МОНГОЛ УЛСЫН НЭРИЙН ӨМНӨӨС

 

 

, Налайх дүүргийн Эрүүгийн хэргийн анхан шатны тойргийн  шүүхийн шүүгч Д.Чинзориг даргалж,

Шүүх хуралдааны нарийн бичгийн дарга М.Буянзаяа,

Улсын яллагч Б.Манлайбаатар,

Насанд хүрээгүй хохирогч Б.*******, түүний хууль ёсны төлөөлөгч Д.*******,

Насанд хүрээгүй хохирогчийн өмгөөлөгч Г.Наранбаатар,

Шүүгдэгч П.******* нарыг оролцуулан тус шүүхийн хуралдааны танхимд нээлттэй хийсэн шүүх хуралдаанаар:

Налайх, дүүргийн прокурорын газрын хяналтын прокурор Б.Манлайбаатарын Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 2025 оны 06 дугаар сарын 25-ны өдөр 128 дугаартай яллах дүгнэлт үйлдэж ирүүлсэн ******* овогт *******н *******ид холбогдох эрүүгийн 2507000000145 дугаартай нэг хавтаст хэргийг 2025 оны 08 дугаар сарын 21-ний  өдөр хүлээн авч хянан хэлэлцэв.

 

Шүүгдэгчийн биеийн байцаалт:

Монгол Улсын иргэн, ******* өдөр ******* аймгийн ******* суманд төрсөн, тай, эрэгтэй, дээд боловсролтой, мэргэжилтэй, “*******” ХХК-д ажилтай, ам бүл 4, эхнэр 2 хүүхдийн хамт дүүргийн тоотод оршин суудаг, урьд ял шийтгэлгүй,

******* овогт *******н ******* /РД:/,

Холбогдсон хэргийн талаар: /яллах дүгнэлтэд дурдсанаар/

Яллагдагч П.******* нь өсвөр насны хүүхдийн эсрэг өөрийн давуу байдлыг ашиглан 2025 оны 02 дугаар сарын 21-ний өдрийн оройн 22 цагийн орчимд дүүргийн ны нутаг дэвсгэрт байрлах , 7 дугаар байрны гадна “Миний хүүхдийг зодсон байна, чамайг яг адилхан зодно” гэж насанд хүрээгүй буюу 16 настай Б.******* рүү дайрч толгой болон дагз, зүүн талын чих рүү нь удаа дараа цохиж зодон эрүүл мэндэд нь “тархи доргилт, зүүн чихний хэнгэргэн хальсны урагдал, цоорол” гэмтэл бүхий хөнгөн хохирол санаатай учруулсан гэмт хэрэгт холбогджээ.

 

ТОДОРХОЙЛОХ нь:

 

Шүүгдэгч П.******* шүүхийн  хэлэлцүүлэгт:  “2025 оны 02 дугаар сарын 21-ний орой 22 цагийн үед ажлаасаа тарж ирээд гэртээ хэвтэж байсан. Тэгсэн манай хүү нойлд орж ирээд уйлаад байхаар нь юу болсон талаар асуухад Б.******* ах намайг зодчихлоо гэсэн. Тэгэхээр нь би яагаад зодсон талаар асуухад тамхиа алга болгосон гээд халаас нэгжээд байхаар нь халаасанд байгаа мөнгө авчхав гэж хэлсэн чинь учиргүй хоёр гараараа балбасан гэж хэлсэн.  Яахаараа тэгдэг юм бэ? гэж хэлээд гэр лүү нь ороод эмээд нь хэлсэн. Тэгсэн эмээ нь энэ одоо дандаа яах гэж хүүхэд дээрэлхдэг юм бэ? Алаад өгөхгүй юу гэж хэлээд бид хоёр гадаа хамт гарсан. Тэгээд Б.******* ирж байхаар нь би нэг удаа цохисон. Тухайн үед чихэндээ чихэвч зүүсэн байсан. Тэр үед би чих рүү нь цохиогүй. Шилэн хүзүү рүү нь хоёр удаа цохисон. Өөр зүйл болоогүй.” гэв.

 

Насанд хүрээгүй хохирогч Б.******* нь шүүхийн хэлэлцүүлэгт: “Тэмцээнээс тараад хоёр найзтайгаа хамт гэр лүүгээ явж байсан. Байрын голд ирж байхад над руу ирээд шууд чих, толгой руу хоёр удаа цохисон. Тэр үед би чихэвч зүүгээгүй байсан. Тэгээд шууд гэр лүүгээ орсон.” гэв. 

 

Шүүхийн хэлэлцүүлэгт талуудаас шүүхэд танилцуулсан нотлох баримтыг шүүхэд хэлэлцүүлэхгүй байх, нотлох баримтаас хасуулах, шинжлэн судлах дараалалд өөрчлөлт оруулах талаар санал, хүсэлт гараагүйг дурдаж, талуудаас шинжлэн судалсан болон бусад нотлох баримтууд:

 

Улсын яллагчийн зүгээс: насанд хүрээгүй хохирогч Б.*******ий  мэдүүлэг /хх-12-13/, нас тоолсон тэмдэглэл /хх-/, шинжээчийн дүгнэлт /хх-34-35/, гэрч н.ын мэдүүлэг /хх-24-25/, гэрч н.ийн мэдүүлэг /хх-20-21/, насанд хүрээгүй гэрч н.ий мэдүүлэг /хх-20-21/, насанд хүрээгүй хохирогчийн чих, хамар, хоолойн эмнэлэгт үзүүлсэн баримт /хх-36-41/, өвчтөний түүх болон холбогдох баримтууд /хх-64-84/,

Насанд хүрээгүй хохирогчийн өмгөөлөгч: Хавтаст хэргээс хохирогчийн мэдүүлэг /хх-15/, гэрч н.ийн мэдүүлэг /хх-20-21/, шинжээчийн дүгнэлт /хх-34/, эрүүл мэндтэй холбоотой эмнэлгийн байгууллагаас гаргасан баримтууд /хх-36-44/ зэргийг шинжлэн судлав.

Шүүгдэгч, насанд хүрээгүй хохирогч, түүний хууль ёсны төлөөлөгч нар нь нотлох баримт шинжлэн судлуулаагүй болно.

 

Шүүхийн хэлэлцүүлгийн үед шинжлэн судалсан болон хавтаст хэрэгт цугларсан нотлох баримтууд нь энэ хэрэгт хамааралтай, хуульд заасан журмаар цугларсан, хэрэг хянан шийдвэрлэхэд хангалттай. Мөн хохирогч, гэрч, яллагдагч нараас мэдүүлэг авахдаа Эрүүгийн хэрэг хянан шийдвэрлэх тухай хуулийг зөрчөөгүй, шинжээчийн дүгнэлт, нотлох баримтууд нь тухайн хэрэгт хамааралтай, агуулгын хувьд зөрүүгүй, үйл баримтыг хангалттай тогтоож чадсан хууль ёсны үнэн зөв баримтууд гэж үнэллээ.

 

Шүүх хуралдаанд гэм буруугийн болон эрүүгийн хариуцлагын талаар гаргасан дүгнэлт тайлбар

Улсын яллагч “...Иймд Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан хүний биед хөнгөн  хохирол учруулсан байх тул Эрүүгийн хуулийн 2.3 дугаар зүйлийн 2 дахь хэсэгт зааснаар гэм буруугийн санаатай хэлбэрээр үйлдсэн гэж дүгнэн яллагдагчийг шүүхэд шилжүүлэх саналыг гаргаж байна. Хохирогчийн зүгээс нэхэмжилсэн зүйлгүй тул П.******* нь бусдад төлөх төлбөргүй болно.” гэх,

Насанд хүрээгүй хохирогчийн өмгөөлөгч “Шүүгдэгч П.*******ийн зүгээс 2025 оны 02 дугаар сарын 21-ний өдөр 22 цагийн үед хүүхдийг минь зодлоо гэх шалтгаанаар хохирогч Б.*******ий толгой хэсэг рүү олон удаа цохиж тархи доргилт болон дунд чихний урагдал бүхий гэмтлийг санаатай учруулсан болох нь хавтаст хэрэгт авагдсан баримтуудаар нотлогдон тогтоогдож байх тул Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар гэм буруутайд тооцож өгнө үү. Хохирогчийн зүгээс хөнгөн хохиролтой холбоотой баримтаар нэхэмжилсэн зүйлгүй” гэх  дүгнэлт, тайлбарыг гаргав.

 

Шүүхээс тогтоосон хэргийн нөхцөл байдал

Прокуророос шүүхэд шилжүүлсэн эрүүгийн хэргийн хүрээнд холбогдсон хэрэгт гэм буруу, эрүүгийн хариуцлага хүлээлгэхдээ Эрүүгийн хуулийн хууль ёсны, шударга ёсны, гэм буруугийн зарчмыг тус тус баримтлан шүүхийн хэлэлцүүлэгт тогтоогдсон үйл баримт, шинжлэн судалсан болон хэрэгт цугларсан дээрх нотлох баримтуудыг үндэслэн дүгнэхэд:

Гэм буруугийн талаар

Шүүгдэгч П.******* нь 2025 оны 02 дугаар сарын 21-ний өдөр 22 цагийн орчимд дүүргийн ны нутаг дэвсгэрт байрлах , 7 дугаар байрны гадна насанд хүрээгүй хохирогч 16 настай Б.*******ийг “Миний хүүхдийг зодсон байна, чамайг яг адилхан зодно” гэх шалтгаанаар толгой болон дагз, зүүн талын чих рүү нь удаа дараа цохиж зодон эрүүл мэндэд нь тархи доргилт, зүүн чихний хэнгэргэн хальсны урагдал, цоорол бүхий хөнгөн хохирол санаатай учруулсан болох нь:

1. Мөрдөн шалгах ажиллагаанд яллагдагчаар П.*******ийн өгсөн: “...Би 2025 оны 02 дугаар сарын 21-ний орой гэртээ амарч байсан. Тэгсэн миний ганц хүү П. нь уйлсан байдалтай нүүр ам нь улайсан ариун цэврийн өрөө шууд яваад орсон. Би гайхаад юу болов гээд араас нь ороод болсон асуудлын талаар нь асуусан чинь дээд ангийн гэх хочтой Б.******* ах намайг сургуулийн автобус нь дотор зодсон гэж хэлэхэд нь би яагаад, юунаас болоод гэж асуусан чинь ******* нь миний хүүгийн халаасыг нь нэгжсэн. Энэ үед миний хүү халаасанд мөнгө байгаа авчхав аа гэж хэлсэн чинь би чиний мөнгийг авчих юм шиг байна уу би чамайг зөндөө тэвчсэн шүү гээд толгой руу нь 20-30 секунд гараараа тасралтгүй цохиж, нүдсэн гэж хэлсэн. Миний уур хүрээд Б.******* одоо хаана байна гэж асуусан чинь одоо ирж байгаа байх гэж манай хүү хэлсэн. Б.*******ий гэр манай байрны доод давхарт 8 тоотод хөрш айлууд байгаа юм. Гэрт нь орсон чинь Б.*******ий эмээ П., өвөө н. нар нь гэртээ байсан. Би Б.******* байна уу манай хүүхдийг зодсон байна гэсэн чинь ирээгүй байна гэж хэлээд эмээ нь энэ Б.******* ойрд бүр бөгс нь загатнаад байгаа юм алаад өг гэж надад хэлсэн. Тэгээд би эмээтэй нь орцны үүдэнд хамт тамхи татаад зогсож байсан чинь Б.******* орцны үүдэн хүрээд ирсэн. Чи яасан гэж хүүхэд зодож байгаа юм гэж асуусан чинь танай хүүхэд өөрөө над руу томроод байсан шүү дээ тэгээд намайг мөнгө авчхав аа гээд байхаар нь зодсон гэж хэлсэн. Би давраад байгаарай гэж хэлээд Б.*******ий шилэн хүзүү орчим нь уурандаа гараараа 2 удаа цохисон. Тэгсэн Б.******* намайг за яах вэ ална гэж намайг заналхийлээд орц руугаа орсон. Би гэртээ орсон. Би 2 удаа цохисон. Энэ үйлдлээ хүлээн зөвшөөрч байна...” гэх мэдүүлэг /хх 91 дүгээр тал/,

 

2. Мөрдөн шалгах ажиллагаанд насанд хүрээгүй хохирогчоор Б.*******ий өгсөн: “...Тэгээд явж байхад 12 дугаар ангийн Нямбаяр гэх хүүхдийн электрон тамхи алга болсон, дундаасаа шүү нэгжээрээ гэж нэг хүүхэд нь хэлсэн. Би суудал дээр байсан П.гээс эхлээд нэгжиж эхэлсэн. Тэгээд П.гийн куртикний дотор энгэрийн халаасыг нэгжиж гараа хийсэн. Тэгсэн П. намайг наана чинь мөнгө байгаа шүү шаачхав аа гэж хэлсэн. Тэр үед би уурлаад би хулгайч шиг харагдаад байна уу гээд гар руу нь зүүн гараараа 2 удаа, баруун гараараа 1 удаа алгадсан. Би нийт 3 удаа цохисон. Энэ үед намайг нэг нь зогсож байсан газраас холдуулж татсан. Би харанхуйд хэн гэдгийг нь таниагүй. Тэгээд би автобуснаас буугаад дэлгүүр ороод гэр рүүгээ явж байхад П.гийн аав П.******* ах, манай эмээ П. нар манай орцны үүдэнд зогсож байсан. П.гийн аав намайг үгийн зөрүүгүй шууд миний зүүн талын чих рүү 1 гараараа алгадаж, 1 удаа гараа зангидаж байгаад цохисон. Тэгээд дахин дагз руу 1 удаа гараа зангидаж байгаад цохисон. Нийт 3 удаа цохисон. Намайг чи хүүхэд зодлоо гэж ууртай байдлаар хэлсэн. Манай эмээ болиоч ээ гэж хэлээд намайг гэр рүү ор гэж хэлсэн. Би шууд гэр рүүгээ орсон. Тэрнээс хойш 3 хоног толгой эргээд халуураад байсан. Зүүн талын чих хавдсан байсан ба эмээ жин тавьж боож өгч, өвчин намдаах эм өгч байсан. Тухайн үед намайг зодуулж байхыг хамт явж байсан 12 дугаар ангийн Б., манай ангийн Г. нар харсан...П. намайг цохиогүй... Миний биеийн байдал хэвийн зүүн талын чих хааяа хатгаж өвдөөд байгаа. Гомдол саналтай байна. Шууд ирээд зодсонд айж байна, гомдолтой байна...” гэх мэдүүлэг /хх 12-13 дугаар тал/,

 

3. Мөрдөн шалгах ажиллагаанд насанд хүрээгүй гэрчээр Б.ын өгсөн: “...Би автобусны урдаас хойшоо ангийнхан руугаа явж байхад арын суудал дээр сууж байсан П.г Б.******* толгой руу нь алгадаж 2 удаа цохиод, сүүлд гараа зангидаж байгаад 2-3 удаа цохиод авсан. Б.******* П.д хандаж би чиний мөнгийг шаачих гээд байгаа юм шиг харагдаад байна уу гээд цохиод байсан. Би уг үйлдлийг таслан зогсоож Б.*******ийг боль одоо арай хэтэрлээ гэж хэлээд баруун талын сандал руу түлхэж суулгасан. Тухайн үед П. толгойгоо дараад доошоо тонгойгоод суугаад байсан. Автобус н дээр ирээд зогсоод П. түрүүлээд буугаад явсан. Би Б.*******ий хамт дэлгүүр ороод шагналын мөнгөөрөө идэх юм авч идсэн. Тэгээд 10 гаруй минут болоод байрны дунд яваад очсон чинь Б.*******ий орцны үүдэнд Б.*******ий эмээ, П.гийн аавтай зогсож байсан. Тэгээд шууд П.гийн аав Б.******* рүү дайраад чи миний хүүг яаж зодсон би чамайг яг тэгж зодно гээд баруун гараараа Б.*******ий зүүн хацар руу 1 алгадаж, дахин баруун гараараа зүүн шанаа хэсэг рүү нэг удаа гараа зангидаж цохисон, дахин баруун гараараа хүзүү рүү нь гараа зангидаж байгаад цохисон. Б.*******ий эмээ яагаад айлын хүүхэд зодож байгаа юм өвөө чинь ууртай хүлээж байна гэж хэлж байхыг харсан. Б.******* шууд орц руугаа яваад ороход нь араас нь эмээ нь, П.гийн аавтай орц руу нь яваад орсон. Манайх Б.*******ий орцны хажуу орц учир би гэр рүүгээ орсон...” гэх мэдүүлэг /хх 24-25 дугаар тал/,

 

4. Мөрдөн шалгах ажиллагаанд гэрчээр П.ийн өгсөн: “…П.******* миний зээ хүүгийн толгой руу нь 2, 3 удаа цохисон. Тухайн үед миний хүү далжийсан, гэхдээ унаагүй. Миний хүүгийн зүүн чих нь улайгаад хавдаад уйлаад байсан. Би эмнэлэгт ажиллаж байсан юм болохоор 400 граммтай натри надад байсан учир тэр натригаар хүйтэн жин тавьсан. Зээ хүү маань та ээж, аавд битгий хэлээрэй, та хэнд ч битгий хэл гээд уйлсан. Тэгсэн миний хүүгийн чихний нь хэнгэрэг хагарсан юм байна лээ...” гэх мэдүүлэг /хх 20-21 дүгээр тал/,

 

5. Мөрдөн шалгах ажиллагаанд насанд хүрээгүй гэрчээр Г.ий өгсөн: “…Б.******* нь П.г 2-3 удаа алгадсан. П. уйлаад байх шиг байсан. Автобус нд ирээд бүх хүүхдүүд буусан би ангийнхаа хүүхдүүдийн хамт дэлгүүр орж идэх юм аваад Б., Б.******* нарын хамт байрны гол руу орсон чинь 7 дугаар байрны урд Б.*******ий эмээ, П.гийн аавтай тамхи татаад зогсож байсан. Бид нараас түрүүлээд Б.******* орц руугаа явсан. Тэгсэн П.гийн аав нь шууд чи миний хүүг яаж зодсон би чамайг тэгж зодно гээд Б.*******ий зүүн хацар орчим 3 удаа баруун гараараа алгадсан. Б.******* юм хэлээгүй шууд орц руугаа орсон. Араас нь эмээ нь орц руугаа орсон. Би тэр үед шууд гэр лүүгээ орсон.” гэх мэдүүлэг /хх 28-29 дүгээр тал/,

 

6. Шүүх эмнэлгийн шинжилгээний тасгийн шинжээч эмчийн  2025 оны 3 дугаар сарын 19-ний өдрийн 147 дугаар: “Б.*******ий биед тархи доргилт. Зүүн чихний хэнгэргэн хальсны урагдтал, цоорол гэмтэл тогтоогдлоо. Дээрх гэмтэл нь мохоо зүйлийн үйлчлэлээр олон удаагийн үйлдлээр үүсгэгдэх боломжтой. Эрүүл мэндийг түр хугацаагаар сарниулах тул хүний эрүүл мэндэд учирсан хохирлын зэрэг тогтоох журмын 3.1.1-т зааснаар хохирлын хөнгөн зэрэг тогтоогдлоо.” гэх дүгнэлт /хх 34-35 дугаар тал/,

 

7.  Насанд хүрээгүй хохирогч Б.*******ий нас тоолсон тэмдэглэл /хх 15 дугаар тал/,

 

8. Насанд хүрээгүй хохирогч Б.*******ий “Мент мед” клиник эмнэлэгт болон Гэмтэл согог судлалын үндэсний төвд үзүүлсэн талаарх баримтууд /хх 36-41 дүгээр тал/,

 

9. Насанд хүрээгүй хохирогч Б.*******ий 2025 оны 3 дугаар сарын 11-ний өдөр дүүргийн эрүүл мэндийн төвд хэвтэн эмчлүүлсэн өвчний түүх болон холбогдох баримтууд /хх 64-84 дүгээр тал/,

 

10. Эрүүгийн хариуцлага хүлээж байсан эсэхийг шалгах хуудас /хх 57-58 дугаар тал/,

 

11. Шүүгдэгчийн хувийн байдлыг тогтоосон баримтууд /хх 50-58 дугаар тал/ зэрэг хавтаст хэрэгт авагдсан нотлох баримтуудаар нотлогдон тогтоогдож байна.

 

Хэргийн үйл баримтаас дүгнэхэд, шүүгдэгч нь хууль зүйн хувьд шууд санаатай үйлдлээр буюу хохирогчийн эрүүл мэндэд гэмтлийн зэрэг тогтоох журамд заасан хөнгөн зэргийн гэмтлийг учруулсан нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан “Хүний эрүүл мэндэд хөнгөн хохирол санаатай учруулах” гэмт хэргийн шинжийг бүрэн хангасан байна.

Өөрөөр хэлбэл шүүгдэгч П.******* нь насанд хүрээгүй хохирогч Б.*******ий биед халдаж эрүүл мэндэд нь “тархи доргилт, зүүн чихний хэнгэргэний хальсны урагдтал, цоорол” бүхий хөнгөн зэргийн гэмтэл учруулсан болох нь хохирогч, шүүгдэгч, гэрч нарын мэдүүлгээр тогтоогдсон ба зодуулсны улмаас хохирогчид хөнгөн зэргийн гэмтэл учирсан нь шинжээч эмчийн 147 дугаартай дүгнэлтээр тогтоогджээ.

 

Тиймээс шүүгдэгчийг гэм буруутайд тооцуулах талаар прокуророос яллах дүгнэлт үйлдэж ирүүлсэн хэргийн зүйлчлэл зөв байх тул улсын яллагчийн дүгнэлтийг хүлээн авч дээрх зүйл, хэсэгт зааснаар гэм буруутайд тооцох хууль зүйн үндэслэлтэй байна.

Гэм буруугийн талаар улсын яллагчаас шүүгдэгчийг Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэгт гэм буруутайд тооцуулах санал дүгнэлт гаргаж оролцсоныг хэргийн бусад оролцогчид хүлээн зөвшөөрч, хэргийн зүйлчлэл болон гэм буруугийн талаар маргаж мэтгэлцээгүйг дурдах нь зүйтэй.

Гэмт хэргийн улмаас учруулсан хохирол, хор уршгийн тухай.

Шүүгдэгч П.*******ийн гэм буруутай үйлдлийн улмаас насанд хүрээгүй хохирогч Б.*******ий биед хөнгөн хохирол учирсан ба насанд хүрээгүй хохирогч болон түүний хууль ёсны төлөөлөгч нарын зүгээс “гомдол санал, нэхэмжлэх зүйлгүй” гэсэн тул шүүгдэгчийг бусдад төлөх төлбөргүй гэж үзэв.

 

Шүүхээс шүүгдэгчид эрүүгийн хариуцлага хүлээлгэхдээ:

Эрүүгийн хуулийн Ерөнхий ангийн 5.1 дүгээр зүйлийн 1 дэх хэсэгт “Эрүүгийн хариуцлагын зорилго нь гэмт хэрэг үйлдсэн этгээдийг цээрлүүлэх, гэмт хэргийн улмаас зөрчигдсөн эрхийг сэргээх, хохирол нөхөн төлүүлэх, гэмт хэргээс урьдчилан сэргийлэх, гэмт хэрэг үйлдсэн хүнийг нийгэмшүүлэхэд оршино” гэж заасны дагуу эрүүгийн хариуцлагыг хууль ёсны, шударга ёсны, гэм буруугийн зарчмыг баримтлан гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдлыг тал бүрээс нь харгалзан эрүүгийн хариуцлага хүлээлгэх нь зүйтэй байна.

Үүнд: Шүүхийн хэлэлцүүлэгт дурдсан нотлох баримтаар тогтоогдсон гэмт хэрэг үйлдсэн хэргийн нөхцөл байдал нь гэмт хэрэг үйлдсэнээ хүлээн зөвшөөрч, гэм буруугийн талаар маргахгүй байгаа байдлыг,

Учирсан хохиролд: Хохирол, хор уршигт хандаж буй хандлага,

Хувийн байдалд: Шүүх хуралдаанд мэдүүлэг өгөхдөө гэмшиж байгаа байдал, ажил хөдөлмөр эрхлэлтийн байдал зэргийг харгалзан үзэв.

 

Харин шүүгдэгч П.*******ид Эрүүгийн хуулийн ерөнхий ангийн 6.5 дугаар зүйлд  заасан эрүүгийн хариуцлага хөнгөрүүлэх, 6.6 дугаар зүйлд заасан эрүүгийн хариуцлагыг хүндрүүлэх нөхцөл байдал тус тус тогтоогдоогүй болно.

 

Иймд шүүгдэгч П.*******ид Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан хүний эрүүл мэндэд хөнгөн хохирол санаатай учруулсан гэм буруутайд тооцож түүнд 240 цаг нийтэд тустай ажил хийх ял шийтгэх нь зүйтэй гэж шүүх үзэв.

 

Түүнчлэн Эрүүгийн хэрэг хянан шийдвэрлэх тухай хуулийн 34.7 дугаар зүйлийн 1 дэх хэсэгт “Прокурор шүүх хуралдаанд улсын яллагчаар оролцож, нотлох баримтыг шинжлэн судлах, шүүх хуралдааны явцад гарсан асуудлын талаар санал гаргах, шүүгдэгчид ял оногдуулахад баримтлах Эрүүгийн хуулийн зүйл, хэсэг, заалт, эрүүгийн хариуцлагын төрөл, хэмжээ, хорих байгууллагын нөхцөл, эрүүгийн хариуцлагаас чөлөөлөх, тэнсэх, албадлагын арга хэмжээ хэрэглэх болон бусад асуудлын талаарх дүгнэлтээ шүүхэд гаргана” гэж заасан байтал улсын яллагч шүүхийн хэлэлцүүлэгт шүүгдэгчид ямар хариуцлага хүлээлгэх, ямар төрлийн ял оногдуулах талаар байр сууриа илэрхийлж санал, дүгнэлтээ шүүхэд гаргаагүй,

Мөн дээрх гэмт хэрэг нь 2025 оны 02 дугаар сарын 21-ний өдөр үйлдэгдсэнээс хойш буюу шүүгдэгчийн холбогдсон “хөнгөн” гэмт хэргийг 4 сарын хугацаанд шалгаж 2025 оны 06 дугаар сарын 25-ны өдөр яллах дүгнэлт үйлдсэн байх ба яллагдагч нь хэрэг хянан шийдвэрлэх ажиллагааны явцад оргон зайлсан, эрэн сурвалжлагдсан нөхцөл байдал хавтаст хэрэгт авагдаагүй, хэрэг хянан шийдвэрлэх ажиллагаанд саад учруулсан гэж үзэх үндэслэл тогтоогдоогүй байхад яллах дүгнэлт үйлдэгдсэнээс хойш 2 сарын дараа буюу шүүгдэгчид 2025 оны 08 дугаар сарын 18-ны өдөр яллах дүгнэлт гардуулан өгч шүүхэд 2025 оны 08 дугаар сарын 21-ний өдөр ирүүлж байгаа зэргээс үзэхэд тухайн хөнгөн хэргийг шалгаж шүүхэд шилжүүлэх хүртэл нийт 6 сарын хугацаа зарцуулсан байгаа нь улсын яллагч хянах үүргээ биелүүлээгүйгээс оролцогчдын эрхийг зөрчсөн нөхцөл байдал байх тул цаашид анхаарах нь зүйтэй.

 

Бусад асуудлаар

Шүүгдэгч П.******* нь цагдан хоригдсон хоноггүй, эд мөрийн баримтаар хураагдсан болон битүүмжлэгдсэн хөрөнгөгүй, шүүгдэгчийн иргэний бичиг баримт шүүхэд шилжиж ирээгүй, хэрэг хянан шийдвэрлэх ажиллагааны зардалгүй, бусдад төлөх төлбөргүй болохыг тус тус дурдах нь зүйтэй.

 

Монгол Улсын Эрүүгийн хэрэг хянан шийдвэрлэх тухай хуулийн 36.2 дугаар зүйлийн 1, 4, 36.6, 36.7, 36.8, 37.1, 38.2 дугаар зүйлүүдэд заасныг удирдлага болгон

ТОГТООХ нь:

        1. Шүүгдэгч ******* овогт *******н *******ийг Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан хүний эрүүл мэндэд хөнгөн хохирол санаатай учруулах гэмт хэргийг үйлдсэн гэм буруутайд тооцсугай.

 

2. Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч П.*******ид 240 /хоёр зуун дөч/ цаг нийтэд тустай ажил хийлгэх ял шийтгэсүгэй.

 

3. Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар шүүгдэгчид оногдуулсан нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солихыг мэдэгдсүгэй.

 

4. Шүүгдэгч П.******* нь цагдан хоригдсон хоноггүй, эд мөрийн баримтаар хураагдсан болон битүүмжлэгдсэн хөрөнгөгүй, шүүгдэгчийн иргэний бичиг баримт шүүхэд шилжиж ирээгүй, хэрэг хянан шийдвэрлэх ажиллагааны зардалгүй, бусдад төлөх төлбөргүй болохыг тус тус дурдсугай.

 

5. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шийтгэх тогтоол нь уншиж сонсгосноор хүчинтэй болохыг дурдсугай.

 

6. Эрүүгийн хэрэг хянан шийдвэрлэх тухай хуулийн 38.2 дугаар зүйлийн 1 дэх хэсэгт зааснаар шийтгэх тогтоолыг эс зөвшөөрвөл прокурор, дээд шатны прокурор, оролцогч нар шийтгэх тогтоолыг гардуулснаас хойш 14 хоногийн дотор давж заалдах гомдол, эсэргүүцлийг Нийслэлийн Эрүүгийн хэргийн давж заалдах шатны шүүхэд гаргах эрхтэй болохыг дурдсугай.

 

7. Шийтгэх тогтоолд гомдол, эсэргүүцэл гаргасан тохиолдолд тогтоолын биелэлтийг түдгэлзүүлж, тогтоол хүчин төгөлдөр болтол шүүгдэгч П.*******ид урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

ДАРГАЛАГЧ, ШҮҮГЧ                                    Д.ЧИНЗОРИГ