МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь сум дундын, эрүүгийн хэргийн анхан шатны шүүхийн шүүх хуралдааныг шүүгч Н.Ариунжаргал даргалж тус шүүхийн шүүх хуралдааны танхимд нээлттэй хийсэн шүүх хуралдаанаар:

Нарийн бичгийн дарга Х.Золжаргал

Улсын яллагч Г.Сэндэнсүрэн,

Шүүгдэгч Э.Ү- нарыг оролцуулан Аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Э.Ү-д холбогдох эрүүгийн 1738001220033 тоот хэргийг 2017 оны 8 дугаар сарын 29-ний өдөр хүлээн авч хянан хэлэлцэв.

Шүүгдэгчийн биеийн байцаалт:

Монгол улсын иргэн, Э.Ү-,

Шүүгдэгч Э.Ү- нь 2017 оны 07 дугаар сарын 27-ны өдөр Хөвсгөл аймгийн Тариалан сумын төвд найз охин Х.Л-г хардалтын улмаас зодож, эрүүл мэндэд нь хөнгөн хохирол учруулсан гэмт хэргийг үйлдсэнд холбогджээ.

ТОДОРХОЙЛОХ нь:

Шүүгдэгч Э.Ү- нь 2017 оны 07 дугаар сарын 27-ны өдөр Хөвсгөл аймгийн Тариалан сумын төвд найз охин Х.Л-г хардалтын улмаас зодож, эрүүл мэндэд нь хөнгөн хохирол учруулсан гэмт хэргийг үйлдсэн гэм буруутай болох нь:

Шүүгдэгч Э.Ү-ы мөрдөн байцаалтын шатанд өгсөн: “...Надад сонсгож байгаа зүйл ангийг хүлээн зөвшөөрч байна. 2017 оны 7 дугаар сарын 26-аас 27-ныг шилжих шөнө 03 цагийн үед байх /яг цагийг нь сайн санахгүй байна/ өөрийн найз Болорхундагатайгаа хамт найз охин болох Х.Л-гийнхээ гэрт очсон. Тухайн үед би найз охиныхоо гэрт согтуу очсон. Тэгээд найз охиныхоо гэрт байж байхдаа найз охинтойгоо түүний хүзүүн дээр үүссэн байсан улаалтаас болж хардаж маргалдсан. Маргалдаж байхдаа найз охиныхоо гарын булчин болон шуу хэсэг рүү 2-оос 3 удаа цохьсон...” гэх мэдүүлэг /хх-ийн 32 дугаар хуудас/,

Хохирогч Х.Л-гийн: “Манай найз залуу болох Э.Ү- нь архи уусан үедээ сүүлийн үед цохиж зодох болсон, хамгийн сүүлд намайг хардаж цохиж зодсон, зодохдоо нүүр амруу цохиж алгадаж, гар болон бугуйг хөх алаг болтол базаж гарын шуу хазсан, би удаа дараа намайг цохиж зодсон болохоор цагдаагийн газарт гомдол гаргасан...” гэх мэдүүлэг /хх-ийн 13 дугаар хуудас/,

Гэрч Х.Б-ын: “...2017 оны 07 сарын 27-ны өглөө үүрээр 04 цагийн үед манай дүү Х.Л- нь намайг Э.Ү- зодоод байна, та хүрч ирээд салгаад өгөөч гэж хэлэхээр нь би эхнэр Б.Ц-тэй хамт Х.Л-гийн гэрт очсон. Х.Л-гийн гэрийн хажууд давхар зочид буудал ажиллуулдаг юм, гэрт нь явж очтол гэрийнх нь шатан дээр Э.Ү- зогсож байснаа шатнаас буугаад зугтаад гүйсэн. Би Э.Ү-г араас нь хөөж гүйгээд бариад авъя гэж бодсон боловч гүйцэгдэхээргүй гүйгээд явсан. Би Х.Л-г Э.Ү- нь яаж зодож цохьсон талаар анзаарч хараагүй, манай эхнэр Б.Ц- харсан байх Х.Л- нь өөрөө хэлэхдээ сэрээгээр хатгасан гэсэн үг хэлээд байсан, тухайн үед би унтаж сэрсэн байсан болохоор нойрмог байсан тул нэг их анзаарч хайхраагүй...” гэх мэдүүлэг /хх-ийн 15 дугаар хуудас/,

Гэрч Б.Ц-ийн: “2017 оны 07 сарын сүүлээр Х.Л- залгаад Э.Ү- намайг зодоод байна гэж хэлэхээр нь Х.Л-гийн байрлаж ажиллуулдаг газарт нь очиход Э.Ү- нь шатан дээрээс үсэрч буугаад зугтаад явсан. Тэгтэл цаанаас нь Дагва гэж залуу өө Э.Ү- зугтаачихсан уу гэж хэлсээр гарч ирсэн. Х.Л- буудлаас уйлсан гарч ирсэн ил харагдах шарх болон цус гарсан зүйл анзаарагдаагүй, баруун өвдөгний дээд талд сэрээгээр зоосон гээд үзүүлэхэд өвдөг дээр нь сэрээгээр хатгасан ором буюу хоёр нүх гарсан өмдийг нь нэвт хатгасан байсан...” гэх мэдүүлэг /хх-ийн 16 дугаар хуудас/,  

Хөвсгөл аймаг дахь Шүүхийн шинжилгээний албаны шинжээчийн 2017 оны 08 дугаар сарын 03-ны өдрийн 477 дугаартай:

1. Х.Л-гийн биед гэмтэл тогтоогдлоо.
2. Х.Л-гийн биед баруун бугалганд цус хуралт, баруун, зүүн шуунд цус хуралт, зөөлөн эдийн няцрал, эрүүнд шарх бүхий гэмтэл учирсан байна.
3. Тухайн өөрийнх нь хэлсэн цаг хугацаанд үүсгэгдсэн байх боломжтой.
4. Хатуу мохоо зүйлийн үйлчлэлээр үүсгэгдэнэ.
5. Шүүх эмнэлгийн гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна.
6. Цаашид энгийн хөдөлмөрийн чадварт нөлөөлөхгүй гэх дүгнэлт /хх-ийн 19 дүгээр хуудас/ зэрэг шүүх хуралдаанаар хэлэлцэгдсэн дээрх нотлох баримтуудыг Эрүүгийн хэрэг хянан шийдвэрлэх тухай хуульд заасан арга хэрэгслийн дагуу цуглуулж бэхжүүлсэн, хэргийг шийдвэрлэхэд хангалттай байх тул шүүгдэгч Э.Ү-д Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар хүний эрүүл мэндэд хөнгөн хохирол учруулах гэмт хэргийг үйлдсэн гэм буруутайд тооцож, эрүүгийн хариуцлага хүлээлгэх үндэслэлтэй байна. Хэргийн зүйлчлэл зөв байна.

Шүүгдэгч Э.Ү- нь урьд ял шийтгэл эдэлж байгаагүй болох нь ял шийтгэгдсэн эсэхийг шалгах хуудас /хх-ийн 39 дүгээр хуудас/-аар тогтоогдож байна.

Шүүгдэгч нь хохирол төлбөрөө барагдуулсныг ял хөнгөрүүлэх нөхцөл байдалд тооцлоо.

Эрүүгийн 1738001220033 дугаартай хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, шүүгдэгч нь цагдаг хоригдсон хоноггүй, бусдад төлөх төлбөргүй болохыг дурдах нь дурдах нь зүйтэй байна.

Эрүүгийн хэрэг хянан шийдвэрлэх тухай хуулийн 17.5.1, 36.2, 36.4, 36.7, 36.8-д заасныг тус тус удирдлага болгон

ТОГТООХ нь:

1. Шүүгдэгч Э.Ү-ыг хүний эрүүл мэндэд хөнгөн хохирол учруулах гэмт хэргийг үйлдсэнд гэм буруутайд тооцсугай.
2. Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч Э.Ү-ыг зургаан зуун нэгжтэй тэнцэх хэмжээний буюу 600.000 /зургаан зуун мянга/ төгрөгөөр торгох ялаар шийтгэсүгэй.
3. Эрүүгийн хуулийн ерөнхий ангийн 5.3 дугаар зүйлийн 4 дэх хэсэгт зааснаар ялтан Э.Ү-д оногдуулсан зургаан зуун нэгжтэй тэнцэх хэмжээний төгрөгөөр торгох ялыг 2017 оны 10 дугаар сарын 25-ны өдрийн дотор төлж барагдуулахаар тогтсугай.
4. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар ялтан нь дээрх хугацаанд торгох ялыг биелүүлээгүй бол шүүх биелэгдээгүй ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солихыг дурдсугай.
5. Эрүүгийн 1738001220033 дугаартай хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, шүүгдэгч нь цагдаг хоригдсон хоноггүй, бусдад төлөх төлбөргүй болохыг дурдсугай.
6. Эрүүгийн хэрэг хянан шийдвэрлэх тухай хуулийн 36.10 дугаар зүйлд зааснаар шийтгэх тогтоол нь танилцуулан сонсгомогц хүчинтэй болох ба давж заалдах гомдол эсэргүүцэл гаргасан тохиолдолд тогтоолын биелэлтийг түдгэлзүүлж шийтгэх тогтоол хуулийн хүчин төгөлдөр болтол шүүгдэгч Э.Ү-д урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.
7. Эрүүгийн хэрэг хянан шийдвэрлэх тухай хуулийн 38.1 дүгээр зүйлийн 1, 38.2 дугаар зүйлийн 1 дэх хэсэгт зааснаар шийтгэх тогтоолыг гардан авснаас хойш 14 хоногийн дотор ялтан, хохирогч, тэдгээрийн өмгөөлөгч, хууль ёсны төлөөлөгч давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

ДАРГАЛАГЧ ШҮҮГЧ                         Н.АРИУНЖАРГАЛ