МОНГОЛ УЛСЫН НЭРИЙН ӨМНӨӨС

 

Орхон аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Ж.Байгалмаа даргалж

 

Улсын яллагч Б.Жавхлантуяа

Шүүгдэгч Ц.Б

Шүүх хуралдааны нарийн бичгийн дарга Б.Номин нарыг оролцуулан тус шүүхийн хурлын танхимд нээлттэй хийсэн шүүх хуралдаанаар

 

Орхон аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Ц.Б-д холбогдох эрүүгийн 1725000000140 дугаартай хэргийг хянан хэлэлцэв.

 

Биеийн байцаалт: Монгол улсын иргэн, ** оны ** дүгээр сарын **-ны өдөр Говь-Алтай аймгийн Алтай суманд төрсөн, эрэгтэй, ** настай, бүрэн дунд боловсролтой, жолооч мэргэжилтэй, “ххххх”-нд жолооч ажилтай, ам бүл 5, эхнэр, хүүхдүүдийн хамт  ял шийтгэлгүй гэх Өндөр овогт Ц.Б 

 

Шүүгдэгч Ц.Б- нь 2017 оны 10 сарын 12-ноос 13-нд шилжих шөнө Орхон аймгийн Баян-Өндөр сумын *** багийн 32-05 тоотод хохирогч Б.Г-ыг зодож эрүүл мэндэд нь хөнгөн хохирол учруулсан гэмт хэрэгт холбогджээ.

 

ТОДОРХОЙЛОХ НЬ:

 

Шүүхийн хэлэлцүүлэгт дараахь нотлох баримтуудыг шинжлэн судлав. Үүнд:

 

-Шүүгдэгч Ц.Б-гийн шүүхийн хэлэлцүүлэгт өгсөн: Мөрдөн байцаалтын шатанд үнэн зөв мэдүүлсэн. Хэргийн хувьд маргах зүйлгүй. Хохиролд 170.000 төгрөг төлсөн. Хохирогчоос уучлалт гуйсан. Тухайн үед согтуу байсан. Хохирогчийн хөмсөг хавьд нь цохисон. Толгой руу нийт 2 удаа цохисон. Хийсэн хэрэгтээ гэмшиж байна. Дахин ийм үйлдэл гаргахгүй гэсэн мэдүүлэг,

 

-Хохирогч Б.Г-ын мөрдөн байцаалтын шатанд өгсөн: ...Мөнхжаргалыг явсаны дараа Б- бид хоёр шоронгоор явж байсан Жаргалсайханы талаар ярьж байхад Б- гэнэт босож ирээд чи шоронгийн пиздануудыг ярьдаг яасан овоо юм бэ гээд шууд миний хувцаснаас зуураад авахаар нь би гарнаас нь бариад Б- миний гарыг тавьчих, больё гэж хэлэхээр нь би Б-гийн гарыг тавихад шууд миний баруун хөмсөг хэсэг рүү гараараа цохиод авсан. Тэр үед би манараад нүдээ дараад доошоо болоход араас сандалаар толгой хэсэг рүү цохиод авсан. Тэр үед миний дотор муухай оргиод Б-г чи миний толгой руу цохичихлоо гэж хэлэхэд Б- чи шээс баастайгаа холилдоод хэвтэж байхыг чинь харна гэхээр нь би орон дээр гараад хэвтчихсэн. Тэр үед гаднаас Г- нөгөө эмэгтэйгийнхээ хамт орж ирээд чи болсон юм бэ гэхээр нь би хэлсэн. Г- Б-г загнасан, тэгээд бид нар унтахаар хэвтээд унтсан, шөнө дунд миний дотор муухайраад байхаар нь би толгойгоо илээд сууж байхад Б- утсаараа оролдоод байхаар нь чи унтаачээ, юу хийгээд байгаа юм бэ пизда минь гээд хэлчихсэн. Б- энэ муу ингэдэг байхгүй юу гээд босож ирээд дахиад намайг зодохоор нь би Г- ахын унтаж байсан орны араар ороход Г- ах босож ирээд гэрээсээ Б-г хөөгөөд гаргасан гэсэн мэдүүлэг /хх 10 ху/,

 

-Гэрч Б.Г-ын мөрдөн байцаалтын шатанд өгсөн: ...О- гэртээ харилаа гэхээр нь би хүргэж өгөх гээд хамт гэрээс гарчихаад машин хайж байгаад эргээд гэртэй буцаж ороход Г-ын хөмсөгнөөс цус гарчихсан байхаар нь юу болсон юм бэ гэж асуухад Б- бид хоёр маргалдаад зодолдсон гэж хэлсэн. Тэгээд бид нар орондоо ороод унтаж байхад үүрээр дахиад хүмүүс маргалдаад байхаар нь би сэрээд юу болоод байгаа юм бэ гэхэд Г-, Б- нар хоорондоо барилцаад авчихсан байсан ба Г- миний унтаж байсан орны араар орж хэвтэхээр нь би Б- чи манай гэрээс зайл гэж хэлээд хөөгөөд гаргасан гэсэн мэдүүлэг /хх 13 ху/,

 

-Гэрч Х.О-ийн мөрдөн байцаалтын шатанд өгсөн: ...Г-той жаахан маргалдаад гэртэй харилаа гээд гарахад Г- надтай хамт намайг машинд суулгаж өгнө гээд гарсан. Тэр үед Г- Б- нар гэрт үлдсэн. Г- бид хоёр гадуур жаахан алхаж байгаад эргээд хамт Г-ын гэрт хамт очиход Г- гэдэг залуугийн хөмсөгнөөс цус гарчихсан байсан. Г- юу болсон талаар асуухал тэр хоёр жаахан маргасан, одоо зүгээр гэж ярьж байсан. Тэгээд бид нар унтаж байхад хүмүүс маргалдаад байх шиг дуу гарахаар нь сэрэхэд Г- нь Г- бид хоёрын унтаж байсан орны хажуугаар орж ирээд Б- намайг зодох гээд байна гэхээр нь Г- Б-г чи манай гэрээс яв гэж хэлээд гэрээсээ гаргасан гэсэн мэдүүлэг /хх 14 ху/,

 

-Орхон аймгийн шүүхийн шинжилгээний албаны 865 дугаартай дүгнэлтэнд:

1. Б.Г-ын биед тархи доргилт, баруун дээд зовхинд язарсан шарх үүсч байжээ.

2. Эдгээр гэмтэл нь мохоо зүйлийн 1 удаагийн цохих, цохигдох хүчний үйлчлэлээр үүсгэгдэнэ.

3. Гэмтлүүд нь нэг цаг хугацаанд үүссэн байж болно.

4. Эрүүл мэндийг түр хугацаагаар сарниулна.

5. Гэмтлийн зэргийн зааврын 2.4.1-д зааснаар гэмтлийн хөнгөн зэрэгт хамаарагдана

6. Гоо сайхан болон хөдөлмөрийн чадвар тогтонги алдалтанд нөлөөлөхгүй гэсэн дүгнэлт /хх 19 ху/,

 

-Ц.Б-г яллагдагчаар татах тухай, яллагдагчаар мэдүүлэг авсан тэмдэглэл /хх 26-27 ху/

              -Ял шийтгэгдсэн эсэхийг шалгах хуудас /хх 29 ху/ зэрэг болно.

 

Шүүхийн хэлэлцүүлгийн үед шинжилсэн нотлох баримтууд нь энэ хэрэгт хамааралтай, хуульд заасан журмаар цугларсан, хэрэг хянан шийдвэрлэхэд хангалттай байна гэж үзэв.

 

            Шүүгдэгч Ц.Б- нь 2017 оны 10 сарын 12-ноос 13-нд шилжих шөнө Орхон аймгийн Баян-Өндөр сумын *** багийн 32-05 тоотод хохирогч Б.Г-ыг зодож эрүүл мэндэд нь хөнгөн хохирол учруулсан гэмт хэргийг үйлдсэн болох нь шүүхийн хэлэлцүүлэгт шүүгдэгчийн үйлдсэн хэргээ хүлээн мэдүүлсэн мэдүүлэг, мөрдөн байцаалтын шатанд өгсөн хохирогч Б.Г-ын “...Б- гэнэт босож ирээд чи шоронгийн пиздануудыг ярьдаг яасан овоо юм бэ гээд шууд миний хувцаснаас зуураад авахаар нь би гарнаас нь бариад Б- миний гарыг тавьчих, болий гэж хэлэхээр нь би Б-гийн гарыг тавихад шууд миний баруун хөмсөг хэсэг рүү гараараа цохиод авсан” гэсэн мэдүүлэг /хх 10 ху/, мөн гэрч Б.Г- /хх 13 ху/, Х.О- /хх 14 ху/ нарын өгсөн мэдүүлгүүд хохирогчийн биед тархи доргилт, баруун дээд зовхинд язарсан шарх үүссэнийг тогтоосон 865 дугаартай шинжээчийн дүгнэлт, ял шийтгэлийг шалгах хуудас болон хэрэгт цугларч шүүхийн хэлэлцүүлэгт шинжлэн судлагдсан бичгийн бусад нотлох баримтуудаар хангалттай нотлогдон тогтоогдож байна.

 

                     Шүүгдэгч Ц.Б-гийн үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэргийн бүрэлдэхүүний шинжийг бүрэн хангаж байх тул түүнийг хүний эрүүл мэндэд хөнгөн хохирол учруулсан гэмт хэргийг үйлдсэн гэм буруутайд тооцож, эрүүгийн хариуцлага хүлээлгэх үндэслэлтэй гэж дүгнэв.

            Шүүгдэгч нь анх удаа хөнгөн гэмт хэрэг үйлдсэн, хохирол төлбөргүй зэргийг ял шийтгэл оногдуулахдаа хөнгөрүүлэх нөхцөл байдалд тооцож, түүнд торгох ялыг сонгон хэрэглэх нь зүйтэй.

            Хохирогч Б.Г- нь мөрдөн байцаалтын шатанд нэхэмжлэх зүйлгүй, гомдол саналгүй гэсэн байх тул энэ шүүх хуралдаанаар хэлэлцэх хохирол төлбөргүй байна.

Энэ хэрэгт хураагдсан эд мөрийн баримтгүй, битүүмжилсэн хөрөнгөгүй, шүүгдэгч нь цагдан хоригдоогүй, бусдад төлөх төлбөргүй, түүний иргэний бичиг баримт шүүхэд ирээгүй болно.

 

Монгол Улсын Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10 дугаар зүйлүүдэд тус тус заасныг удирдлага болгон

                                                                                                                                                  ТОГТООХ нь:

1. Шүүгдэгч хүний эрүүл мэндэд хөнгөн хохирол учруулсан гэмт хэргийг үйлдсэн гэм буруутайд тооцсугай.

2. Эрүүгийн хуулийн тусгай ангийн 11.6 дугаар зүйлийн 1.д зааснаар шүүгдэгч Ц.Б-г 450 нэгжтэй тэнцэх хэмжээний буюу 450.000 /дөрвөн зуун тавин мянга/ төгрөгөөр торгох ялаар шийтгэсүгэй.

 

3. Эрүүгийн хуулийн ерөнхий ангийн 5.3 дугаар зүйлийн 4.т зааснаар шүүгдэгч Ц.Б-д оногдуулсан торгох ялыг 2 /хоёр/ сарын хугацаанд хэсэгчлэн төлүүлэхээр тогтоосугай.

 

4. Эрүүгийн хуулийн ерөнхий ангийн 5.3 дугаар зүйлийн 5.д зааснаар шүүгдэгч Ц.Б- нь торгох ялыг шүүхээс тогтоосон хугацаанд биелүүлээгүй тохиолдолд хорих ялаар солихыг анхааруулсугай.

 

  5. Шийтгэх тогтоол хүчин төгөлдөр болтол шүүгдэгч Ц.Б-д урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

6. Энэ хэрэгт хураагдсан эд мөрийн баримтгүй, битүүмжилсэн хөрөнгөгүй, шүүгдэгч нь цагдан хоригдоогүй, бусдад төлөх төлбөргүй, түүний иргэний бичиг баримт шүүхэд ирээгүйг тус тус дурьдсугай.

 

  7. Шийтгэх тогтоол уншин сонсгосноор хүчинтэй болох бөгөөд шүүгдэгч, хохирогч, тэдний өмгөөлөгч, хууль ёсны төлөөлөгч нар эс зөвшөөрвөл шийтгэх тогтоолыг гардан авснаас хойш 14 хоногийн дотор Орхон аймгийн Эрүүгийн хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй.

 

 

 

 

 

ДАРГАЛАГЧ ШҮҮГЧ                     Ж.БАЙГАЛМАА