МОНГОЛ УЛСЫН НЭРИЙН ӨМНӨӨС

 

 

Нийслэл дэх Захиргааны хэргийн анхан шатны шүүхийн шүүгч С.Отгонтуяа даргалж, тус шүүхийн шүүх хуралдааны 1 дүгээр танхимд нээлттэй хийсэн шүүх хуралдаанаар

Гомдол гаргагч: С*******ийн Б*******

Хариуцагч: Нийслэлийн боловсролын газрын Боловсрол, шинжлэх ухааны хяналтын улсын байцаагч Б.Б*******

Гомдлын шаардлага: Боловсрол, шинжлэх ухааны хяналтын улсын байцаагч Б.Б*******ын гаргасан 2023 оны 10 дугаар сарын 26-ны өдрийн Зөрчилд шийтгэл оногдуулах тухай №******* дугаар Шийтгэлийн хуудас-ыг хүчингүй болгуулах шаардлага бүхий зөрчил хянан шийдвэрлэх захиргааны хэргийг хянан хэлэлцэв.

Шүүх хуралдаанд: Гомдол гаргагч С.Б*******, гомдол гаргагчийн өмгөөлөгч Б.Б*******, хариуцагч Боловсрол, шинжлэх ухааны хяналтын улсын байцаагч С.Б*******, шүүх хуралдааны нарийн бичгийн дарга Э.Э******* нар оролцов.

ТОДОРХОЙЛОХ нь:

Гомдол гаргагч нь Нийслэлийн боловсролын газрын Боловсрол, шинжлэх ухааны хяналтын улсын байцаагч Б.Б*******т холбогдуулан түүний гаргасан 2023 оны 10 дугаар сарын 26-ны өдрийн Зөрчилд шийтгэл оногдуулах тухай №******* дугаар Шийтгэлийн хуудас-ыг хүчингүй болгуулах шаардлагаар гомдол гаргажээ.

2. Хэргийн нөхцөл байдлын талаар:

2.1. Хариуцагч нь дүүргийн *******-р дүгээр сургуулийн анги засварын мөнгө гэж нэг хүүхдээс 100,000 төгрөг нэхээд байна. Асуудлыг шалгаж шийдвэрлэж өгнө үү гэх гомдлын дагуу 2023 оны 09 дүгээр сарын 15-ны өдөр зөрчлийн хэрэг нээн, зөрчил шалган шийдвэрлэх ажиллагааг явуулж, 2023 оны 10 дугаар сарын 26-ны өдрийн №******* Шийтгэлийн хуудас-аар Зөрчлийн тухай хуулийн 9.1 дүгээр зүйлийн 1 дэх хэсэгт заасан хуульд заагаагүй төлбөр, хураамж авсан зөрчил гаргасан гэж үзэн гомдол гаргагч С.Б*******т хорин нэгжтэй тэнцэх хэмжээний буюу 20,000 төгрөгөөр торгох шийтгэл оногдуулжээ.

3. Хариуцагчийн зөрчилд шийтгэл оногдуулсан 2023 оны 10 дугаар сарын 26-ны өдрийн №******* Шийтгэлийн хуудас-ыг эс зөвшөөрч гомдол гаргагч нь 2023 оны 11 дүгээр сарын 17ны өдөр шүүхэд хандсан байна.

4. Гомдол гаргагчаас хариуцагч эрх бүхий албан тушаалтны 2023 оны 10 дугаар сарын 26-ны өдрийн №******* Шийтгэлийн хуудас-ыг эс зөвшөөрч, хүчингүй болгуулахаар шүүхэд гаргасан гомдлын шаардлагын үндэслэлдээ:

4.1. Боловсрол Шинжлэх Ухааны сайдын 2023 оны 01 дүгээр сарын 02-ны ******* тушаалаар "2023 оныг сургалтын байгууллагын менежментийг сайжруулах жил болгон зарлаж зөвлөн туслах баг хамтын үйл ажиллагаа явуулан *******-р сургуульд хяналт шалгалт хийхэд "Сургуулийн тохижилт барилгын норм стандарт хангалтгүй хүүхэд сурах нөхцөл бүрдээгүй гэх дүн авсан.

*******-р сургуулийн захирал О.Б*******аас тухайн сургуулийн тохижилт засвар үйлчилгээний төсөв хүрэлцэхгүй гэж мэдэгдсэн тул багш нар өөрсдийн хөрөнгөөр сургуулийн коридорыг засварлан тохижуулсан. Сургуулийн удирдлагаас 2023 оны 03 дугаар сарын 24-нд ангиудын нэгдсэн эцэг эхийн зөвлөлийн хурлыг зохион байгуулж "Сургуулийн анги тохижилтын талаар хэлэлцсэн" энэхүү хурлаар эцэг эхчүүдийн зөвлөлөөс шийдэл гараагүй.

Гэвч 2023 оны 05 дугаар сарын 10-ны өдрийн ангийн эцэг эхийн хурлаар эцэг эхийн зөвлөлөөс бие даан анги тохижилт хийлгэх талаар санаачилж нийт эцэг эхийн санал хураалтаар өөрсдийн хөрөнгөөр ангийн тохижилт засвар хийх шийдвэр гарч гарын үсэг зурж баталгаажуулан засварын ажлыг 2023 оны 09 дүгээр сарын 01-ний өдрийн өглөө хийж дуусган хүлээлгэн өгсөн.

4.2. Засвар, тохижилт хийхийг удирдлагаас санаачилж, эцэг эхчүүд засварын ажил, мөнгө хураахтай холбоотой ажиллагааг бие даан зохион байгуулсан. Миний бие тухайн үед Улаанбаатар хотод байгаагүй 2023 оны 06 дугаар сарын 15-ны өдрөөс 07 дугаар сарын 01-ний өдрийн хооронд өөрийн төрсөн нутагт хувийн ажлаар зорчин нэг ч удаа оролцоогүй, утсаар мөнгө нэхэж ярьж байгаагүй бөгөөд зун наадмын дараа долоон сарын сүүл найман сарын эхээр "Засварын ажил эхэлж байгаа, багшаа ирж харах уу" гэсний дагуу болон хотод бороо хур, үер ус их үед сургуулийн гадна пасадны ажил эхэлсэн цонх салгаж онгорхой байсан учир анги танхимаар орж үзэж харж байснаас өөр зүйлгүй. Гэтэл Нийслэлийн боловсролын газарт гаргасан "С.Б******* багш залгаж засварын мөнгө нэхсэн" гэх гомдлын дагуу дугаар зөрчлийн хэрэг үүсгэн шалгасан.

4.3. Засварын ажилд сэтгэл зүрхнээсээ хувийн ажил амьдрал, мөнгө санхүүгээр тусалж байсан эцэг эхийн зөвлөлийн дарга, гишүүд ийнхүү шалгаж шийтгэл ногдуулах гэж буйд дургүйцэн миний гэм буруугүйг нотлохын тулд уулзаж мэдүүлэг өгч шалгуулсан.

4.4. Шалгуулах явцад Нийслэлийн боловсролын газрын хяналтын улсын байцаагч Б.Б******* нь намайг хийсэн хэрэгжүүлсэн ажлаар маань болон уулзах мэдүүлэг тайлбар авах болгондоо дарамталж хэлсэн ярьснаасаа өөр зүйл ярьж, зөвшөөрөлгүй нууцаар бичлэг хийх гэх мэт үйлдлүүдийг гаргаж байсан.

Нууцаар бичлэг хийсэн үйлдлийг мэдээд хэлэхэд ... би хийх эрхтэй гэх мэт хариу хэлсэн ба энэ үед захирал болон нийгмийн ажилтан 2 хамт байсан. Дараа нь үүнийгээ нарийн бичгийн өрөөнд үгүйсгэж ...би хийгээгүй тэгэхэд хийсэн гэж зүгээр хэлсэн юм" гэх зэргээр хэлсэн ярьсан зүйл нь хүртэл зөрж байсан нь намайг бухимдуулаад зогсохгүй сэтгэлийн дарамтад оруулж байсан. Мөн ажил болон Нийслэлийн боловсролын газарт дуудагдах, шуудангаар бичиг ирэх, мэдүүлэг тайлбар авах зэрэг нь 2023 оны 9 дүгээр сарын 06-ны өдрөөс хойш өдийг хүртэл үргэлжилж байгаагаас миний бие ажлаа хийж чадахгүй сэтгэл санааны хувьд тогтворгүй дарамтад орж, цаашид багшийн ажлыг хийх урам зориг үгүй болсон ба ажлын байран дээр ч энэ асуудлын учрыг сайн мэдэхгүй багш ажилчдын дунд миний нэр хүнд унаж энэ нь цаашлаад миний сэтгэл зүй, хувийн амралт чөлөөт цагт нөлөөлж байгаад гомдолтой байна.

4.5. Анги танхим сургуулийн тохижилтод бүх багш анги, эцэг эхчүүд оролцож сургууль даяараа хийсэн. Сургуулийн удирдлага болон дээд шатны газрын шийдвэр, эцэг эхчүүдийн санаачилга тохиролцоо, сайн дурын үндсэн дээр хүүхдийнхээ сурч хөгжих таатай орчныг тохижуулсан байтал шийдвэр гаргах түвшний эрхгүй анги удирдсан багш би шийтгүүлэх болсонд гомдолтой байна.

4.6. Дээрх асуудалтай холбоотой эцэг эх, асран халамжлагч нарт миний зүгээс нэг ч удаа шаардлага тавиагүй талаар эцэг эхүүд баталдаг бөгөөд тухайн засвар үйлчилгээ хийхтэй холбоотой төлбөр мөнгийг хураан авах ажиллагаанд оролцоогүй, мөнгө авсан зүйлгүй атал Зөрчлийн тухай хуулийн 9 дүгээр зүйлийн 9.1 дэх хэсгийн 1-д заасны дагуу шийтгэл ногдуулан үндэслэл, нотлох баримтыг танилцуулалгүй үндэслэлгүйгээр 20 нэгжийн торгуулийн арга хэмжээ авсан.

4.7. Цөөн тооны буруу ойлголттой сургууль, багштай хамтран ажилладаггүй эцэг эхчүүдээс болж нийт массыг буруутгадаг, аливаа ажлыг гацаадаг ийм байдлыг дээд доод шатандаа харгалзан үзэж энэ салбарт ажиллаж байгаа багш, удирдлага, албан хаагчдаа дэмжин ажиллах, уян хатан байж нөхцөл байдлыг маш нарийн тодруулж байж шийдвэр гаргадаг байгаасай гэж хүсэж байна гэж тайлбарлаж байна.

5. Гомдол гаргагчийн өмгөөлөгч шүүх хуралдаанд гаргасан тайлбартаа:

Нэгдүгээрт тухайн анги завсарлах ажлыг сургуулиас санаачилсан. Мөн эцэг эхийн зөвлөлийн гишүүдийг байцуулан сургуулийн удирдлага зохион байгуулсан. 2023 оны 05 дугаар сарын 10-ны өдрийн эцэг эхийн хуралд суусан эцэг эхийн зөвлөлийн дарга, гишүүд нь тухайн саналыг хүлээн авч нийт эцэг эхчүүдийн саналын авч зохион байгуулж дуусгасан юм. Энэ нь зөрчлийн хэрэгт авагдсан санхүүгийн баримтуудаар нотлогдоно. С.Б*******т багшийн хувьд тухайн үед Улаанбаатар хотод байгаагүй.

Эцэг эхчүүд багшийг дуудаж анги засварын ажил дууссан ирж үзнэ үү гэсэн байдаг. С.Б******* багш өөрийн данс дээрээ төлбөр хураамж авсан гэдэг нотлох баримт, үйл баримт байхгүй. Анх гомдол гаргасан этгээд төлбөр мөнгө хураагаад байна. Үүнийг зохицуулж өгөөч гэсэн боловч яг хэн хурааж байгаа талаар огт мэдээлэл өгөөгүй байгаа юм.

Зөрчлийн тухай хуулийн 9 дүгээр зүйлийн 9.1-д сурагчид сэтгэл санааны дарамт үзүүлсэн эсхүл мөнгө өгөх ном бүтээгдэхүүн худалдаж авахыг тулгасан эсвэл хуульд заагаагүй төлбөр хураамж авсан бол гэж байгаа юм. С.Б******* багшийн хувьд тухайн засвар үйлчилгээг өөрөө санаачлан төлбөр мөнгө өөрийн биеэр хурааж аваад хувьдаа ашигласан бол энэ зүйл ангид хамаарах байсан. Зөрчлийн хэрэгт авагдсан баримтаар эцэг эх өөрсдөө санаачлан зохион байгуулсан нь үнэн гэдэг нь нотлогдож байгаа. Засвар хийх санаачилгыг анх сургуулийн зөвлөлийн дарга нар санаачилсан. С.Б******* багшийн дансанд анги засвартай холбоотой мөнгө орж байгаагүй. Утсаар хүүхдүүдийг дарамталсан үйл баримт байхгүй байхад 20,000 нэгжээр торгосон нь үндэслэлгүй юм. Нийгмийн ухааны багш болон нийгмийн ажилтнаар олон жил ажилласан хүүхдэд юу хэрэгтэй, хэрэггүй талаар сайн мэдэх хүндэт багш юм. Гэтэл С.Б******* багшийг ажлаа хийхэд нь саад учруулж, мэргэжлээсээ шантрах хүртэл дарамт учруулсан байгаа юм. 20,000 төгрөгийн шийтгэлийн төлбөр дээр голоо цохиод байгаа юм биш. 20,000 төгрөгийг шийтгэлийн төлбөрийг нь барагдуулаад салж болох юм. Гэтэл энэ хүн хүүхдүүдэд хичээл заадаг хүний хувьд үндэслэлгүй шийтгэлийн хуудсыг хүлээн зөвшөөрөлгүй гомдол гаргаж байгаа юм. Тиймээс гомдлын шаардлагыг бүхэлд нь хангаж өгнө үү гэв.

6. Хариуцагч шүүхэд бичгээр гаргасан болон шүүх хуралдаанд гаргасан тайлбартаа:

... иргэн П.Ч /утас: /-ийн гаргасан " дүүрэг дэх ерөнхий боловсролын ******* дүгээр сургууль нь анги засварын мөнгө гэж нэг хүүхдээс 100.0 мянган төгрөг нэхээд байна. Шалгаж өгнө үү" гэх гомдол мэдээллийг Нийслэлийн Засаг даргын Тамгын газрын 1800-1200 дугаарын утсаар ирүүлсний дагуу тухайн сургуулийн зарим үйл ажиллагаанд 2023 оны 09 дүгээр сарын 06-ны өдөр төлөвлөгөөт бус хяналт шалгалтыг хийсэн.

6.1. Шалгалтаар тус сургуулийн ангийн багш С.Б******* 2022-2023 оны хичээлийн жилийн 3 дугаар улирлын эцэст анги засварын төлбөр хэмээн хүүхэд бүрээс 100.0 мянган төгрөг буюу нийт 23 хүүхдээс 2.300.0 мянган төгрөгийг эцэг эхийн зөвлөлийн гишүүний дансаар дамжуулан хураалгуулж, засварыг 7 дугаар сард хийсэн.

Засвараар багшийн ширээ, сандал, хөшигнүүдийг шинэчлэн анги дахь суралцагчийн ширээнүүдийг будаж, уналттай дүүжин тааз хийн таазны хүрээгээр 22 нүдэн гэрлийг байрлуулан, 3, 3 тусгалтай гэрлийг хойд, урд хэсэгт суурилуулсан нь сургалтын байгууллагад тавигдах шаардлагыг хангаагүй буюу Монгол Улсын Ерөнхий боловсролын сургуулийн орчны аюулгүй байдал Ерөнхий шаардлага MNS:6782:2019 стандартын 6.5.1 дэх /Барилгын төлөвлөлтийн норм дүрмийн дагуу баригдсан өрөө тасалгааны зориулалтыг өөрчлөхийг хориглоно/ заалтад нийцээгүй.

Анги засварын мөнгийг хураалгаагүй үлдсэн 5 хүүхдээс 2023- 2024 оны хичээлийн жилийн эхэнд 100.0 мянган төгрөгийг дахин шаардсан нь ангийн суралцагчдын хавтгайруулан албадлагын шинжтэйгээр хураах гэсэн дээрх үйлдэл нь Боловсрол, шинжлэх ухааны сайдын 2022 оны дугаар тушаалын нэгдүгээр хавсралтаар "Сургуулийн өмнөх болон ерөнхий боловсролын сургалтын байгууллагын багш, ажилтны мэргэжлийн ёс зүйн дүрэм"-ийн 4.2.4 дэх /Ажил үүргээ гүйцэтгэсний төлөө төлбөр, хураамж, хандив, тоног төхөөрөмж, эд материал өгөхийг шаардах, ном, сургалтын хэрэглэгдэхүүн, бусад зүйлийг тулган борлуулахаас татгалзах/ гэсэн заалтыг зөрчсөн гэж үзээд багш өөрөө мөнгө хураагаагүй ч гэсэн ангийг удирдаж байгаа гэсэн үндэслэлээр, 2022-2023 оны хичээлийн жилд төлбөр хураамж авч анги засвар хийж дуусаад дахин 2023-2024 оны хичээлийн жилд аваагүй хүүхдүүдээс 100,000 төгрөг хураасан асуудлын таслан зогсоох үүднээс арга хэмжээ авсан.

6.2. Илэрсэн зөрчилд 2023 оны 09 дүгээр сарын 15-ны өдрийн дугаартай зөрчлийн хэрэг нээн, зөрчил шалган шийдвэрлэх ажиллагааг явуулах явцад удаа дараа буюу утсаар 2 удаа дуудсан, ажлын байран дээр нь 1 удаа очсон, албан бичгээр 1 удаа дуудах хуудас шуудангаар хүргүүлсэн боловч тайлбар мэдүүлгийг авч чадаагүй болно. Зөрчилд холбогдогчоос мэдээлэл авч чадаагүй нь миний алдаа байна.

Гомдол гарагчаас мэдүүлэг авах гэтэл хөдөө ажилдаг тул биечлэн мэдүүлэг өгөх боломжгүй гэсэн тул мэдүүлэг аваагүй.

6.3. Иймд багш С.Б*******т Монгол Улсын Зөрчлийн тухай хуулийн 9.1 дүгээр зүйлийн 1-д хуульд заагаагүй төлбөр, хураамж авсан гэж заасныг үндэслэн 20.0 мянган төгрөгөөр торгохоор шийдвэрлэсэн, гомдлыг хүлээн зөвшөөрөхгүй байх тул шийтгэлийн хуудсыг хэвээр үлдээж өгнө үү гэв.

ҮНДЭСЛЭХ нь:

Гомдол гаргагчийн гомдлыг үндэслэлтэй байна гэж үзлээ.

1. С.Б*******аас гомдлын шаардлагын үндэслэлээ ... сургуулиас эцэг эхийн зөвлөлийн нэгдсэн хуралдааныг хийсэн, улмаар ангийн эцэг эхийн зөвлөл зохион байгуулж ангийн засварыг хийсэн, мөнгө хураахад багш огт оролцоогүй тул шийтгэл оногдуулсан нь үндэслэлгүй гэж,

Харин хариуцагч эрх бүхий албан тушаалтнаас ...багш мөнгө хураагаагүй ч ангийг удирдаж байгаа гэдгээр мөнгө хурааж байгаа үйлдлийг таслан зогсоох зорилгоор арга хэмжээ авсан, ангийн засвар нь сургуулийн орчны аюулгүй байдлын стандартыг хангаагүй, багшийн үйлдлийг багшийн мэргэжлийн ёс зүйн дүрмийн заалтыг зөрчсөн гэж үзсэн гэх агуулга бүхий тайлбараар гомдлын шаардлагын үндэслэлийг үгүйсгэн маргаж байна.

2. Хэрэгт авагдсан зөрчлийн хэргийн материал болон бусад нотлох баримтаар дараах үйл баримт тогтоогдож байна.

2.1. Нийслэлийн Засаг даргын тамгын газрын үйлчилгээний нэгдсэн төвд гаргасан иргэн П.Чгийн ...*******-р сургууль анги засварын мөнгө гэж нэг хүүхдээс 100.000 төгрөг нэхээд байна, шалгаж өгнө үү гэх гомдлыг Нийслэлийн боловсролын газарт шилжүүлсэн байх ба, хариуцагч эрх бүхий албан тушаалтан болох Боловсрол, шинжлэх ухааны хяналтын улсын байцаагч нь дээрх гомдолд 2023 оны 09 дүгээр сарын 15-ны өдөр дугаартай зөрчлийн хэрэг нээж, зөрчил шалган шийдвэрлэх ажиллагаа явуулсан нь Зөрчлийн хэрэг нээх тухай эрх бүхий албан тушаалтны тогтоолоор /хавтаст хэргийн 57 дахь тал/;

2.2. Улмаар зөрчил шалган шийдвэрлэх ажиллагааны явцад дүүргийн *******-р сургуулийн ангид үзлэгийн ажиллагааг явуулсан нь Үзлэг хийсэн тухай тэмдэглэл, фото зургаар /хавтаст хэргийн 61-62 дахь тал/;

2.3. ... эцэг эхийн тусламжтайгаар ангид засвар хийх тухай шийдвэрийг сургуулиас гаргасан болох нь, түүнчлэн ангийн засварт смен ангиас 800.000 төгрөгийг нэмж өгсөн, гэрч Ж.О /смен ангийн багш/-ийн мэдүүлэг /хавтаст хэргийн 68-70 дахь тал/-ээр, Ж.Оийн Хаан банкны 5017317797 дугаар харилцах дансны хуулга /хавтаст хэргийн 117-118 дахь тал/, М.Дгийн Хаан банкны 5065306324 дугаар харилцах дансны хуулга /хавтаст хэргийн 114-116 дахь тал/;

2.4. ангийн засварын мөнгийг тус ангийн эцэг эхийн зөвлөлийн гишүүн Э.Огийн эзэмшлийн Хаан банк дахь дугаар харилцах дансанд 23 хүүхдийн эцэг, эхээс нийт 2,300,000 төгрөг шилжүүлсэн бөгөөд 2,300,000 төгрөг болон смен ангиас өгсөн 800.000 төгрөгийг тус тус анги засварын ажилд зарцуулсан болох нь Э.Огийн банкны харилцах дансны хуулга, засварын ажлын орлого, зарлагын тооцоо, материал худалдан авсан зарлагын баримт /хавтаст хэргийн 87-113 дахь тал/ зэрэг зөрчлийн хэргийн материалд цуглуулсан нотлох баримтуудаар;

2.6. Хариуцагч нь маргаан бүхий шийтгэлийн хуудсыг гаргасан 2023 оны 10 дугаар сарын 26-ны өдрийг хүртэлх хугацаанд гомдол гаргагч П.Ч, зөрчилд холбогдогч С.Б******* нараас мэдүүлэг аваагүй болох нь Зөрчлийн хэргийн материалд авагдсан Зөрчлийн хэрэг шалган шийдвэрлэх ажиллагаа явуулсан тухай тэмдэглэл /хавтаст хэргийн 64 дэх тал/, хариуцагчийн шүүх хуралдаанд гаргасан тайлбараар тус тус тогтоогдож байна.

3. Хариуцагч нь зөрчлийг хянан шийдвэрлэх ажиллагаа явуулж, шийтгэл оногдуулахдаа холбогдогч С.Б*******ын хуульд заагаагүй төлбөр, хураамж авсан зөрчил үйлдсэнийг нотлох баримтаар бүрэн нотлон тогтоогоогүй, өөрөөр хэлбэл шийтгэл оногдуулсан шийдвэрийнхээ үндэслэлийг шүүхэд нотолж чадаагүй гэж үзлээ. Үүнд:

Зөрчил шалган шийдвэрлэх тухай хуулийн 4.14 дүгээр зүйлийн 2. Зөрчлийн нотлох баримт нь гэрч, хохирогч, холбогдогчийн мэдүүлэг, бичмэл болон эд мөрийн баримт, эсхүл баримт бичиг, ..., бусад баримтаар тодорхойлогдоно, мөн хуулийн 3.1 дүгээр зүйлийн 2-ийн 2.8-д холбогдогч нь нотлох баримт шалгуулах тухай хүсэлт гаргах эрхтэй гэж, 4.15 дугаар зүйлийн 1-д эрх бүхий албан тушаалтан гаргасан шийдвэрийнхээ үндэслэлийг буюу зөрчлийг нотлох үүргийг хүлээхээр тус тус заасан байна.

Хариуцагчаас зөрчил шалган шийдвэрлэх ажиллагаа явуулахдаа хохирогч П.Чгээс болон холбогдогч С.Б*******аас мэдүүлэг аваагүй, зөрчлийг шийдвэрлэхэд ач холбогдолтой асуудлыг тодруулахаар сургуулийн удирдлага, эрх бүхий албан тушаалтнуудаас гэрчийн мэдүүлэг аваагүй байх ба зөрчил шалган шийдвэрлэх ажиллагааны явцад гаргасан холбогдогчийн хүсэлтийн дагуу нотлох баримт цуглуулаагүй, нөхцөл байдлыг тогтоогоогүй, өөрөөр хэлбэл анги засварыг эцэг эхийн тусламжтайгаар хийх талаар сургуулиас эцэг эхийн зөвлөлийн нэгдсэн хуралдаанаар хэлэлцсэн буюу сургуулийн шийдвэр байсан талаар тодруулахаар холбогдогчоос хүсэлт гаргасан байхад энэхүү нөхцөл байдлыг тодруулаагүй, нотлох баримт цуглуулаагүй байна.

Хариуцагч нь маргаан бүхий Шийтгэлийн хуудас-даа холбогдогчийн гаргасан зөрчлийг Зөрчлийн тухай хуулийн 9.1 дүгээр зүйлийн 1-д заасан хуульд заагаагүй төлбөр хураамж авсан гэж тодорхойлсон.

Гэвч зөрчлийг хянан шийдвэрлэх ажиллагааны явцад хариуцагчийн зүгээс хэргийн материалд цуглуулсан өмнө 2 дахь хэсэгт шүүхээс дүгнэсэн нотлох баримтуудаар холбогдогч С.Б******* нь өөрийн санаачилгаар, өөрийн эзэмшиж буй банкны харилцах дансандаа анги засварын мөнгө цуглуулж авсан гэх үйл баримт, шийтгэл оногдуулах үндэслэл, нөхцөл байдал тогтоогдоогүй байхад хуульд заагаагүй төлбөр хураамж авсан зөрчил үйлдсэн нь үзэн С.Б*******т шийтгэл оногдуулсан нь хууль бус болжээ.

Түүнчлэн хуульд заагаагүй төлбөр хураамж авсан зөрчил үйлдсэн гэж шийтгэл оногдуулсан буюу зөвхөн Зөрчлийн тухай хуулийн 9.1 дүгээр зүйлийн 1-д заасан хуульд заагаагүй төлбөр хураамж авсан зөрчлийг үйлдсэн гэж маргаан бүхий шийтгэлийн хуудсыг үйлдсэн атлаа шүүхийн хэлэлцүүлэгт гаргасан тайлбартаа ангийн засвар нь сургалтын байгууллагад тавигдах шаардлагыг хангаагүй, монгол улсын стандартад нийцээгүй, анги засварын мөнгийг хураалгаагүй үлдсэн 5 хүүхдээс 2023- 2024 оны хичээлийн жилийн эхэнд 100.0 мянган төгрөгийг дахин шаардаж ангийн суралцагчдын хавтгайруулан албадлагын шинжтэйгээр хураах гэсэн үйлдэл нь багшийн мэргэжлийн ёс зүйн дүрэм 4.2.4 д заасан ажил үүргээ гүйцэтгэсний төлөө төлбөр, хураамж, хандив, өгөхийг шаардах гэж заасныг зөрчсөн гэх маргаан бүхий актад хамааралгүй үндэслэлээр татгалзлаа тайлбарлаж байгааг хүлээн авах үндэслэлгүй, эрх бүхий албан тушаалтны зөрчил шалган шийдвэрлэх ажиллагаанд гаргасан алдааг шүүхээс зөвтгөх үндэслэл тогтоогдохгүй байгааг дурдах нь зүйтэй.

Гомдол гаргагч С.Б*******ын Зөрчлийн тухай хуулийн 9.1 дүгээр зүйлийн 1-д заасан хуульд заагаагүй төлбөр хураамж авсан зөрчил үйлдсэн нь тогтоогдохгүй байх тул, Нийслэлийн боловсролын газрын Боловсрол, шинжлэх ухааны хяналтын улсын байцаагч Б.Б*******ын гаргасан 2023 оны 10 дугаар сарын 26-ны өдрийн Зөрчилд шийтгэл оногдуулах тухай №******* дугаар Шийтгэлийн хуудас-ыг хүчингүй болгож, гомдлын шаардлагыг хангаж шийдвэрлэх үндэслэлтэй гэж үзлээ.  

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.2, 106.3.1, 106.3.12 дахь зүйлүүдэд заасныг удирдлага болгон

ТОГТООХ нь:

1. Зөрчил шалган шийдвэрлэх тухай хуулийн 4.14 дүгээр зүйлийн 2, 4.15 дугаар зүйлийн 1 дэх хэсэгт заасныг баримтлан гомдол гаргагч С.Б*******ын гомдлын шаардлагыг бүхэлд нь хангаж, Нийслэлийн боловсролын газрын Боловсрол, шинжлэх ухааны хяналтын улсын байцаагч Б.Б*******ын гаргасан Зөрчилд шийтгэл оногдуулах тухай 2023 оны 10 дугаар сарын 26-ны өдрийн Зөрчилд шийтгэл оногдуулах тухай №******* дугаар Шийтгэлийн хуудас-ыг хүчингүй болгосугай.

2. Захиргааны хэрэг шүүхэд хянан шийдвэрлэх тухай хуулийн 47 дугаар зүйлийн 47.1 дэх хэсэгт заасныг баримтлан гомдол гаргагчаас улсын тэмдэгтийн хураамжид урьдчилан төлсөн 70200 төгрөгийг төсвийн орлогод хэвээр үлдээж, хариуцагчаас 70200 төгрөгийг гаргуулж гомдол гаргагч С.Б*******т олгосугай.

3. Захиргааны хэрэг шүүхэд хянан шийдвэрлэх тухай хуулийн 113 дугаар зүйлийн 113.2-т зааснаар гомдол гаргагч, хариуцагч, тэдгээрийн төлөөлөгч, өмгөөлөгч нь шүүхийн шийдвэрийг гардан авснаас хойш таван хоногийн дотор давж заалдах журмаар гомдол гаргах эрхтэйг дурдсугай.

 

 

 

ДАРГАЛАГЧ, ШҮҮГЧ С.ОТГОНТУЯА