 төгрөгийн татварыг суутгахдаа Захиргааны ерөнхий хуулийн 47 дугаар зүйлд заасан илт хууль бус актын шинж агуулсан ... өөрийн эрх хэмжээнд үл хамаарах асуудлаар захиргааны акт гаргасан буюу Баянзүрх дүүрэгт татварын бүртгэлтэй хуулийн этгээдийн данснаас Сүхбаатар дүүргийн Татварын хэлтэс суутган авсан нь илт хууль бус акт ..., авто машиныг бодитойгоор эзэмшээгүй, эзэмшигч бус этгээдээс автомашины татвар суутгасан... гэж, хариуцагчаас ...татвар төлөгдөөгүй этгээдүүдээс хугацаанд нь төлүүлэхээр мэдэгдэх хуудас хүргүүлсэн ..., мэдэгдэх хуудаст татварыг төлөөгүй тохиолдолд данснаас нь шууд татан авах талаар мэдэгдсэн ... , Монгол Улсын автотээврийн болон өөрөө явагч хэрэгслийн албан татварын хуульд автотээврийг эзэмшигч тухайн татварыг хариуцна гэж заасан ... гэж тус тус тайлбарлан маргажээ.

Сүхбаатар дүүргийн Татварын хэлтсийн 2019 оны 11 дүгээр сарын 18-ны өдрийн DNP191211007 дугаар мэдэгдэх хуудсаар Тв авто финансХХК-д авто тээврийн хэрэгслийн албан татвар, авто зам ашигласны болон агаарын бохирдлын төлбөрийн ногдлыг төлөх хугацаа тогтоон, тогтоосон хугацаанд төлөөгүй тохиолдолд Татварын ерөнхий хуулийн 62 дугаар зүйлд заасан ажиллагааг явуулахаас гадна Зөрчлийн тухай хуулийн 15.2 дугаар зүйлийн 1 дэх хэсэгт заасны дагуу 500 нэгжтэй тэнцэх хэмжээний төгрөгөөр торгохыг мэдэгдэж, уг мэдэгдлийн хавсралтаар ТХХК-д авто тээвэр өөрөө явагч хэрэгслийн албан татварт үүссэн 19,288,491.0 төгрөг, авто зам ашигласны төлбөрт үүссэн 7,941,008.00 төгрөг, агаарын бохирдлын төлбөрт үүссэн 252,500.00 төгрөг, нийт 27,481,999.00 төгрөгийг барагдуулахыг үүрэг болгож, мэдэгдэх хуудсыг 2019 оны 12 дугаар сарын 18-ны өдрийн М ХК-ийн баталгаат шуудангаар хүргүүлжээ.

Нийслэлийн Татварын газрын 2019 оны 11 дүгээр сарын 08-ны өдрийн А/64 дүгээр Ажлын хэсэг байгуулах тухай тушаалын нэгдүгээр хавсралтаар автотээвэр болон өөрөө явагч хэрэгслийн албан татвар, авто зам ашигласны төлбөрийн 2019 оны эхний 10 сарын орлогыг бүрэн бүртгэх, татварын орлогын бүртгэлд хяналт тавих ажлын хэсгийг байгуулжээ.

Ажлын хэсгийн 2019 оны 11 дүгээр сарын 25-ны өдрийн хуралдаанаар нийслэлийн хэмжээнд 2019 оны татвараа төлөөгүй 6300 тээврийн хэрэгслийн эзэмшигчтэй холбогдож, татварыг төлүүлэх талаар тус тус хэлэлцэж, нэхэмжлэгчийн Хаан банк дахь харилцах данснаас 16337699 төгрөгийг 2019 оны 12 дугаар сарын 23-ны өдөр үл маргах журмаар суутган авсан байна.

Монгол Улсын автотээврийн болон өөрөө явагч хэрэгслийн албан татварын тухай хуулийн 3 дугаар зүйлд Монгол Улсын нутаг дэвсгэрт автотээврийн болон өөрөө явагч хэрэгсэл эзэмшиж буй хувь хүн, аж ахуйн нэгж, байгууллага албан татвар төлөгч байна Агаарын бохирдлын төлбөрийн тухай хуулийн 4 дүгээр зүйлийн 4.1-д Дoр дурдсан иргэн, аж ахуйн нэгж, байгууллага агаарын бохирдлын

төлбөр төлөгч байна, 4.1.4-т автотээврийн болон өөрөө явагч хэрэгсэл эзэмшигч гэж заажээ.

Дээрх хуулийн заалтаас дүгнэхэд тухайн автомашины эзэмшигч нь тээврийн хэрэгслийн албан татвар, авто зам ашигласны болон агаарын бохирдлын төлбөрийг төлөх үүрэгтэй байна.

Мөн Монгол Улсын автотээврийн болон өөрөө явагч хэрэгслийн албан татварын тухай хуулийн 6 дугаар зүйлийн 6.1-д Улсын бүртгэлд байгаа автотээврийн болон өөрөө явагч хэрэгсэлд тэдгээрийг ашиглаж байгаа эсэхийг үл харгалзан албан татвар ногдуулна, 7 дугаар зүйлийн 7.1-д Хувь хүн нь авто тээврийн болон өөрөө явагч хэрэгслийн жилийн албан татварыг жилд нэг удаа тухайн жилийн 6 дугаар сарын 1-ний өдрөөс өмнө харьяалах татварын албанд төлнө. Хэрэв 6 дугаар сарын 1-нээс хойш авто тээврийн болон өөрөө явагч хэрэгслийг импортоор оруулж ирсэн бол харьяалах татварын албанд тухайн жилдээ багтаан үлдсэн хугацаанд ногдох татварыг төлнө, 7.2-т Аж ахуйн нэгж, байгууллага автотээврийн болон өөрөө явагч хэрэгслийн жилийн албан татварыг тэнцүү хэмжээгээр улирал бүрийн сүүлчийн сарын 25-ны дотор багтаан төсөвт төлж дараа оны 2 дугаар сарын 15-ны дотор тайланг татварын албанд ирүүлнэ, Татварын Ерөнхий хуулийн /2008 оны/ 63 дугар зүйлийн 63.1-д хугацаанд нь төлөөгүй татварын өрийг эхний ээлжинд татвар төлөгчийн банкин дахь дансанд байгаа мөнгөн хөрөнгөөс үл маргах журмаар гаргуулах бөгөөд уг мөнгөн хөрөнгө нь татварын өрийг төлөхөд хүрэлцэхгүй бол уг данснаас төлөх баталгаажсан барьцаа, шүүхийн шийдвэрээс бусад зарлагын гүйлгээг бүрэн буюу хэсэгчлэн зогсоож дансны орлогоос татварын өрийг барагдуулна гэж тус тус заажээ.

Хэдийгээр нэхэмжлэгч нь Баянзүрх дүүргийн татварын хэлтэст татвар төлөгчөөр бүртгэлтэй, авто машиныг бодитойгоор эзэмшээгүй, зээлийн үүргийн гүйцэтгэлийг хангуулах зорилгоор тухайн тээврийн хэрэгслийн нэрийг шилжүүлсэн гэж тайлбарлаж байгаа хэдий ч тухайн автомашины эзэмшигчийн хувьд татвар төлөх үүрэгтэй бөгөөд ажлын хэсгийн хуралдаанаар нийслэлийн хэмжээнд 2019 оны татвараа төлөөгүй 6300 тээврийн хэрэгслийн эзэмшигчтэй холбогдож, татварыг төлүүлэх талаар хэлэлцэж, уг ажлын хүрээнд тухайн татваруудыг суутган авсан хариуцагчийн үйлдлийг буруутгах хууль зүйн үндэслэл тогтоогдохгүй байна.

Өөрөөр хэлбэл нэхэмжлэгч нь аль дүүрэгт бүртгэлтэйгээс үл хамаарч тухайн татваруудыг төлөх үүрэгтэй бөгөөд татвар төлөлтийн талаарх мэдээлэл нийслэлийн хэмжээнд нэгдсэн бүртгэлд бүртгэгдэж тэмдэглэгээ хийгддэг байх тул хариуцагчийн дээрх татваруудыг нэхэмжлэгчийн даснаас татан авсан үйлдэл нь Захиргааны Ерөнхий хуулийн 47 дугаар зүйлд заасан захиргааны акт илт хууль бус болох аль ч шинжийг агуулаагүй байна.

Иймд нэхэмжлэгчийн нэхэмжлэлийн шаардлагыг бүхэлд нь хэрэгсэхгүй болгож шийдвэрлэх нь зүйтэй гэж шүүх үзлээ.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.2, 106.3.14 дэх заалтад заасныг тус тус удирдлага болгон ТОГТООХ нь:

1. Монгол Улсын автотээврийн болон өөрөө явагч хэрэгслийн албан татварын тухай хуулийн 3 дугаар зүйл, 6 дугаар зүйлийн 6.1, 7.1, Агаарын бохирдлын төлбөрийн тухай хуулийн 4 дүгээр зүйлийн 4.1.4, Татварын Ерөнхий хуулийн /2008 оны/ 63 дугар зүйлийн 63.1, Захиргааны Ерөнхий хуулийн 47 дугаар зүйлийн 47.1-д заасныг тус тус баримтлан ТХХК-ийн нэхэмжлэлтэй Сүхбаатар дүүргийн Татварын хэлтэст холбогдох Сүхбаатар дүүргийн Татварын хэлтсийн 2019 оны 12 дугаар сарын 23-ны өдрийн татвар суутгасан захиргааны актыг илт хууль бус болохыг тогтоолгохыг хүссэн нэхэмжлэлийг бүхэлд нь хэрэгсэхгүй болгосугай.

2. Улсын тэмдэгтийн хураамжийн тухай хуулийн 7 дугаар зүйлийн 7.1.2, Захиргааны хэрэг шүүхэд хянан шийдвэрлэх тухай хуулийн 51 дүгээр зүйлийн 51.1, 47 дугаар зүйлийн 47.1-д тус тус зааснаар нэхэмжлэгчийн улсын тэмдэгтийн хураамжид төлсөн 70200 төгрөгийг төрийн сангийн орлогод хэвээр үлдээсүгэй.

3. Захиргааны хэрэг шүүхэд хянан шийдвэрлэх тухай хуулийн 108 дугаар зүйлийн 108.2 дахь хэсэгт зааснаар шүүхийн шийдвэр танилцуулан сонсгосноор хүчинтэй болох ба хэргийн оролцогчид, түүний төлөөлөгч, өмгөөлөгч мөн хуулийн 108 дугаар зүйлийн 108.3 дах хэсэгт заасан хугацаа өнгөрснөөс хойш 14 хоногийн дотор тус шүүхэд хүрэлцэн ирж шүүхийн шийдвэрийг өөрөө гардан авах үүрэгтэй бөгөөд ийнхүү аваагүй нь давж заалдах гомдол гаргах хугацааг хуульд заасан журмын дагуу тоолоход саад болохгүй болохыг дурдсугай.

4. Захиргааны хэрэг шүүхэд хянан шийдвэрлэх тухай хуулийн 114 дүгээр зүйлийн 114.1 дэх хэсэгт зааснаар хэргийн оролцогч, тэдгээрийн төлөөлөгч, өмгөөлөгч шүүхийн шийдвэрийг эс зөвшөөрвөл гардан авснаас хойш 14 хоногийн дотор Захиргааны хэргийн давж заалдах шатны шүүхэд гомдол гаргах эрхтэй.

 

 

ДАРГАЛАГЧ ШҮҮГЧ Б.МӨНХ-ЭРДЭНЭ