МОНГОЛ УЛСЫН НЭРИЙН ӨМНӨӨС

 

Өмнөговь аймаг дахь сум дундын анхан шатны шүүхийн шүүх хуралдааныг шүүгч Э.Оюун-Эрдэнэ даргалж,

Улсын яллагч Б.Арсланбаатар,    

Шүүгдэгч С.*******

Нарийн бичгийн дарга З.Түвшинжаргал нарыг оролцуулан тус шүүхийн эрүүгийн шүүх хуралдааны танхимд нээлттэй хийсэн хуралдаанаар,   

Өмнөговь аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан гэмт хэрэгт холбогдуулан яллах дүгнэлт үйлдэж ирүүлсэн ******* овогт *******гийн *******т холбогдох ......... дугаартай нэг хавтас эрүүгийн хэргийг 2025 оны 03 дугаар сарын 31-ний өдөр хүлээн авч хянан хэлэлцэв.  

Биеийн байцаалт:   

....................... Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар 600 нэгжтэй тэнцэх хэмжээний буюу 600,000 төгрөгөөр торгох ялаар шийтгүүлж байсан, ..............., регистрийн дугаар .................,

Холбогдсон хэргийн талаар: /Яллах дүгнэлтэд бичигдсэнээр/

Шүүгдэгч С.******* нь 2024 оны 12 дугаар сарын 21-ний өдөр Өмнөговь аймгийн ******* сумын ******* 4 дүгээр багийн нутагт “Toyota prius” маркийн ........... улсын дугаартай тээврийн хэрэгслийн кабинд согтууруулах ундааны зүйл хэрэглэсэн үедээ гэр бүлийн хамаарал бүхий харилцаатай Х.*******ын биед тархи доргилт, баруун зүүн нүдний зовхинд цус хуралт, зөөлөн эдийн няцрал, зулайд зөөлөн эдийн няцрал, хүзүүнд цус хуралт, зулгаралт, баруун чих, цээж, баруун, зүүн бугалгад цус хуралт гэмтэл бүхий хөнгөн хохирол санаатай учруулж, хүүхдийн дэргэд гэр бүлийн хүчирхийлэл үйлдсэн гэмт хэрэгт холбогджээ.

                                                          ТОДОРХОЙЛОХ нь:  

Шүүх хуралдааны хэлэлцүүлгийн шатанд шүүгдэгч С.Адьяабазар яллах болон өмгөөлөх талын дараах нотлох баримтуудыг шинжлэн судлав. Үүнд:

Шүүгдэгч С.*******  шүүхийн хэлэлцүүлэгт мэдүүлэхдээ: Эхнэр өмнө нь 2 хоног дараалан шөнө 03, 04 цаг гэж ирсэн. Тэгээд гарсан 2 өдөр нь машины кабинд архи, пивоны сав байсан. Тэр талаар нь ярьж байгаад муудалцсан. Тэгээд согтуудаа эхнэртээ гар хүрсэн. Хийсэн хэрэгтээ гэмшиж байна  гэв.  

Хохирогч Х.******* мөрдөн байцаалтын шатанд өгсөн мэдүүлэгтээ: 2024 оны 12 дугаар сарын 21-ний өдөр Өмнөговь аймгийн ******* сумын нутаг дэвсгэрт Номгон сумаас адуун хүнс хийгээд гэр бүлийн хүн болон охины хамт 19 цагийн үед аймгийн төв рүү хөдөлсөн ингээд замд явж байхад гэр бүлийн хүн хэрүүл маргаан үүсгээд намайг машин дотор үсдэж дарсан тэгж байгаад охин А.*******ийг аваад буусан тэгээд би охиныг өг гэхэд өгөхгүй байсан. Тэгээд цагдаад дуудлага өгсөн тэр үед мөн намайг боосон. Тэр үед би машинтайгаа хөдөлсөн юм цагдаагаас та гэрлээ шилжүүл арай өндөр газарт гар гэхээр нь би хөдлөөд явсан тэгээд эргээд ирэхэд байхгүй байсан. Тэгээд 2 цаг гаран болсон байх. Ингэж байхад цагдаагаас болон миний гэр бүлээс хүмүүс ирэхтэй зэрэгцээд охин ******* хоёр машин дээр ирсэн. Тэгээд аймагт орж ирээд цагдаад өргөдлөө өгсөн. Баруун талын хацар хөхөрсөн, баруун чих хөхөрсөн, баруун талын шанаа өвдөлт ихтэй, баруун жавьж хөхөрсөн, улайсан,  зүүн талын хацар нүдний доод талд хөхөрсөн, цээж бага зэрэг хөхөрсөн, баруун гарын бугалга хэсэгт хөхөрсөн. Би согтууруулах, ундааны зүйл хэрэглээгүй. ******* хэрэглэсэн... гэх мэдүүлэг /хавтаст хэргийн 16-17 дахь тал/,

Шүүгдэгч С.******* мөрдөн байцаалтын шатанд яллагдагчаар өгсөн мэдүүлэгтээ: Өмнөговь аймгийн Номгон сум хөдөө айлаас адуу хүнс хийх гээд 2024 оны 12 дугаар сарын 21-ний орой 18 цагийн үед аймгийн чиглэлд эхнэр хүүхдийн хамт машинтай хөдөлсөн. Тухайн үед айлын хүнтэй муудалцаад салсан байсан тэгээд тэр маргааныг машинд яриад эндээс хөдөө явахын урд өдөр эхнэр ажлынхаа хүмүүстэй гадуур гараад оройтож ирсэн байсан тэр талаар би ярьж эхлээд маргаан үүсээд би 2, 3 удаа үсдэж, зулгаасан тэр үед намайг машинаас буу холд яв гээд буусан тэгээд би буугаад машины арын хаалгыг онгойлгоод ахиж үснээс нь татах үед охин хажууд ирсэн уйлж байсан. Би охиноо тэвэрч авах үед эхнэр машинтай хөдөлсөн тэгээд охин бид хоёрыг 2 удаа тойроод явсан хойшоо чиглэлд явсан гэрэл нь харагдахгүй болсон. Би тэр үед замын ойролцоо алхаад охиноо даарчих байх гэж бодоод жалганд 30-40 минут тэвэрч суусан тэгж байгаад охиноо тэврээд босож ирэхэд ойролцоо нэг машин гэрлээ асаасан зогсож байхаар нь очиход эхнэр машиндаа сууж байсан. Тэгж байхад эхнэрийн гэр бүлээс болон цагдаагаас ирсэн. “...Хоёр удаа алгадсан, 2-3 удаа үснээс татсан зулгаасан мөн хүзүү хэсгээс нь багалзуурдсан боосон харин гараа атгаж цохиогүй...” “...Бид хоёр маргалдаж байгаад би уурандаа биед нь халдсан миний буруу...” гэх мэдүүлэг /хавтаст хэргийн 19-20 дахь тал/,

Өмнөговь аймаг дахь Бүсийн шүүх шинжилгээний төвийн 2024 оны 12 дугаар сарын 27-ны өдрийн ....... дугаартай шинжээчийн дүгнэлтэд “Х.*******ын биед тархи доргилт, баруун зүүн нүдний зовхинд цус хуралт, зөөлөн эдийн няцрал, зулайд зөөлөн эдийн няцрал, хүзүүнд цус хуралт, зулгаралт, баруун чих, цээж, баруун, зүүн бугалгад цус хуралт гэмтэл тогтоогдлоо. Дээрх гэмтэл нь  мохоо зүйлийн олон удаагийн үйлчлэлээр хэрэг болсон гэх хугацаанд үүссэн байх боломжтой. Уг гэмтлүүд нь цаашид ерөнхий хөдөлмөрийн чадвар алдалтанд нөлөөлөхгүй. Х.*******ын биед учирсан гэмтэл нь хохирлын зэрэг тогтоох журмын 3.1.1-д зааснаар эрүүл мэндийг түр хугацаанд сарниулах тул хохирлын хөнгөн зэрэгт хамаарна. /хавтаст хэргийн 23-24 дахь тал/

Иргэний оршин суугаа газрын хаягийн бүртгэлийн лавлагаа /хавтаст хэргийн 32 дахь тал/

Гэрлэсний бүртгэлгүй лавлагаа /хавтаст хэргийн 33 дахь тал/

Эрүүгийн хариуцлага хүлээж байгаа болон хүлээж байсан эсэхийг шалгах хуудас /хавтаст хэргийн 29 дэх тал/ зэрэг бичгийн нотлох баримтуудыг шинжлэн судалсан болно.

Шүүгдэгч С.******* нь 2024 оны 12 дугаар сарын 21-ний өдөр Өмнөговь аймгийн ******* сумын ******* 4 дүгээр багийн нутагт “Toyota prius” маркийн ........улсын дугаартай тээврийн хэрэгслийн кабинд согтууруулах ундааны зүйл хэрэглэсэн үедээ гэр бүлийн хамаарал бүхий харилцаатай Х.*******ын эрх чөлөөнд халдаж, зодон гэр бүлийн хүчирхийлэл үйлдэн эрүүл мэндэд нь хөнгөн хохирол санаатай учруулсан үйл баримт тогтоогдож байна.

Шүүгдэгч С.*******т холбогдох хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн байцаалтын шатанд оролцогчийн хуулиар хамгаалагдсан эрхийг хасаж хязгаарласан, Эрүүгийн хэрэг хянан шийдвэрлэх тухай хуульд заасан шаардлагыг зөрчсөн гэх ноцтой зөрчил тогтоогдоогүй.

Шүүгдэгч С.******* нь 2024 оны 12 дугаар сарын 21-ний өдөр Өмнөговь аймгийн ******* сумын ******* 4 дүгээр багийн нутагт “Toyota prius” маркийн ........ улсын дугаартай тээврийн хэрэгслийн кабинд согтууруулах ундааны зүйл хэрэглэсэн үедээ гэр бүлийн хамаарал бүхий харилцаатай хамтран амьдрагч Х.*******ын биед тархи доргилт, баруун зүүн нүдний зовхинд цус хуралт, зөөлөн эдийн няцрал, зулайд зөөлөн эдийн няцрал, хүзүүнд цус хуралт, зулгаралт, баруун чих, цээж, баруун, зүүн бугалгад цус хуралт гэмтэл бүхий хөнгөн гэмтэл санаатай учруулж, хүүхдийн дэргэд гэр бүлийн хүчирхийлэл үйлдсэн гэмт хэрэг үйлдсэн болох нь шүүх хуралдааны хэлэлцүүлгийн шатанд шинжлэн судалсан хохирогч Х.*******ын мэдүүлэг /хавтаст хэргийн 16-17 дахь тал/, Шүүх шинжилгээний ерөнхий газрын Өмнөговь аймаг дахь Бүсийн шүүх шинжилгээний төвийн 2024 оны 12 дугаар сарын 27-ны өдрийн ..... дугаартай шинжээчийн дүгнэлт /хавтаст хэргийн 23-24 дахь тал/ зэрэг нотлох баримтуудаар хөдөлбөргүй тогтоогдож байна.

Гэр бүлийн хүчирхийлэл гэж гэр бүлийн хамаарал бүхий харилцаатай этгээд хэн нэгнийхээ сэтгэл санаа, бие махбодь, эдийн засаг, бэлгийн эрх чөлөөнд халдсан үйлдэл, эс үйлдэхүйг ойлгохоор тодорхойлсон.

Гэр бүлийн хүчирхийлэлтэй тэмцэх тухай хуулийн 3 дугаар зүйлийн 3.1.1 дэх хэсэгт: эхнэр, нөхөр, гэр бүлийн бусад гишүүн, хамтран амьдрагч, асран хамгаалагч, харгалзан дэмжигч, тэдгээрийн асрамж, хамгаалалтад байгаа этгээд, тухайн гэр бүлд хамт амьдарч байгаа этгээд нь тус хуулийн үйлчлэлд хамаарахаар заасан.  

Шүүгдэгч С.******* нь хохирогч Х.*******тай эхнэр, нөхөр болох нь хохирогч Х.*******ын “...Бид хоёр гэр бүлийн батлах байхгүй, хамт амьдраад 3 жил болж байна. Дундаасаа нэг охинтой 3 настай...” гэх мэдүүлэг /хавтаст хэргийн 16 дахь тал/ шүүгдэгч С.*******ын “...2021 онд Х.******* гэх хүнтэй танилцан гэр бүл болоод дундаасаа нэг хүүхэдтэй...” гэх мэдүүлэг /хавтаст хэргийн 28 дахь тал/-аар тогтоогдож байх тул гэр бүлийн хамаарал бүхий харилцаатай хүн гэж үзэх үндэслэлтэй байна.

Гэр бүлийн хүчирхийлэл нь бие махбодын, сэтгэл санааны, эдийн засгийн, бэлгийн гэсэн 4 хэлбэртэй байхаар хуульд тодорхойлсон ба шүүгдэгч С.******* нь хохирогч Х.*******ын биед тархи доргилт, баруун зүүн нүдний зовхинд цус хуралт, зөөлөн эдийн няцрал, зулайд зөөлөн эдийн няцрал, хүзүүнд цус хуралт, зулгаралт, баруун чих, цээж, баруун, зүүн бугалгад цус хуралт гэмтэл учруулсан байх тул бие махбодын хүчирхийлэл үйлдсэн гэж үзэхээр байна.  

Шүүгдэгч С.*******ын гэм буруутай үйлдлийн улмаас хохирогч Х.*******ын эрүүл мэндэд учирсан дээрх гэмтэл нь Өмнөговь аймаг дахь Бүсийн шүүх шинжилгээний төвийн 2024 оны 12 дугаар сарын 27-ны өдрийн 42 дугаартай шинжээчийн дүгнэлт  /хавтаст хэргийн 23-24 дахь тал/-ээр хөнгөн хохирол болох нь тогтоогдсон. 

Шинжээчийн дүгнэлт нь хуульд заасан журмын дагуу авагдсан, шинжилгээ хийх эрх бүхий этгээд уг шинжилгээг хийж дүгнэлт гаргасан байх тул шүүх шинжээчийн дүгнэлтийг Эрүүгийн хэрэг хянан шийдвэрлэх тухай хуульд заасны дагуу нотлох баримтаар үнэлж шийдвэрлэв.

Эрүүгийн хуулийн ерөнхий ангийн 2.3 дугаар зүйлийн 2 дахь хэсэгт: өөрийн үйлдэл, эс үйлдэхүйн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэсэн бол санаатай гэмт хэрэгт тооцно гэж тодорхойлсон.

Эрүүгийн хуулийн тусгай ангийн 11.6 дугаар зүйлийн 2 дахь хэсэгт энэ гэмт хэргийг энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн бол гэж Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.8-д заасан “гэр бүлийн хүчирхийлэл үйлдэж” дээрх гэмт хэргийг үйлдсэн гэж үзнэ.

Иймд шүүгдэгч С.*******ыг эхнэр Х.*******ад гэр бүлийн хүчирхийлэл үйлдэж, эрүүл мэндэд нь хөнгөн хохирол санаатай учруулсан гэмт хэрэг үйлдсэн гэм буруутай гэж үзэх үндэслэлтэй байна

Хохирогч Х.******* нь шүүхэд хандан шүүгдэгч С.*******т гомдол санал, нэхэмжлэхгүй зүйл байхгүй гэх тайлбарыг гаргасан тул шүүгдэгчийг бусдад төлөх хохирол төлбөргүй гэж үзлээ.

Шүүгдэгч С.*******ын үйлдэлд Эрүүгийн хуулийн ерөнхий ангийн 6.5, 6.6 дугаар зүйлд заасан эрүүгийн хариуцлагыг хөнгөрүүлэх, хүндрүүлэх нөхцөл байдал тогтоогдохгүй байна гэж үзлээ.

Шүүгдэгч С.*******ын хувийн байдлын тухайд .............тоотод оршин суух, урьд 2024 оны 01 дүгээр сарын 25-ны өдөр Өмнөговь аймгийн Сум дундын Эрүүгийн хэргийн анхан шатны шүүхийн 15 дугаартай тогтоолоор Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар 600 нэгжтэй тэнцэх хэмжээний буюу 600,000 төгрөгөөр торгох ялаар шийтгүүлж байсан болох нь иргэний оршин суугаа газрын хаягийн бүртгэлийн лавлагаа /хавтаст хэргийн 32 дахь тал/, гэрлэсний бүртгэлгүй лавлагаа /хавтаст хэргийн 33 дахь тал/, эрүүгийн хариуцлага хүлээж байгаа болон хүлээж байсан эсэхийг шалгах хуудас /хавтаст хэргийн 29 дэх тал/ зэрэг нотлох баримтуудаар тогтоогдож байна. 

Улсын яллагчийн зүгээс шүүгдэгч С.*******т Эрүүгийн хуулийн 10.1 дүгээр зүйлийн 2 дахь хэсгийн 2.8-д зааснаар гэр бүлийн хүчирхийлэл үйлдэж гэх хүндрүүлэх нөхцөл байдалтайгаар Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар 1 сарын хугацаагаар зорчих эрхийг хязгаарлах ял оногдуулах, уг ялын хязгаарлалтын бүсийг Өмнөговь аймгийн Даланзадгад сумын нутаг дэвсгэрээр тогтоох тухай санал, дүгнэлтийг,

Шүүгдэгчийн зүгээс хэлэх зүйл байхгүй гэх тайлбарыг тус тус гаргав.

Эрүүгийн хариуцлагын зорилго нь гэмт хэрэг үйлдсэн хүн, хуулийн этгээдийг цээрлүүлэх, гэмт хэргийн улмаас зөрчигдсөн эрхийг сэргээх, хохирлыг нөхөн төлүүлэх, гэмт хэргээс урьдчилан сэргийлэх, гэмт хэрэг үйлдсэн хүнийг нийгэмшүүлэхэд оршдог.

Эрүүгийн хариуцлага нь тухайн хүн, хуулийн этгээдийн үйлдсэн гэмт хэрэг, гэмт хэргийн нийгмийн аюулын шинж чанар, хэр хэмжээ, гэм буруугийн хэлбэрт тохирсон байна.

Гэмт хэрэгт тооцох, ял оногдуулахад хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, бэлгийн болон хүйсийн чиг баримжаа, боловсрол, хөгжлийн бэрхшээлтэй байдлаар ялгаварлан гадуурхахгүй байх зэрэг нь шударга ёсны зарчим байхаар хуульчилсан.

Эрүүгийн хуулийн тусгай ангийн 11.6 дугаар зүйлийн 2 дахь хэсэгт энэ гэмт хэргийг энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн бол дөрвөн зуун тавин нэгжээс хоёр мянга долоон зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас зургаан сар хүртэл хугацаагаар зорчих эрхийг хязгаарлах ял шийтгэнэ гэж хуульчилсан.

Шүүх шүүгдэгч С.*******ын үйлдсэн гэмт хэргийн нийгмийн аюулын шинж чанар, хэр хэмжээ, гэм буруугийн хэлбэр, гэм буруугаа хүлээн зөвшөөрч буй хувийн байдлыг харгалзан Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар 1 /нэг/ сарын хугацаагаар зорчих эрхийг хязгаарлах ял оногдуулж шийдвэрлэх нь Эрүүгийн хуулийн ерөнхий ангийн 1.3 дугаар зүйлд заасан шударга ёсны зарчим, 5.1 дүгээр зүйлийн 1 дэх хэсэгт заасан эрүүгийн хариуцлагын зорилгод нийцнэ гэж дүгнэв.

Зорчих эрхийг хязгаарлах ял нь гэмт хэрэг үйлдсэн хүнийг эрх бүхий байгууллагын хяналтад өөрийн оршин суух газраас явахыг хориглох, тодорхой газар очихыг хориглох, шүүхээс тогтоосон чиглэлээр зорчих үүргийг хүлээлгэж нийгмээс тусгаарлахгүйгээр засарч хүмүүжих боломжийг олгох зорилготой бөгөөд үйлдсэн гэмт хэргийн шинж чанар хувийн байдлыг харгалзан чөлөөтэй зорчих хүрээ хязгаарыг нь хумьж чиглэлийг тогтоох зэргээр чөлөөтэй зорчих эрхэд нь тодорхой хугацаанд хязгаарлалт тогтоож буй шийтгэлийн төрөл юм.

Шүүгдэгч С.*******т зорчих эрхийг хязгаарлах ял оногдуулж шийдвэрлэсэнтэй холбогдуулан түүнд Өмнөговь аймгийн Даланзадгад сумын нутаг дэвсгэрээс бусад чиглэлд явахыг хориглох хязгаарлалт тогтоож, уг ялын биелэлтэд хяналт тавихыг Өмнөговь аймаг дахь Шүүхийн шийдвэр гүйцэтгэх газарт даалгаж шийдвэрлэх нь эрүүгийн хариуцлагын зорилгод нийцнэ гэж дүгнэв.

Зорчих эрхийг хязгаарлах ял шийтгүүлсэн хүн эрх бүхий байгууллагын зөвшөөрөлтэйгөөр оршин суух газраа өөрчлөх, зорчих үүргийг хүлээх ба хүндэтгэн үзэх шалтгаанаар шүүхээс тогтоосон хориглолт, хязгаарлалтын нөхцөлийг өөрчлөх, эсхүл хязгаарлалт тогтоосон бүсээс гадагш 30 хүртэл хоногийн хугацаагаар түр зорчих зайлшгүй шаардлага үүссэн, эсхүл байнга оршин суугаа газраас бусад газарт 3 сараас дээш хугацаанд эмнэлгийн тусламж, үйлчилгээ авах шаардлагатай болсон зэрэг хуульд заасан үндэслэлээр зорчих эрх хязгаарлах ялыг түдгэлзүүлэх нөхцөл байдал үүсвэл энэ талаарх хүсэлтээ Шүүхийн шийдвэр гүйцэтгэх тухай хуулийн 154, 173, 174 дүгээр зүйлд заасан журмын дагуу хяналт тавьж буй эрх бүхий байгууллагын албан тушаалтанд буюу шүүхийн шийдвэр гүйцэтгэгч, прокурорт тавьж шийдвэрлүүлэх боломжтойг дурдах нь зүйтэй.    

Хохирогч Х.******* нь шүүгдэгч С.*******аас хохирол, төлбөр нэхэмжлээгүй, хохирлын талаар маргаагүй байх тул шүүгдэгч С.*******ыг бусдад төлөх хохирол төлбөргүй гэж үзлээ.

Шүүгдэгч С.******* цагдан хоригдсон хоноггүй, бусдад төлөх хохирол төлбөргүй, хэрэгт эд мөрийн баримтаар хураагдан ирсэн зүйлгүй, битүүмжилсэн хөрөнгө, орлогогүй, хэрэг хянан шийдвэрлэх ажиллагааны зардалгүй болно.

Шийтгэх тогтоол хуулийн хүчин төгөлдөр болтол шүүгдэгч С.*******т хувийн баталгаа гаргах таслан сэргийлэх арга хэмжээ авч шийдвэрлэв.    

Шүүгдэгч С.******* өөрөө өөрийгөө өмгөөлж, өмгөөлөгчгүй шүүх хуралдаанд оролцох хүсэлтээ бичгээр гаргасан тул Үндсэн хуулийн 16 дугаар зүйлийн 14 дэх хэсэгт заасан “өөрийгөө өмгөөлөх эрх, Эрүүгийн хэрэг хянан шийдвэрлэх тухай хуулийн 7.6 дугаар зүйлийн 3 дахь хэсэгт заасан шүүх шүүгдэгч өөрийгөө өмгөөлөх, эсхүл өмгөөлүүлэх, хууль зүйн туслалцаа авах эрхээ эдлэх боломжоор хангана” гэсэн эрхийг эрүүгийн хэрэг хянан шийдвэрлэх ажиллагаанд хангаж ажилласан ба Эрүүгийн хэрэг хянан шийдвэрлэх тухай хуулийн 5.3 дугаар зүйлд заасан өмгөөлөгчийг оролцуулах үндэслэл тогтоогдохгүй байна гэж үзэж хүсэлтийг хангаж шийдвэрлэсэн.     

Эрүүгийн хэрэг хянан шийдвэрлэх тухай хуулийн 36.2 дугаар зүйлийн 1, 2, 3, 4, 36.8 дугаар зүйлийн 1, 5 дахь хэсэгт заасныг тус тус удирдлага болгон

ТОГТООХ нь 

1. Шүүгдэгч ******* овогт *******гийн *******ыг Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.8-д зааснаар “гэр бүлийн хүчирхийлэл үйлдэж” гэх хүндрүүлэх нөхцөл  байдалтайгаар Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар гэр бүлийн хүчирхийлэл үйлдэж хүний эрүүл мэндэд хөнгөн хохирол санаатай учруулсан гэмт гэмт хэрэг үйлдсэн гэм буруутайд тооцсугай.    

2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгч С.*******т 1 /нэг/ сарын хугацаагаар зорчих эрхийг хязгаарлах ял шийтгэсүгэй.

3. Шүүгдэгч С.*******т зорчих эрхийг хязгаарлах ял шийтгэсэнтэй холбогдуулан түүнд Өмнөговь аймгийн Даланзадгад сумын нутаг дэвсгэрээс гарч явахыг хориглох хязгаарлалт тогтоож, уг ялын биелэлтэд хяналт тавихыг Өмнөговь аймаг дахь Шүүхийн шийдвэр гүйцэтгэх газарт даалгасугай.

4. Эрүүгийн хуулийн ерөнхий ангийн 5.5 дугаар зүйлийн 3 дахь хэсэгт зааснаар шүүгдэгч С.******* нь зорчих эрхийг хязгаарлах ялыг биелүүлээгүй бол зорчих эрхийг хязгаарлах ялын эдлээгүй үлдсэн хугацааны нэг хоногийг хорих ялын нэг хоногоор тооцож хорих ялаар солихыг мэдэгдсүгэй.

5. Хохирогч Х.******* нь шүүгдэгч С.*******аас хохирол, төлбөр нэхэмжлээгүй, хохирлын талаар маргаагүй болохыг тайлбарласугай.

6. Шүүгдэгч С.******* цагдан хоригдсон хоноггүй, бусдад төлөх хохирол төлбөргүй, хэрэгт эд мөрийн баримтаар хураагдан ирсэн зүйлгүй, битүүмжилсэн хөрөнгө, орлогогүй, хэрэг хянан шийдвэрлэх ажиллагааны зардалгүй болохыг тус тус дурдсугай.  

7. Шийтгэх тогтоол хуулийн хүчин төгөлдөр болтол шүүгдэгч С.*******т хувийн баталгаа гаргах таслан сэргийлэх арга хэмжээ авсугай.

 8. Эрүүгийн хэрэг хянан шийдвэрлэх тухай хуулийн 38.1 дүгээр зүйлийн 1 дэх хэсэг, 38.2 дугаар зүйлд зааснаар шүүхийн шийтгэх тогтоолыг эс зөвшөөрвөл гардан авснаас хойш, эсхүл энэ хуулийн 11.9 дүгээр зүйлд заасны дагуу хүргүүлснээс хойш шүүгдэгч, хохирогч түүний хууль ёсны төлөөлөгч, тэдгээрийн өмгөөлөгч нар 14 хоногийн дотор Өмнөговь аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.

9. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэг, 37.1 дүгээр зүйлийн 2 дахь хэсэгт зааснаар шийтгэх тогтоол уншиж сонсгосноор хүчинтэй болохыг, шийтгэх тогтоолд гомдол, эсэргүүцэл гаргасан бол шийтгэх тогтоолын биелэлт түдгэлзэж, шүүгдэгч С.*******т авсан хувийн баталгаа гаргах таслан сэргийлэх арга хэмжээ хэвээр үргэлжлэхийг мэдэгдсүгэй.

 

 

 

                            ДАРГАЛАГЧ, ШҮҮГЧ                                    Э.ОЮУН-ЭРДЭНЭ