МОНГОЛ УЛСЫН НЭРИЙН ӨМНӨӨС

 

 

Хэргийн индекс: 166/2017/0110/Э

 

Дархан-Уул аймаг дахь сум дундын Эрүүгийн хэргийн анхан шатны шүүхийн шүүгч Б.Ихтамир даргалж,

Шүүх хуралдааны нарийн бичгийн дарга Б.Нандинцэцэг,

Улсын яллагчаар М.Очбадрах,

Шүүгдэгчийн өмгөөлөгч Ц.Гэнэндулам, Н.Баярмаа, Б.Чинбаатар,

Шүүгдэгч Б.Тогтох, Ц.Хаянгарав, Н.Дарханбат нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар

 

Дархан-Уул аймгийн Прокурорын газраас Эрүүгийн хуулийн тусгай ангийн 146 дугаар зүйлийн 146.2-т заасан гэмт хэрэгт Боржигин овогт Цэрэндоржийн Хаянгарав, Бараг овогт Нацагдоржийн Дарханбат нарт, Эрүүгийн хуулийн тусгай ангийн 181 дүгээр зүйлийн 181.1-т заасан гэмт хэрэгт  Бугадууд овогт Буянжаргалын Тогтохт тус тус холбогдуулан яллах дүгнэлт үйлдэж ирүүлсэн, эрүүгийн 201609000395 дугаартай хэргийг 2017 оны 6 дугаар сарын 30-ны  өдөр хүлээн авч, шүүн хэлэлцэв.

 

Шүүгдэгч нарын биеийн байцаалт:

 

1. Монгол Улсын иргэн, 1972 оны 10 дугаар сарын 06-нд Дархан-Уул аймагт төрсөн, 45 настай, эрэгтэй, бүрэн дунд боловсролтой, өрлөгчин мэргэжилтэй, ам бүл 3 эхнэр, хүүхдийн хамтаар Дархан-Уул аймаг Дархан сумын 18 дугаар баг Карьерын задгайд оршин суух, эрхэлсэн тодорхой ажилгүй, улсаас авсан гавъяа шагналгүй, ухаан мэдрэл бүрэн, урд ял шийтгэлгүй, Бугадууд овогт Буянжаргалын Тогтох /Регистрийн дугаар: ТГ72100671/,

 

2. Монгол Улсын иргэн, 1976 оны 12 дугаар сарын 21-нд Дархан-Уул аймагт төрсөн, 41 настай, эрэгтэй, бага боловсролтой, мэргэжилгүй, ам бүл 3 аав, дүүгийн хамтаар Дархан-Уул аймаг Дархан сумын 13 дугаар баг 27-24 тоотод оршин суух, эрхэлсэн тодорхой ажилгүй, улсаас авсан гавъяа шагналгүй, ухаан мэдрэл бүрэн, Урьд:

-Дархан-Уул аймгийн Сум дундын шүүхийн  1994 оны 03 дугаар сарын 11-ны өдрийн дугаар 77 тоот Таслан шийдвэрлэх тогтоолоор Эрүүгийн хуулийн 112 дугаар зүйлийн 112.2-т зааснаар 1 /нэг/ жил 6 /зургаа/сарын хорих ялаар,

-Дархан-Уул аймгийн Сум дундын шүүхийн  1997  оны 05 дугаар сарын 12-ны өдрийн дугаар 177 тоот шийтгэх тогтоолоор Эрүүгийн хуулийн тусгай ангийн 239 дүгээр зүйлийн 239.1-т зааснаар 1 жилийн 1 сарын хугацаагаар хорих ялыг тэнсэж мөн хугацаагаар хянан харгалзсан,

-Дархан-Уул аймгийн Сум дундын шүүхийн  1998 оны 05 дугаар сарын 27-ны өдрийн 213 тоот Шийтгэх тогтоолоор Эрүүгийн хуулийн тусгай ангийн 125 дугаар зүйлийн 125.1-т зааснаар  2 жил хорих ялаар,

-Дархан-Уул аймгийн Сум дундын шүүхийн 2000 оны 10 дугаар сарын 20-ны өдрийн дугаар 348 тоот Шийтгэх тогтоолоор Эрүүгийн хуулийн тусгай ангийн 125 дугаар зүйлийн 125.1-д зааснаар 2 жил хорих ялаар,

-Баянгол дүүргийн эрүүгийн хэргийн анхан шатны шүүхийн 2004 оны 02 дугаар сарын 25-ны өдрийн дугаар 63 тоот Шийтгэх тогтоолоор Эрүүгийн хуулийн тусгай ангийн 146 дугаар зүйлийн 146.3-д зааснаар 5 жил 1 сар хорих ялаар тус тус шийтгүүлж байсан Боржигин овогт Цэрэндоржийн Хаянгарав /Регистрийн дугаар: ТЗ76122112/,

 

3. Монгол Улсын иргэн, 1981 оны 12 дугаар сарын 15-нд Дархан-Уул аймагт төрсөн, 36 настай, эрэгтэй, бүрэн бус дунд боловсролтой, мэргэжилгүй, ам бүл 4, 3 дүүгийн хамтаар Дархан-Уул аймаг Дархан сумын 7 дугаар баг Түлээтийн 2-73 тоотод түр оршин суух, Сэлэнгэ аймгийн Мандал сумын 6 дугаар баг Баянхангай гудамж 94 тоотод оршин суух албан ёсны бүртгэлтэй, эрхэлсэн тодорхой ажилгүй, улсаас авсан гавъяа шагналгүй, ухаан мэдрэл бүрэн, Урьд:

-Дархан-Уул аймгийн Сум дундын шүүхийн 2002 оны шийтгэх тогтоолоор Эрүүгийн хуулийн тусгай ангийн 125 дугаар зүйлийн 125.1 -т зааснаар  1 жил хорих ялаар,

-Дархан-Уул аймгийн Сум дундын шүүхийн 2004 оны 04 дүгээр сарын 20-ны өдрийн дугаар 116 тоот Шийтгэх тогтоолоор Эрүүгийн хуулийн тусгай ангийн 181 дүгээр зүйлийн 181.2.1-д зааснаар 3 жил 10 хоног хорих ялаар тус тус шийтгүүлж байсан, Бараг овгийн Нацагдоржийн Дарханбат /Регистрийн дугаар: ТИ81121572/

 

Холбогдсон хэргийн талаар:

Шүүгдэгч Б.Тогтох нь согтууруулах ундаа хэрэглэсэн үедээ 2016 оны 06 дугаар сарын 28-ны өдрийн 17 цагийн орчимд Дархан-Уул аймаг Дархан сумын 16 дугаар багийн нутаг дэвсгэрт байрлах үйлчилгээний төвийн “Манхан” дэлгүүрийн орчимд бусдыг илтэд үл хүндэтгэн хохирогч Л.Дэлгэрсайханыг ямар ч шалтаг шалтгаангүйгээр боож унагаан нийгмийн хэв журмыг ноцтой зөрчин танхайрсан,

Шүүгдэгч Ц.Хаянгарав, Н.Дарханбат нар нь согтууруулах ундаа хэрэглэсэн үедээ, бүлэглэн 2016 оны 06 дугаар сарын 28-ны өдрийн 17 цагийн орчимд Дархан-Уул аймаг Дархан сумын 16 дугаар багийн нутаг дэвсгэрт байрлах үйлчилгээний төвийн “Манхан" дэлгүүрийн орчимд яллагдагч Б.Тогтох нь хохирогч Л.Дэлгэрсайханыг боож унагаасан байх үед нь бэлэн 350.000 /Гурван зуун тавин мянга/ төгрөг болон Нокиа-6110 загварын гар утас 1 ширхэг зэрэг нийт 390.000 /Гурван зуун ерэн мянга/ төгрөгийн эд зүйлийг нь булааж бага бус хэмжээний хохирол учруулсан гэмт хэрэгт тус тус холбогджээ. /яллах дүгнэлтэд бичигдсэнээр/

ТОДОРХОЙЛОХ нь:

 

1.Гэм буруугийн талаар:

 

Шүүгдэгч Т.Тогтох нь хохирогч Л.Дэлгэрсайханыг илтэд үл хүндэтгэн хоолойг нь боож унаган нийгмийн хэв журмыг зөрчсөн,

Шүүгдэгч Ц.Хаянгарав, Н.Дарханбат нар нь Л.Дэлгэрсайханы 350000 төгрөг болон 40000 төгрөгийн үнэтэй Нокиа-6110 гар утсыг илээр, хүч хэрэглэхгүйгээр, хууль бусаар авсан болох нь:

Шүүгдэгч Б.Тогтохын шүүхийн хэлэлцүүлэгт өгсөн: “Энэ хэрэг 2016 оны 06 дугаар сарын 28-ны орой болсон. Би бага зэрэг архи уусан явж байгаад хохирогч Л.Дэлгэрсайхантай маргалдсан. Түүнээс болж хохирогч Л.Дэлгэрсайханы мөнгө алга болсон, намайг өөрийнхөө мөнгийг дээрэмдсэн гэж хэлсэн. Би Л.Дэлгэрсайхантай маргалдаж муудалцсан нь үнэн, гэхдээ мөнгийг аваагүй. ” гэх мэдүүлэг,

 

Шүүгдэгч Ц.Хаянгаравын шүүхийн хэлэлцүүлэгт өгсөн: Би 2016 оны 06 дугаар сарын 28-ны өдөр Үйлчилгээний төвийн орчимд архи ууж байгаад Б.Тогтох, Н.Дарханбат нартай таарч 21 дүгээр байрны гадаа 1 шил архи хувааж уусан. Б.Тогтох, Н.Дарханбат хоёр түрүүлээд Үйлчилгээний төв рүү явсан. Би таньдаг хүнтэйгээ тамхилчихаад Б.Тогтох, Н.Дарханбат нарын араас очиход Б.Тогтох Л.Дэлгэрсайхантай маргалдаад Б.Тогтохын толгойноос нь цус гарсан байдалтай байсан. Намайг Л.Дэлгэрсайханыг яв гээд түлхэх үед Л.Дэлгэрсайхан арагшаа савж унасан. Тэр үед Л.Дэлгэрсайханы гараас нь базсан 20.000 төгрөгүүд унасан. Би тэр мөнгийг аваад байрны булан тойроод явсан. Миний араас Н.Дарханбат гүйж ирээд бид хамт мөнгийг хэрэглэсэн. Тухайн үед Б.Тогтох Л.Дэлгэрсайхантай муудалцаад үлдсэн. Намайг мөнгө авч явсныг мэдээгүй гэх мэдүүлэг,

 

Шүүгдэгч Н.Дарханбатын шүүхийн хэлэлцүүлэгт өгсөн: 2016 оны 06 дугаар сарын 27-ны өдөр Б.Тогтох бид хоёр түрүүлж явсан. Үйлчилгээний арын баарнаас Л.Дэлгэрсайхан өөрөөсөө гадна 2 залуутай гарч ирсэн. Тухайн үед Л.Дэлгэрсайхан согтуу байсан. Би барааны дэлгүүрээс тамхи авахаар явсан. Харин Б.Тогтох ард үлдсэн. Би барааны дэлгүүрт нилээд удсан. Намайг дэлгүүрээс гарч ирэхэд Б.Тогтохын подволк нь урагдсан. Цээж нүцгэн байсан. Тэр үед Л.Дэлгэрсайхан Б.Тогтохыг тойрч гүйгээд мөнгө нэхэж байсан. Тухайн үед Ц.Хаянгарав харагдахгүй байхаар нь би Ц.Хаянгаравын араас явж очтол Ц.Хаянгарав би “Б.Тогтохтой маргалдаж байсан залуугын гарнаас мөнгө унасан. Би түүнийг нь авсан” гэж хэлсэн. Би Улаанбаатарт ажилтай байсан учраас тэр орой Улаанбаатар хот руу явсан гэх мэдүүлэг,

 

Хохирогч Л.Дэлгэрсайханы шүүхийн хэлэлцүүлэгт өгсөн: “... Би 2016 оны 06 дугаар сарын 26-ны өдөр бирж /зах/ дээр ажиллаж байсан. Тухайн өдөр миний цалин буусан. Би хамт ажиллаж байсан Лхагвасүрэнтэй хамт Үйлчилгээний төвийн ард бааранд орсон. Манхан дэлгүүрийн тэнд Б.Тогтох намайг боосон. Хажууд нь Ц.Хаянгарав хараад сууж байсан. Н.Дарханбат миний халааснаас утсыг маань авсан. Тэр үед би өөрийнхөө зүүн халаасанд байсан мөнгийг гартаа атгасан. Гэтэл Н.Дарханбат, Ц.Хаянгарав нар  миний гарнаас мөнгийг авч явсан. Би Б.Тогтохоос мөнгөө авахаар нэхсэн. Б.Тогтох төд удалгүй алга болсон. Миний зүгээс одоо бол ямар нэгэн санал хүсэлт, нэхэмжлэх зүйл байхгүй. Би өөрт учирсан хохирлоо авчихсан... гэх мэдүүлэг,

 

Гэрч Б.Лхагвасүрэнгийн мөрдөн байцаалтад өгсөн: “...Хэн хэн нь ямар үйлдэл гаргасан талаар нь сайн санахгүй байна. Тухайн 3 залуу Дэлгэрсайханыг хэдэн талаас хөдөлгөөнгүй барьж аваад уртааш нь газар хэвтүүлээд карма хотыг нэгжээд эд зүйлийг нь 2 залуу нь аваад зугтаад яваад өгсөн.” гэсэн мэдүүлэг /1-р хх-ийн 19-20/,

 

Гэрч П.Уртнасангийн мөрдөн байцаалтад өгсөн: “...2016 оны 06 дугаар сарын 28-ны өдрийн 17 цагийн орчимд намайг ажил дээрээ байж байхад надтай хамт ажиллаж байсан Энхцэцэг гэж эмэгтэй надад –танай нөхрийг 2-3 архичин боож унагаад өшиглөөд байна гэсэн. Тэгэхээр нь ажлынхаа ар талын цонхоор харсан чинь Даниста дэлгүүрийн урд талд үл таних эрэгтэй хүн манай нөхрийн хоолойг нь өмсөж явсан подволкоор нь боогоод газар унагасан байсан. Мөн үл таних 2 хүн манай ажлын хажуу талын аркаар маш хурдтай гүйгээд яваад өгөх шиг болсон. Тэгээд би нөхөр дээрээ очих гээд ажлынхаа хаалгаар гартал манай нөхөр Тогтох гэж залууг барьчихсан –энэ залуу, 2 залуутай нийлээд миний хоолойг боож унагаад халаасанд байсан гар утас, гарт барьж байсан 350.000 төгрөгийг минь дээрэмдээд явчихлаа -Би энэ залууг яах вэ? гэж хэлсэн. Тэгээд би нөхөртөө наад залуугаа цагдаа дуудаад өгчих гэж хэлсэн. Тэгээд би цагдаа дуудах гэсэн чинь цагдаагийн утас нь ачаалал ихтэй ярьж болохгүй байсан. Учир нь тухайн өдөр сонгуулийн санал авах өдрийн урьд өдөр нь байсан. Тэгээд би Тогтох гэж залууд хандаж чи миний нөхрийн мөнгийг өгөөч гэж хэлэхэд би танай нөхрийн мөнгийг аваагүй, зугтаагаад явсан 2 залуу авсан гэж хэлсэн.” гэсэн мэдүүлэг/1-р хх-ийн 16-18/,

 

Гэрч Б.Шинэхүүгийн  мөрдөн байцаалтын шатанд өгсөн:  “ Би үйлчилгээний төвийн урд үйл ажиллагаа явуулдаг Хаан банк, Хаан экспресс АТМ-д хамгаалагчийн үүрэг гүйцэтгэж ажилласан. 16-17 цагийн хооронд байсан санагдаад байна “Манхан” дэлгүүрийн урд талд үл таних  3 залуучууд 1 залууг дээрэмдээд байгаа ч юм шиг тухайн 3 залуугийн 1 залуу нь дээрэмдэж байгаа хүнийхээ араас боож газар унагаах шиг болсон. Удаагүй байж байсан чинь 3 залуугийн 2 залуу нь хаашаа гүйсэнг нь сайн санахгүй байна нэг тийшээ зугтаагаад явчих шиг болсон.” гэсэн мэдүүлэг /1-р хх-ийн 21/,

 

Гэрч Б.Энхцэцэгийн мөрдөн байцаалтад өгсөн: “...Манхан дэлгүүрийн хажуу талаар явж байхад манай цайны газарт тогтооч хийдэг Уртнасангийн нөхөр Дэлгэрсайхан гэж залуу манай үйлчилгээний төв дээр сүү зардаг Нямжил эгчийн хүү Тогтох гэж залуутай барьцалдаад зогсож байхаар нь би тухайн 2 залууг болиоч гэж салгаад ажил дээрээ очоод хамт ажилладаг Уртнасанд танай нөхөр гадаа хүнтэй зодолдоод байна гэж хэлсэн. ...Хажууд нь Дэлгэрсайхантай хамт явж байсан гэх жижигхэн, сахалтай үл таних залуу, Тогтохтой хамт манай үйлчилгээний төв орчмоор архи уугаад явдаг 2 залуу хараад зогсож байсан ...Тогтох, Дэлгэрсайхан нар архи согтууруулах ундааны зүйл хэрэглэсэн байх шиг байсан. Тогтох нилээн согтсон юм шиг надад санагдсан. ...Би цайны газраасаа гараад баруун талд байдаг таван цулын цайны газар руугаа алхаад явж байхад Тогтохын хажууд байсан 2 залуу “Од” цогцолбор сургууль чиглээд гүйгээд явж байх шиг харагдсан...” гэсэн мэдүүлэг /1-р хх-ийн 22-23/,

 

- Нокиа-6110 маркийн гар утас 1 ширхэг 40.000 төгрөгийн үнэтэй гэх “Капитал зууч” ХХК-ийн 2016 оны 08 дугаар сарын 06-ны өдрийн эд зүйл үнэлсэн тайлан /1-р хх-ийн 38-39/ зэрэг хавтаст хэрэгт авагдсан, шүүх хуралдаанаар хэлэлцэгдсэн бусад бичгийн нотлох баримтуудаар нотлогдож байна.

 

2015 оны Эрүүгийн хуулийн 1.8 дугаар зүйлийн 1 дэх хэсэгт “Үйлдэл, эс үйлдэхүйг гэмт хэрэгт тооцох, гэм буруутай хүн, хуулийн этгээдэд хүлээлгэх эрүүгийн хариуцлагын төрөл, хэмжээг тухайн гэмт хэргийг үйлдэх үед дагаж мөрдөж байсан хуулиар тодорхойлно” гэж, 1.9 дүгээр зүйлийн 1 дэх хэсэгт “Үйлдэл, эс үйлдэхүйг гэмт хэрэгт тооцохгүй болсон, оногдуулах ялыг хөнгөрүүлсэн, гэмт хэрэг үйлдсэн этгээдийн эрх зүйн байдлыг дээрдүүлсэн хуулийг буцаан хэрэглэнэ” гэж тус тус заажээ.

 

Иймд 2015 оны Эрүүгийн хуульд бусдыг илтэд үл хүндэтгэн хүч хэрэглэх буюу хүч хэрэглэхээр заналхийлж, нийгмийн хэв журмыг ноцтой зөрчиж танхайрах үйлдэл нь 2015 оны Эрүүгийн хуулиар гэмт хэрэгт тооцогдохгүй болсон байх тул шүүгдэгч Т.Тогтохыг 2002 оны Эрүүгийн хуулийн тусгай ангийн 181 дүгээр зүйлийн 181.1-т зааснаар яллах дүгнэлт үйлдэж ирүүлсэн хэргийг хэрэгсэхгүй болгох нь зүйтэй байна.

 

Мөн 2015 оны Эрүүгийн хуулийн тусгай ангийн 17.2 дугаар зүйлийн 1 дэх хэсэгт “Бусдын эд хөрөнгийг илээр, хүч хэрэглэхгүйгээр, хууль бусаар авсан бол зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ” гэж заасан нь оногдуулах ялын хэмжээ хэмжээ багасч, шүүгдэгчийн эрх зүйн байдлыг дээрдүүлж байх тул хууль буцаан хэрэглэж, шүүгдэгч Ц.Хаянгарав, Н.Дарханбат нарыг 2015 оны Эрүүгийн хуулийн тусгай ангийн 17.2 дугаар зүйлийн 1 дэх хэсэгт заасан “дээрэмдэх” гэмт хэрэг үйлдсэн гэм буруутайд тус тус тооцох нь зүйтэй гэж үзлээ.

Шүүгдэгч нар нь гэмт хэрэг үйлдэж учруулсан хохирлоо нөхөн төлсөн болох нь эд зүйл хүлээлгэн өгсөн тэмдэглэл /1-р хх-ийн 8-10/, хохирогч, шүүгдэгч нарын мэдүүлгээр нотлогдож байна.

Иймд шүүгдэгч нар нь бусдад төлөх төлбөргүй, хохирогч Л.Дэлгэрсайхан нь нэхэмжлэх зүйлгүй, гомдол саналгүй гэснийг дурдах нь зүйтэй байна.

 

 

2.Ял, эрүүгийн хариуцлагын бусад асуудлын талаар:

 

Эрүүгийн хариуцлага нь эрүүгийн хуульд заасан ял, албадлагын арга хэмжээнээс бүрддэг ба шүүгдэгч Ц.Хаянгарав, Н.Дарханбат нар нь эрүүгийн хариуцлага хүлээлгэх насанд хүрсэн, хэрэг хариуцах чадвартай байна.

 

Шүүгдэгч Ц.Хаянгарав, Н.Дарханбат нар нь гэмт хэргийн улмаас учруулсан хохирлоо нөхөн төлснийг эрүүгийн хариуцлагыг хөнгөрүүлэх нөхцөл байдалд тооцож, шүүгдэгч нарын гэмт хэрэг үйлдсэн нөхцөл байдал, учирсан хохирол, хор уршгийн шинж чанар, хувийн байдал зэргийг харгалзан Эрүүгийн хуулийн тусгай ангийн 17.2 дугаар зүйлийн 1 дэх хэсэгт зааснаар 6 сарын хугацаагаар хорих ял оногдуулж, уг ялыг нээлттэй хорих байгууллагад эдлүүлэх нь зүйтэй гэж үзлээ.

Шүүгдэгч Б.Тогтох нь 85 хоног цагдан хоригдсоныг дурдаж, шүүгдэгч Ц.Хаянгарав, Н.Дарханбат нарын цагдан хоригдсон 85 хоногийг эдлэх ялд оруулан тооцож, хэрэгт хураасан болон битүүмжилсэн эд хөрөнгөгүй, эд мөрийн баримтаар хураагдаж ирүүлсэн эд зүйлгүй болохыг тус тус дурдах нь зүйтэй байна.

Шүүгдэгч Ц.Хаянгарав, Н.Дарханбат нарт оногдуулах эрүүгийн хариуцлагыг хүндрүүлэх нөхцөл байдал тогтоогдоогүй болно.

 

Эрүүгийн хэрэг хянан шийдвэрлэх тухай хуулийн  36.2, 36.3, 36.5, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон

ТОГТООХ нь:

 

 1. Эрүүгийн хуулийн ерөнхий ангийн 1.9 дүгээр зүйлийн 1 дэх хэсэг, Эрүүгийн хэрэг хянан шийдвэрлэх тухай хуулийн 34.19 дүгээр зүйлийн 1 дэх хэсгийн 1.5-д зааснаар 2002 оны Эрүүгийн хуулийн тусгай ангийн 181 дүгээр зүйлийн 181.1-т зааснаар яллах дүгнэлт үйлдэж ирүүлсэн Бугадууд овогт Буянжаргалын Тогтохт холбогдох хэргийг хэрэгсэхгүй болгосугай.

 

2. Эрүүгийн хуулийн ерөнхий ангийн 1.9 дүгээр зүйлийн 1 дэх хэсэгт заасныг баримтлан Эрүүгийн хуулийн тусгай ангийн 17.2 дугаар зүйлийн 1 дэх хэсэгт зааснаар Боржигин овогт Цэрэндоржийн Хаянгарав, Бараг овогт Нацагдоржийн Дарханбат нарыг бусдын эд хөрөнгийг илээр, хүч хэрэглэхгүйгээр, хууль бусаар авсан гэмт хэрэг үйлдсэн гэмт буруутайд тус тус тооцсугай.

 

3. Шүүгдэгч нар нь бусдад төлөх төлбөргүй, тэднээс гаргуулах хэрэг хянан шийдвэрлэх ажиллагааны зардалгүй, хохирогч гомдол саналгүй, нэхэмжлэх зүйлгүй болохыг дурдсугай.

 

4. Эрүүгийн хуулийн тусгай ангийн 17.2 дугаар зүйлийн 1 дэх хэсэгт зааснаар шүүгдэгч Ц.Хаянгарав, Н.Дарханбат нарт тус бүр 6 сар /зургаа сар/-ын хугацаагаар хорих ял оногдуулсугай.

 

5. Эрүүгийн хуулийн ерөнхий ангийн 5.6 дугаар зүйлийн 4 дэх хэсэгт зааснаар шүүгдэгч Ц.Хаянгарав, Н.Дарханбат нарт оногдуулсан 6 сарын хугацаагаар хорих ялыг нээлттэй хорих байгууллагад эдлүүлсүгэй.

 

6. Эрүүгийн хуулийн ерөнхий ангийн 6.10 дугаар зүйлийн 1, 2-т зааснаар шүүгдэгч Ц.Хаянгарав, Н.Дарханбат нарын цагдан хоригдсон 85 хоногийг эдлэх ялд оруулан тооцсугай.                      

 

 7. Хэрэгт  эд мөрийн баримтаар хураагдсан болон битүүмжлэгдсэн эд зүйлгүй, шүүгдэгч Т.Тогтох нь 85 хоног цагдан хоригдсоныг тус тус дурдсугай.

 

8. Шийтгэх тогтоол уншиж сонсгосноор хүчинтэй болох ба шүүгдэгч Т.Тогтохт урьд авсан хувийн баталгаа гаргах таслан сэргийлэх арга хэмжээг хүчингүй болгож, шүүгдэгч Ц.Хаянгарав, Н.Дарханбат нарт урьд авсан хувийн баталгаа гаргах таслан сэргийлэх арга хэмжээг өөрчилж, цагдан хорьж, эдлэх ялыг энэ өдрөөс эхлэн тоолсугай.

 

9. Давж заалдах гомдол гаргах, эсэргүүцэл бичих эрх бүхий этгээд тогтоолыг эс зөвшөөрвөл гардуулсан буюу хүргүүлснээс хойш 14 хоногийн дотор Дархан-Уул аймгийн Эрүүгийн хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

10. Давж заалдах гомдол гаргасан, эсэргүүцэл бичигдсэн тохиолдолд тогтоолын биелэлтийг түдгэлзүүлсүгэй.

 

 

 

 

ДАРГАЛАГЧ, ШҮҮГЧ                                 Б.ИХТАМИР