МОНГОЛ УЛСЫН НЭРИЙН ӨМНӨӨС

Орхон аймаг дахь Сум дундын Иргэний хэргийн анхан шатны шүүгч Б.Бямбасүрэн даргалж хийсэн шүүх хуралдаанаар

Нэхэмжлэгч: Орхон аймаг, Баян-Өндөр сум, Согоот баг, *******,*******,*******ийн нэхэмжлэлтэй,

Хариуцагч: Орхон аймаг, Баян-Өндөр сум, Зэст баг, *******,*******/ холбогдох

Тээврийн хэрэгсэлийн гэрчилгээний эзэмшигчээр тогтоолгох тухай нэхэмжлэлийг 2018 оны 04 дүгээр сарын 17-ны өдөр хүлээн авч, 2018 оны 04 дүгээр сарын 23-ны өдөр иргэний хэрэг үүсгэн хянан хэлэлцэв.

Шүүх хуралдаанд нэхэмжлэгч *******, хариуцагч Б.Дуламсүрэн, шүүх хуралдааны нарийн бичгийн дарга Х.Заяа нар оролцов.

ТОДОРХОЙЛОХ нь:

Нэхэмжлэгч ******* шүүхэд гаргасан нэхэмжлэлдээ: Миний бие ******* нь Б.Дуламсүрэнгийн ээж Г.Маяатай 1987 оноос 2013 он хүртэл 16 жил хамт 1-13-15 тоотод амьдарч байсан бөгөөд 2013 оны 10 дугаар сараас хойш хамт амьдрахаа больсон юм. Б.Дуламсүрэн нь мөн энэ байранд одоо ч гэсэн хамт амьдарч байгаа болно. Би Г.Маяагаас салахдаа хамтран өмчилж байсан үл хөдлөх хөрөнгө болох Зэт багийн 1-13-15 тоотоос өөрийн нэрээ хасуулсан болно. 2012 оны 07 дугаар сарын 04-ний өдөр би Ниссан маркийн X-трайл 99-99 ора улсын дугаартай тээврийн хэрэгсэлийг анх худалдаж авч байсан ба 2013.10.07-ны өдөр зөвхөн машиныхаа бичиг баримтыг Г.Маяагийн бага охин Б.Дуламсүрэнгийн нэр дээр шилжүүлсэн юм. Гэхдээ би дээрх тээврийн хэрэгсэлийг анх худалдаж авсан үеэс өнөөг хүртэл ашиглаж унаж хэрэглэсээр байгаа болно. Би хойд охин Б.Дуламсүрэнгээс миний машины бичиг баримтыг минь нэр дээр шилжүүлж өгөөч гэж ээжээр нь хэлүүлэхэд за гээд өнөөдрийг хүргэсэн тул аргагүй эрхэнд шүүхэд хандахаас өөр аргагүй байдалд хүрлээ. Иймд Ниссан маркийн X-трайл 99-99 ора улсын дугаартай тээврийн хэрэгсэлийн эзэмшигчээр ******* намайг тогтоож өгнө үү гэжээ.

Хариуцагч Б.Дуламсүрэн шүүхэд ирүүлсэн хариу тайлбартаа: *******ийн Тээврийн хэрэгслийн эзэмшигчээр тогтоолгох тухай нэхэмжлэлд хариуцагч Б.Дуламсүрэнгийн зүгээс доорхи тайлбарыг гаргаж байна.

Х-трайл маркийн ******* улсын дугаартай автомашиныг миний төрсөн эх Г.Мааяа нь тэтгэвэрийн зээлийнхээ тодорхой хувийг төлж надад авч өгсөн тул *******ийг шууд эзэмшигчээр тогтоолгох боломжгүй юм. Тиймээс иргэн Г.Мааяагийн тайлбарт дурьдсаны дагуу машины төлбөр болох 4 362 126 /дөрвөн сая гурван зуун жаран хоёр мянга нэг зуун хорин зургаа/ төгрөгийг төлж барагдуулсны дараа машиныг өөрийнх нь өмчлөлд шилжүүлж өгнө.

Нэхэмжлэлд дурьсанчлан миний ээж Г.Мааяагийн өмч хувьчлалаар авсан байрыг өөрийн байр мэтээр худал бичсэнийг нь нотлох үл хөдлөх хөрөнгийн лавлагааны баримтыг хавсаргав. Мөн энэ мэт найз Үнэнбүрэнгийн төрсөн дүү Чинбатын байрыг өөрийн мэтээр залилаж нэр дээрээ шилжүүлж аваад шүүхийн зарлан өгөөд дуудаад ирээгүй учраас манайд цагдаа ирээд гав зүүлгээд аваад явж байсныг энд дурьдах нь зүйтэй.

******* нь Эрдэнэтэд амьдрах газаргүй биш юм. Учир нь өөрийн хоёр хүүхэд, төрсөн хоёр дүү нь байдаг. Гэхдээ тэд нартайгаа зан харилцааны хувьд таардаггүй гэжээ.

Шүүхийн хэлэлцүүлэгт бичгийн нотлох баримтыг шинжлэн судлаад

ҮНДЭСЛЭХ нь:

Нэхэмжлэгч ******* нь хариуцагч Б.Дуламсүрэнд холбогдуулан ******* улсын дугаартай Ниссан Х-трайл маркийн суудлын автомашины тээврийн хэрэгсэлийн гэрчилгээний эзэмшигчээр тогтоолгох тухай нэхэмжлэлийн шаардлага гаргажээ.

Нэхэмжлэгч ******* нь ******* улсын дугаартай Х-трайл маркийн суудлын автомашины тээврийн хэрэгсэлийн эзэмшигчээр тогтоолгох нэхэмжлэлийн шаардлага гаргасныг, хариуцагч эс зөвшөөрч, миний төрсөн эх Г.Мааяа нь тэтгэвэрийн зээлийнхээ тодорхой хувийг төлж надад авч өгсөн, машины төлбөрийн 50 хувь болох 4 362 126 /дөрвөн сая гурван зуун жаран хоёр мянга нэг зуун хорин зургаа/ төгрөгийг төлж барагдуулсны дараа машиныг шилжүүлж өгөх болно гэж маргаж байна.

Хэрэгт авагдсан баримтаас үзэхэд ******* улсын дугаартай Ниссан Х-трайл маркийн суудлын автомашиныг ******* нь 2012 оны 07 дугаар сарын 04-ний өдөр өөрийн өмчлөлд шилжүүлэн тээврийн хэрэгсэлийн гэрчилгээ авсан байх бөгөөд 2013 оны 10 дугаар сарын 07-ны өдөр тээврийн хэрэгсэлийг бүртгэх маягтаар тээврийн хэрэгсэлийн эзэмшигчийг өөрчлөн Б.Дуламсүрэнгийн нэр дээр шилжүүлсэн болох нь ******* дугаартай тээврийн хэрэгсэлийн гэрчилгээ, зохигчдын тайлбараар тогтоогдож байна.

******* улсын дугаартай Х-трайл маркийн суудлын автомашиныг нэхэмжлэгч ******* нь ашигладаг, хариуцагч нэг ч удаа ашиглаж байгаагүй талаар талууд маргахгүй байна.

Хариуцагч 4 362 126 /дөрвөн сая гурван зуун жаран хоёр мянга нэг зуун хорин зургаа/ төгрөгийг төлж барагдуулсны дараа машиныг шилжүүлж өгөх болно гэж нэхэмжлэлийн шаардлагыг хүлээн зөвшөөрөхгүй байгаа үндэслэлээ тайлбарлаж байгаа боловч, нэхэмжлэгчээс 4 362 126 төгрөг гаргуулах сөрөг нэхэмжлэлийн шаардлага гаргаагүй, гаргасан тайлбараа бичгийн баримтаар нотолж чадахгүй байх тул ******* улсын дугаартай Ниссан Х-трайл маркийн суудлын автомашины ******* дугаартай тээврийн хэрэгсэлийн гэрчилгээний эзэмшигчээр *******ийг тогтоох үндэслэлтэй гэж шийдвэрлэв.

Улсын тэмдэгтийн хураамжийг хуулийн дагуу хуваарилав.

Монгол Улсын Иргэний хэргийг шүүхэд хянан шийдвэрлэх тухай хуулийн 115 дугаар зүйлийн 115.2.1,116,118 дугаар зүйлүүдэд заасныг удирдлага болгон ТОГТООХ нь:

1.Иргэний хуулийн 106 дугаар зүйлийн 106.1-д зааснаар 99-99 ОРА улсын дугаартай Ниссан Х-трайл маркийн суудлын автомашины ******* дугаартай тээврийн хэрэгсэлийн гэрчилгээний эзэмшигчээр Арс овогт Содномдоржийн Шагжийг******* тогтоосугай.

2.Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 57 дугаар зүйлийн 57.1-т зааснаар нэхэмжлэгчийн улсын тэмдэгтийн хураамжинд урьдчилан төлсөн 70,200 төгрөгийг Төрийн санд хэвээр үлдээж, хариуцагч Б.Дуламсүрэнгээс 70,200 төгрөг гаргуулан нэхэмжлэгчид олгосугай.

3.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4, 119.7 дахь хэсэгт зааснаар энэхүү шийдвэр нь танилцуулан сонсгомогц хуулийн хүчинтэй болох бөгөөд мөн хуулийн 119.3-д заасан хугацаа өнгөрмөгц 14 хоногийн дотор шүүхэд хүрэлцэн ирж шийдвэрийг өөрөө гардан авах ба ийнхүү аваагүй нь гомдол гаргах хугацааг хуульд заасан журмын дагуу тоолоход саад болохгүйг дурдаж, зохигчид шийдвэрийг эс зөвшөөрвөл гардан авсан өдрөөс хойш 14 хоногийн дотор Орхон аймгийн Иргэний хэргийн давж заалдах шатны шүүхэд давж заалдах гомдол гаргах эрхтэйг дурьдсугай.

 

 

 

ДАРГАЛАГЧ,ШҮҮГЧ Б.БЯМБАСҮРЭН