2020 оны 02 сары 17 өдөр

181/ШШ2020/00476

 

 

 

МОНГОЛ УЛСЫН НЭРИЙН ӨМНӨӨС

 

 

Сүхбаатар дүүргийн Иргэний хэргийн анхан шатны шүүхийн шүүгч Б.Ууганбаяр даргалж, тус шүүхийн танхимд хийсэн шүүх хуралдаанаар,

 

Нэхэмжлэгч: Б.А /РД:/-ын нэхэмжлэлтэй,

 

Хариуцагч: С ХХК /РД:/-д холбогдох,

 

Ажилд эгүүлэн тогтоолгох, ажилгүй байсан хугацааны цалинтай тэнцэх олговор гаргуулах, нийгмийн болон эрүүл мэндийн даатгалын шимтгэлийг нөхөн төлүүлж, дэвтэрт бичилт хийлгэх тухай нэхэмжлэлийн шаардлагатай иргэний хэргийг хянан хэлэлцэв.

 

Шүүх хуралдаанд: Нэхэмжлэгчийн төлөөлөгч У.*******, нэхэмжлэгчийн өмгөөлөгч Ж.*******, хариуцагчийн төлөөлөгч Б.*******, хариуцагчийн өмгөөлөгч Т.*******, шүүх хуралдааны нарийн бичгийн дарга Ц.Мядагмаа нар оролцов.

 

ТОДОРХОЙЛОХ НЬ:

 

Нэхэмжлэгч, түүний төлөөлөгч шүүхэд гаргасан нэхэмжлэл болон шүүх хуралдаанд гаргасан тайлбартаа: Нэхэмжлэгч Б.А нь С ХХК-ийн гүйцэтгэх захирлын 2019 оны 08 дугаар сарын 16-ны өдрийн 35 дугаартай тушаалаар тус компанид бараа түгээлтийн ажилтнаар томилогдож, 2019 оны 08 дугаар сарын 19-ний өдөр хөдөлмөрийн гэрээ байгуулан гэрээгээр хүлээсэн үүргээ ямар нэгэн зөрчил, дутагдалгүй биелүүлж, компанийн бүтээгдэхүүнийг харилцагч, үйлчлүүлэгчид хүргэн өгч ажиллаж байсан. Гэтэл 2019 оны 11 дүгээр сарын 18-ны өдөр гэнэт Хөдөлмөрийн тухай хуулийн 23 дугаар зүйлийн 23.2.3, 23 дугаар зүйлийн 23.3 дахь хэсгийг тус тус үндэслэн ажлаас чөлөөлсөн тухай хариуцагч компанийн гүйцэтгэх захирлын 64 дугаартай тушаал танилцуулж, ажлаа хүлээлгэн өгөхийг шаардсан. Ингэхдээ ямар үндэслэл, шалтгаанаар намайг ажлаас чөлөөлж байгаагаа ч тайлбарлаж өгөөгүй тул энэхүү тушаалыг хүлээн зөвшөөрөхгүй. Түүнчлэн ажлаас чөлөөлсөн 2019 оны 11 дүгээр сарын 18-ны өдрийн 64 дугаартай тушаал нь хууль зүйн үндэслэлгүй байх ба дээрх хуулийн зохицуулалт нь хөдөлмөрийн гэрээ цуцлах тухай биш харин хөдөлмөрийн гэрээний хугацааг зохицуулсан заалтууд байна. Иймд С ХХК-д холбогдуулан ажилд эгүүлэн тогтоолгох, ажилгүй байсан хугацааны цалин гаргуулах, ажилгүй байсан хугацааны нийгмийн болон эрүүл мэндийн даатгалын дэвтэрт нөхөн бичилт хийлгэх тухай нэхэмжлэл гаргаж байна. гэв.

Хариуцагч, түүний төлөөлөгч шүүхэд гаргасан хариу тайлбар болон шүүх хуралдаанд гаргасан тайлбартаа: Нэхэмжлэгч Б.А нь С ХХК-д холбогдуулан ажилд эгүүлэн тогтоолгох, ажилгүй байсан хугацааны цалин гаргуулах, ажилгүй байсан хугацааны нийгмийн болон эрүүл мэндийн даатгалын дэвтэрт нөхөн бичилт хийлгүүлэх тухай нэхэмжлэлийн шаардлага гаргасныг дараах үндэслэлээр хүлээн зөвшөөрөхгүй байна. Хөдөлмөрийн тухай хуулийн 23 дугаар зүйлийн 23.1-д хөдөлмөрийн гэрээ нь хугацаатай буюу хугацаагүй байх ба ажилтныг ажилд авахдаа ... тухайн ажлыг гүйцэтгэхэд тохирох эсэхийг шалгах зорилгоор туршилтын хугацаа тогтоож болно гэж заасны дагуу нэхэмжлэгч Б.А нь 2019 оны 08 сарын 16-ны өдрийн №39 дугаар тушаалаар С ХХК-д Бараа түгээлтийн ажилтнаар 3 сарын туршилтын хугацаатай томилогдсон. Түүнд 2019 оны 08 сарын 19-ний өдрөөс 3 сарын туршилтын хугацаанд үндсэн цалингийн 80 хувиар тооцож цалин олгохоор тогтоож 2019 оны 08 сарын 19-ний өдөр №14/2019 тоот Хөдөлмөрийн гэрээг байгуулсан байдаг. 2019 оны 08 сарын 19-ний өдрийн №14/2019 тоот Хөдөлмөрийн гэрээний хугацаа 2019 оны 11 сарын 18-ны өдөр дууссан бөгөөд талууд хөдөлмөрийн гэрээний хугацааг сунгах, нэхэмжлэгчийг үндсэн ажилтнаар авах талаар харилцан тохиролцоогүй. Улмаар Хөдөлмөрийн тухай хуулийн 37 дугаар зүйлийн 37.1.3-т заасан хөдөлмөрийн гэрээний хугацаа дуусаж, цаашид сунгагдахгүй болсон гэх үндэслэлээр 2019 оны 08 сарын 19-ний өдрийн №14/2019 тоот Хөдөлмөрийн гэрээ дуусгавар болж С ХХК-ийн гүйцэтгэх захирлын 2019 оны 11 сарын 28-ны өдрийн №64 тоот тушаалаар нэхэмжлэгч Б.Аыг ажлаас чөлөөлсөн. Тус тушаалыг нэхэмжлэгчид танилцуулж, Хөдөлмөрийн тухай хуулийн 23 дугаар зүйлийн 23.2.3-т зааснаар туршилтын гурван сарын хугацаатай байгуулсан хөдөлмөрийн гэрээний хугацаа дуусч хөдөлмөрийн гэрээ дуусгавар болсон талаар тайлбарлаж өгсөн. Нэхэмжлэгч нэхэмжлэлдээ ...ажлаас чөлөөлсөн тушаал нь хууль зүйн үндэслэлгүй байх ба дээрх хуулийн зохицуулалт нь хөдөлмөрийн гэрээ цуцлах тухай биш хөдөлмөрийн гэрээний хугацааг зохицуулсан заалтууд байна гэж дурдсан байна. 2019 оны 11 сарын 28-ны өдрийн №64 тоот Ажпаас чөлөөлөх тухай тушаал нь Б.Атай байгуулсан хөдөлмөрийн гэрээг Хөдөлмөрийн тухай хуулийн 38 дугаар зүйл, 40 дүгээр зүйлийн 40.1-т заасан үндэслэлээр цуцлах тухай тушаал биш бөгөөд зөвхөн хугацаатай байгуулсан хөдөлмөрийн гэрээний хугацаа дуусч цаашид сунгагдахгүй болсон тул ажлаас чөлөөлсөн. 2019 оны 08 сарын 19-ны өдрийн №14/2019 тоот Хөдөлмөрийн гэрээний 1.9-д Хөдөлмөрийн гэрээний хугацааг Туршилтын 3 сарын хугацаагаар тогтоож, хэрэв 2.1-д заасны дагуу талууд харилцан тохиролцож сунгасан, цуцлах санал гаргаагүй тохиолдолд нэг жилийн хугацаагаар сунгагдсанд тооцохоор тохиролцсон байна. Ийнхүү туршилтын 3 сарын хугацаа дууссанаар талууд цаашид сунгах талаар тохиролцоогүй тул нэхэмжлэгчийг үндсэн ажилтнаар ажилд авч хөдөлмөрийн гэрээ байгуулах боломжгүй юм. Иймд С ХХК-д холбогдох ажилд эгүүлэн тогтоолгох, ажилгүй байсан хугацааны цалин гаргуулах, нийгмийн болон эрүүл мэндийг даатгалын дэвтэрт нөхөн бичилт хийлгүүлэх тухай нэхэмжлэлийн шаардлагыг бүхэлд нь хэрэгсэхгүй болгож өгнө үү. гэв.

 

Хэрэгт байгаа болон шүүх хуралдаанаар хэлэлцэгдсэн нотлох баримтуудыг шинжлэн судлаад

 

ҮНДЭСЛЭХ НЬ:

 

Нэхэмжлэгч Б.А нь хариуцагч С ХХК-д холбогдуулан ажилд эгүүлэн тогтоолгох, ажилгүй байсан хугацааны цалинтай тэнцэх олговор гаргуулах, нийгмийн болон эрүүл мэндийн даатгалын шимтгэлийг нөхөн төлүүлж, дэвтэрт бичилт хийлгэх тухай нэхэмжлэлийг шүүхэд гаргасан бөгөөд шүүх хуралдаанд нэхэмжлэгчийн төлөөлөгч нь ажилгүй байсан хугацааны цалинтай тэнцэх олговрын хэмжээг 2,326,575 төгрөг гэж тодруулж байна.

Хариуцагч С ХХК нь Б.Аын туршилтын 3 сарын хугацаатай байгуулсан хөдөлмөрийн гэрээний хугацаа дуусаж, цаашид сунгагдахгүй болсон тул ажлаас нь чөлөөлсөн, нэхэмжлэлийг бүхэлд нь хэрэгсэхгүй болгох үндэслэлтэй гэж маргаж байна.

Шүүх дараах үндэслэлээр нэхэмжлэгчийн нэхэмжлэлийн шаардлагын зарим хэсгийг хангаж, үлдэх хэсгийг хэрэгсэхгүй болгож шийдвэрлэх нь зүйтэй байна гэж үзлээ.

Б.А нь С ХХК-тай 2019 оны 08 сарын 19-ний өдөр бараа түгээлтийн ажилтны ажлын байранд 14/2019 дугаартай хөдөлмөрийн гэрээ /хх-5-10 тал/ байгуулан ажиллаж байгаад С ХХК-ийн захирлын 2019 оны 11 сарын 18-ны өдрийн 64 дугаартай Ажлаас чөлөөлөх тухай тушаал /хх-13 тал/-аар 2019 оны 11 сарын 18-ны өдрөөр дуусгавар болгон ажлаас чөлөөлөгдсөн байна.

Хөдөлмөрийн тухай хуулийн 129 дүгээр зүйлийн 129.2 дахь заалтад зааснаар ажилтан ажлаас буруу халсан буюу өөр ажилд буруу шилжүүлсэн тухай гомдлоо ажил олгогчийн шийдвэрийг хүлээн авсан өдрөөс хойш нэг сарын дотор шүүхэд гаргах хуулийн зохицуулалттай.

Нэхэмжлэгч нь ажил олгогчийн шийдвэрийг хүлээн авснаас хойш нэг сарын дотор буюу 2019 оны 12 дугаар сарын 12-ны өдөр тус шүүхэд нэхэмжлэл гаргасан байх тул нэхэмжлэгчийг Хөдөлмөрийн тухай хуулийн 129 дүгээр зүйлийн 129.2 дахь заалтад заасан хугацааны дотор шүүхэд гомдлоо гаргасан гэж үзнэ.

С ХХК-ийн захирлын 2019 оны 11 сарын 18-ны өдрийн 64 дугаартай Ажлаас чөлөөлөх тухай тушаалд Хөдөлмөрийн тухай хуулийн 23 дугаар зүйлийн 23.2.3, 23.3 дахь заалтуудыг баримталсан байх ба тушаалд бараа түгээлтийн ажилтан Б.Аын 2019 оны 08 сарын 19-ний өдрийн №14/2019 тоот хөдөлмөрийн гэрээг 2019 оны 11 сарын 18-ны өдрөөр дуусгавар болгох талаар заасан байна.

Хөдөлмөрийн тухай хуулийн 23 дугаар зүйлийн 23.2.3 дахь заалт нь ажил, албан тушаал нь хууль болон бусад шийдвэрийн үндсэн дээр хэвээр хадгалагдаж байгаа ажилтны оронд ажиллах ажилтантай эзгүй байгаа ажилтныг ажилдаа эргэж орох хүртэл, улирлын болон түр ажилд тухайн ажлын үргэлжлэх хугацаагаар, шинээр орж байгаа ажилтан болон дагалдан суралцагчтай ажил олгогчоос хөдөлмөрийн дотоод журмаараа тогтоосон туршилтын болон дагалдан ажиллуулах хугацаагаар хөдөлмөрийн гэрээг байгуулна. гэсэн, мөн хуулийн 23 дугаар зүйлийн 23.3 дахь заалт нь Хөдөлмөрийн хугацаатай гэрээний хугацаа дуусмагц талууд түүнийг цуцлах санал тавиагүй бөгөөд ажилтан ажлаа гүйцэтгэсээр байгаа бол уг гэрээг анх заасан хугацаагаар сунгагдсанд тооцно гэсэн заалтууд бөгөөд эдгээр заалтууд нь хөдөлмөрийн харилцааг эхлүүлэх, үргэлжлүүлэхтэй холбоотой хуулийн зохицуулалтууд байх ба ажил олгогч ажилтантай байгуулсан хөдөлмөрийн гэрээний хугацаа дуусаж, цаашид сунгагдахгүй болсон үндэслэлээр хөдөлмөрийн гэрээг дуусгавар болгож байгаа тохиолдолд Хөдөлмөрийн тухай хуулийн 37 дугаар зүйлийн 37.1.3 дахь зохицуулалт үйлчилнэ.

Мөн хөдөлмөрийн гэрээний туршилтын хугацааг 2019 оны 08 сарын 19-ний өдрөөс эхлэн 3 сарын хугацаагаар тогтоосон байх тул Иргэний хуулийн 73 дугаар зүйлийн 73.1 дахь заалтад ... сараар тогтоосон хугацаа нь уг хугацаа дуусах сарын мөн өдөр дуусна гэж зааснаар туршилтын 3 сарын хугацаа 2019 оны 11 сарын 19-ний өдрөөр дуусгавар болно.

С ХХК нь Б.Атай хөдөлмөрийн гэрээг байгуулахдаа хөдөлмөрийн гэрээний 1 дүгээр зүйлийн 1.9 дахь заалтад туршилтын хугацааны 3 сар, үндсэн ажилтнаар 1 жил гэсэн хугацаа тохиролцсон байна.

Хөдөлмөрийн тухай хуулийн 23¹.1 дахь заалтад Ажилтныг ажилд авахдаа мэргэжлийн ур чадвар, ажлын дадлага, туршлага тухайн ажлыг гүйцэтгэхэд тохирох эсэхийг шалгах зорилгоор туршилтын хугацаа тогтоож болно, мөн зүйлийн 23¹.2 дахь заалтад Хөдөлмөрийн гэрээнд туршилтын хугацааг талууд харилцан тохиролцох бөгөөд туршилтын хугацаа гурван сар хүртэл байна. Гэж тус тус заасан тул С ХХК нь Б.Атай хөдөлмөрийн гэрээг байгуулахдаа туршилтын 3 сарын хугацаа тогтоосон нь хуульд нийцсэн байна.

С ХХК нь Б.Атай байгуулсан хөдөлмөрийн гэрээг туршилтын 3 сарын хугацаа дууссан үндэслэлээр дуусгавар болгосон үндэслэлээ шүүхэд гаргасан хариу тайлбартаа тайлбарлахдаа туршилтын 3 сарын хугацаа дууссанаар талууд цаашид гэрээг сунгах талаар тохиролцоогүй тул нэхэмжлэгчийг үндсэн ажилтнаар ажилд авч хөдөлмөрийн гэрээ байгуулах боломжгүй гэж тайлбарласан байна.

С ХХК-ийн хөдөлмөрийн дотоод журам /хх-30-38 тал/-ын 3 дугаар зүйлийн 3.1.8 дахь заалтад Анх ажилд орж байгаа ажилтныг ажилд томилохдоо ажилтны мэргэжлийн ур чадвар, ажлын дадлага, туршлага тухайн ажлыг гүйцэтгэхэд тохирох эсэхийг шалгах зорилгоор туршилтын хугацаа ... тогтоож болно., 3.1.9 дахь заалтад Туршилтын хугацаа болон дагалдан ажиллуулах хугацааг 3 хүртэл сараар тогтооно, 3.1.10 дахь заалтад Туршилтын хугацаа, дагалдан ажиллуулах хугацаа дуусахад эсвэл энэ хугацаа дуусахаас өмнө тухайн ажилтныг үндсэн ажилтнаар цаашид ажиллуулах эсэх саналаа харьяа хэлтсийн удирдлага Захиргаа, хүний нөөцийн хэлтэст хүргүүлнэ, 3.1.11 дахь заалтад Захиргаа, хүний нөөцийн хэлтэс нь тухайн саналд өөрсдийн саналыг хавсарган Гүйцэтгэх захиралд танилцуулж шийдвэрлүүлнэ гэж тус тус заасан байна.

Хөдөлмөрийн тухай хуулийн 130 дугаар зүйлийн 130.1 дахь заалтад зааснаар ажил олгогч нь хөдөлмөрийн дотоод журмыг хууль тогтоомжид нийцүүлэн баталж мөрдүүлэх бөгөөд мөн зүйлийн 130.2 дахь заалтад зааснаар Хөдөлмөрийн дотоод журамд хөдөлмөр зохион байгуулалт, ажил олгогч болон ажилтны эрх, үүрэг, хариуцлагыг тусгасан байна.

Өөрөөр хэлбэл хөдөлмөрийн дотоод журам нь хөдөлмөрийн харилцаанд оролцогч талуудын хоорондын харилцааг зохицуулж буй баримт бичиг бөгөөд талууд хөдөлмөрийн дотоод журмаар тогтоосон журмыг дагаж мөрдөх үүрэгтэй.

С ХХК нь туршилтын хугацаагаар авч ажиллуулсан ажилтны туршилтын хугацаа дуусахад цааш ажиллуулах эсэхийг шийдвэрлэхдээ Хөдөлмөрийн тухай хуулийн 5 дугаар зүйлийн 5.2 дахь заалтад заасан хөдөлмөрийн дотоод журамд заасан үүргээ биелүүлэх үүргийн хүрээнд өөрийн баталсан хөдөлмөрийн дотоод журмын зохицуулалт буюу хөдөлмөрийн дотоод журмын 3.1.10, 3.1.11 дахь заалтад заасан тухайн ажилтныг үндсэн ажилтнаар цаашид ажиллуулах эсэх саналаа харьяа хэлтсийн удирдлага Захиргаа, хүний нөөцийн хэлтэст хүргүүлэх, Захиргаа, хүний нөөцийн хэлтэс нь тухайн саналд өөрсдийн саналыг хавсарган Гүйцэтгэх захиралд танилцуулж шийдвэрлүүлэх журмыг мөрдсөн байхыг шаардана.

Хариуцагчийн өмгөөлөгч шүүх хуралдаанд тайлбарлахдаа С ХХК нь хөдөлмөрийн дотоод журмын 3.1.10, 3.1.11 дахь заалтад заасан журмыг хэрэгжүүлсэн, гэхдээ энэ талаарх баримтыг шүүхэд гаргаж өгөх шаардлагагүй гэж үзсэн гэх тайлбарыг гаргаж байх боловч Иргэний хэрэг шүүхэд хянан шийдвэрлэх тухай хуулийн 25 дугаар зүйлийн 25.2.2 дахь заалтад зааснаар шүүхэд гаргасан нэхэмжлэлийн шаардлагыг үгүйсгэх, татгалзах үндэслэл, тайлбар түүнтэй холбоотой баримтыг өөрөө нотлох, нотлох баримтыг цуглуулах, гаргаж өгөх нь хариуцагчийн үүрэг байна.

Хөдөлмөрийн харилцаанд туршилтын хугацааг тогтоохдоо мэргэжлийн ур чадвар, ажлын дадлага, туршлага тухайн ажлыг гүйцэтгэхэд тохирох эсэхийг шалгах зорилгоор тогтоодог тул ажил олгогч туршилтын хугацаанд ажилтан мэргэжлийн ур чадвар, ажлын дадлага, туршлага тухайн ажлыг гүйцэтгэхэд тохирох эсэхийг шалгаж, хэрэв тохирохгүй гэж үзвэл ажилтныг цаашид ажиллуулахгүй гэсэн шийдвэрээ гаргахаас бус ажилтныг туршилтын хугацаа дууссаны дараа цаашид ажиллуулах эсэх нь ажил олгогчийн дур зоргын асуудал байх ёсгүй.

Ийм учраас ажил олгогч туршилтын хугацаагаар ажиллаж байсан ажилтныг туршилтын хугацаа дууссанаар цаашид ажиллуулахгүй гэж шийдвэрлэсэн тохиолдолд ажилтан мэргэжлийн ур чадвар, ажлын дадлага, туршлагын хувьд тухайн ажлыг гүйцэтгэхэд тохирохгүй байсан гэдгийг нотлох үүргийг хүлээх бөгөөд нотолж чадаагүй тохиолдолд хөдөлмөрийн харилцааг хуулийн дагуу дуусгавар болгоогүй гэж үзэх үндэслэл болно.

Хөдөлмөрийн тухай хуулиар ажил олгогчид ажилтныг ажилд авахдаа туршилтын хугацаа тогтоож болох эрхийг олгосон нь туршилтын хугацаагаар ажилтантай байгуулсан хөдөлмөрийн гэрээний хугацаа дуусахад хөдөлмөрийн харилцааг хүндэтгэн үзэх аливаа үндэслэлгүйгээр, мэргэжлийн ур чадвар, ажлын дадлага, туршлага зэрэг асуудалтай холбоо хамааралгүйгээр, шалтгаангүйгээр дуусгавар болгох эрхийг ажил олгогчид олгосон гэж үзэх үндэслэл биш юм.

Иймд хариуцагч С ХХК нь нэхэмжлэгч Б.Аыг ажлаас буруу халсан гэж үзэж, Б.Аыг өмнө эрхэлж байсан бараа түгээлтийн ажилтны ажилд эгүүлэн тогтоох нь зүйтэй байна.

Хөдөлмөрийн тухай хуулийн 69 дүгээр зүйлийн 69.1 дахь заалтад зааснаар ажилтныг ажил, албан тушаалд нь эргүүлэн тогтоосон бол түүнд ажилгүй байсан бүх хугацаанд нь урьд авч байсан дундаж цалин хөлстэй тэнцэх олговор олгоно.

Урьд авч байсан дундаж цалин хөлсийг тооцохдоо Нийгмийн хамгаалал, хөдөлмөрийн сайдын 2005 оны 55 тоот тушаалаар батлагдсан Дундаж цалин хөлс тодорхойлох журам-ын 7-д ажилтны дундаж цалин хөлсийг тодорхойлохдоо тухайн ажилтны сүүлийн 3 сарын дундаж цалингаас тооцно гэснийг баримтлах бөгөөд нэхэмжлэгч Б.Аын сүүлийн 3 сарын цалин хөлс буюу 2019 оны 09 сарын цалин хөлс 800,000 төгрөг, 10 сарын цалин хөлс 556,521 төгрөг, 11 сарын цалин хөлс 505,263 төгрөг, нийт 1,861,784 төгрөгөөс нэг сарын дундаж цалин хөлсийг тооцоход 620,594 төгрөг, үүнээс нэг өдрийн дундаж цалин хөлсийг сарын дундаж хоног болох 21.5 хоногт хуваан тооцоход 28,864.8 төгрөг, үүнийг нэхэмжлэгчийг ажлаас чөлөөлсөн 2019 оны 11 сарын 18-ны өдрөөс шүүх хуралдаан болсон 2020 оны 02 дугаар сарын 17-ны өдрийг хүртэлх хугацааны ажлын 65 хоногт тооцоход ажилгүй байсан хугацааны цалинтай тэнцэх олговрын хэмжээ нь 1,876,212 төгрөг болж байх тул хариуцагч С ХХК-аас ажилгүй байсан хугацааны цалинтай тэнцэх олговорт 1,876,212 төгрөгийг гаргуулан нэхэмжлэгч Б.Аад олгож, нэхэмжлэгчийн ажилгүй байсан хугацааны цалинтай тэнцэх олговор гаргуулах шаардлагын үлдэх хэсэг буюу 450,363 төгрөгийн шаардлагыг хэрэгсэхгүй болгож шийдвэрлэх нь зүйтэй байна.

Хөдөлмөрийн тухай хуулийн 46 дугаар зүйлийн 46.2 дахь заалтад заасны дагуу нэхэмжлэгч Б.Аын нийгмийн болон эрүүл мэндийн даатгалын шимтгэлийг хуульд заасан хувь хэмжээгээр тооцон суутгаж, нийгмийн даатгалын байгууллагын төвлөрсөн харилцах дансанд шилжүүлэн, нийгмийн болон эрүүл мэндийн даатгалын дэвтэрт нөхөн бичилт хийхийг хариуцагч С ХХК-д даалгаж шийдвэрлэв.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.2, 116, 118 дугаар зүйлийг тус тус удирдлага болгон

 

ТОГТООХ НЬ:

 

1.  Хөдөлмөрийн тухай хуулийн 128 дугаар зүйлийн 128.1.2, 69 дүгээр зүйлийн 69.1 дахь заалтыг баримтлан нэхэмжлэгч Б.Аыг С ХХК-ийн бараа түгээлтийн ажилтны ажилд эгүүлэн тогтоож, хариуцагч С ХХК-аас ажилгүй байсан хугацааны цалинтай тэнцэх олговорт 1,876,212 төгрөгийг гаргуулж нэхэмжлэгч Б.Аад олгож, нэхэмжлэгчийн ажилгүй байсан хугацааны цалинтай тэнцэх олговор гаргуулах шаардлагын үлдэх хэсэг буюу 450,363 төгрөгийн шаардлагыг хэрэгсэхгүй болгосугай.

 

2.  Хөдөлмөрийн тухай хуулийн 46 дугаар зүйлийн 46.2 дахь заалтад заасны дагуу нэхэмжлэгч Б.Аын нийгмийн болон эрүүл мэндийн даатгалын шимтгэлийг хуульд заасан хувь хэмжээгээр тооцон суутгаж, нийгмийн даатгалын байгууллагын төвлөрсөн харилцах дансанд шилжүүлэн, нийгмийн болон эрүүл мэндийн даатгалын дэвтэрт нөхөн бичилт хийхийг хариуцагч С ХХК-д даалгасугай.

 

3.  Улсын тэмдэгтийн хураамжийн тухай хуулийн 41 дүгээр зүйлийн 41.1.5 дахь заалтад зааснаар нэхэмжлэгч нь улсын тэмдэгтийн хураамжаас чөлөөлөгдсөн болохыг дурдаж, Улсын тэмдэгтийн хураамжийн тухай хуулийн 7 дугаар зүйлийн 7.1.1, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.2, 60 дугаар зүйлийн 60.1 дахь заалтыг баримтлан хариуцагч С ХХК-аас улсын тэмдэгтийн хураамжид 44,969 төгрөгийг гаргуулж улсын орлогод оруулсугай.

 

4.  Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь заалтад зааснаар зохигч, тэдгээрийн төлөөлөгч, өмгөөлөгч нь шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэйг дурдсугай.

 

5.  Иргэний хэрэг шүүхэд хянан шийдвэрлэх тухай хуулийн 119 дүгээр 119.4, 119.7 дахь заалтад зааснаар шийдвэрийг танилцуулан сонсгомогц хүчинтэй болох ба шийдвэр хүчинтэй болсноос 7 хоног өнгөрснөөс хойш 14 хоногийн дотор шүүх хуралдааны оролцогч талууд шүүхэд хүрэлцэн ирж шийдвэрийг гардан авах үүрэгтэй бөгөөд шийдвэрийг гардан аваагүй нь давж заалдах гомдол гаргах хугацааг хуульд заасан журмын дагуу тоолоход саад болохгүй болохыг дурдсугай.

 

 

 

 

 

ДАРГАЛАГЧ, ШҮҮГЧ Б.УУГАНБАЯР