2023 оны 06 сарын 21 өдөр Дугаар 183/ШШ2023/02078 Улаанбаатар хот

 

 

МОНГОЛ УЛСЫН НЭРИЙН ӨМНӨӨС

 

Хан-Уул дүүргийн Иргэний хэргийн анхан шатны шүүхийн шүүгч Б.Мөнхжаргал даргалж, тус шүүхийн шүүх хуралдааны танхимд хийсэн шүүх хуралдаанаар,

Нэхэмжлэгч:

Хариуцагч: 

Түрээсийн төлбөрт 28 980 270 төгрөг гаргуулах тухай нэхэмжлэлтэй иргэний хэргийг хянан хэлэлцэв.

Шүүх хуралдааны оролцогчид:

нэхэмжлэгчийн төлөөлөгч С.Э,

хариуцагчийн төлөөлөгч Б.Г,

нарийн бичгийн дарга Д.Эрдэнэ-Очир нар оролцов.

Нэхэмжлэлийг 2023 оны 03 дугаар сарын 31-ний өдөр хүлээн авав.

ТОДОРХОЙЛОХ нь:

1. ИП ХХК хариуцагч БАМ ХХК-д холбогдуулан түрээсийн гэрээний үүрэгт 23 819 400 төгрөг, алданги 5 160 870 төгрөг, нийт 28 980 270 төгрөг гаргуулахаар шаарджээ.

Нэхэмжлэгч нэхэмжлэлийн үндэслэлээ дараах байдлаар тодорхойлсон. Үүнд: ИП ХХК нь 2022 оны 11 дүгээр сарын 30-ны өдөр № ********* тоот "Үл хөдлөх эд хөрөнгө түрээслүүлэх, түрээслэх гэрээ"-г "БАМ" ХХК-тай байгуулсан билээ. Уг гэрээний хүрээнд талууд Сүхбаатар дүүрэг, 1 дүгээр хороо, 13 дугаар хороолол, Парисын гудамж** дугаартай "АСТ" барилгын 6 давхар, *** тоот хаягт байрлах 132.33 м.кв талбай бүхий үл хөдлөх эд хөрөнгийг 2023 оны 01 дүгээр сарын 12-ны өдрөөс эхлэн 2024 оны 01 дүгээр сарын 11-ний өдрийг дуустал 1 жилийн хугацаанд түрээслэхээр харилцан тохиролцсон байдаг. Гэрээний дагуу манай компани нь 2022 оны 12 дугаар сарын 13-ны өдөр түрээсийн талбайг БАМ ХХК-ийн ажилтанд акт үйлдэн хүлээлгэн өгсөн. Гэтэл түрээслэгч нь түрээсийн талбайг хүлээн авснаас хойш түрээсийн гэрээний дагуу байршуулах барьцаа төлбөрийг байршуулаагүйгээс гадна бидний хооронд байгуулагдсан гэрээний тусгай нөхцөлийн 2.3-т заасан дотоод заслын хугацаанд дотоод заслын ажлыг хийж гүйцэтгээгүй болно. Өөрөөр хэлбэл түрээслэгч нь түрээсийн талбайг зохих журмын дагуу акт үйлдэн хүлээн авсан хэдий ч түрээсийн талбайг ашиглаагүй. Мөн түрээсийн гэрээний дагуу төлбөл зохих төлбөрийг одоог хүртэл төлөөгүй байна. Монгол улсын Иргэний хуулийн 318 дугаар зүйлийн 318.5-д зааснаар энэ бүлэгт өөрөөр заагаагүй бол түрээсийн гэрээнд эд хөрөнгө хөлслөх гэрээний журам нэгэн адил үйлчилнэ гэж заасан. Тус хуулийн 292 дугаар зүйлд эд хөрөнгө хөлслөх гэрээний хөлс төлөх журмын талаар заасан бөгөөд 292.4-т хөлслөн авагч өөрийн буруугаар эд хөрөнгийг ашиглаж чадаагүй бол хөлс төлөхөөс чөлөөлөгдөхгүй гэж заасан. Мөн талуудын хооронд байгуулагдсан "Үл хөдлөх эд хөрөнгө түрээслүүлэх, түрээслэх гэрээ"-ний 5.9-д Түрээслэгч түрээсийн талбайг ашиглаагүй нь түрээсийн гэрээний төлбөрөөс чөлөөлөгдөх үндэслэл болохгүй гэж заасан билээ. Манай байгууллага нь түрээсийн гэрээний хүрээнд түрээсийн талбайг акт үйлдэн хүлээлгэн өгч, түрээсийн талбайг ашиглах боломжоор хангасан гэтэл түрээслэгч нь өөрийн буруутай үйл ажиллагааны улмаас талбайг ашиглаагүй болно. Мөн бид түрээслэгчийн уг үйлдэлтэй холбоотойгоор 2023 оны 02 дугаар сарын 28-ны өдөр түрээсийн гэрээний 9.2.1-т заасны дагуу түрээсийн гэрээ цуцлах мэдэгдлийг хүргүүлсэн хэдий ч түрээслэгчийн зүгээс одоог хүртэл түрээсийн талбайг гэрээнд заасны дагуу акт үйлдэн хүлээлгэн өгөөгүйгээс гадна, түрээсийн гэрээний үндсэн төлбөр болох 2023 оны 01 дугаар сарын 11-ний өдрөөс 2023 оны 03 дугаар сарын 20-ны өдрийн төлбөр болох 23,819,400 төгрөгийг төлөөгүй байна. Бидний хооронд байгуулагдсан гэрээний 5 дугаар зүйлийн 5.13-т зааснаар түрээсийн гэрээний төлбөрийг хугацаанд нь төлөөгүй тохиолдолд Тусгай нөхцөлд заасан алдангийг төлнө гэж заасан бөгөөд гэрээний тусгай нөхцөлийн 5 дугаар зүйлийн 5.1-т Алдангийн хэмжээ гүйцэтгээгүй үүргийн үнийн дүнгийн 0.5 хувь байна гэж заасан. Иймд гэрээнд заасны дагуу талууд түрээсийн төлбөрийг хугацаанд нь төлөөгүй тохиолдолд хугацаа хэтэрсэн хоног тутамд төлөгдөөгүй үүргийн үнийн дүнгээр алданги төлөхөөр тохиролцсон тул түрээсийн төлбөрийг 56 хоногоор хэтрүүлсний алданги 5 160 870 төгрөг болон түрээсийн гэрээний үндсэн төлбөр 23 819 400 төгрөг, нийт 28,980,270 төгрөгийг хариуцагчаас гаргуулж өгнө үү гэв.

2. Хариуцагч шүүх хуралдаанд гаргасан хариу тайлбартаа: Талуудын хооронд түрээсийн гэрээ бичгээр байгуулагдсан. Уг гэрээ нь хуулийн шаардлага хангасан эсэх нь эргэлзээтэй байгаа. Нэхэмжлэлийн шаардлагын хууль зүйн үндэслэл болж байгаа Иргэний хуулийн 318 дугаар зүйлийн 318.1 дэх хэсэг, 287 дугаар зүйлийн 287.1 дэх хэсгүүдэд зааснаар түрээслүүлэгч нь эрхийн зөрчилгүй, биет байдлын доголдолгүй, гэрээнд заасан зориулалтаар ашиглах боломжтой эд зүйлийг түрээслэгчид шилжүүлж өгөх ёстой. Гэрээ байгуулах өдөр түрээсийн гэрээгээр тохиролцсон талбайг оффисын зориулалтаар ашиглах боломжгүй байсан нь нэхэмжлэл болон нотлох баримтуудаар тогтоогддог. Нэхэмжлэгч талаас хариуцагчийг тухайн талбайг яагаад ашиглаагүй талаар лавлаж байх шиг байна. Тухайн талбайг ашиглах боломжгүй байсан. Улсын комисс хүлээж аваагүй бол тухайн талбайг ашиглаж, үйл ажиллагаа явуулах боломжгүй. Тухайн барилга нь маш их засвар үйлчилгээ шаардлагатай барилга байсан. Нэхэмжлэгч талаас хариуцагчтай 1 жилийн хугацаатай түрээсийн гэрээ байгуулаад дотор заслын бүх ажлаа хийлгэж аваад гаргах зорилготой гэрээ байгуулсан гэж харж байна. Хариуцагч талаас тухайн талбайг ашиглах боломжгүй биет байдлын доголдолтой байсан тул түрээсийн төлбөр төлөхөөс татгалзах эрхтэй гэж үзэж байна. Мөн тус гэрээг цуцлах талаар удаа дараа эрх бүхий албан тушаалтанд утсаар мэдэгдэж байсан. Ямарваа гэрээ нь хуульд заасан хэлбэрийн шаардлагыг хангасан байх ёстой. Үл хөдлөх эд хөрөнгө түрээслэхэд бичгээр байгуулан, улсын бүртгэлд бүртгүүлсэн байх шаардлагатай. Тухайн үл хөдлөх эд хөрөнгийг түрээслэх гэрээг улсын бүртгэлд бүртгүүлээгүй бөгөөд бүртгүүлэх боломжгүй гэрээ байдаг. Улсын комисс хүлээн аваагүй, өмчлөх эрх нь үүсээгүй, биет байдлын доголдолтой, ашиглах эрх нь нээгдээгүй хөрөнгө байсан. Иргэний хуулийн 318 дугаар зүйлд заасан 318.3-т заасан хэлбэрийн шаардлагыг хангаагүй байгаа тул гэрээ хүчин төгөлдөр бус гэж үзэж байна. Тиймээс Иргэний хуулийн 56 дугаар зүйлийн 56.6 дахь хэсэгт зааснаар нэхэмжлэгч, хариуцагч аль аль нь хүчин төгөлдөр бус хэлцэл байгуулсантай холбоотой хохирлоо л шаардах эрх үүсэх боломжтой. Нэгэнт хүчин төгөлдөр бус тул түрээсийн төлбөр, алдангийг нэхэмжлэгч шаардах эрхгүй тул нэхэмжлэлийн шаардлагыг бүхэлд нь хэрэгсэхгүй болгож өгнө үү гэв.

3. Нэхэмжлэгчээс улсын тэмдэгтийн хураамж төлсөн баримт, итгэмжлэл, 2022.11.30-ны өдрийн ********* дугаар үл хөдлөх эд хөрөнгө, түрээслүүлэх, түрээсийн гэрээ, гэрээний хавсралт, талбай хүлээлгэн өгөх хуудас, орон сууц, оффис худалдан авагч, түрээслэгчийн анкет, ИХХК-ийн 2023.02.28-ны өдрийн **** дугаар Түрээсийн гэрээ цуцлах тухай мэдэгдэл хүргүүлэх тухай албан бичиг, үл хөдлөх эд хөрөнгө өмчлөх эрхийн улсын бүртгэлийн гэрчилгээний хуулбар, хуулийн этгээдийн улсын бүртгэлийн гэрчилгээний хуулбар, түрээсийн төлбөр нэхэмжлэлийн баримт, 2022.12.30-ны өдрийн ******** дугаар Барилга байгууламжийг ашиглалтад оруулах комиссын дүгнэлт, үл хөдлөх эд хөрөнгө өмчлөх эрхийн улсын бүртгэлийн гэрчилгээний хуулбар зэргийг ирүүлсэн. /3-20, 43-47/

4. Хариуцагчаас хуулийн этгээдийн улсын бүртгэлийн гэрчилгээ, итгэмжлэл зэргийг ирүүлсэн.

ҮНДЭСЛЭХ нь:

1. Шүүх үндсэн нэхэмжлэлийн шаардлагыг бүхэлд нь хэрэгсэхгүй болгож, сөрөг нэхэмжлэлийн шаардлагыг хангаж шийдвэрлэв.

2.Нэхэмжлэгч нэхэмжлэлийн үндэслэлээ ...ИП ХХК нь 2022 оны 11 дүгээр сарын 30-ны өдөр ********* тоот Үл хөдлөх эд хөрөнгө түрээслүүлэх, түрээслэх гэрээг БАМ ХХК-тай байгуулсан билээ. Уг гэрээний хүрээнд талууд Сүхбаатар дүүрэг, 1 дүгээр хороо, 13 дугаар хороолол, Парисын гудамж** дугаартай АСТ барилгын 6 давхар, *** тоот хаягт байрлах 132.33 м.кв талбай бүхий үл хөдлөх эд хөрөнгийг 2023 оны 01 дүгээр сарын 12-ны өдрөөс эхлэн 2024 оны 01 дүгээр сарын 11-ний өдрийг дуустал 1 жилийн хугацаанд түрээслэхээр харилцан тохиролцсон байдаг. Гэрээний дагуу манай компани нь 2022 оны 12 дугаар сарын 13-ны өдөр түрээсийн талбайг БАМ ХХК-ийн ажилтанд акт үйлдэн хүлээлгэн өгсөн. Гэтэл түрээслэгч нь түрээсийн талбайг хүлээн авснаас хойш түрээсийн гэрээний дагуу байршуулах барьцаа төлбөрийг байршуулаагүйгээс гадна бидний хооронд байгуулагдсан гэрээний тусгай нөхцөлийн 2.3-т заасан дотоод заслын хугацаанд дотоод заслын ажлыг хийж гүйцэтгээгүй болно. Мөн бид түрээслэгчийн уг үйлдэлтэй холбоотойгоор 2023 оны 02 дугаар сарын 28-ны өдөр мэдэгдэл хүргүүлсэн. Иймд гэрээнд заасны дагуу талууд түрээсийн төлбөрийг хугацаанд нь төлөөгүй тохиолдолд хугацаа хэтэрсэн хоног тутамд төлөгдөөгүй үүргийн үнийн дүнгээр алданги төлөхөөр тохиролцсон тул түрээсийн төлбөрийг 56 хоногоор хэтрүүлсний алданги болох 5 160 870 төгрөг болон түрээсийн гэрээний үндсэн төлбөр 23 819 400 төгрөг нийт 28 980 270 төгрөгийг хариуцагчаас гаргуулахаар шаардаж байна. гэж тайлбарласан.

3. Хариуцагч татгалзлын үндэслэлээ ...Талуудын хооронд түрээсийн гэрээ бичгээр байгуулагдсан. Уг гэрээ нь хуулийн шаардлага хангасан эсэх нь эргэлзээтэй байгаа. Нэхэмжлэлийн шаардлагын хууль зүйн үндэслэл болж байгаа Иргэний хуулийн 318 дугаар зүйлийн 318.1 дэх хэсэг, 287 дугаар зүйлийн 287.1 дэх хэсгүүдэд зааснаар түрээслүүлэгч нь эрхийн зөрчилгүй, биет байдлын доголдолгүй, гэрээнд заасан зориулалтаар ашиглах боломжтой эд зүйлийг түрээслэгчид шилжүүлж өгөх ёстой. ...Хариуцагч талаас тухайн талбайг ашиглах боломжгүй биет байдлын доголдолтой байсан тул түрээсийн төлбөр төлөхөөс татгалзах эрхтэй гэж үзэж байна. Улсын комисс хүлээн аваагүй, өмчлөх эрх нь үүсээгүй, биет байдлын доголдолтой, ашиглах эрх нь нээгдээгүй хөрөнгө байсан тул нэхэмжлэлийн шаардлагыг үндэслэлгүй. гэж маргасан.

4. Хавтаст хэрэгт авагдсан бичгийн нотлох баримтуудаар болон зохигч талуудын тайлбар зэргээс дараах үйл баримт тогтоогдож байна.

5. И  ХХК нь Б  ХХК-тай 2022 оны 11 дүгээр сарын 30-ны өдөр ********* дугаар Үл хөдлөх эд хөрөнгө түрээслүүлэх, түрээслэх гэрээг бичгийн хэлбэрээр байгуулж, уг гэрээгээр түрээслүүлэгч И  ХХК нь түрээслэгч Б  ХХК-д Сүхбаатар дүүргийн 1 дүгээр хороо, 13 хороолол, Па гудамж** дугаартай, А  ХХК тауэр барилгын 6 давхар, *** тоот хаягт байрлах, оффисын зориулалт бүхий 132.33 м.кв талбайг түрээслүүлэхээр тохиролцсон байна.

6. Мөн дээрх гэрээний тусгай нөхцөлөөр Сүхбаатар дүүргийн 1 дүгээр хороо, ** хороолол, Парисын гудамж** дугаартай, А  ХХК тауэр барилгын 6 давхар, *** тоот хаягт байрлах, оффисын зориулалт бүхий 132.33 м.кв талбайг 1 жилийн хугацаагаар байгуулж, нэг сарын төлбөр 7 939 800 төгрөг байхаар харилцан тохиролцжээ. /хх-ийн 11-12/

Талуудын байгуулсан Түрээсийн гэрээний тусгай нөхцөлийн 2.1-т 1 жилийн хугацаагаар байгуулж байгаа бөгөөд түрээсийн хугацаа нь 2023 оны 01 дүгээр сарын 12-ны өдөр эхэлж, 2024 оны 01 дүгээр сарын 11-ний өдөр дуусна, 2.2-т дотоод заслын ажлын зориулалтаар 2022 оны 12 дугаар сарын 12-ны өдөр хүлээлгэн өгөхөөр тохиролцов, 2.3-т тусгай нөхцөлийн 2.2 дугаар зүйлд заасан хугацаанаас хойш 1 сарын хугацаатай байна. Тухайн хугацаанд түрээслэгч түрээсийн талбайг зөвхөн дотоод заслын ажлын зориулалтаар ашиглах бөгөөд 1 сарын хугацаа дууссанаар түрээсийн хугацаа эхэлж, түрээсийн гэрээний төлбөрийг төлөх үүрэг хүлээнэ. Дотоод заслын ажил дууссан эсэхээс үл хамааран уг 1 сарын хугацаа дуусахад түрээсийн хугацаа эхэлнэ гэж тус тус тохиролцжээ.

7. Зохигч талууд 2022 оны 11 дүгээр сарын 30-ны өдөр түрээсийн гэрээ байгуулсан, тус түрээсийн талбайг талууд 2022.12.12-ны өдөр акт үйлдэж хүлээн авсан болон М ХХК нь түрээсийн гэрээ байгуулсан өдрөөс хойш ашиглаагүй талаар талууд маргаагүй боловч хариуцагч тал уг гэрээг хүчин төгөлдөр бус хэлцэл гэж маргасан. /хх-ийн 13-15/

8. Иргэний хуулийн 39 дүгээр зүйлийн 39.1-т Иргэний эрх, үүргийг үүсгэх, өөрчлөх, шилжүүлэх, дуусгавар болгох зорилгоор хүсэл зоригоо илэрхийлсэн иргэн, хуулийн этгээдийн үйлдэл /эс үйлдэхүй/-г хэлцэл гэнэ, 39 дүгээр зүйлийн 39.2-т Нэг этгээд хүсэл зоригоо илэрхийлэн хэлцэл хийж болно, 40 дүгээр зүйлийн 40.1-т Хүсэл зоригийн илэрхийлэл нь нөгөө тал түүнийг хүлээн авснаар хүчин төгөлдөр болно гэж заажээ.

9. Иргэний хуулийн 318 дугаар зүйлийн 318.1-д Түрээсийн гэрээгээр түрээслүүлэгч нь түрээслэгчийн эзэмшил, ашиглалтад аж ахуйн үйл ажиллагаа явуулах болон дүрэмд заасан зорилгоо биелүүлэхэд нь зориулж тодорхой хөрөнгө шилжүүлэх, түрээслэгч нь гэрээгээр тохирсон түрээсийн төлбөрийг төлөх үүргийг тус тус хүлээнэ. 318.3-т зааснаар Хуульд өөрөөр заагаагүй бол түрээсийн гэрээг бичгээр байгуулах бөгөөд үл хөдлөх эд хөрөнгө түрээслэх гэрээг үл хөдлөх эд хөрөнгийн бүртгэлийн газарт бүртгүүлнэ. гэж, 318.4-т Энэ хуулийн 318.3-т заасан шаардлагыг хангаагүй гэрээ хүчин төгөлдөр бус байна гэж тус тус заасан.

10. Талуудын байгуулсан 2022 оны 11 дүгээр сарын 30-ны өдрийн үл хөдлөх эд хөрөнгө түрээслүүлэх, түрээслэх гэрээний 3.1-т ...Түрээсийн талбайн үл хөдлөх эд хөрөнгө өмчлөх эрхийн улсын бүртгэлийн гэрчилгээг гэрээний хавсралт 3-т хавсаргана гэж заасан ба нэхэмжлэлд хавсаргасан баримтаас үзэхэд 2022 оны 11 дүгээр сарын 30-ны өдрийн ********* дугаар үл хөдлөх эд хөрөнгө түрээслүүлэх, түрээсийн гэрээнд хавсаргасан баримтыг ирүүлээгүй байх ба нэхэмжлэгч нь 2023.02.28-ны **** Гэрээ цуцлах тухай мэдэгдлийг хариуцагчид хүргүүлсэн баримтыг ирүүлжээ.

11. Хариуцагч Улсын комисс хүлээн аваагүй, өмчлөх эрх нь үүсээгүй, биет байдлын доголдолтой, ашиглах эрх нь нээгдээгүй хөрөнгө байсан гэж маргасан ба нэхэмжлэгч уг барилгыг гэрээ байгуулах үед улсын комисс хүлээн авахаар ажиллаж байсан ба комисс 2022.12.30-ны өдөр хүлээн авсан, үл хөдлөх эд хөрөнгийн гэрчилгээг 2022.05.24-нд 63 хувийн гүйцэтгэлээр авсан байсан тул дээрх тайлбар үндэслэлгүй ба Иргэний хуулийн 292 дугаар зүйлийн 292.4-т Хөлслөн авагч өөрийн буруугаар эд хөрөнгийг ашиглаж чадаагүй бол хөлс төлөхөөс чөлөөлөгдөхгүй. гэснээр түрээсийн төлбөр гаргуулна гэж маргасан.

12. Эдгээрээс дүгнэхэд талуудын хооронд байгуулагдсан 2022 оны 11 дүгээр сарын 30-ны өдөр ********* дугаар Үл хөдлөх эд хөрөнгө түрээслүүлэх, түрээслэх гэрээ нь хүчин төгөлдөр бус байна.

Хүчин төгөлдөр бус хэлцлийн үр дагаврыг талууд Иргэний хуулийн 56 дугаар зүйлийн 56.5 дах хэсэгт зааснаар хэлцлээр шилжүүлсэн зүйлээ харилцан буцаах замаар арилгах үүрэгтэй ба нэхэмжлэгчийн түрээсийн талбай бүхий үл хөдлөх эд хөрөнгийг хариуцагч эзэмшилдээ авч ашиглаагүй үйл баримт тогтоогдсон.

Тодруулбал, талуудын хооронд байгуулагдсан түрээсийн гэрээ хэрэгжсэн гэх үйл баримт тогтоогдоогүй, хүчин төгөлдөр бус гэрээний үүргийг шаардах эрх хариуцагчид үүсэхгүй тул нэхэмжлэлийн шаардлагыг хангах үндэслэлгүй байна.

13. Улсын тэмдэгтийн хураамжийг хуульд зааснаар хуваарилах нь зүйтэй.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.3, 116, 118 дугаар зүйлд заасныг удирдлага болгон

ТОГТООХ нь:

1. Иргэний хуулийн 318 дугаар зүйлийн 318.1 дэх хэсэгт заасныг баримтлан нэхэмжлэгч И ХХК-ийн хариуцагч Б ХХК-иас түрээсийн гэрээний үүрэгт 28 980 270 төгрөг гаргуулах нэхэмжлэлийн шаардлагыг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 60 дугаар зүйлийн 60.1, 56 дугаар зүйлийн 56.1, Улсын тэмдэгтийн хураамжийн тухай хуулийн 7 дугаар зүйлийн 7.1.1 дэх хэсэгт зааснаар нэхэмжлэгч И  ХХК-ийн улсын тэмдэгтийн хураамжид төлсөн 302 852 төгрөгийг улсын орлогод тус тус хэвээр үлдээсүгэй.

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.7, 120 дугаар зүйлийн 120.2 дахь хэсэгт зааснаар шийдвэр нь танилцуулан сонсгомогц хүчинтэй болох бөгөөд зохигч, гуравдагч этгээд, тэдгээрийн төлөөлөгч буюу өмгөөлөгч нар энэхүү шийдвэрийг эс зөвшөөрвөл уг шийдвэрийг гардан авснаас хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэйг болон зохигчид хуульд заасан хугацааны дотор шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүйг тус тус дурдсугай.

 

 

 

 

ДАРГАЛАГЧ, ШҮҮГЧ Б.МӨНХЖАРГАЛ