2023 оны 12 сарын 06 өдөр                     Дугаар 121/ШШ2023/0027                           Өвөрхангай аймаг

 

Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Өвөрхангай аймаг дахь Захиргааны хэргийн анхан шатны шүүхийн Ерөнхий шүүгч Ц.Нэргүй би, Өвөрхангай аймгийн Прокурорын газрын ахлах прокурорын дүгнэлттэй, Өвөрхангай аймгийн Засаг даргын тамгын газрын Геологи, уул уурхай, газрын тос, хийн хяналтын улсын байцаагч *****д холбогдох “2023 оны 09 дүгээр сарын 12-ны өдрийн 0120516 дугаар шийтгэлийн хуудсанд өөрчлөлт оруулах”  тухай шаардлага бүхий зөрчил шалган шийдвэрлэх захиргааны хэргийг хянаад

ТОДОРХОЙЛОХ нь:

Хариуцагч Өвөрхангай аймгийн Засаг даргын тамгын газрын Геологи, уул уурхай, газрын тос, хийн хяналтын улсын байцаагч *****гээс 2023 оны 12 дугаар сарын 06-ны өдөр шүүхэд бичгээр ирүүлсэн хүсэлтдээ:

“...Өвөрхангай аймгийн Арвайхээр сумын *** дугаар багийн нутаг дэвсгэрт ***** нь **** УАВ улсын дугаартай тээврийн хэрэгслээр байгалийн өнгөт чулууг хууль бусаар тээвэрлэсэн тул зөрчлийн хэрэг бүртгэлтийн 2326000768 дугаартай хэрэг нээж шалгаад Зөрчлийн тухай хуулийн 7.11 дүгээр зүйлийн 7.4 дэх хэсэгт заасны дагуу 1000 нэгжээр торгох шийтгэл оногдуулж, 147 кг байгалийн өнгөт чулууг улсын орлого болгохоор хураан авч шалган шийдвэрлэсэн.

Иргэн *****д 0120516 дугаартай шийтгэлийн хуудсаар оногдуулсан 1.000.000 төгрөгийн торгууль оногдуулж шийтгэлийн хуудас бичихдээ нэг мянган нэгжтэй тэнцэх хэмжээний төгрөгөөр торгох гэж бичих байсныг нэг мянган нэгжээр гэж бичсэн нь Засгийн газрын 2021 оны 135 дугаар тогтоолоор батлагдсан загварын дагуу үйлдээгүй, эрх бүхий албан тушаалтны хураан авсан эд зүйлийг Засгийн газрын 195 дугаар тогтоолоор баталсны дагуу арга хэмжээ аваагүй нөхцөл байдал тогтоогдсон байна.

Иймд Өвөрхангай аймгийн Прокурорын газрын ахлах прокурор, хууль цаазын итгэмжит зөвлөх *****гийн 2023 оны 10 дугаар сарын 31-ний өдрийн 49 дугаартай “Эрх бүхий албан тушаалтны шийтгэл оногдуулсан шийдвэрт өөрчлөлт оруулах тухай” Өвөрхангай аймгийн Захиргааны хэргийн анхан шатны шүүхэд гаргасан дүгнэлтийг хүлээн зөвшөөрч байна.

Захиргааны хэрэг шүүхэд хянан шийдвэрлэх тухай хуулийн 67 дугаар зүйлд заасны дагуу прокурорын дүгнэлтийг хүлээн зөвшөөрч байгаа тул хялбаршуулсан журмаар шийдвэрлэж өгнө үү” гэжээ.

                                                ҮНДЭСЛЭХ НЬ:

Өвөрхангай аймгийн Прокурорын газрын ахлах прокурор *****гаас Өвөрхангай аймгийн Засаг даргын тамгын газрын Геологи, уул уурхай, газрын тос, хийн хяналтын улсын байцаагчийн “2023 оны 09 дүгээр сарын 12-ны өдрийн 0120516 дугаар шийтгэлийн хуудсанд өөрчлөлт оруулах” тухай прокурорын дүгнэлтийг тус шүүхэд гаргажээ.

Хариуцагч нь прокурорын дүгнэлтийг бүхэлд нь хүлээн зөвшөөрч, хэргийг хялбаршуулсан журмаар шийдвэрлүүлэх тухай тайлбар, хүсэлтээ тус шүүхэд бичгээр ирүүлсэн байх бөгөөд хариуцагчийн энэхүү зөвшөөрөл нь бусад этгээдийн эрх, хууль ёсны ашиг сонирхлыг хөндөөгүй, хуульд харшлаагүй байх тул шүүх Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д зааснаар хариуцагчийн зөвшөөрлийг баталж, тус шүүхийн 121/2023/0025/З дугаарын индекстэй захиргааны хэргийг хэрэгсэхгүй болгож, хэргийг хялбаршуулсан журмаар шийдвэрлэх нь зүйтэй байна.

Хариуцагч нь прокурорын дүгнэлтийг хүлээн зөвшөөрснөөр энэхүү хэргийн оролцогчид уг асуудлаар дахин тус шүүхэд нэхэмжлэл гаргах, анхан шатны шүүгчийн захирамжид давж заалдах, хяналтын журмаар гомдол гаргах эрхээ алдах бөгөөд харин бусад этгээд уг асуудлаар нэхэмжлэл гаргахад саад болохгүйг дурдах нь зүйтэй.

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1, 111.2-д тус тус заасныг удирдлага болгон ЗАХИРАМЖЛАХ нь:

         1. Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д заасныг баримтлан Өвөрхангай аймгийн Прокурорын газрын ахлах прокурор *****гаас, Өвөрхангай аймгийн Засаг даргын тамгын газрын Геологи, уул уурхай, газрын тос, хийн хяналтын улсын байцаагч *****д холбогдуулан гаргасан “2023 оны 09 дүгээр сарын 12-ны өдрийн 0120516 дугаар шийтгэлийн хуудсанд өөрчлөлт оруулах” тухай шаардлага бүхий 49 дугаартай дүгнэлтийг хариуцагч бүхэлд нь хүлээн зөвшөөрснийг баталж, холбогдох захиргааны хэргийг хэрэгсэхгүй болгосугай.

   2. Улсын тэмдэгтийн хураамжийн тухай хуулийн 41 дүгээр зүйлийн 41.1.3-д зааснаар Өвөрхангай аймгийн Прокурорын газрын ахлах прокурор ***** нь улсын тэмдэгтийн хураамжаас чөлөөлөгдсөн болохыг дурдсугай. 

   3. Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2-т зааснаар энэхүү шүүгчийн захирамжид гомдол гаргах эрхгүй бөгөөд шүүхийн шийдвэрийн нэгэн адил биелүүлэх болохыг дурдсугай.

 

 

 

ЕРӨНХИЙ ШҮҮГЧ                                 Ц.НЭРГҮЙ