Нэхэмжлэлийн шаардлагыг хариуцагч

биелүүлснийг баталж, хэргийг

хэрэгсэхгүй болгох тухай

 

 

Сэлэнгэ аймаг дахь сум дундын иргэний хэргийн анхан шатны шүүхийн шүүгч Д.Мөнхцэцэг би Ч.*******ын нэхэмжлэлтэй, Л.*******т холбогдох Зээлийн төлбөрт 21.000.000 төгрөг гаргуулах, үүргийн гүйцэтгэлийг барьцаа хөрөнгөөр хангуулах, Л.*******ын сөрөг нэхэмжлэлтэй Ч.*******ад холбогдох Зээлийн гэрээ болон барьцааны гэрээг хүчин төгөлдөр бус хэлцэлд тооцуулахыг хүссэн иргэний хэргийг хянаад:

ТОДОРХОЙЛОХ нь:

Нэхэмжлэгч: Дархан-Уул аймаг, Дархан сум, 5 дугаар баг, 20 дугаар хороолол, 2 дугаар байрны 52 тоотод оршин суух, хувиараа хөдөлмөр эрхэлдэг гэх ******* овгийн *******ын ******* /регистрийн дугаар УХ-71090202/ шүүхэд гаргасан нэхэмжлэлдээ:

...Нэхэмжлэлийн шаардлага:

1.Үндсэн зээл 20.000.000 төгрөг, зээлийн хүү 1.000.000 төгрөг, бүгд 21.000.000 төгрөг гаргуулах,

2.Үүргийн гүйцэтгэлийг барьцааны зүйл болох Дархан-Уул аймаг, дархан сум, 7 дугаар баг, Түлээтийн 3 дугаар гудамж, 104 тоотод орших хувийн орон сууц, газраас хангуулах

Нэхэмжлэлийн үндэслэл: Миний бие хувиараа түүхий эд цуглуулах ажил эрхэлдэг юм. Хариуцагч Л.*******ын гуйлт, хүсэлтийн дагуу харилцан тохиролцож, 2017 оны 04 дүгээр сарын 28-ны өдөр Зээлийн болон барьцааны гэрээ байгуулан хариуцагч Л.*******т 20.000.000 төгрөгийг 4 сарын хугацаатайгаар 5 хувийн хүүтэйгээр Л.*******г байлцуулж зээл олгосон юм.

Л.*******аас зээлийн гэрээнийхээ үүргийн дагуу авсан зээлээ буцааж төлөхийг олон удаа шаардсан боловч төлөхгүйгээр намайг банкны зээл, хүү төлүүлэн хохироосоор байна. Миний бие зээл өгөхдөө хариуцагч Л.*******ын хувийн өмчийн хашаа /газар/, орон сууцыг барьцаалан гэрээ байгуулсан тухай Улсын бүртгэлийн байгууллагад мэдэгдэн гэрээндээ тэмдэглэл хийлгүүлсэн болно.

Зээлийн гэрээний хоёрдугаар зүйлийн 2.7 дахь хэсэгт заасны дагуу гэрээнийхээ үүргээ 270 хоног хэтрүүлсний алданги хоног тутамд 0.5 хувиар тооцож

үзэхэд 35.100.000 төгрөг нэмж нэхэмжлэх хууль зүйн үндэслэл үр дагавартай боловч хариуцагч Л.*******ын хувийн байдлыг харгалзан нэхэмжлэхгүй байгаа бөгөөд зөвхөн зээлийн гэрээний үндсэн үүргийн гүйцэтгэлийг шаардаж байна... гэжээ.

 

Нэхэмжлэгч: Ч.*******, түүний өмгөөлөгч А.******* нар нь 2019 оны 02 дугаар сарын 22-нд шүүхэд гаргасан хүсэлтэндээ:

...Иргэн Ч.*******ын нэхэмжлэлтэй Л.*******т холбогдох 21.000.000 төгрөг гаргуулах тухай нэхэмжлэлийн шаардлагыг хариуцагч талаас төлж барагдуулан хохирлыг арилгасан, нэхэмжлэгчийн нэхэмжлэлийн шаардлагыг хангасан байх тул бид тус шүүхэд гаргасан нэхэмжлэлээсээ татгалзаж байна. Хүсэлтийг хүлээн авч хэргийг хэрэгсэхгүй болгож өгнө үү! гэжээ.

 

Хариуцагч: Сэлэнгэ аймаг, Хушаат сум, Даагат 1 дүгээр баг, *******н ******* /регистрийн дугаар ОО-80121013/ шүүхэд гаргасан хүсэлтэндээ:

...Ч.*******ын нэхэмжлэлтэй Л.*******т холбогдох иргэний хэрэгт Ч.******* нь тус шүүхэд гаргасан нэхэмжлэлээсээ татгалзсан тул хариуцагч талаас шүүхэд гаргасан сөрөг нэхэмжлэлийг хүлээн авахаас татгалзахад гомдолгүй. Сөрөг нэхэмжлэл гаргасахад төлсөн 70.200 төгрөгийг буцаан хариуцагчид олгохоор тусгаж өгнө үү!

 

ҮНДЭСЛЭХ нь:

 

Нэхэмжлэгч Ч.******* нь хариуцагч Л.*******т холбогдуулан зээлийн гэрээний үүргийн биелэлт 21.000.000 төгрөг гаргуулах, үүргийн гүйцэтгэлийг барьцаа хөрөнгөөр хангуулахыг хүссэн нэхэмжлэл гаргасан ба хариуцагч Л.******* нь Ч.*******ад холбогдуулан Зээлийн гэрээ болон барьцааны гэрээг хүчин төгөлдөр бус хэлцэлд тооцуулахаар сөрөг нэхэмжлэл гаргасан байна.

Хэрэг хянан шийдвэрлэх ажиллагааны шатанд хариуцагч нь нэхэмжлэлийн шаардлага болох 21.000.000 төгрөгийг төлж барагдуулснаар нэхэмжлэгч Ч.******* шүүхэд гаргасан нэхэмжлэлээсээ татгалзсан байх тул Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2-т зааснаар Нэхэмжлэлийн шаардлагыг хариуцагч биелүүлснийг баталж, хэргийг хэрэгсэхгүй болгож шийдвэрлэх үндэслэлтэй байна.

Хариуцагч нэхэмжлэлийн шаардлагыг биелүүлсэн нь хуулинд нийцсэн, гуравдагч этгээдийн хуулиар хамгаалагдсан эрх ашиг, сонирхлыг хөндөөгүй болно.

Нэхэмжлэгч нэхэмжлэлээсээ татгалзсан байх тул Л.*******ын Зээлийн гэрээ болон барьцааны гэрээг хүчин төгөлдөр бус хэлцэлд тооцуулах тухай сөрөг нэхэмжлэлийг хүлээн авахаас татгалзах нь зүйтэй.

Иймд Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчийн улсын тэмдэгтийн хураамжид урьдчилан төлсөн 262.950 төгрөгийг төрийн сангийн орлогод хэвээр үлдээж, улсын тэмдэгтийн хураамж 262.950 төгрөгний тал хувь болох 131.475 төгрөгийг хариуцагчаас, үлдэх тал хувь болох 131.475 төгрөгийг Сүхбаатар сумын төрийн сангийн орлогоос буцаан гаргуулж нэхэмжлэгчид олгож, Л.*******ын сөрөг нэхэмжлэлд төлсөн улсын тэмдэгтийн хураамж 70.200 төг

рөгийг төрийн сангийн орлогоос гаргуулан Л.*******т буцаан олгох нь зүйтэй.

 

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйлийн 75.1, 123 дугаар зүйлийн 123.1 дэх хэсэгт заасныг удирдлага болгон ЗАХИРАМЖЛАХ нь:

 

1. Ч.*******ын нэхэмжлэлтэй, Л.*******т холбогдох Зээлийн төлбөрт 21.000.000 төгрөг гаргуулах, үүргийн гүйцэтгэлийг барьцаа хөрөнгөөр хангуулах-ыг хүссэн иргэний хэргийн хариуцагч нэхэмжлэлийн шаардлагыг биелүүлснийг баталж, хэргийг хэрэгсэхгүй болгож, Л.*******ын Ч.*******ад холбогдох Зээлийн гэрээ болон барьцааны гэрээг хүчин төгөлдөр бус хэлцэлд тооцуулах-ыг хүссэн сөрөг нэхэмжлэлийг хүлээн авахаас татгалзсугай.

 

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчийн улсын тэмдэгтийн хураамжид урьдчилан төлсөн 262.950 төгрөгийг орон нутгийн төсвийн орлогод хэвээр үлдээж, улсын тэмдэгтийн хураамж 262.950 төгрөгний тал хувь болох 131.475 төгрөгийг хариуцагчаас, үлдэх тал хувь болох 131.475 төгрөгийг Сүхбаатар сумын төрийн сангийн орлогоос буцаан гаргуулж Ч.*******ад олгож, Л.*******ын сөрөг нэхэмжлэлд төлсөн улсын тэмдэгтийн хураамж 70.200 төгрөгийг төрийн сангийн орлогооос гаргуулан буцаан олгосугай.

 

3. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4 дэх хэсэгт зааснаар зохигчид давж заалдах, хяналтын журмаар хянан шийдвэрлүүлэхээр гомдол гаргах эрхгүй болохыг дурдсугай.

 

 

 

 

 

 

ШҮҮГЧ Д.МӨНХЦЭЦЭГ