МОНГОЛ УЛСЫН НЭРИЙН ӨМНӨӨС

 

Налайх дүүргийн Иргэний хэргийн анхан шатны шүүхийн Ерөнхий шүүгч Л.Энхбилэг даргалж, тус шүүхийн танхимд хаалттай хийсэн иргэний шүүх хуралдаанаар

 

Нэхэмжлэгч: *******,*******, 1*******, ******* тоотод оршин суух *******гийн ******* /РД:*******/-гийн

 

Хариуцагч: *******, *******,ын тоотод оршин суух /РД:/-т холбогдох

 

Гэрлэлт цуцлуулах, хүүхдийн асрамж тогтоолгох тухай нэхэмжлэлийг 2020 оны 02 дугаар сарын 13-ны өдөр хүлээн авч, 2020 оны 02 дугаар сарын 20-ны өдөр иргэний хэрэг үүсгэснээр хянан хэлэлцэв.

 

Шүүх хуралдаанд: Нэхэмжлэгч Л.*******, хариуцагч Т., шүүх хуралдааны нарийн бичгийн дарга Ч.Сэлэнгэмөрөн нар оролцов.

 

ТОДОРХОЙЛОХ нь:

 

Нэхэмжлэгч Л.******* шүүхэд гаргасан нэхэмжлэл болон шүүх хуралдаанд тайлбарлахдаа: Т.тай 2007 оны 06 дугаар сарын 27-ны өдөр гэр бүл болж 12 сарын 22-ны өдөр охин Б. төрүүлсэн. 2010 онд Т. намайг бусадтай хардаж зодчихоод охин бид хоёрыг орхиод яваад өгсөн. Түүнээс хойш эргэж ирээгүй. Би ч хойноос нь яваагүй. Хэн аль нь эргэж эвлэрч амьдрах талаар яриагүй. 2013 онд би өөр хүнтэй ханилан сууж 2 хүүхэд төрүүлсэн. Цаашид эвлэрч амьдрах боломжгүй. Гэрлэлтээ цуцлуулна. Охиноо өөрийнхөө асрамжид авна. Тэтгэлэг гаргуулахгүй, эд хөрөнгийн маргаан байхгүй гэв.

 

Хариуцагч Т. шүүхэд болон шүүх хуралдаанд тайлбарлахдаа: 2006 онд танилцаад 2007 онд гэр бүл болж өвөл нь охин Б. төрсөн. Хардалтаас болоод бид хоёр салсан. Эргэж эвлэрч амьдраагүй. 2018 онд би өөр хүнтэй танилцаж нэг гэрт ханилан сууж 2020 оны 02 дугаар сарын 22-ны өдөр охинтой болсон учраас Л.*******тэй эвлэрч амьдрах боломжгүй. ...гэрлэлт цуцлах, охиныг ээжийнх нь асрамжид үлдээхэд татгалзах зүйлгүй гэв.

 

ҮНДЭСЛЭХ нь:

 

Шүүх нэхэмжлэлийг бүхэлд нь хангах үндэслэлтэй гэж үзсэн.

 

Нэхэмжлэгч Л.******* нь хариуцагч Т.т холбогдуулан үнэнч байх үүргээ биелүүлээгүй, олон жил тусдаа амьдарсан, өөр бусадтай ханилан сууж үр хүүхэд төрүүлсэн үндэслэлээр гэрлэлт цуцлуулах, хүүхдийн асрамж тогтоолгохыг шаардсан.

 

Хариуцагч Т. нэхэмжлэлийн үндэслэл, шаардлагад маргаагүй.

 

Гэрлэгчид 2007 оны 01 дүгээр сарын 05-ны өдөр гэр бүл болж 2007 оны 06 дугаар сарын 26-ны өдөр иргэний гэр бүлийн байдлын гэрлэлтийн бүртгэлийн 0209-рт бүртгүүлжээ./хх-8/

 

Тэд 2010 оноос хойш хувийн тараамжгүй байдлаас тусдаа амьдарсан бөгөөд энэ хугацаанд хэн аль нь эвлэрч амьдрах талаар санаачлага гаргаагүй, шүүхийн дэргэдэх эвлэрүүлэн зуучлалаар ороод хэн аль нь өөр хүнтэй ханилан сууж үр хүүхэд төрүүлсэн үндэслэлээр эвлэрээгүй болох нь зохигчдын тайлбар, эвлэрүүлэн зуучлагчийн 2020 оны 02 дугаар сарын 13-ны өдрийн уулзалтын тэмдэглэл зэрэг баримтаар тогтоогдсон./хх-10-13/

 

Гэрлэгчдийн дунд Гэр бүлийн тухай хуулийн 14 дүгээр зүйлийн 14.4.-т заасан нөхцөлүүд үүсээгүй ч гэрлэгчид тусдаа амьдраад олон жил болсон, хэн аль нь өөр бусадтай ханилан сууж үр хүүхэд төрүүлсэн байх тул шүүхээс тэдэнд эвлэрүүлэх арга хэмжээ авахгүйгээр гэрлэлтийг цуцлах нь зүйтэй гэж үзсэн.

 

Гэрлэгчдийн дундаас 2007 оны 12 дугаар сарын 22-ны өдөр охин Б. төрсөн./хх-10/

Гэрлэлт цуцлаж байгаатай холбогдуулан насанд хүрээгүй хүүхдийг Гэр бүлийн тухай хуулийн 14 дүгээр зүйлийн 14.5., 14.6.-д зааснаар эцэг, эхийн хэн нэгний асрамжид үлдээх асуудлыг шийдвэрлэдэг.

 

Зохигчдын тайлбар, хүүхэд асуусан тэмдэглэл зэргээс үзэхэд 2007 оны 12 сарын 22-ны өдөр төрсөн охин Б. эцэг, эхийг тусдаа амьдрах хугацаанд эхийн асрамжид байсан, тэрээр цаашид эхтэйгээ амьдрах сонирхолтой, эцэг хүүхдийн асрамжийн талаар эхтэй тохиролцсон зэргийг үндэслэн хүүхдийг эхийн асрамжид үлдээж нэхэмжлэлийг бүхэлд нь хангаж шийдвэрлэлээ.

 

Нэхэмжлэл хангагдсантай холбогдуулан улсын тэмдэгтийн хураамжийг Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1.-д заасан журмын дагуу нэхэмжлэгчийн урьдчилан төлсөн 140.400 төгрөгийг улсын төсөвт хэвээр үлдээж хариуцагчаас уг мөнгийг гаргуулж нэхэмжлэгчид буцаан олгов.

 

Цаг үеийн нөхцөл байдал, цар тахал өвчин гарсантай холбогдуулан нэхэмжлэгч Л.******* шүүх хуралдаанд Хөвсгөл аймгаас онлайнаар оролцсон учраас шүүхийн шийдвэрийг 14 хоногийн дотор баталгаат шуудангаар хүргүүлэх нь зүйтэй.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн

115.2.1., 116., 118., 132 дугаар зүйлийн 132.6.-д заасныг удирдлага болгон ТОГТООХ нь:

 

1.Гэр бүлийн тухай хуулийн 14 дүгээр зүйлийн 14.1.-д зааснаар , *******гийн ******* нарын гэрлэлтийг цуцалсугай.

 

2.Гэр бүлийн тухай хуулийн 14 дүгээр зүйлийн 14.5.-д зааснаар 2007 оны 12 дугаар сарын 22-ны өдөр төрсөн охин Б. эх Л.*******гийн асрамжид үлдээсүгэй.

 

3.Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1., 60 дугаар зүйлийн 60.1., Улсын тэмдэгтийн хураамжийн тухай хуулийн 7 дугаар зүйлийн 7.1.2.-т зааснаар нэхэмжлэгч Л.*******гийн улсын тэмдэгтийн хураамжид урьдчилан төлсөн 140.400 /нэг зуун дөчин мянга дөрвөн зуу/ төгрөгийг улсын орлого болгож, хариуцагч Т.аас 140.400 /нэг зуун дөчин мянга дөрвөн зуу/ төгрөгийг гаргуулж нэхэмжлэгч Л.*******д буцаан олгосугай.

 

4.Гэр бүлийн тухай хуулийн 14 дүгээр зүйлийн 14.9.-д заасныг баримтлан шүүхийн шийдвэрийг хуулийн хүчин төгөлдөр болсноос хойш ажлын гурван өдрийн дотор гэрлэлт бүртгэсэн Иргэний улсын бүртгэлийн байгууллагад хүргүүлэхийг шүүгчийн туслах Д.Одгэрэлд даалгасугай.

 

5.Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2.-т зааснаар зохигч шүүхийн шийдвэрийг гардан авснаас хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргаж болохыг заасугай.

 

6.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.5.-д зааснаар нэхэмжлэгч Л.*******гийн оршин суугаа хаягаар баталгаат шуудангаар шүүхийн шийдвэрийг хүргүүлэхийг шүүгчийн туслах Д.Одгэрэлд даалгасугай.

 

7.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2., 119.4., 119.7.-д зааснаар шийдвэрийг танилцуулан сонсгомогц хүчинтэй болох бөгөөд хариуцагч энэ өдрөөс хойш 21 хоногийн дотор шүүхэд хүрэлцэн ирж шийдвэрээ өөрөө гардан авах үүрэгтэй, энэ хугацааны дотор шүүхийн шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүйг мэдэгдсүгэй.

 

 

 

 

 

ДАРГАЛАГЧ Л.ЭНХБИЛЭГ