2017         06          12                                                      80

 

    МОНГОЛ УЛСЫН НЭРИЙН ӨМНӨӨС

Дорнод аймаг дахь Сум дундын Эрүүгийн хэргийн анхан шатны шүүхийн шүүгч Ү.Одгэрэл даргалж, шүүх хуралдааны нарийн бичгийн дарга Ө.Гансувдыг суулган, улсын яллагч Ц.Лхамсүрэн, хохирогч Б.Энхтайван, шүүгдэгч О.Наранбаатар нарыг оролцуулан тус шүүхийн шүүх хуралдааны "Б" танхимд нээлттэй явуулсан шүүх хуралдаанаар;

Дорнод аймгийн Прокурорын газраас Монгол Улсын Эрүүгийн хуулийн тусгай ангийн 99 дүгээр зүйлийн 99.1 дэх хэсэгт заасан гэмт хэрэгт холбогдуулан яллагдагчаар татах тогтоол баталж ирүүлсэн Дархад овогт Оюунбаатарын Наранбаатарт холбогдох эрүүгийн 201711000182 дугаартай хэргийг 2017 оны 06 сарын 06-ны өдөр өдөр хүлээн авч хянан хэлэлцэв.

Шүүгдэгч Дархад овогт Оюунбаатарын Наранбаатар, Дорнод аймгийн Хэрлэн суманд 1977 оны 9 сарын 11-ний өдөр төрсөн, 40 настай, эрэгтэй, Монгол Улсын иргэн /РД-ЖЮ77091119/, бүрэн дунд боловсролтой, мэргэжилгүй, эрхэлсэн тодорхой ажилгүй, ам бүл 6, эх, эхнэр, хүүхдүүдийн хамт амьдрах, Дорнод аймгийн Хэрлэн сумын 2 дугаар багийн Тээвэрчдийн 3 дугаар гудамжны 18 тоотод оршин суух, улсаас авсан гавьяа шагналгүй, Баянзүрх дүүргийн шүүхийн 2000 оны 03 сарын 10-ны өдрийн 152 дугаар таслан шийдвэрлэх тогтоолоор Эрүүгийн хуулийн тусгай ангийн 123 дугаар зүйлийн 4, 131 дүгээр зүйлийн 2-д зааснаар 3 жил 6 сарын хорих ялаар, Баянзүрх дүүргийн шүүхийн 2004 оны 06 сарын 02-ны өдрийн 300 дугаар шийтгэх тогтоолоор Эрүүгийн хуулийн тусгай ангийн 145 дугаар зүйлийн 145.2 дахь хэсэгт зааснаар 2 жилийн хорих ялаар,  Дорнод аймгийн Хэрлэн сумын шүүхийн 2010 оны 10 сарын 08-ны өдрийн 55 дугаар шийтгэх тогтоолоор Эрүүгийн хуулийн тусгай ангийн 99 дүгээр зүйлийн 99.2 дахь хэсэгт зааснаар 3 сар 1 хоногийн баривчлах ялаар тус тус шийтгүүлж байсан, бие эрүүл,

Шүүгдэгч О.Наранбаатар нь согтуугаар 2017 оны 4 дүгээр сарын 26-ны орой 19 цагийн орчим Дорнод аймгийн Хэрлэн сумын 7 дугаар багт байрлах 43 дугаар байрны гадаа эхнэр Б.Энхтайвантай хувийн таарамжгүй харьцааны улмаас маргалдаж улмаар түүний нүүрэн тус газарт цохиж бие махбодид нь хөнгөн гэмтэл санаатай учруулсан гэмт хэрэгт холбогджээ. /Яллагдагчаар татах тогтоолд бичсэнээр/

ТОДОРХОЙЛОХ НЬ:

Шүүхийн хэлэлцүүлэгт дараах нотлох баримтуудыг шинжлэн судлав. Үүнд:

Шүүгдэгч О.Наранбаатар шүүхийн хэлэлцүүлэгт мэдүүлэхдээ: 2017 оны 04 сарын 26-ны өдөр улсын яллагчийн уншиж сонсгон яллагдагчаар татах тогтоол дээр бичигдсэн үйл явдал болсон. Би үйлдсэн хэргээ хүлээн зөвшөөрч байгаа. Олон жил ханилсан ханиа гомдоосондоо маш их харамсаж байна. Тэгээд архинаас ер нь гаръя гэж шийдээд архинаас гаргах “АА”-ын цуглаанд явж эхэлсэн, цаашдаа ч гэсэн явна гэж бодож байна. Бид 2 гурван хүүхэдтэй, том нь оюутан, бага нь энэ жил сургуульд орно. Би эхнэрээ гомдоосондоо үнэхээр их харамсаж, гэмшиж байна. Бид хоёр эвлэрсэн тул хэргийг хэрэгсэхгүй болгож өгнө үү гэв.

Хохирогч Б.Энхтайван шүүхийн хэлэлцүүлэгт мэдүүлэхдээ: 2017 оны 4 сарын 26-ны өдөр бид 2 гэр рүүгээ явж байхад манай нөхөр “пиво аваад өг” гэсэн. Тэрнээс болж муудалцсан. Наранбаатар найз нөхөд рүүгээ явах гээд уурлаад байсан. Манай том охин 2 дугаар курст суралцдаг. Наранбаатар “Зөв боломж” ХХК-д улирлын чанартай ажил хийхээр бүртгүүлсэн байсан. 2010 онд баривчилгаанаас гарч ирчихээд нэг удаа гар хүрч байсан. Нөхөр маань найз нартайгаа архи ууна гээд зөрүүдлээд байхаар нь би явуулахгүй гээд муудалцсан  юм. Ер нь  гэртээ согтуу ирэнгүүт нь би цагдаа дуудаад өгчихдөг. Хэтэрхий их уухаараа  тэнэг  юм шиг болчихдог. Төлбөрөө төлж чадахгүйн улмаас миний охин сургуулиа төгсөж чадаагүй хөөгдчихсөн.

Би Наранбаатартай ойлголцож эвлэрсэн. Иймд хэргийг хэрэгсэхгүй болгуулах хүсэлтэй байна. Одоо надад нэхэмжлэх зүйл болон гомдол санал байхгүй гэв.

Дорнод аймгийн Шүүхийн шинжилгээний албаны шинжээчийн 2017 оны 05 сарын 01-ний өдрийн 238 тоот дүгнэлтэд: "1.Б.Энхтайваны биед духанд зөөлөн эдийн няцрал, 2 нүдний зовхи, баруун бугалганд цус хуралт гэмтэл тогтоогдлоо. 2.Дээрх тогтоогдсон гэмтлүүд нь мохоо зүйлийн 2-оос доошгүй удаагийн үйлчлэлээр үүсгэгдсэн шинэ гэмтлүүд байна. 3.Шүүх эмнэлгийн гэмтлийн зэрэг тогтоох журмын 2.4.1-т зааснаар тогтоогдсон гэмтлүүд нь бүрдэл байдлаараа эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна. 4.Цаашид эрүүл мэнд, энгийн хөдөлмөрийн чадвар тогтонги алдалтанд нөлөөлөхгүй" гэжээ. /хх-ийн 36/

Хохирогч Б.Энхтайван /хх 22-23/, гэрч П.Наранцэцэг /хх 25-26/, Б.Мөнхдалай /хх 27-28/, С.Оюунцэцэг /хх 29-30/, О.Мөнхбат /хх 31-32/, Д.Нямсүрэн /хх 33-34/, шүүгдэгч О.Наранбаатар /хх 42-43/ нарын мөрдөн байцаалтад өгсөн мэдүүлгүүд, Шүүгдэгчийн иргэний үнэмлэхний хуулбар /хх 52/, Урьд ял шийтгэгдсэн эсэхийг шалгах хуудас /хх 53/, Хохирогчийн шүүхийн шатанд ирүүлсэн “Эвлэрсэн тухай” хүсэлт /задгай/ болон тухайн хэрэгт хамааралтай, хуулийн дагуу цуглуулж, бэхжүүлж авсан бусад нотлох баримтуудыг шинжлэн судлав.

            Шүүгдэгч О.Наранбаатар нь согтуурсан үедээ 2017 оны 4 сарын 26-ны орой 19 цагийн орчим Дорнод аймгийн Хэрлэн сумын 7 дугаар багт байршилтай 43 дугаар байрны гадна эхнэр Б.Энхтайвантай хувийн таарамжгүй харьцааны улмаас маргалдаж улмаар түүний нүүрэн тус газарт гараар цохиж бие махбодид нь хөнгөн гэмтэл санаатай учруулсан гэмт хэрэг үйлдсэн гэм буруутай болох нь шүүхийн хэлэлцүүлэгт шинжлэн судалсан шүүгдэгч О.Наранбаатарын мөрдөн байцаалтад болон шүүхийн хэлэлцүүлэгт үйлдсэн хэргээ хүлээн мэдүүлсэн мэдүүлэг, түүнийг давхар нотолсон хохирогч Б.Энхтайван, гэрч П.Наранцэцэг, Б.Мөнхдалай, С.Оюунцэцэг, О.Мөнхбат, Д.Нямсүрэн нарын мөрдөн байцаалт болон шүүхийн хэлэлцүүлэгт өгсөн мэдүүлгүүд, Шинжээчийн 238 тоот дүгнэлт зэрэг болон бусад нотлох баримтуудаар нотлогдон тогтоогдож байна.

Шүүгдэгч О.Наранбаатарт холбогдох хэрэгт прокурорын газраас зүйлчлэн ирүүлсэн хуулийн зүйл хэсэг тохирсон, хэргийг шийдвэрлэхэд шаардлагатай нотлох баримт цугларч бүрдэл хангагдсан байна гэж шүүх дүгнэлээ.

Иймд шүүгдэгч О.Наранбаатарыг бусдын бие махбодид хөнгөн гэмтэл санаатай учруулсан гэмт хэрэг үйлдсэн гэм буруутайд тооцох хууль зүйн үндэслэлтэй байна.

Шүүгдэгч О.Наранбаатар нь урьд өмнө удаа дараа ял шийтгүүлж байсан боловч ялтайд тооцох хууль зүйн үр дагавар арилсан байх тул анх удаа хөнгөн гэмт хэрэг үйлдсэн гэж үзэх үндэслэл болно.

            Түүнчлэн шүүгдэгч О.Наранбаатарын үйлдсэн Эрүүгийн хуулийн тусгай ангийн 99 дүгээр зүйлийн 99.1 дэх хэсэгт заасан гэмт хэрэг нь мөн хуулийн ерөнхий ангийн 17 дугаар зүйлийн 17.1.1-д заасан хөнгөн гэмт хэргийн ангилалд багтах ба шүүгдэгч нь хөнгөн гэмт хэрэг анх удаа үйлдсэн хохирогчид төлөх төлбөргүй, хохирогч нь шүүгдэгчтэй сайн дураар эвлэрсэн болох нь урьд ял шийтгэгдсэн байдлыг шалгах хуудас /хх 53/, шүүгдэгч, хохирогч нарын шүүхийн хэлэлцүүлэгт өгсөн мэдүүлгүүд /шүүх хуралдааны тэмдэглэлээс/, шүүгдэгч, хохирогч нарын шүүхэд гаргасан хүсэлт /задгай/ зэргээр тус тус нотлогдож байна.

Мөн шүүгдэгч нь согтуурсан үедээ гэмт хэрэг үйлдсэн нь хэрэгт цугларсан нотлох баримтуудаар тогтоогддог ч Эрүүгийн хуулийн ерөнхий ангийн 71 дүгээр зүйлийн 71.1, Эрүүгийн байцаан шийтгэх хуулийн 25 дугаар зүйлийн 25.1-д тус тус дурдсанаар өөрөөр хязгаарлалт тогтоож шүүгдэгчийн эрх зүйн байдлыг дордуулах боломжгүй юм.

Өөрөөр хэлбэл, Эрүүгийн хуулийн ерөнхий ангийн 23 дугаар зүйлийн 23.1-д заасан "…согтуурлын байдалд байхдаа гэмт хэрэг үйлдсэн бол эрүүгийн хариуцлагаас чөлөөлөхгүй…" гэснийг Эрүүгийн байцаан шийтгэх хуулийн 13 дугаар зүйлийн 13.2-т зааснаар шүүгдэгчид ашигтайгаар шийдвэрлэх нь зүйтэй гэж үзлээ.

             Иймээс Эрүүгийн   хуулийн   ерөнхий   ангийн  71 дүгээр  зүйлийн 71.1,  Эрүүгийн байцаан шийтгэх хуулийн 25 дугаар зүйлийн 25.1-д заасан үндэслэлээр шүүгдэгчид холбогдох хэргийг хэрэгсэхгүй болгох нь зүйтэй байна.

Энэ хэрэгт эд мөрийн баримт хураагдаж ирээгүй, шүүгдэгч нь цагдан хоригдоогүй, хохирогчид төлөх төлбөргүй, түүний эзэмшлээс 10000 төгрөг битүүмжилсэн мөрдөн байцаагчийн "Эд хөрөнгө битүүмжлэх тухай" тогтоолыг хүчингүй болгох, бичгийн баримтаар хураагдаж ирсэн шүүгдэгчийн иргэний цахим үнэмлэхийг шийтгэх тогтоол хүчин төгөлдөр болмогц өөрт нь буцаан олговол зохино.

Монгол Улсын Эрүүгийн байцаан шийтгэх хуулийн 248 дугаар зүйлийн 248.1.2, 283, 286, 290 дугаар зүйлийн 290.3, 294, 297, 298, 418 дугаар зүйлд тус тус заасныг удирдлага болгон ТОГТООХ НЬ:

1. Шүүгдэгч Дархад овогт Оюунбаатарын Наранбаатарт бусдын бие махбодид хөнгөн гэмтэл санаатай учруулсан гэмт хэрэг үйлдсэн гэм буруутайд тооцсугай.

2. Эрүүгийн хуулийн ерөнхий ангийн 71 дүгээр зүйлийн 71.1-д зааснаар шүүгдэгч О.Наранбаатарыг эрүүгийн хариуцлагаас чөлөөлж, Эрүүгийн байцаан шийтгэх хуулийн 25 дугаар зүйлийн 25.1-д заасан "хохирогч нь шүүгдэгчтэй эвлэрсэн" үндэслэлээр түүнд холбогдох Эрүүгийн хуулийн тусгай ангийн 99 дүгээр зүйлийн 99.1 дэх хэсэгт заасан гэмт хэргийг хэрэгсэхгүй болгосугай.

3. Шүүгдэгч нь энэ хэрэгт цагдан хоригдоогүй, эд мөрийн баримт хураагдаж ирээгүй, хохирогчид төлөх төлбөргүй болохыг тус тус дурдсугай.

4. Шүүгдэгчийн эзэмшлээс AJ2214100 сери дугаартай 10000 төгрөгийн дэвсгэрт битүүмжилсэн мөрдөн байцаагчийн 2017 оны 05 сарын 18-ны өдрийн "Эд хөрөнгө битүүмжлэх тухай" тогтоолыг хүчингүй болгосугай.

5. Хэрэгт баримт бичгээр ирүүлсэн шүүгдэгч О.Наранбаатарын ЖЮ77091119 регистрийн дугаартай Монгол Улсын иргэний үнэмлэхийг тогтоол хүчин төгөлдөр болмогц шүүгдэгчид буцаан олгосугай.

6. Эрүүгийн байцаан шийтгэх хуулийн 299 дүгээр  зүйлийн  299.3-т  зааснаар  энэ тогтоол танилцуулан сонсгосноор хүчинтэй болох бөгөөд хүчин төгөлдөр болох хүртэл шүүгдэгчийн батлан даалтад байх таслан сэргийлэх арга хэмжээг хэвээр үлдээсүгэй.

7. Эрүүгийн байцаан шийтгэх хуулийн 303 дугаар зүйлийн 303.1-д зааснаар энэхүү тогтоолыг   эс   зөвшөөрвөл   шүүгдэгч,   хохирогч нар  шийтгэх тогтоолыг гардан авснаас хойш 14 хоногийн дотор Дорнод аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг мэдэгдсүгэй.

 

 

ДАРГАЛАГЧ                       Ү.ОДГЭРЭЛ