МОНГОЛ УЛСЫН НЭРИЙН ӨМНӨӨС

Баянгол дүүргийн Иргэний хэргийн анхан шатны шүүхийн шүүгч Ч.Баярсүрэн даргалж, тус шүүхийн шүүх хуралдааны танхимд хийсэн иргэний хэргийн шүүх хуралдаанаар:

Нэхэмжлэгч: *** тоот хаягт байрлах *** Сууц өмчлөгчдийн холбоо

Хариуцагч: *** тоот хаягт бүртгэлтэй боловч *** тоотод оршин суух, *** овогт ***-гийн *** /рд:***/

Нэхэмжлэлийн шаардлага: 2,985,710.17 төгрөг гаргуулах тухай нэхэмжлэлтэй иргэний хэргийг хянан хэлэлцэв.

Шүүх хуралдааны оролцогч:

Нэхэмжлэгчийн итгэмжлэгдсэн төлөөлөгч Б.М***

Шүүх хуралдааны нарийн бичгийн дарга Г.Анударь,

/Хариуцагчийн хүсэлтээр түүний эзгүйд хэргийг хянан шийдвэрлэсэн/

 

ТОДОРХОЙЛОХ нь:

1. Нэхэмжлэгч *** СӨХ нь хариуцагч Б.***гаас 2,985,710.17 төгрөг гаргуулах тухай нэхэмжлэл, үндэслэлээ дараах байдлаар тодорхойлж байна. Үүнд:

*** СӨХ нь 2014 онд байгуулагдаж үйл ажиллагаа эрхлэх дүүргийн засаг даргаас олгосон 213 тоот гэрчилгээтэй. Бид иргэдийнхээ ая тухтай цэвэр орчинд амьдрах нөхцөлийг бүрдүүлэх үүднээс Монгол улсын Иргэний хууль, Сууц өмчлөгчдийн эрх зүйн байдал, нийтийн зориулалттай байшингийн дундын өмчлөлийн эд хөрөнгийн тухай хуулийн дагуу үйл ажиллагаагаа хэвийн явуулсаар өнөөдрийг хүрсэн. СӨХ-ны төлбөрөө төлөлгүй удаж, СӨХ-ны ажилд хүндрэл учруулж, доголдуулж, хууль тогтоомжуудыг зөрчиж байгаа тул энэхүү нэхэмжлэлийг гаргаж байна. *** тоотод оршин суугч Б.***гаас 2014 оны 5-12 сарын төлбөр 221,408.17 төгрөг, 2015 оны 1-12 сарын төлбөр 325,212 төгрөг, 2016 оны 1-12 сарын төлбөр 325,212 төгрөг, 2017 оны 1-12 сарын төлбөр 325,212 төгрөг, 2018 оны 1-12 сарын төлбөр 325,212 төгрөг, 2019 оны 1-12 дугаар сарын төлбөр 325,212 төгрөг, 2020 оны 1-12 дугаар сарын төлбөр 325,212 төгрөг, 2021 оны 1-12 дугаар сарын төлбөр 325,212 төгрөг, 2022 оны 1-12 дугаар сарын төлбөр 325,212 төгрөг, 2023 оны 1, 2, 3, 4, 5, 6 дугаар сарын төлбөр 162,606 төгрөг, нийт 2,985,710.17 төгрөгийг гаргуулж өгнө үү гэжээ.

 

2. Хариуцагч шүүх хуралдаанд гаргасан хариу тайлбартаа: Миний бие Б.*** нь БГД-ийн 3-р хороо, энгельс гудамжид байрлах Нарны хорооллын 7-р байр, 214 тоотын оршин суугч болно. 2023 оны 8 дугаар сарын 11-ний өдөр *** СӨХ-ноос 2014 оны 5-р сараас 2023 оны 7-р сар хүртэлх төлбөр болох 2,985,710.17 төгрөгийг гаргуулах нэхэмжлэлтэй танилцаад доорх шийдвэрийг гаргаж байгааг хүлээн авна уу. *** СӨХ нь 2014 онд анх байгуулагдахдаа хууль бусаар байгуулагдсан учраас төлбөрийг төлөхгүй байсан. Сүүлийн 3 жилээс өмнө жилүүд буюу 2014-2020 он хүртэлх хугацааны хөөн хэлэлцэх хугацаа дуусгавар болсон гэж үзэж байна. Дээрх хугацаанд нэг ч удаа мэдэгдэх хуудас албан ёсоор авч байгаагүй болно. Иймд сүүлийн 3 жил болох 2021-2023 онуудын төлбөрийг төлөх саналтай байна. Мөн цаашид СӨХ-ны төлбөрийг сар бүр хуваарийн дагуу төлж явах болно гэдгийг мэдэгдэж байна гэжээ.

3. Хариуцагчаас шүүх хуралдаанд ирүүлсэн хүсэлтдээ: Сайн байна уу. СӨХ-ны шийдвэрийг миний эзгүйд өргөдлийн дагуу шийдвэрлэж өгнө үү гэжээ.

4. Нэхэмжлэгчээс дараах баримтуудыг шүүхэд гаргаж өгсөн. Үүнд: нэхэмжлэл /хх 1-2/, улсын тэмдэгтийн хураамж төлсөн баримт /хх 3/, итгэмжлэл /хх 4/, СӨХ-ны гэрчилгээний хуулбар /хх 5/, *** СӨХ-ны Удирдах зөвлөлийн даргын 2018 оны 1 дүгээр сарын 17-ны өдрийн 1 дүгээр Ажлаас чөлөөлж ажилд томилох тухай тушаал /хх 6/, *** СӨХ-ны Удирдах зөвлөлийн ээлжит бус хурал 2018 оны 1 дүгээр сарын 16-ны өдөр /хх 7/ Төрийн банкны нэхэмжлэх /хх 8-17/.

5. Хариуцагчаас шүүхэд гаргасан хариу тайлбар /хх 24/.

Зохигчийн тайлбар, хэрэгт цугларсан баримтуудыг судлаад

ҮНДЭСЛЭХ нь:

Нэхэмжлэгч *** СӨХ нь хариуцагч Б.***д холбогдуулан СӨХ-ны төлбөрт нийт 2,985,710.17 төгрөг гаргуулахаар шүүхэд хандсан.

Хариуцагч нь нэхэмжлэлийн шаардлагыг эс зөвшөөрсөн үндэслэлээ ... Сүүлийн 3 жилээс өмнө жилүүд буюу 2014-2020 он хүртэлх хугацааны хөөн хэлэлцэх хугацаа дуусгавар болсон гэсэн агуулгаар тайлбарлав.

Шүүхээс зохигчийн тайлбар, хэрэгт цугларсан баримтуудыг судлаад дараах үндэслэлүүдээр нэхэмжлэлийн шаардлагын зарим хэсгийг хангаж шийдвэрлэв.

1. Иргэний хуулийн 143 дугаар зүйлийн 143.4-т зааснаар орон сууцанд оршин суугаа сууц өмчлөгч бусад этгээд заавал тухайн холбооны гишүүн байна гэж, Орон сууцны тухай хуулийн 3 дугаар зүйлийн 3.1.1-д орон сууц гэж хүн суурьшин амьдрах зориулалттай нийтийн болон амины орон сууцны байшин, сууц, гэрийг хэлнэ гэж тус тус заасан байна. Эдгээр хуулийн заалтуудаас үзэхэд орон сууцны зориулалттай сууц өмчлөгч нь заавал Сууц өмчлөгчдийн холбооны гишүүн байхаар зохицуулжээ.

Хариуцагч Б.*** нь *** тоотод оршин суудаг эсэх талаараа маргаагүй бөгөөд тухайн орон сууц нь *** СӨХ-д харьяалагддаг болох нь тус холбоог 2015 оны 11 дүгээр сарын 13-ны өдөр сууц өмчлөгчдийн холбооны бүртгэлд бүртгэсэн №213 тоот гэрчилгээгээр тогтоогдож байна. Иймд хариуцагч нь *** СӨХ-ны гишүүн байна.

Иргэний хуулийн 147 дугаар зүйлийн 147.1-д зааснаар гишүүн нь дундын өмчлөлийн зүйлийн ашиглалт, засвар үйлчилгээтэй холбогдсон зардлыг сууц өмчлөгчдийн холбоонд төлөх үүрэгтэй ба мөн хуулийн 148 дугаар зүйлийн 148.2.3-т зааснаар орон сууц өмчлөгч нь дундын өмчлөлийн зүйлийн засвар, үйлчилгээний зардлыг санхүүжүүлэхэд оролцох ёстой.

2. Иргэний хуулийн 75 дугаар зүйлийн 75.2.3-т тогтсон хугацааны туршид гүйцэтгэх үүрэгтэй холбогдон шаардлага гаргах хөөн хэлэлцэх хугацаа гурван жил байхаар хуульчилсан. Энэ хугацаанд нэхэмжлэгч дээрх төлбөрийг шаардах, шаардлага гаргах эрхээ хэрэгжүүлээгүй, хариуцагч үүргийг зөвшөөрөөгүй бол Иргэний хуулийн 82 дугаар зүйлийн 82.1-д заасны дагуу хөөн хэлэлцэх хугацаа өнгөрсөн үндэслэлээр хариуцагч үүрэг гүйцэтгэхээс татгалзах эрхтэй.

Нэхэмжлэлийн шаардлагаас 2014 оны 5 дугаар сараас 2020 оны 7 дугаар сарын хугацааны дундын өмчлөлийн зүйлийн ашиглалт, засвар үйлчилгээтэй холбогдсон төлбөр болох 330,440 төгрөгийг нэхэмжлэгч хөөн хэлэлцэх хугацаанд шаардаагүй, хариуцагч төлөхийг зөвшөөрөөгүй тул нэхэмжлэлийн шаардлагаас энэ хэмжээнд хэрэгсэхгүй болгоно.

3. Харин дээр дурдсанчлан орон сууц өмчлөгч нь дундын өмчлөлийн зүйлийн ашиглалт, засвар үйлчилгээтэй холбогдсон зардлыг сууц өмчлөгчдийн холбоонд төлөх үүрэг хүлээх тул хариуцагчаас 2020 оны 8 дугаар сараас 2023 оны 8 дугаар сарын хугацааны төлбөрт 921,434 төгрөгийг гаргуулан нэхэмжлэгчид олгох үндэслэлтэй байна.

Иймд хариуцагч Б.***гаас 921,434 төгрөгийг гаргуулан нэхэмжлэгч *** СӨХ-нд олгож, нэхэмжлэлийн шаардлагаас үлдэх 2,064,276.17 төгрөгт холбогдох хэсгийг хэрэгсэхгүй болгов.

4. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 60 дугаар зүйлийн 60.1, Улсын тэмдэгтийн хураамжийн тухай хуулийн 7 дугаар зүйлийн 7.1.1 дэх хэсгүүдэд заасныг баримтлан нэхэмжлэгчээс улсын тэмдэгтийн хураамжид төлсөн 62,721 төгрөгийг улсын орлогод хэвээр үлдээж, хариуцагч Б.***гаас 26,664 төгрөгийг гаргуулан нэхэмжлэгч *** СӨХ-нд олгож шийдвэрлэв.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.2, 116, 118 дугаар зүйлүүдийг удирдлага болгон

ТОГТООХ нь:

1. Иргэний хуулийн 147 дугаар зүйлийн 147.1, 148 дугаар зүйлийн 148.2.3 дахь хэсгүүдэд заасныг баримтлан хариуцагч Б.***гаас 921,434 төгрөгийг гаргуулан нэхэмжлэгч *** СӨХ-нд олгож, нэхэмжлэлийн шаардлагаас үлдэх 2,064,276.17 төгрөгт холбогдох хэсгийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 60 дугаар зүйлийн 60.1, Улсын тэмдэгтийн хураамжийн тухай хуулийн 7 дугаар зүйлийн 7.1.1-д заасныг баримтлан нэхэмжлэгчээс улсын тэмдэгтийн хураамжид төлсөн 62,721 төгрөгийг улсын орлогод хэвээр үлдээж, хариуцагч Б.***гаас 26,664 төгрөгийг гаргуулан нэхэмжлэгч *** СӨХ-нд олгосугай.

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2-т зааснаар шийдвэр танилцуулан сонсгомогц хүчинтэй болох ба зохигч, тэдгээрийн төлөөлөгч буюу өмгөөлөгч шийдвэрийг эс зөвшөөрвөл гардан авснаас хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэйг тайлбарласугай.

4. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.4, 119.7-д зааснаар шийдвэрийг танилцуулан сонсгож, 7 хоног өнгөрснөөс хойш 14 хоногийн дотор зохигч, гуравдагч этгээд, тэдгээрийн төлөөлөгч буюу өмгөөлөгч анхан шатны шүүхийн шийдвэрийг шүүхэд хүрэлцэн ирж шийдвэрийг өөрөө гардан авах үүргээ биелүүлээгүй нь гомдол гаргах хугацааг тоолоход саад болохгүй бөгөөд шүүх хуралдаанд оролцоогүй талд шийдвэрийг гардуулснаар гомдол гаргах хугацааг тоолохыг дурдсугай.

 

 

 

ДАРГАЛАГЧ, ШҮҮГЧ Ч.БАЯРСҮРЭН