Хариуцагчийн зөвшөөрлийг батлах тухай

 

Дундговь аймаг дахь Захиргааны хэргийн анхан шатны шүүхийн Ерөнхий шүүгч Б.С би, Дундговь аймгийн Прокурорын газрын хяналтын прокурор М.Үээс тус аймгийн Улсын бүртгэлийн хэлтсийн хяналтын улсын байцаагч Д.Нд холбогдуулан гаргасан “2021 оны 11 дүгээр сарын 08-ны өдрийн ... дугаартай Н.Эт холбогдох шийтгэлийн хуудсанд өөрчлөлт оруулах”-ыг хүссэн нэхэмжлэлийг /дүгнэлт/ 2022 оны 04 сарын 04-ний өдөр хүлээн авч хянаад ТОДОРХОЙЛОХ нь:

Дундговь аймгийн Прокурорын газрын хяналтын прокурор М.Ү шүүхэд гаргасан нэхэмжлэлдээ: “...тус аймаг дахь Улсын бүртгэлийн хэлтсийн Улсын бүртгэлийн хяналтын улсын байцаагч Д.Н нь “...Н.Э нь иргэний үнэмлэхээ гэмтээсэн...” гэх зөрчилд хялбаршуулсан журмаар зөрчлийн хэрэг бүртгэлтийн ажиллагаа явуулж, холбогдогч Н.Эыг 2021 оны 11 дүгээр сарын 08-ны өдөр Монгол улсын Зөрчлийн тухай хуулийн 15.24 дүгээр зүйлийн 1 дэх хэсэгт зааснаар ... дугаартай шийтгэлийн хуудсаар 25 нэгжтэй тэнцэх хэмжээний төгрөгөөр торгох шийтгэл оногдуулж шийдвэрлэснийг шалгалтын явцад хянав.

Материалд Улсын бүртгэлийн хяналтын улсын байцаагч Д.Н нь “Үйлдсэн зөрчлөө сайн дураараа илчилсэн мэдээллийг хүлээн авсан тухай” болон “Хялбаршуулсан журмаар зөрчил шалган шийдвэрлэх ажиллагааны тэмдэглэлд “Н.Э нь иргэний үнэмлэхээ гэмтээсэн” талаар тэмдэглэл үйлдсэн байна.

Иргэний үнэмлэхээ зориуд гэмтээсэн бол Зөрчлийн тухай хуулийн 15.24 дүгээр зүйлийн 2 дэх хэсэгт “иргэний үнэмлэх, энгийн гадаад паспорт, улсын бүртгэлийн  гэрчилгээг  барьцаалсан, барьцаалуулсан, зориуд гэмтээсэн”  гэх  зүйл заалтаар шийтгэл оногдуулах байтал Зөрчлийн тухай хуулийн 15.24 дүгээр зүйлийн 1 дэх хэсэг буюу “тогтоосон хугацаанд иргэний улсын бүртгэлд бүртгүүлээгүй” гэсэн зүйл заалтаар шийтгэл оногдуулж хуулийг буруу хэрэглэсэн байх тул шийтгэлийн хуудсанд өөрчлөлт оруулах үндэслэлтэй байна.

Иймд Монгол Улсын Зөрчил шалган шийдвэрлэх тухай хуулийн 7.2 дугаар зүйлийн 8 дахь хэсгийг удирдлага болгон Дундговь аймгийн Улсын бүртгэлийн хэлтсийн Улсын бүртгэлийн хяналтын улсын байцаагч Д.Нгийн 2021 оны 11 дүгээр сарын 08-ны өдөр Монгол улсын Зөрчлийн тухай хуулийн 15.24 дүгээр зүйлийн 1 дэх хэсэгт зааснаар ... дугаартай шийтгэлийн хуудсаар 25 нэгжтэй тэнцэх хэмжээний төгрөгөөр торгох шийтгэл оногдуулж шийдвэрлэсэн шийдвэрийг Зөрчлийн тухай хуулийн 15.24 дүгээр зүйлийн 2 дахь хэсэг болгон өөрчлүүлэхээр прокурорын дүгнэлт бичив” гэжээ.

Хариуцагч Д.Н 2022 оны 04 сарын 22-ны өдөр шүүхэд бичгээр ирүүлсэн хариу тайлбартаа: “....Үйлдсэн зөрчлөө сайн дураараа илчилсэн мэдээллийг хүлээн авсан тухай болон хялбаршуулсан журмаар зөрчил шалган шийдвэрлэх ажиллагааны тэмдэглэлд Н.Э нь иргэний үнэмлэх үрэгдүүлсэн талаар тэмдэглэл үйлдсэн бөгөөд шийтгэлийн хуудас бичих явцдаа алдаа гаргаж Зөрчлийн тухай хуулийн 15.24 дүгээр зүйлийн 2 дах заалт “Иргэний үнэмлэх, энгийн гадаад паспорт, улсын бүртгэлийн гэрчилгээ барьцаалсан, барьцаалуулсан, зориуд гэмтээсэн" гэх зүйл заалтаар шийтгэл оногдуулах байтал хайхрамжгүйн улмаас Зөрчлийн тухай хуулийн 15.24. дүгээр зүйлийн 1 дэх заалт “Тогтоосон хугацаанд иргэний улсын бүртгэлд бүртгүүлээгүй гэсэн зүйл заалтаар шийтгэл оногдуулж хуулийг буруу хэрэглэсэн байх тул ... дугаартай шийтгэлийн хуудсаар 25 нэгжтэй тэнцэх хэмжээний төгрөгөөр торгох шийтгэл орогдуулж шийдвэрлэсэн шийдвэрийг Зөрчлийн тухай хуулийн 15.24 дүгээр зүйлийн 2 дах хэсэг болгон өөрчлөх хүсэлтэй байна. Миний бие алдаа, зөрчлөө хүлээн зөвшөөрч байна” гэжээ.

ҮНДЭСЛЭХ нь:

Дундговь аймгийн Прокурорын газрын хяналтын прокурор М.Үээс иргэний үнэмлэхээ гэмтээсэн бол Зөрчил шалган шийдвэрлэх тухай хуулийн 15.24 дүгээр зүйлийн 2 дахь заалтаар шийтгэл оногдуулах байтал Зөрчлийн тухай хуулийн 15.24 дүгээр зүйлийн 1 дэх заалтаар шийтгэл оногдуулж хуулийг буруу хэрэглэсэн гэх үндэслэлээр эрх бүхий албан тушаалтны шийдвэрийг өөрчлүүлэхээр прокурорын дүгнэлт[1] шүүхэд  ирүүлжээ.

Дундговь аймгийн Улсын бүртгэлийн хэлтсийн хяналтын улсын байцаагчаас  иргэн Н.Эыг иргэний үнэмлэхээ гэмтээсэн гэж Зөрчлийн тухай хуулийн 15.24 дүгээр зүйлийн 1-д зааснаар 25 нэгж буюу 25000 төгрөгийн торгуулийг шийтгэлийн хуудсаар[2] оногдуулсныг зөрчилд холбогдогч Н.Э нь 2021 оны 11 сарын 08-ны өдөр биелүүлж төлсөн болох нь  баримтаар[3]  тогтоогдож байна.

Хариуцагч прокурорын дүгнэлтийг буюу нэхэмжлэлийн шаардлагыг  бүхэлд нь хүлээн зөвшөөрсөн тухай хариу тайлбарыг[4] шүүхэд бичгээр ирүүлсэн нь Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д заасан “хариуцагч нэхэмжлэлийн шаардлагыг бүхэлд нь хүлээн зөвшөөрсөн...” гэх үндэслэлд хамаарах ба хариуцагч нэхэмжлэлийн шаардлагыг хүлээн зөвшөөрсөн нь зөрчилд холбогдогчийн болон бусад этгээдийн эрх, хууль ёсны ашиг сонирхол  хөндөгдөхгүй, хуульд харшлахгүй тул шүүх хариуцагчийн зөвшөөрлийг батлав.

Хуулийн зүйл ангийг зөв тохируулаагүйгээс тодруулбал Зөрчлийн тухай хуулийн 15.24 дүгээр зүйлийн 1 дэх хэсэгт заасан зөрчилд  20 нэгж буюу 20000 төгрөгөөр торгохоор байтал 25 нэгж буюу 25000 төгрөгөөр  торгосон байгаа мэт зөрчил байх тул /зааснаас хэтрүүлсэн үнийн дүн мэт/ гаргасан үйлдэл түүнд тохирсон зүйлчлэлийг бүрэн зөв гүйцэд бичиж шийтгэлийн хуудсыг оногдуулах нь зүйтэйг анхааруулж байна.

Захирамжид давж заалдах журмаар гомдол гаргахгүй, мөн уг асуудлаар дахин шүүхэд нэхэмжлэл гаргах /дүгнэлт бичих/ эрхгүй зэргийг  танилцуулж, энэ тухай баримтжуулсан[5] болно.       

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1, 122 дугаар зүйлийн 122.2-т заасныг удирдлага болгон ЗАХИРАМЖЛАХ нь:

1. Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1,Зөрчил шалган шийдвэрлэх тухай хуулийн 7.2 дугаар зүйлийн 8 дахь хэсэгт заасныг баримтлан нэхэмжлэгч Дундговь аймгийн Прокурорын газрын хяналтын прокуророос тус аймгийн Улсын бүртгэлийн хэлтсийн хяналтын улсын байцаагчид холбогдуулан гаргасан “2021 оны 11 дүгээр сарын 08-ны өдрийн ... дугаартай ...т холбогдох шийтгэлийн хуудаст өөрчлөлт оруулах тухай захиргааны хэрэгт хариуцагчийн зөвшөөрлийг баталж, улсын байцаагчийн  2021 оны 11 дүгээр сарын 08-ны өдрийн ... дугаартай “Хялбаршуулсан журмаар  шийдвэрлэх зөрчилд шийтгэл ногдуулах тухай” шийтгэлийн хуудасны  ШИЙДВЭРЛЭХ нь хэсгийн 1-р заалтын “Зөрчлийн тухай хуулийн 15.24.1” гэснийг  “Зөрчлийн тухай хуулийн 15.24 дүгээр зүйлийн 2” гэж  өөрчилсүгэй.

2. Улсын тэмдэгтийн хураамжийн тухай хуулийн 41 дүгээр зүйлийн 41.1.3 дахь хэсэгт зааснаар нэхэмжлэгч, хариуцагч нарыг улсын тэмдэгтийн хураамжаас чөлөөлсүгэй.

3. Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2 дахь хэсэгт зааснаар энэхүү захирамжид гомдол гаргах эрхгүй бөгөөд шүүхийн шийдвэрийн нэгэн адил биелүүлэхийг тайлбарласугай.

 

 

ЕРӨНХИЙ ШҮҮГЧ                              Б.С