156/ШШ2020/00457

 

МОНГОЛ УЛСЫН НЭРИЙН ӨМНӨӨС

  

 

156/2020/00405/И 

Хэнтий аймаг дахь сум дундын Иргэний хэргийн анхан шатны шүүхийн шүүх хуралдааныг шүүгч Б.Марина даргалж, тус шүүхийн танхимд нээлттэй хийсэн хуралдаанаар:

Хүсэлт гаргагч: Хэнтий аймаг, Баян-Адарга сум, .. дүгээр багт оршин суух, М овогт Ж О /РД:........./-ийн хүсэлттэй нөхөх олговор гаргуулах тухай иргэний хэргийг хянан хэлэлцэв.

Шүүх хуралдаанд хүсэлт гаргагч Ж.О,  прокурор Г.М, шүүх хуралдааны нарийн бичгийн дарга Ж. нар оролцов. 

                                                                                ТОДОРХОЙЛОХ нь:

Хүсэлт гаргагч Ж.О шүүхэд гаргасан хүсэлт болон шүүх хуралдаанд гаргасан тайлбартаа: Миний аав болох Т.Ж нь 1938 онд улс төрийн хэрэгт баривчлан, Онцгой бүрэн эрхт комиссын 1938 оны 5 дугаар сарын 06-ны өдрийн 17 дугаар хурлын тогтоолоор Шүүх цаазны бичгийн 43, 47 дугаар зүйлээр 10 жил хорих ялаар шийтгэгдсэн. Дээд шүүхийн цэргийн коллегийн 1992 оны 7 дугаар сарын 06-ны өдрийн 106 дугаар магадлалаар цагаатгагдсан. Нөхөх олговорыг дүү Ж.Г тэнцүү хэмжээгээр хувааж авна. Иймд нөхөх олговрын 40 000 000 төгрөгийг гаргуулж өгнө үү гэв.

Прокурор шүүх хуралдаанд гаргасан тайлбартаа: Улс төрийн хилс хэрэгт иргэн Т.Ж нь холбогдож улмаар цагаатгагдсан, түүний охин нь хүсэлт гаргагч Ж.О мөн болох нь хэрэгт авагдсан нотлох баримтуудаар нотлогдож байгаа тул нөхөх олгвор 40,000,000 төгрөгийг олгоход татгалзах зүйлгүй гэв. 

 

Шүүх хэрэгт цугларсан болон шүүх хуралдаанаар хэлэлцэгдсэн нотлох баримтыг шинжлэн судлаад:

ҮНДЭСЛЭХ нь: 

Хүсэлт гаргагч Ж.О нь улс төрийн хилс хэрэгт хэлмэгдсний цагаатгалын нөхөх олговор болох 40,000,000 төгрөгийг гаргуулах тухай хүсэлтийг шүүхэд гаргажээ.

Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 10 дугаар зүйлийн 10.1.3 дахь хэсэгт зааснаар хүсэлт гаргагч Ж.О нь нөхөх олговор нэхэмжлэх эрхтэй байна. Энэ нь хэрэгт авагдсан Зууны мэдээ сонины 2020 оны 3 дугаар сарын 27-ны өдрийн 59 /6284/ дугаарт нийтлэгдэж баталгаажсан байна.

Т Ж нь улс төрийн хилс хэрэгт хэлмэгдэж Онцгой бүрэн эрхт комиссын 1938 оны 5 дугаар сарын 06-ны өдрийн 17 дугаар хурлын тогтоолоор Шүүх цаазын бичгийн 43, 47 дугаар зүйлээр 10 жилийн хорих ялаар шийтгэгдсэнийг хэрэгт холбогдолгүй болохыг тогтоож цагаатгасан, түүнчлэн Т.Ж нь улс төрийн хилс хэрэгт хэлмэгдсэнтэй холбогдуулан хэлмэгдэгч, түүний ар гэрт төрөөс орон сууц олгож байгаагүй, хүсэлт гаргагч Ж.О нь Т.Ж хүүхэд гэх үйл баримт дараах нотлох баримтуудаар тогтоогдсон байна. Үүнд:

- Хүсэлт гаргагчийн иргэний үнэмлэхний нотариатаар гэрчлүүлсэн хуулбар,

- Хэнтий аймгийн Баян-Адарга сумын Дуурлиг багийн Засаг даргын 2020 оны 4 дүгээр сарын 27-ны өдрийн 3/90 дугаартай албан тоот

- Улсын бүртгэлийн Ерөнхий газраас олгосон ...2020 оны 4 дүгээр сарын 21-ний өдрийн 00/002219 тоот Ж.Г эцэг Т.Ж, эх Ц.С гэх ХААТР-1 маягтын лавлагаа, Ж.О эцэг Т.Ж, эх Ц.С гэх төрсний бүртгэлийн лавлагаа,

- Улсын бүртгэлийн Ерөнхий газраас олгосон ...2020 оны 4 дүгээр сарын 21-ний өдрийн 00/002220 тоот Ц.С нь 2000 оны 10 дугаар сарын 23-ны өдөр нас барсаны бүртгэлийн лавлагаа

- Хэнтий аймгийн Баян-Адарга сумын Дуурлиг багийн Засаг даргын 2018 оны 12 дугаар сарын 26-ны өдрийн 3/321 дугаартай албан тоот

- Үндэсний төв архивын 2018 оны 12 дугаар сарын 04-ний өдрийн 03-6/6033 тоот 1989 оны улсын тооллогын бүртгэлийн лавлагаа,

- Үндэсний төв архивын 2018 оны 12 дугаар сарын 03-ны өдрийн 03-1/6009 тоот 1956 оны хүн амын тооллогын бүртгэлийн лавлагаа,

- Үндэсний төв архивын 2018 оны 12 дугаар сарын 04-ний өдрийн 03-6/6034 тоот 1989 оны улсын тооллогын бүртгэлийн лавлагаа,

- Тагнуулын ерөнхий газрын Тусгай архивын 2018 оны 12 дугаар сарын 06-ны өдрийн 05/6985 тоот лавлагаа,

- БНМАУ-ын Дээд шүүхийн цэргийн коллегийн хяналтын шатны шүүхийн 1992 оны 7 дугаар сарын 06-ны өдрийн 106 дугаартай магадлал,

- Ж.О дүү Ж.Г нөхөх олговрыг хувь тэнцүү хувааж авахаар хийгдсэн хэлцэл,

- Улсын дээд шүүхээс 1998 оны 3 дугаар сарын 20-ны өдөр олгосон цагаатгалын үнэмлэхний нотариатаар гэрчлүүлсэн хуулбар

- Хэнтий аймгийн сум дундын шүүхийн 1999 оны 8 дугаар сарын 30-ны өдрийн 504 дугаартай шийдвэрийн хуулбар,

- Цагаатгах ажлыг удирдан зохион байгуулах салбар комиссын 2020 оны 4 дүгээр сарын 20-ны өдрийн 40 тоот албан бичгүүд хэрэгт авагджээ.

Шүүх хуралдааны явцад Иргэний хэрэг шүүхэд хянан шийдвэрлэх тухай хуулийн 31, Прокурорын тухай хуулийн 20 дугаар зүйлд зааснаар хэрэг хянан шийдвэрлэх ажиллагаанд оролцсон прокурорын зүгээс нөхөх олговорыг олгох нь зүйтэй гэсэн саналыг гаргасан болно.

Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 13 дугаар зүйлийн 13.2, 13.2.2, 23 дугаар зүйлийн 23.1 дэх хэсэгт зааснаар хэлмэгдэгч Т.Ж нь улс төрийн хилс хэрэгт хэлмэгдэж хорих ялаар шийтгэгдсэн, үүнтэй холбогдуулж төрөөс орон сууц олгоогүй байх тул түүний охин Ж.О 40,000,000 төгрөгийн нөхөх олговор олгох нь зүйтэй гэж үзлээ. 

 Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118 дугаар зүйлд заасныг удирдлага болгон

                                                                                                                         ТОГТООХ нь: 

1. Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 13 дугаар зүйлийн 13.2.2 дахь хэсэгт заасныг баримтлан 40,000,000 төгрөгийн нөхөх олговрыг Хэнтий аймгийн Төрийн сангаас гаргуулан .......... регистрийн дугаартай, М овогт Ж О олгосугай.

2. Улсын тэмдэгтийн хураамжийн тухай хуулийн 41 дүгээр зүйлийн 41.1.9, Улс төрийн хилс хэрэгт хэлмэгдэгчдийг цагаатгах, тэдэнд нөхөн олговор олгох тухай хуулийн 16 дугаар зүйлийн 16.5-д зааснаар энэхүү хүсэлт нь улсын тэмдэгтийн хураамжаас чөлөөлөгдсөн болохыг дурдсугай.

 3. Иргэний хэрэг шүүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2-т зааснаар шийдвэр танилцуулан сонсгосноор хүчинтэй болох бөгөөд зохигч, төлөөлөгч, өмгөөлөгч, прокурор нь шийдвэрийг гардан авсан өдрөөс хойш 14 хоногийн дотор шийдвэр гаргасан шүүхээр дамжуулан Хэнтий аймгийн Эрүү, Иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

 

 

ДАРГАЛАГЧ ШҮҮГЧ                                            Б.МАРИНА