Хариуцагч нэхэмжлэлийн шаардлагыг хүлээн

                                           зөвшөөрснийг баталж, хэргийг хэрэгсэхгүй

                                                                 болгох тухай

            Баян-Өлгий аймаг дахь Захиргааны хэргийн анхан шатны шүүхийн шүүгч М.Риза би, тус аймгийн Прокурорын газрын хяналтын прокуророос  Баян-Өлгий аймаг дахь Гаалийн газрын гаалийн улсын байцаагчид холбогдуулан гаргасан “Эрх бүхий албан тушаалтны 2023 оны 01 дүгээр сарын 13-ны өдрийн 0091985 дугаартай шийтгэлийн хуудаст өөрчлөлт оруулах тухай” нэхэмжлэлийн шаардлагатай /прокурорын дүгнэлт/ захиргааны хэрэгт хянан шийдвэрлэх ажиллагаа явуулаад

ТОДОРХОЙЛОХ нь:

Хариуцагч Баян-Өлгий аймаг дахь Гаалийн газрын гаалийн улсын байцаагч Ө.С шүүхэд ирүүлсэн тайлбартаа:

Баян-Өлгий аймгийн Прокурорын газрын зөрчлийн хэрэг бүртгэх ажиллагаанд хяналт тавих хяналтын прокурор Р.Г 2023 оны 6 дугаар сарын 24-ний өдрийн 129 тоот  дүгнэлттэй танилцав.

Уг дүгнэлтэд Баян-Өлгий аймаг дахь Гаалийн газрын  эрх бүхий албан тушаалтын 2023 оны 01 дүгээр сарын 13-ны өдрийн 0091985 дугаартай шийдвэрийн 1 дэх хэсэгт хуулийн зүйл заалт, шийтгэлийн төрөл хэмжээг, 5 дахь хэсэгт хураан авсан эд зүйлийг хэрхэн шийдвэрлэснийг  тусгуулах шаардлагатай байх тул шийтгэлийн хуудаст өөрчлөлт оруулахаар прокурорын дүгнэлт бичиж хүргүүлсэн байна.

 Тус 0091985 дугаартай шийтгэлийн хуудаст өөрчлөлт оруулахыг хүлээн зөвшөөрч байна гэжээ.                                                              

ҮНДЭСЛЭХ нь:

            Баян-Өлгий аймаг дахь Гаалийн газрын гаалийн улсын байцаагчийн 2023 оны 01 дүгээр  сарын 13-ны өдрийн 0091985 дугаартай шийтгэлийн хуудсаар К.Ш  тарифын бус хязгаарласан барааг улсын хилээр оруулсан  гэж үзэж, Зөрчлийн тухай хуулийн 11.21 дүгээр зүйлийн 11 дэх  хэсэгт зааснаар 100 000 төгрөгөөр  торгох шийтгэл оногдуулж шийдвэрлэжээ.

            Баян-Өлгий аймгийн Прокурорын газрын хяналтын прокуророос Зөрчил шалган шийдвэрлэх тухай хуулийн 7.2 дугаар зүйлийн 2 дахь хэсэгт “Эрх бүхий албан тушаалтан шийтгэл оногдуулах шийдвэртээ зөрчлийг шалган шийдвэрлэсэн он, сар, өдөр, шийдвэр гаргасан эрх бүхий албан тушаалтны нэр, албан тушаал, зөрчлийн талаар тогтоогдсон нөхцөл байдал, шийтгэл оногдуулах, албадлагын арга хэмжээ авах үндэслэл, хуулийн зүйл, хэсэг, заалт, оногдуулах шийтгэл, албадлагын арга хэмжээ, зөрчил шалган шийдвэрлэх ажиллагааны зардлыг хуваарилсан тухай, түүнийг сайн дураараа биелүүлэх хугацаа, хэлбэр, нөхцөл, хураан авсан, битүүмжилсэн эд зүйлийг хэрхэн шийдвэрлэсэн талаар тусгана” гэж заасан ба эрх бүхий албан тушаалтан 2023 оны 01 дүгээр сарын 13-ны өдрийн 0091985 дугаартай шийтгэлийн хуудасны 1 дэх хэсэгт хуулийн зүйл заалт, шийтгэлийн төрөл хэмжээг, 5 дахь хэсэгт хураан авсан эд зүйлийг хэрхэн шийдвэрлэснийг тусгаагүй гэж үзэж, шийтгэлийн хуудаст өөрчлөлт оруулахаар дүгнэлт гаргажээ.

            Хариуцагчаас хэрэг хянан шийдвэрлэх ажиллагааны явцад  прокурорын дүгнэлтийн шаардлагыг  хүлээн зөвшөөрч, энэ талаар шүүхэд бичгээр тайлбарласан байх  тул хариуцагч нэхэмжлэлийн шаардлагыг хүлээн зөвшөөрсөн нь  хуульд харшлаагүй, мөн  бусад этгээдийн эрх, эрх чөлөө, хууль ёсны ашиг сонирхлыг хөндөөгүй гэж үзэж, Захиргааны хэрэг шүүхэд хянан шийдвэрлэх тухай хуулийн  67 дугаар зүйлийн 67.1-д зааснаар  хариуцагчийн зөвшөөрлийг баталж, хэргийг хэрэгсэхгүй болгож шийдвэрлэлээ.

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1, 69 дүгээр зүйлийн 69.2-т заасныг тус тус удирдлага болгон

ЗАХИРАМЖЛАХ нь:

1. Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д заасныг баримтлан Баян-Өлгий аймгийн Прокурорын газрын хяналтын прокурорын шүүхэд гаргасан “Эрх бүхий албан тушаалтны 2023 оны 01 дүгээр сарын 13-ны өдрийн 0091985 дугаартай шийтгэлийн хуудаст өөрчлөлт оруулах тухай” нэхэмжлэлийн шаардлагыг хариуцагч бүхэлд нь хүлээн зөвшөөрснийг баталж, Баян-Өлгий аймгийн Прокурорын газрын прокурорын нэхэмжлэлтэй /дүгнэлт/, Баян-Өлгий аймаг дахь Гаалийн газрын гаалийн улсын байцаагчид холбогдох захиргааны хэргийг хэрэгсэхгүй болгосугай.  

2. Улсын тэмдэгтийн хураамжийн тухай хуулийн 41 дүгээр зүйлийн 41.1.3,  Захиргааны хэрэг шүүхэд хянан шийдвэрлэх тухай хуулийн  47 дугаар зүйлийн 47.1-д тус тус зааснаар нэхэмжлэгч нь төсвийн байгууллага тул улсын тэмдэгтийн хураамжаас чөлөөлөгдсөнийг дурдаж, хариуцагчаас  улсын тэмдэгтийн хураамжид 70200 төгрөг гаргуулан улсын орлого  болгосугай.

3.Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2-т зааснаар энэхүү захирамжийг захиргааны хэргийн шүүхийн шийдвэрийн нэгэн адил журмаар биелүүлэхийг дурдсугай.

4. Хэргийн оролцогчид энэ захирамжид гомдол гаргах эрхгүй болохыг тайлбарласугай.

 

                                              

                                            ШҮҮГЧ                                      М.РИЗА