МОНГОЛ УЛСЫН НЭРИЙН ӨМНӨӨС

Завхан аймаг дахь сум дундын эрүүгийн хэргийн анхан шатны шүүхийн шүүх хуралдааныг шүүгч П.Доржбал даргалж,

Шүүх хуралдааны нарийн бичгийн дарга М.Баярмэнд,

Улсын яллагч Б.Төрболд,

Шүүгдэгчийн өмгөөлөгч В.С,

Шүүгдэгч О.Н нарыг оролцуулан тус шүүхийн шүүх хуралдааны танхимд нээлттэй явуулж, Завхан аймгийн прокурорын газрын хяналтын прокуророос Эрүүгийн хуулийн тусгай ангийн 27.10 дугаар зүйлийн 5 дахь хэсэгт зааснаар яллах дүгнэлт үйлдэж, хялбаршуулсан журмаар хянан шийдвэрлүүлэх саналтай ирүүлсэн шүүгдэгч О.Н-т холбогдох 2423001200115 дугаартай эрүүгийн хэргийг хянан хэлэлцэв.

Шүүгдэгч: Монгол Улсын иргэн, 1993 оны 09 дүгээр сарын 03-ны өдөр .... хотод төрсөн, 31 настай, эрэгтэй, бүрэн дунд боловсролтой, мэргэжилгүй, хувиараа барилгын ажил эрхэлдэг, ам бүл 5, ээж, ах, эгч, дүү нарын хамт амьдардаг, Завхан аймгийн .... сумын ... багийн .... хэсэг 6-2 тоотод оршин суух хаягтай, урьд эрүүгийн хариуцлага хүлээж байгаагүй, .... овогт ...-ын Н, регистрийн дугаар ........,

                                                        Холбогдсон хэргийн талаар:

Шүүгдэгч О.Н нь тээврийн хэрэгсэл жолоодох эрхээ хасуулсан үедээ архи согтууруулах ундааны зүйл хэрэглэн 2024 оны 09 дүгээр сарын 20-ны өдөр 19 цагийн орчимд Завхан аймгийн .... сумын .... багийн нутаг дэвсгэрт “Porter” маркийн 00-00 ЗАН улсын дугаартай тээврийн хэрэгслийг жолоодон замын хөдөлгөөнд оролцсон гэмт хэрэгт холбогджээ.

Шүүгдэгчийн холбогдсон хэрэг нь Эрүүгийн хуулийн тусгай ангийн 27.10 дугаар зүйлийн 5 дахь хэсэгт заасан “тээврийн хэрэгсэл жолоодох эрхээ хасуулсан хүн согтуурсан үедээ тээврийн хэрэгсэл жолоодсон” гэмт хэрэгт хамаарч байна.

Шүүх хуралдаанаар хэлэлцэгдсэн, хэрэгт цугларсан яллах болон цагаатгах нотлох баримтуудыг шинжлэн судлаад

                                                                      ТОДОРХОЙЛОХ нь:

                            Нэг. Шүүгдэгчийг гэмт хэрэг үйлдсэн гэм буруутайд тооцсон талаар:

Шүүгдэгч О.Н нь тээврийн хэрэгсэл жолоодох эрх хасагдсан үедээ буюу 2024 оны 09 дүгээр сарын 20-ны өдөр 19 цагийн орчимд Завхан аймгийн .... сумын .... багийн нутаг дэвсгэрт “Porter” маркийн 00-00 ЗАН улсын дугаартай тээврийн хэрэгслийг согтуурсан үедээ жолоодон замын хөдөлгөөнд оролцсон болох нь хэрэгт авагдсан шүүх хуралдаанаар хэлэлцэгдсэн дараах нотлох баримтуудаар тогтоогдож байна. Тухайлбал:

О.Н-ыг согтуурсан үедээ тээврийн хэрэгсэл жолоодсоныг нотолсон гэрч П.Б-ийн “...Би тухайн өдөр үндсэн постод гарч байсан ба над руу Хүүхдийн асуудал хариуцсан мэргэжилтэн Г.Д залгаад согтуугаар тээврийн хэрэгсэл жолоодож явсан хүн цагдаа дээр аваад ирлээ гээд дуудсан. Би цагдаагийн газар дээр ирээд тухайн иргэнийг согтуурал шалгах драгер багажаар үлээлгэж шалгахад О.Н-аас 2.30 бүхэл гарч согтолтын өндөр зэрэгтэй байсан. О.Н-ын тээврийн хэрэгслийг тээврийн хэрэгсэл түр саатуулах байранд аваачиж хийсэн...” гэсэн мэдүүлэг /хавтаст хэргийн 21-22 дугаар хуудас/,

Гэрч Б.Э-ын “...Тухайн үед Хүүхдийн асуудал хариуцсан мэргэжилтэн Г.Д намайг дуудаад хамт Шинэ хороо орж О.Н-ын гэрт очоод ирье гээд дагуулаад явсан. О.Н-ын гэрт очиход гэр нь цоожтой хүн байхгүй байхаар нь Цагдаагийн газар луу буцаад явж байхад О.Н тэжээлийн фондны тэндээс цэнхэр өнгийн “Porter” маркийн 00-00 ЗАН улсын дугаартай тээврийн хэрэгсэлтэй ирж байхыг нь хараад урдаас очоод зогсоосон. Буугаад очоод уулзахад О.Н согтуу байсан. Г.Д согтуугаар тээврийн хэрэгсэл жолоодож явсан байна машиныг нь уначих цагдаа оръё гэсэн. Би түүний “Porter” маркийн 00-00 ЗАН улсын дугаартай тээврийн хэрэгслийг жолоодоод цагдаа дээр ирээд замын цагдаад хүлээлгэж өгөөд би яваад өгчихсөн. Тухайн тээврийн хэрэгслийг О.Н жолоодож явсан. Тээврийн хэрэгсэл дотор нэг танихгүй залуу явж байсан...” гэсэн мэдүүлэг /хавтаст хэргийн 25-26 дугаар хуудас/,

 Гэрч Г.Д-ийн “...Тухайн үед Цагдаагийн газраас багийн цагдаа О.Э-ыг дагуулаад Шинэ хороо руу О.Н-ын гэрт очихоор явсан. О.Н-ын гэрт очиход гэр нь цоожтой хүн байхгүй байсан бөгөөд Цагдаагийн газар луу буцаад явж байхад О.Н Тэжээлийн фондны тэндээс цэнхэр өнгийн “Porter” маркийн 00-00 ЗАН улсын дугаартай тээврийн хэрэгсэлтэй ирж байхыг хараад урдаас нь очоод зогсоосон. Бууж очоод уулзахад О.Н согтуу байсан тэгэхээр нь би согтуугаар тээврийн хэрэгсэл жолоодож явсан байна гээд машиныг нь Б.Э-д бариулаад цагдаа орсон. Цагдаа дээр замын цагдаа П.Б-ийг дуудаж О.Н-ын согтолтын зэргийн драгер багажаар тогтоолгуулахад 2.30 бүхэлтэй гарсан. Би замын цагдаад хүлээлгэж өгөөд явсан. Би О гэх хүний утасны дэлгэцийг хагалсан талаар тодруулах гэж Б.Э-ыг дагуулж О.Н-х руу явсан...” гэсэн мэдүүлэг /хавтаст хэргийн 29-30 дугаар хуудас/,

Гэрч О.Б-ийн “...Тухайн үед Богдын голын намаржаанаас аргал түүх гэж О.Н-тай хамт явсан. Намаржаан дээр очоод дүү О.Н-ын хамт 0.5 литртэй архи согтууруулах ундааны зүйл хэрэглэсэн. Манай дүү О.Н “Porter” маркийн 00-00 ЗАН улсын дугаартай тээврийн хэрэгслээ унаад бид 2 манай гэрийн гадаа очих гээд явж байхад цагдаа зогсоосон. Цагдаа бууж ирээд архи согтууруулах ундааны зүйл хэрэглэсэн үедээ тээврийн хэрэгсэл жолоодож явсан байна аваад яв гэхээр нь би машинаас буугаад гэр рүүгээ явсан…” гэсэн мэдүүлэг /хавтаст хэргийн 33-34 дүгээр хуудас/,

Завхан аймгийн Цагдаагийн газрын Замын цагдаагийн тасгийн (цагдаа) зохицуулагч цагдаагийн дэд ахлагч П.Б-ийн 2024 оны 09 дүгээр сарын 20-ны өдрийн жолоочийн согтууруулах ундаа, мансууруулах эм, сэтгэцэд нөлөөт бодис хэрэглэсэн эсэхийг шалгасан “...2.30% тоон үзүүлэлт илэрч, согтууруулах ундаа, мансууруулах эм, сэтгэцэд нөлөөт бодис хэрэглэсэн болох нь тогтоогдлоо...” гэх тэмдэглэл /хавтаст хэргийн 06 дугаар хуудас/,

Завхан аймаг дахь сум дундын Эрүүгийн хэргийн анхан шатны шүүхийн 2024 оны 05 дугаар сарын 21-ний өдрийн 2024/ЗШ/135 дугаартай шийтгэвэр, /хавтаст хэргийн 9-11 дүгээр хуудас/,

Завхан аймгийн Цагдаагийн газрын Мөрдөн байцаах тасгийн ахлах мөрдөгч, цагдаагийн хошууч Т.Л-ийн 2024 оны 10 дугаар сарын 01-ний өдрийн “...2.1 .... ургийн ...-ын Н нь  согтууруулах ундааны зүйл хэрэглэсэн үедээ буюу 2024 оны 09 дүгээр сарын 20-ны өдөр Завхан аймаг .... сум .... багийн нутаг дэвсгэрт 00-00 ЗАН улсын дугаартай “Porter” маркийн тээврийн хэрэгсэл жолоодон замын хөдөлгөөнд оролцсон үйлдэл нь Монгол улсын замын хөдөлгөөний холбогдох заалтыг зөрчсөн гэх нөхцөл байдал тогтоогдож байна.

- ... ургийн ...-ын Н нь согтууруулах ундааны зүйл хэрэглэсэн үедээ буюу 2024 оны 09 дүгээр сарын 20-ны өдөр Завхан аймаг .... сум .... багийн нутаг дэвсгэрт 00-00 ЗАН улсын дугаартай “Porter” маркийн тээврийн хэрэгсэл жолоодон замын хөдөлгөөнд оролцсон үйлдэл нь Монгол улсын замын хөдөлгөөний дүрмийн 3.7 дахь хэсгийн а заалтад заасан “... тухайн ангиллын тээврийн хэрэгслийг жолоодох эрхгүй (жолоодлогын дадлага хийхээс бусад тохиолдолд), эсхүл согтууруулах ундаа, мансууруулах эм, сэтгэцэд нөлөөт бодис хэрэглэсэн, мөн хөдөлгөөний аюулгүй байдлыг хангаж чадахааргүй өвчтэй буюу ядарсан үедээ тээврийн хэрэгсэл жолоодохыг хориглоно...” гэсэн заалтыг зөрчсөн байна...” гэсэн магадалгаа /хавтаст хэргийн 39-40 дүгээр хуудас/,

- Завхан аймаг дахь сум дундын Эрүүгийн хэргийн анхан шатны шүүхийн 2024 оны 05 дугаар сарын 21-ний өдрийн 2024/ЗШ/135 дугаартай шийтгэвэр /хавтаст хэргийн 09-11 дүгээр хуудас/ зэрэг хуульд заасан үндэслэл, журмын дагуу хавтаст хэрэгт цуглуулж бэхжүүлсэн нотлох баримтуудаар тогтоогдож байна.

Шүүх хэрэгт авагдсан нотлох баримтуудыг Эрүүгийн хэрэг хянан шийдвэрлэх тухай хуулийн 16.1 дүгээр зүйлийн 13 дахь хэсэгт заасныг баримтлан үнэлсэн бөгөөд хэргийн үйл баримтыг нотолж байгаа баримтууд нь тухайн хэрэгт хамааралтай, Эрүүгийн хэрэг хянан шийдвэрлэх тухай хуульд заасны дагуу цуглуулж, бэхжүүлсэн нотлох баримтууд нь ач холбогдолтой, хууль ёсны, уг хэргийг хянан шийдвэрлэхэд хангалттай байна.

Хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг бүрэн шалгаж тодруулсан, хэрэг хянан шийдвэрлэх ажиллагааны явцад оролцогчийн хуулиар хамгаалагдсан эрхийг хассан хязгаарласан зөрчил тогтоогдоогүй.

Замын хөдөлгөөний аюулгүй байдлын тухай хуулийн 12 дугаар зүйлийн 3 дахь хэсэгт зааснаар замын хөдөлгөөнд оролцогч нь замын хөдөлгөөний аюулгүй байдлын тухай хууль тогтоомжийг биелүүлэх үүрэгтэй бөгөөд Монгол Улсын Замын хөдөлгөөний дүрмийн 3.1а-д тухайн ангиллын тээврийн хэрэгслийг жолоодох эрхийн хүчинтэй үнэмлэх буюу түр зөвшөөрөл /жолоодлогын дадлага хийж яваа суралцагчид хамаарахгүй/ гэж, мөн дүрмийн 3.7а-д “тухайн ангиллын тээврийн хэрэгслийг жолоодох эрхгүй /жолоодлогын дадлага хийхээс бусад тохиолдолд/, эсхүл согтууруулах ундаа, мансууруулах эм, сэтгэцэд нөлөөт бодис хэрэглэсэн мөн хөдөлгөөний аюулгүй байдлыг хангаж чадахааргүй өвчтэй буюу ядарсан үедээ тээврийн хэрэгсэл жолоодохыг хориглоно” гэж тус тус заасан.

Дээрх хориглосон заалтыг зөрчиж тээврийн хэрэгсэл жолоодох эрхээ хасуулсан хүн согтуурсан үедээ дахин тээврийн хэрэгсэл жолоодсон тохиолдолд Эрүүгийн хуулийн тусгай ангийн 27.10 дугаар зүйлийн 5 дахь хэсэгт зааснаар “Тээврийн хэрэгсэл жолоодох эрхээ хасуулсан хүн согтуурсан, мансуурсан үедээ тээврийн хэрэгсэл жолоодсон, эсхүл согтуурсан, мансуурсан эсэхийг зохих журмын дагуу шалгуулахаас зайлсхийсэн” гэмт хэргийн шинж болгон, эрүүгийн хариуцлага хүлээлгэхээр хуульчилсан.

Эрүүгийн хуулийн тусгай ангийн 27.10 дугаар зүйлийн 5 дахь хэсэгт заасан гэмт хэргийн субъектийг тус зүйлийн хуульчилсан тайлбарт “Тээврийн хэрэгсэл жолоодох эрхээ хасуулсан хүн” гэж согтуурсан, мансуурсан үедээ тээврийн хэрэгсэл жолоодсон, эсхүл согтуурсан, мансуурсан эсэхийг зохих журмын дагуу шалгуулахаас зайлсхийсэн үйлдлийн улмаас тээврийн хэрэгсэл жолоодох эрхээ хасуулсан хүнийг ойлгоно” гэж тайлбарласан.

Шүүгдэгч О.Н нь 2024 оны 09 дүгээр сарын 20-ны өдөр 19 цагийн орчимд Завхан аймгийн .... сумын ... багийн нутаг дэвсгэрт “Porter” маркийн 00-00 ЗАН улсын дугаартай тээврийн хэрэгслийг согтуурсан үедээ жолоодсон болох нь эрх бүхий албан тушаалтны жолоочийн согтууруулах ундаа хэрэглэсэн эсэхийг шалгасан “...О.Н-ын согтолтыг “Аlcоtest” багаж ашиглан шалгахад 2.30% тоон хувийн тоон үзүүлэлт илэрч, согтууруулах ундаа хэрэглэсэн болох нь тогтоогдлоо” гэсэн тэмдэглэлээр /хавтаст хэргийн 03 дугаар хуудас/ тогтоогдсон байна.

Мөн шүүгдэгч О.Н нь 2024 оны 05 дугаар сарын 21-ний өдөр Зөрчлийн тухай хуулийн тусгай ангийн 14.7 дугаар зүйлийн 5 дахь хэсгийн 5.2-т зааснаар тээврийн хэрэгсэл жолоодох эрхээ 1 жилийн хугацаагаар хасуулсан болох нь Завхан аймаг дахь сум дундын Эрүүгийн хэргийн анхан шатны шүүхийн 2024 оны 05 дугаар сарын 21-ний өдрийн 2024/ЗШ/135 дугаартай шийтгэвэр болон Цагдаагийн ерөнхий газрын жолоочийн лавлагаа, мэдээллээр нотлогдож байх бөгөөд тэрээр тээврийн хэрэгсэл жолоодох эрхээ хасуулсан гэдгээ мэдсээр байж 2024 оны 09 дүгээр сарын 20-ны өдөр Завхан аймаг ... сум ... багийн нутаг дэвсгэрт 00-00 ЗАН улсын дугаартай “Porter” маркийн тээврийн хэрэгсэл жолоодон замын хөдөлгөөнд оролцсон үйлдэл нь Эрүүгийн хуулийн тусгай ангийн 27.10 дугаар зүйлийн 5 дахь хэсэгт заасан гэмт хэргийн шинжтэй байна.

Иймд шүүгдэгч О.Н-ыг Эрүүгийн хуулийн тусгай ангийн 27.10 дугаар зүйлийн 5 дахь хэсэгт заасан “Тээврийн хэрэгсэл жолоодох эрхээ хасуулсан хүн согтуурсан үедээ тээврийн хэрэгсэл жолоодсон” гэмт хэрэг үйлдсэн гэм буруутайд тооцож эрүүгийн хариуцлага хүлээлгэх нь зүйтэй.  

Шүүгдэгч О.Н нь өөрийн холбогдсон хэргийг хялбаршуулсан журмаар хянан шийдвэрлүүлэх хүсэлтийг сайн дураар гаргаснаа илэрхийлж байх ба түүнд эрүү шүүлт тулгах, хүнлэг бус харьцах, хуурч мэхлэх зэрэг хууль бусаар хэрэг хүлээлгэсэн нөхцөл байдал тогтоогдоогүй болно.

Энэ хэргийн улмаас бусдад хохирол, хор уршиг учраагүй байх тул шүүгдэгч О.Н-ыг бусдад төлөх төлбөргүй гэж үзлээ.

                              Хоёр. Шүүгдэгчид эрүүгийн хариуцлага хүлээлгэх талаар:

Шүүгдэгч О.Н-ыг Эрүүгийн хуулийн тусгай ангийн 27.10 дугаар зүйлийн 5 дахь хэсэгт заасан “Тээврийн хэрэгсэл жолоодох эрхээ хасуулсан хүн согтуурсан үедээ тээврийн хэрэгсэл жолоодсон” гэмт хэрэг үйлдсэн гэм буруутайд тооцсон тул Эрүүгийн хуулийн ерөнхий ангийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ” гэж заасныг баримтлан түүнд эрүүгийн хариуцлага хүлээлгэх нь зүйтэй байна.

Шүүгдэгч О.Н нь гэмт хэрэг үйлдсэн гэм буруугаа хүлээн зөвшөөрсөн, гэмт хэргийн улмаас хохирол, хор уршиг учраагүй тул холбогдох хэргээ хялбаршуулсан журмаар шийдвэрлүүлэх хүсэлт гаргасныг прокуророос хүлээн авч шүүхэд шилжүүлсэн бөгөөд шүүгдэгчид прокурорын сонсгосон эрүүгийн хариуцлага нь Эрүүгийн хуулийн 1.3 дугаар зүйлийн 1 дэх хэсэгт заасан “Эрүүгийн хариуцлага нь тухайн хүн, хуулийн этгээдийн үйлдсэн гэмт хэрэг, гэмт хэргийн нийгмийн аюулын шинж чанар хэр хэмжээ, гэм буруугийн хэлбэрт тохирсон байна” гэсэн зарчмыг зөрчөөгүй, шүүх хуралдаанаар Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 4 дэх хэсэгт заасан нөхцөл байдлыг хянахад бүрэн хангагдсан байна.

Түүнчлэн Эрүүгийн хуулийн 5.1 дүгээр зүйлийн 1 дэх хэсэгт “Эрүүгийн хариуцлагын  зорилго нь гэмт хэрэг үйлдсэн хүн, хуулийн этгээдийг цээрлүүлэх, гэмт хэргийн улмаас зөрчигдсөн эрхийг сэргээх, хохирлыг нөхөн төлүүлэх, гэмт хэргээс урьдчилан сэргийлэх, гэмт хэрэг үйлдсэн хүнийг нийгэмшүүлэхэд оршино” гэж заасан эрүүгийн хариуцлагын зорилготой нийцэж байгаа тул түүнд эрүүгийн хариуцлага хүлээлгэхдээ хөнгөрүүлэх, хүндрүүлэх нөхцөл байдлыг харгалзан үзэлгүйгээр прокурорын саналын хүрээнд буюу шүүгдэгч О.Н-т Эрүүгийн хуулийн тусгай ангийн 27.10 дугаар зүйлийн 5 дахь хэсэгт зааснаар тээврийн хэрэгсэл жолоодох эрхийг 1 /нэг/ жилийн хугацаагаар хасаж, 240 цагийн хугацаагаар нийтэд тустай ажил хийлгэх ялыг оногдуулж уг ялыг өдөрт 8 /найм/ цагаар тогтоож шийдвэрлэлээ.

Шүүгдэгч О.Н нь шүүхээс оногдуулсан нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солих журмыг тайлбарлах нь зүйтэй. 

Эрүүгийн хуулийн ерөнхий ангийн 5.7 дугаар зүйлийн 3 дахь хэсэгт “шүүх эрх хасах ялыг хорих ял дээр оногдуулсан бол уг ялыг эдэлж дууссаны дараа, эсхүл торгох, нийтэд тустай ажил хийлгэх, зорчих эрхийг хязгаарлах ял дээр нэмж оногдуулсан бол ял оногдуулсан үеэс, эсхүл хорих ял оногдуулахгүйгээр үүрэг хүлээлгэх, эрх хязгаарлах албадлагын арга хэмжээ авсан бол албадлагын арга хэмжээ авсан үеэс хугацааг тоолно” гэж заасан байх тул шүүгдэгч О.Н-т оногдуулсан тээврийн хэрэгсэл жолоодох эрх хасах 1 /нэг/ жилийн нэмэгдэл ялын хугацааг түүнд нийтэд тустай ажил хийлгэх ял оногдуулсан үеэс эхлэн тоолох нь зүйтэй.

Шүүгдэгч нь энэ хэрэгт цагдан хоригдсон хоноггүй, түүнээс гаргуулах хэрэг хянан шийдвэрлэх ажиллагааны зардалгүй, хэрэгт битүүмжилсэн эд хөрөнгөгүй, эд мөрийн баримтаар хураагдсан зүйлгүй болохыг тус тус дурдаж, түүнд урьд авсан хувийн баталгаа гаргах таслан сэргийлэх арга хэмжээг шийтгэх тогтоол хуулийн хүчин төгөлдөр болтол хэвээр үргэлжлүүлэхээр шийдвэрлэв.

Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5 дахь хэсэг, 36.2 дугаар зүйлийн 1, 2, 3, 4 дэх хэсэг, 36.6 дугаар зүйл, 36.7 дугаар зүйл, 36.8 дугаар зүйл, 36.10 дугаар зүйлийн 1, 2, 3, 4 дэх хэсэгт заасныг тус тус удирдлага болгон

                                                                  ТОГТООХ нь:

1. Шүүгдэгч ... овогт ...-ын Н-ыг Эрүүгийн хуулийн тусгай ангийн 27.10 дугаар зүйлийн 5 дахь хэсэгт заасан “Тээврийн хэрэгсэл жолоодох эрхээ хасуулсан хүн согтуурсан үедээ тээврийн хэрэгсэл жолоодсон” гэмт хэрэг үйлдсэн гэм буруутайд тооцсугай.

2. Эрүүгийн хуулийн тусгай ангийн 27.10 дугаар зүйлийн 5 дахь хэсэгт зааснаар шүүгдэгч О.Н-ын тээврийн хэрэгсэл жолоодох эрхийг 1 жилийн хугацаагаар хасаж, 240 /хоёр зуун дөч/ цагийн хугацаагаар нийтэд тустай ажил хийлгэх ялаар шийтгэсүгэй.

3. Эрүүгийн хуулийн ерөнхий ангийн 5.4 дүгээр зүйлийн 2 дахь хэсэгт зааснаар шүүгдэгч О.Н-т оногдуулсан 240 /хоёр зуун дөч/ цагийн хугацаагаар нийтэд тустай ажил хийлгэх ялыг өдөрт 8 /найм/ цагаар тогтоосугай.

4. Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар шүүгдэгч О.Н нь шүүхээс оногдуулсан нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солихыг тайлбарласугай. 

5. Эрүүгийн хуулийн ерөнхий ангийн 5.7 дугаар зүйлийн 3 дахь хэсэгт зааснаар шүүгдэгч О.Н-т оногдуулсан тээврийн хэрэгсэл жолоодох эрх хасах 1 жилийн нэмэгдэл ялын хугацааг түүнд нийтэд тустай ажил хийлгэх ял оногдуулсан үеэс эхлэн тоолсугай.

6. Шүүгдэгч О.Н нь энэ хэрэгт цагдан хоригдсон хоноггүй, бусдад төлөх төлбөргүй, түүнээс гаргуулах эрүүгийн хэрэг хянан шийдвэрлэх ажиллагааны зардалгүй, битүүмжилсэн эд хөрөнгөгүй, эд мөрийн баримтаар хураагдсан зүйлгүй  болохыг тус тус дурдсугай.  

7. Шүүгдэгч О.Н-т урьд авсан хувийн баталгаа гаргах таслан сэргийлэх арга хэмжээг шийтгэх тогтоол хуулийн хүчин төгөлдөр болтол хэвээр үргэлжлүүлсүгэй.

8. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шүүхийн шийдвэр уншиж сонсгосноор хүчинтэй болохыг дурдсугай.

9. Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 7 дахь хэсэгт зааснаар шүүхийн шийдвэрт талууд, оролцогчид гагцхүү Эрүүгийн хэрэг хянан шийдвэрлэх тухай хуулийг ноцтой зөрчсөн үндэслэлээр давж заалдах гомдол, эсэргүүцэл гаргаж болохыг дурдсугай.

                                                     ДАРГАЛАГЧ, ШҮҮГЧ П.ДОРЖБАЛ