Багануур дүүргийн Эрүүгийн хэргийн анхан шатны шүүхийн шүүх хуралдааныг шүүгч А.Бямбажав даргалж, Нийслэлийн Багануур дүүргийн прокурорын газраас Эрүүгийн хуулийн тусгай ангийн 11.7 дугаар зүйлийн 1 дэх хэсгийн 1.1 дэх заалт, 11.7 дугаар зүйлийн 2 дахь хэсгийн 2.1 дэх заалтад тус тус зааснаар М.У-т холбогдуулан яллах дүгнэлт үйлдэж ирүүлсэн 201701070030 дугаартай эрүүгийн хэргийг 2017 оны 9 дүгээр сарын 27-ны өдөр хүлээн авч хянан хэлэлцэв.

           Шүүх хуралдаанд:

           Нарийн бичгийн дарга:                                      Ц.Баясай

           Улсын яллагч:                                                    Д.Дашцэрмаа

           Хохирогч, насанд хүрээгүй хохирогч

           Н.Б-н хууль ёсны төлөөлөгч                 Н.Н-

            Хүүхэд гэр бүл залуучуудын

           хөгжлийн төвийн сэтгэл зүйч                            М.Урангоо

           Шүүгдэгчийн өмгөөлөгч:                                    Д.Цэнд-Аюуш                     

           Шүүгдэгч:                                                            М.У- нар оролцов.    

 

Шүүгдэгч: Монгол улсын иргэн, 19.. оны 4 дүгээр сарын 25-ны өдөр Багануур дүүрэгт төрсөн, эрэгтэй, .. настай, бүрэн дунд боловсролтой, мэргэжилгүй, эрхэлсэн тодорхой ажилгүй, ам бүл .., эхнэр Н.Н-, .... насны .. хүүхдийн хамт Багануур дүүргийн .. дугаар хороо, .. дугаар байрны .. тоот орон сууцанд оршин суух, /Багануур дүүргийн .. дүгээр хороо, .. дугаар байрны .. тоот/ гэсэн иргэний үнэмлэхийн хаягтай, хэрэг хариуцах чадвартай, Б- овгийн М-ы У- /РД:УГ/.

Яллах дүгнэлтэнд дурдсанаар:

Шүүгдэгч М.У- нь хамтран амьдрагч Н.Н-г 2016 оноос эхлэн байнга зодож, бие махбодийн болон сэтгэл санааны хүчирхийлэл үйлдэж, 2017 оны 02 дугаар сарын 01-ний өдөр Багануур дүүргийн 3 дугаар хороо, 32 дугаар байрны 7 тоотод “утсаа салгаад алга болсон” гэх шалтгаанаар гараараа болон сандал, гутал зэрэг эд зүйлээр толгойн тус газар нь цохиж зодсон,

 2017 оны 02 дугаар сарын 08-ны үед Багануур дүүргийн 3 дугаар хороо, 32 дугаар байрны 7 тоотод “ажил төрөлтэй болоод цалин мөнгө аваад намайг тоохгүй байна” гэх шалтгаанаар толгой руу нь 2-3 удаа гараараа цохиж зодсон,

2017 оны 02 дугаар сарын 15-ны өдөр Багануур дүүргийн 3 дугаар хороо, 32 дугаар байрны 7 тоотод “намайг байнга харддаг, араас байнга утсаар залгадаг” гэх шалтгаанаар хуванцар сандлаар толгой руу нь хэд хэдэн удаа цохиж, эхний сандал эвдэрсний дараа дараагийн сандлаар дахин цохиж, зодон Н.Н-гийн биед хөнгөн гэмтэл санаатай учруулсан,

2017 оны 5 дугаар сарын 12-ны өдөр Багануур дүүргийн 1 дүгээр хорооны нутаг дэвсгэрт үйл ажиллагаа явуулдаг Тээвэр зохицуулалтын албаны диспечерийн өрөөнд /ажлын байран дээр нь/ Н.Н-тай маргалдаж гэр бүлийн хүчирхийлэл үйлдэн маргалдах явцдаа тус өрөөнд байрлах сандал, телефон утасны аппаратыг эвдэж гэмтээх байдлаар сэтгэл санааны шаналал үүсгэн хүчирхийлэл үйлдсэн,

Мөн дагавар хүү 9 нас 7 сартай Н.Б-г Багануур дүүргийн 3 дугаар хороо, 32 дугаар байрны 7 тоотод “өөрт нь таалагдах үйлдэл хийсэнгүй, үгэнд орсонгүй, дүү  нараа харсангүй, өмд хувцасаа угаасангүй” гэх шалтгаанаар байнга загнаж, 2017 оны 2 дугаар сарын 1-ний өдөр Н.Б-г “ээжийг битгий зодооч” гэж уйлахад нь арагш нь түлхэж унагаан зүүн хацрыг нь алгадаж, догшин авирлаж бие махбодийн болон сэтгэл санааны хүчирхийлэл үйлдсэн,

2017 оын 2 дугаар сарын 4-ний өдөр “оймсоо угаасангүй” гэх шалтгаанаар тэлээгээр 3-4 удаа ороолгож зодсон,

2017 оны 2 дугаар сарын 10-ны үед орой 18 цагийн үед комьпютер тоглолоо гэх шалтгаанаар нуруу руу нь 2-3 удаа цохиж зодсон гэмт хэрэгүүдэд холбогджээ.

 

ТОДОРХОЙЛОХ нь:

           Шүүхийн хэлэлцүүлэгт дараах нотлох баримтуудыг шинжлэн судлав. Үүнд:

           Шүүгдэгч М.У-ын мөрдөн байцаалтын шатанд болон шүүхийн хэлэлцүүлэгт өгсөн: “...2016 оны 07 дугаар сард намайг үсчин орчихоод ирсэн чинь үсчинтэй хардаад байхаар нь түлхэж унагаан ганц нэг удаа алгадсан. Мөн тус ондоо зун согтуу гэртээ орж агсам тавьсан. Тэгэхэд миний араас утасдаад харааж зүхээд хардаад байдаг байсан. Тэгэхээр нь би ганц нэг алгадаж цохисон. 2017 оны 02 дугаар сарын 15-ны орой Н-г хэвтэж байхаар нь хөлөөрөө түлхэчихсэн чинь Н- “чи банзалдаж явсан хүүхэн рүүгээ яваач” гэж хэлээд түүнээс болж хэрүүл үүсээд гэрт байсан улаан өнгөтэй хуванцар сандлаар тохой, гар хэсэг рүү нь цохисон. Тэгээд эхний сандлаар цохиод эвдрэхээр нь дараагийн сандлаар цохиж эвдэлсэн...”, “...Манай эхнэр Н- нь өөрөө намайг хардаад байдаг болохоор нь би зодсон. Би яг хэзээ яаж зодсоныг сайн санахгүй байна... Би Б-г нээх зодоод байдаг юм байхгүй. Б- нь өөрөө гэр орондоо ирэхгүй гадуур тэнээд байдаг. Би хувцасаа угаасангүй, жорлонгийн гадуур бие заслаа гэж ганц нэг удаа гар хүрч байсан. Би айхтар гар хүрсэн зүйл байхгүй. Надад тэгтлээ их дарамтлуулаад байсан бол эмээ, өвөөгийнх рүүгээ яваад өгөх л байсан байх... Надад зодох эрх бол байхгүй. Гэхдээ Н- намайг өөрөө хардаад хэрүүл хийгээд байдгаас л би зоддог...”, “...2017 оны 2 дугаар сарын 1-ний орой намайг Н-тай маргалдаж байхад Б- дүү Бэрцэцэгийг өргөж явж байгаад газар дэвсчихсэн байсан матрас руу шидчихсэн. Түүнээс болоод би чи хүүхэд шидчихлээ гээд 2-3 удаа алгадсан. Дараа нь 2017 оны 2 дугаар сарын 4-ны өдөр гэртээ байж байгаад Б-г оймс энэ тэрээ угаа гэж хэлсэн чинь үгэнд орохгүй байхаар нь 3-4 удаа тэлээгээр ороолгож байсан. Дараа нь 2017 оны 2 дугаар сарын 10-ны өдөр гэртээ байж байгаад компьютер тоглоод байгаад байхаар нь би босч хичээл номоо хий гэж хэлсэн чинь босч ирээд гараа атгаад, шүдээ зуугаад байхаар нь чи намайг зодох нь уу? зод чи үг хэлүүлэхгүй хаашаа явдаг юм чи гэж 2-3 удаа нуруун дээр нь алгадаж байсан. Н- Б-д үг хэлээд байдаггүй, зөөлөн хандаад байдаг. Түүнээс болоод Б- үгэнд орохоо больчихоод байгаа юм. Би бас буруу хүмүүжилтэй хүн болчихвий гэж бодоод хэдэн үг хэлдэг юм ...Би 2015 оны 05 дугаар сарын 12-ны өдөр гэртээ 2 бага хүүхдээ хараад сууж байхад эхнэр “чи эмэгтэй хүнтэй мессэж бичдэг, уулзаж учирдаг” гээд элдвээр хэлээд утсаар загнаад байсан. Би тэр үед хөргөгчинд байсан нэг лааз пивыг уусан байсан. Тэгээд би эхнэрийн ажил дээр очоод “чи намайг гэртээ хүүхдээ хараад байж байхад, ингэлээ” гээд утсыг нь шидсэн. Бас өмнө нь Б-г хаана байгаа юм гэж эхнэрээс асуухад надад “байхгүй, задгай явчихсан” гэж хэлсэн байсан чинь ажил дээр нь очиход хоёулаа байж байсан. Тэгэхээр нь “задгай явчихсан хүүхэд чинь энд байдаг юм уу” гэсэн чинь “одоо би явуулах гэж байна гээд, бас чи тэрэнтэйгээ мессэж бичилцсэн” гээд над руу уурлаад маргалдаж эхэлсэн... Намайг явах гэсэн чинь хаалгаа түлхүүрээр дотроос нь цоожилчихоод онгойлгохгүй байсан. Тэгэхээр нь би явмаар байна гэж хэлээд утсыг нь шидээд, би түлхүүрийг нь булааж аваад онгойлгож гараад оройдоо хот руу явсан. Би Б-г нэг их зодсон зүйл байхгүй, хамт амьдарч байгаа болохоор хэлэх л ёстой байх, үг хэлээд ойлгохгүй болохоор нь ганц нэг удаа цохисон асуудал байгаа. Б- нэг их хөдөлгөөнтэй хүүхэд биш, өглөөнөөс орой хүртэл утас шагайж, зурагт үзээд байдаг, гэртээ зүгээр л юу ч хийхгүй, тоохгүй суугаад байдаг. Цаашдаа том хүн болох болохоор тэр хүүхдийг ажил хөдөлмөр хийлгэж сургах хэрэгтэй байх. Түүнээс биш хүн амьтан алчих гээд дарамтлаад байсан зүйл байхгүй. Би гэм буруугаа ойлгож байна, миний буруу...” гэсэн мэдүүлэг /хх-ийн 52-53, 55, 229-230 дугаар хуудас, шүүх хуралдааны тэмдэглэлээс/,

            Хохирогч Н.Н-гийн мөрдөн байцаалтын шатанд болон шүүхийн хэлэлцүүлэгт өгсөн: “...Би Б.У-тай танилцаад 5 жил, хамран амьдраад 2 жил болж байна. Манай хоёр бага хүүхэд маань нэг нь 2 настай, нөгөө нь 11 сартай хүүхэд байгаа. М.У- намайг жил гарны өмнөөс зоддог болсон. Ер нь архи ууж ирэхээрээ агсам согтуу тавьж намайг зоддог. Манай бага охин гэдсэнд байхад согтуудаа ирж агсам тавиад гараараа нуруу, бие хаа руу маань цохиж зоддог байсан. 2017 оны 02 дугаар сарын 01-ний өдөр намайг эрүүл байхдаа дөнгөж ажилд ороод удаагүй байхад утсаа салгаад албаар алга боллоо гэж хэлээд гараараа цохиж зодоод мөн сандал, гутал зэрэг эд зүйлээр голдуу толгой руу цохиж зоддог байсан. 2017 оны 02 дугаар сарын 15-ны өдөр унтах гээд хэвтэж байсан чинь дугуй, өндөр хувцанцар сандал аваад намайг цохисон би гараараа хаасан. Тэгээд миний толгой, нуруу руу маань хэд хэдэн удаа цохисон. Тухайн үед сандал нь хагарсан чинь дараагийн сандлаар харж бай чи гээд дахиад зодсон. Тэгээд хоёр сандал эвдэлсэн. Гар хөлөөрөө миний бие рүү цохиод алгадаад эрүү рүү хөл нүцгэн намайг өшиглөсөн. Тухайн үед манай нөхөр эрүүл байсан. Миний гэртээ өмсдөг байсан хатуу ултай углаашийг аваад миний эрүү рүү цохиж байсан. 2017 оны 02 дугаар сарын 01-нээс 02 дугаар сарын 15-ны өдрийн хооронд намайг зодсон, би яг цаг хугацааг нь сайн санахгүй байна. Надтай маргалдаад намайг зодсон...”, “...У- нь Б-г 2017 оны 2 дугаар сарын 1-нээс хойш 3 удаа зодож байсан. 2017 оны 2 дугаар сарын 4-ны өдөр намайг ажилтай байх хооронд Б-г оймсоо угаагаагүй байна гэж хэлээд тэлээгээр 3-4 удаа ороолгосон байсан. Ингэж ороолгож зодсон талаар Б- надад хэлээгүй, У- надад өөрөө хэлсэн. Түүний өмнө 2017 оны 2 дугаар сарын 1-ний өдөр У- бид хоёрыг муудалцахад Б- бага дүү Номинчулууныг өргөж явж байгаад газар байсан матрасанд тээглээд дүүтэйгээ газар унаад өгсөн. Тэгсэн У- чи хүүхэд унагчихлаа гэж хэлээд хацар руу нь нэг алгадаад түлхэж унагаж байсан. Тэгээд Б-г хүүхэд алах гээд байна уу гэх мэтчилэнгээр загнаад байсан. Мөн 2017 оны 2 дугаар сарын 10-ны үед гэртээ орой 18 цагийн үед байцгааж байхад Б- компьютер тоглоод сууж байсан чинь У- хичээлээ хий наадахаа боль гэж хэлсэн чинь Б- уурлаад босч ирээд сандал өшиглөчихсөн чинь У- чи юундаа уурлаад байгаа юм, хичээл номоо хийхгүй компьютер тоглолоо гээд нуруу руу нь 2-3 удаа цохиод авсан. Тэрнээс хойш зодож цохиж байсан асуудал байхгүй. ...2017 оны 02 сарын 15-ны орой У-тай хоёулаа задгай руу явж аавынхаас хүүхдээ авах гээд машинтай нь явж байхад машинд нь улаан өнгийн будаг гэмээр зүйл болсон хоёр ширхэг нэг удаагийн аяга байхаар нь би гэртээ ирснийхээ дараа У-т хандаж “чи валентины баярыг хотод тэмдэглээ юу” гэтэл У- уурлаад намайг гэрт ширээний хажууд байсан сандлаар хэд хэдэн цохиод хагарахаар нь ахиад нэг сандлаар цохьсон. Тэрний өмнө буюу 2017 оны 02 сарын 01-ний өдөр нийгмийн даатгалын дэвтэр, эрүүл мэндийн даатгалын дэвтрээ бөглүүлэх гээд нийгмийн даатгалын хэлтэс дээр очтол хүн ихтэй байсан, тэгээд хүлээгээд зогсож байтал утас цэнэггүй болоод унтарчихсан, тэгээд тэнд 30-40 минут болоод иртэл У- “чи албаар утсаа унтрааж алга боллоо” гэснээс болж бид хоёр маргалдсан, тэгээд хоёулаа маргалдаж байхад У- миний толгой руу хэд хэдэн удаа цохиод авсан. Дараа нь бас намайг ажил дээрээ байж байхад Ууганаа миний утсаар facebook орж байсан юм шиг байгаа юм. Тэгээд би утсаа үзээд байж байтал Ууганаад мессэж ирж байх шиг байсан. Би тэрийг нь уншаагүй орхичихсон юм. Тэгээд нэлээд байж байгаад мессэжээ устгачихсан байсан. Тэгэхээр нь би “чамд тийм хүнээс мессэж ирсэн байсан, яахаараа чи устгадаг юм гээд маргалдсан, тэгсэн Ууганаа ажил дээр ирээд бид хоёр нэлээд маргалдсан, тэгээд манай ажлын хаалга нэг хаагдахаараа онгойдоггүй, түлхүүр хийж байж онгойдог юм. Хоёр хүүхдээ цоожилчихсон гэхээр нь би “чи гэртээ хариад байж бай” гэсэн чинь утас авч шидээд, актлах гэж байсан сандлыг шидээд эвдэлчихсэн. 2017 оны 02 сарын 08-нд бас хоёулаа хардалтаас болж маргалдаад намайг хэд хэдэн удаа цохиж алгадсан...” гэсэн мэдүүлэг /хх-ийн 34-35, 83-84, 231-232 дугаар хуудас, шүүх хуралдааны тэмдэглэлээс/,

Насанд хүрээгүй хохирогч Н.Б-н мөрдөн байцаалтын шатанд өгсөн: “...У- ах ээжийг хааяа зоддог. Зодохдоо гараараа зоддог. Намайг унтаж байхад ээжтэй хэрэлдээд байсан. Тэгж хэрэлдэхдээ ээжийг У- ах сандлаар цохиж байсан. Ээжийг маань У- ах зоддог байсан. Би ерөөсөө хүнд ээжийг зоддог талаар хэлдэггүй байсан. ...2017 оны өвөл 2 дугаар сард У- ах намайг хувцсаа угаагаагүй байна гээд тэлээгээр 4 удаа гуянд ороолгож байсан. Тухайн үед манай ээж байгаагүй би хоёр дүүтэйгээ байсан. Бас энэ өвөл 1 сард гараараа миний нуруунд цохисон, юунаас болж цохиж зодсоныг би сайн санахгүй байна. Миний нуруу болон хүзүү хэсэгт цохисон. Тухайн үед тэгж цохиж зодоход манай ээж байсан. Бас намайг загнадаг. Гэхдээ би одоо юу гэж хэлж загнаад байсныг санахгүй байна. Ер нь намайг хичээлээ хийсэнгүй, гэрээ цэвэрлэсэнгүй, дүүгээ авсангүй гэж загнадаг. ...Би У- ахтай хамт байхаас заримдаа айдаг. Би У- ахаас айгаад гэр рүүгээ орж чадахгүй гадаа удаан зогсож байсан. У- ах гадуур явж байгаад архи уугаад ирдэг…” гэсэн мэдүүлэг, /хх-ийн 37 дугаар хуудас/

Гэрч Н.Нандин-Эрдэний мөрдөн байцаалтын шатанд өгсөн “...Н- эгчийг 7 сартай жирэмсэн байхад М.У- хэрэлдээд наад хүүхдийг чинь шахаад гаргаад авчихна гэх зэргээр янз бүрээр хэлж хэрэлддэг байсан. Тухайн жилдээ нилээн хэдэн удаа хэрэлдсэн. ...2016 оны намар манай аав хөдөө ажлаар яваад ээж бид хоёр Н- эгчийнд очиход У- ах Н- эгч хоёр гаднаас орж ирээд муудалцсан. Тухайн үед У- нь архи согтууруулах ундааны зүйл хэрэглээгүй байсан. Тэгэхэд Н- эгчийн хоолойг боож хананд шахаж байсан. Бас толгой руу нь гараараа цохиод жийж унагааж байсан. Тэгэхээр нь би цагдаад дуудлага өгч байсан. 2016 оны 03 дугаар сарын 24-ний үед Н- эгч төрөөд эмнэлэгт хэвтэж байхад нь би гэрт нь охиныг нь хараад байж байхад шөнө 4 цагийн үед У- архи уучихсан орж ирсэн. Тэгэхээр нь би өглөө 8 цагийн үед эмнэлэг рүү хоол цай хүргээд өгчих гэж хэлсэн чинь над руу варианы шил аваад шидэж байсан...” гэсэн мэдүүлэг /хх-ийн 38 дугаар хуудас/

Гэрч Г.Цэнгэлийн мөрдөн байцаалтын шатанд өгсөн “...Би Б-г зоддог гэдгийг ерөөсөө мэдэхгүй байна. Н.Н-тай хэрэлдэж зодолдсон гэж би цагдаа дээр дуудагдаж шөнө ирж авсан. М.У- нь огцом ууртай, хөнгөн зантай хүүхэд байгаа юм...” гэсэн мэдүүлэг /хх-ийн 39 дүгээр хуудас/

Гэрч Ч.Энхмандахын мөрдөн байцаалтын шатанд өгсөн “...2017 оны 02 дугаар сарын 15-ны өдөр би эргүүлийн үүрэг гүйцэтгэж байсан. Энэ хугацаанд жижүүрийн бүрэлдэхүүнээс Багануур дүүргийн 3 дугаар хороо, 32 дугаар байрны 7 тоотод согтуу хүн агсам тавиад байна гэсэн дуудлага ирэхээр нь би ахлах ахлагч Доржсүрэнгийн хамт очсон. Тэгэхэд эхнэр нь гурван хүүхэдтэйгээ уйлсан байдалтай, нөхөр нь гэрийнхээ хаалгыг онгойлгож өгч байсан. Харин эхнэр нь манай нөхөр дандаа намайг зодож дарамталдаг гэж хэлсэн. …Эхнэр нь “намайг байнга зодож дарамталдаг гэж хэлсэн тэрийг нь би камерын бичлэгээр бичиж баталгаажуулсан. Тэгэхэд эхнэрийнх нь дух хавдчихсан байсан. Тухайн үед нөхөр нь эхнэр хүүгээ дайрч давшилсан байдалтай байсан. Нөхөр нь согтууруулах ундааны зүйл хэрэглээгүй эрүүл байсан...” гэсэн мэдүүлэг /хх-ийн 41 дүгээр хуудас/

Шүүх эмнэлгийн шинжээч эмч Ө.Шаарийбуугийн 2017оны 02 дугаар сарын 17-ны өдрийн 09шэ/060 дугаартай “...Н.Н-гийн биед тархины доргилт, зүүн гарын шуунд шарх, духны баруун хэсэгт зөөлөн эдийн гэмтэл, эрүү, зүүн гарын бугалга, зүүн ташаа баруун гуянд цус хуралт гэмтэл тогтоогдлоо. Тухайн гэмтэл шинэ гэмтэл. Уг гэмтэл нь хатуу мохоо зүйлийн нэг буюу түүнээс дээш удаагийн хүчин зүйлийн үйлчлэлээр үүсгэгдсэн байх боломжтой. Дээрх гэмтэл нь гэмтлийн зэрэг тогтоох журмын 2.4.1-т зааснаар гэмтлийн хөнгөн зэрэгт хамаарна...” гэсэн дүгнэлт /хх-ийн 45 дугаар хуудас/

Иргэний нэхэмжлэгч Н.Мөнгөнцэцэгийн мөрдөн байцаалтын шатанд өгсөн “...2017 оны 5 дугаар сарын 12-ны өдөр би тээвэр зохицуулалтын кассны байранд байгаагүй. Тухайн өдөр би Улаанбаатар хотод ажлаар явж байсан. Улаанбаатар хотоос ирээд ажлын байрны кассны өрөөнд Н-гийн нөхөр ирээд утасны аппарат, сандал эвдэлснийг мэдсэн. У- нь манай байгууллагын хохирлыг барагдуулсан. Одоо манай байгууллагад гомдол санал, нэхэмжлэх зүйл байхгүй...” гэсэн мэдүүлэг /хх-ийн 199-200 дугаар хуудас/

Эд зүйлийн үнэлгээ “...нийт 40.000 төгрөгийн...” үнэлгээ /хх-ийн 203 дугаар хуудас/

Гэмт хэргийн талаарх гомдол, мэдээллийг хүлээн авсан тэмдэглэл, гэрэл зураг “...Багануур дүүргийн 3 дугаар хороо, 32 дугаар байрны 7 тоотод гэр бүлийн хүчирхийлэл үйлдэж нөхөр нь эхнэрээ байнга зоддог, одоо ч гэсэн зодоод байна...” гэсэн тэмдэглэл /хх-ийн 3, 22 дугаар хуудас/,

 

Эрсдлийн нөхцөл байдлын үнэлгээ “дунд”, аюулын зэргийн үнэлгээ “дунд”, хүүхдийн эрсдлийн нөхцөл байдлын үнэлгээ “бага” гэсэн дүгнэлт /хх-ийн 62-76, 171-186 дугаар хуудас/

Насанд хүрээгүй хохирогч Н.Б-н сэтгэлзүйн үнэлгээний дүгнэлт “түгшүүр дундаж хэмжээнд” гэсэн дүгнэлт /хх-ийн 208-210 дугаар хуудас/

Насанд хүрээгүй хохирогч Н.Б-н төрсний гэрчилгээ “…Н.Б- нь 2007 оны 7 дугаар сарын 16-ны өдөр Багануур дүүрэгт төрсөн…”, нас тоолсон “…Н.Б- нь 2017 оны 2 дугаар сарын 16-ны өдрийн байдлаар 9 нас 7 сартай ...” гэсэн баримт /хх-ийн 59-60 дугаар хуудас/

Урьд ял шийтгэгдсэн эсэхийг шалгах хуудсанд: “…М.У-ын ЦЕГ-ын МСТТ-ийн лавлагааны санд ял шийтгэл бүртгэгдээгүй болохыг тодорхойлсон…”  /хх-ийн 58 дугаар хуудас/ зэрэг нотлох баримтууд болно.

Шүүгдэгч М.У- нь хамтран амьдрагч Н.Н-г 2017 оны 02 дугаар сарын 01-ний өдөр Багануур дүүргийн 3 дугаар хороо, 32 дугаар байрны 7 тоот орон сууцанд “утсаа салгаад алга болсон” гэх шалтгаанаар гараараа болон сандал, гутал зэрэг эд зүйлээр толгойн тус газар нь цохиж зодсон,

 2017 оны 02 дугаар сарын 08-ны үед Багануур дүүргийн 3 дугаар хороо, 32 дугаар байрны 7 тоотод “ажил төрөлтэй болоод цалин мөнгө аваад намайг тоохгүй байна” гэх шалтгаанаар толгой руу нь 2-3 удаа гараараа цохиж зодсон,

2017 оны 5 дугаар сарын 12-ны өдөр Багануур дүүргийн 1 дүгээр хорооны нутаг дэвсгэрт үйл ажиллагаа явуулдаг Тээвэр зохицуулалтын албаны диспечерийн өрөөнд /ажлын байран дээр нь/ Н.Н-тай маргалдах явцдаа тус өрөөнд байрлах сандал, телефон утасны аппаратыг эвдэж гэмтээх байдлаар сэтгэл санааны шаналал үүсгэн хүчирхийлэл үйлдсэн,

2017 оны 02 дугаар сарын 15-ны өдөр Багануур дүүргийн 3 дугаар хороо, 32 дугаар байрны 7 тоот орон сууцанд “намайг байнга харддаг, араас байнга утсаар залгадаг” гэх шалтгаанаар хуванцар сандлаар толгой руу нь хэд хэдэн удаа цохиж, эхний сандал эвдэрсний дараа дараагийн сандлаар дахин цохиж, зодон Н.Н-гийн биед тархины доргилт, зүүн гарын шуунд шарх, духны баруун хэсэгт зөөлөн эдийн гэмтэл, эрүү, зүүн гарын бугалга, зүүн ташаа баруун гуянд цус хуралт гэмтэл учруулсан,

 Мөн дагавар хүү 9 нас 7 сартай Н.Б-г Багануур дүүргийн 3 дугаар хороо, 32 дугаар байрны 7 тоотод “өөрт нь таалагдах үйлдэл хийсэнгүй, үгэнд орсонгүй, дүү  нараа харсангүй, өмд хувцасаа угаасангүй” гэх шалтгаанаар байнга загнаж, 2017 оны 2 дугаар сарын 1-ний өдөр Н.Б-г “ээжийг битгий зодооч” гэж уйлахад нь арагш нь түлхэж унагаан зүүн хацрыг нь алгадаж зодсон,

2017 оын 2 дугаар сарын 4-ний өдөр “оймсоо угаасангүй” гэх шалтгаанаар тэлээгээр 3-4 удаа ороолгож зодсон,

2017 оны 2 дугаар сарын 10-ны үед орой 18 цагийн үед комьпютер тоглолоо гэх шалтгаанаар нуруу руу нь 2-3 удаа цохиж зодсон болох нь шүүгдэгч М.У-ын “...Миний бие хамтран амьдрагч Н.Н-, түүний хүү Н.Б- нарыг зодсон нь үнэн. Би гэм буруугаа хүлээн зөвшөөрч байна. Гараараа болон сандлаар цохиод эвдрэхээр нь дараагийн сандлаар цохиж зодсон...” гэсэн мэдүүлэг, хохирогч Н.Н-гийн “...Ер нь архи ууж ирэхээрээ агсам согтуу тавьж намайг зоддог. Манай бага охин гэдсэнд байхад согтуудаа ирж агсам тавиад гараараа нуруу, бие хаа руу маань цохиж зоддог байсан. 2017 оны 02 дугаар сарын 01-нээс 02 дугаар сарын 15-ны өдрийн хооронд намайг зодсон. 2017 оны 02 дугаар сарын 15-ны өдөр унтах гээд хэвтэж байсан чинь дугуй өндөр хувцанцар сандал аваад намайг цохисон мөн миний толгой, нуруу руу маань хэд хэдэн удаа цохиж зодож байсан...” гэсэн мэдүүлэг, насанд хүрээгүй хохирогч Н.Б-н “...2017 оны өвөл 2 дугаар сард У- ах намайг хувцасаа угаагаагүй байна гээд тэлээгээр 4 удаа гуянд ороолгож байсан. Бас энэ өвөл 1 сард гараараа миний нуруунд цохисон... намайг хичээлээ хийсэнгүй, гэрээ цэвэрлэсэнгүй, дүүгээ авсангүй гэж загнадаг. ...Би У- ахтай хамт байхаас заримдаа айдаг. Би У- ахаас айгаад гэр рүүгээ орж чадахгүй гадаа удаан зогсож байсан…” гэсэн мэдүүлэгүүд болон гэрч нарын мэдүүлгүүд, шинжээчийн дүгнэлт, эрсдлийн нөхцөл байдлын үнэлгээ “дунд”, аюулын зэргийн үнэлгээ “дунд” гэсэн дүгнэлт /хх-ийн 62-76 дугаар хуудас/ Н.Б-н сэтгэлзүйн үнэлгээний дүгнэлт “түгшүүр дундаж хэмжээнд” гэсэн дүгнэлт /хх-ийн 208-210 дугаар хуудас/ зэрэг хэрэгт авагдсан дээрх нотлох баримтуудаар хөдөлбөргүй тогтоогдож байна.

 Гэрч, хохирогч, шүүгдэгчийн мэдүүлгийг хуульд заасан журмын дагуу бэхжүүлж авсан мэдүүлгүүдийн агуулга зөрүүгүй, шинжээчийн дүгнэлтийг хэрэгт хувийн сонирхолгүй, зохих мэдлэг, дадлага, туршлагатай, гаргасан дүгнэлтийнхээ хариуцлагыг хүлээх чадвар бүхий шинжээч гаргасан байх ба уг дүгнэлтэд талууд маргаагүй байна. Бичгийн нотлох баримтууд нь хуульд нийцсэн, шүүгдэгч нь яллагдагчаар өгсөн мэдүүлэгтээ өөрийн гэм бурууг хүлээсэн нь хохирогч, насанд хүрээгүй хохирогчийн мэдүүлэг зэргээр батлагдаж байх тул дээрх дүгнэлт, мэдүүлгүүд нь хэрэгт хамааралтай, эргэлзээгүй, эх сурвалж нь тогтоогдсон, хэрэгт ач холбогдолтой, хууль ёсны, үнэн зөв баримтууд гэж үнэлэв.

Шүүгдэгч нь хохирогч нарын Монгол Улсын Үндсэн хуулийн 16 дугаар зүйлийн 13-т заасан “Хүний халдашгүй, чөлөөтэй байх эрх”-ийг бүдүүлгээр зөрчжээ.

            М.У- нь энэ дээрхи үйлдлүүдийг хүсч хийсэн байх бөгөөд гэм буруугийн шууд санаатай хэлбэрээр үйлдэж байсан болох нь шүүхийн хэлэлцүүлгээр нотлогдож байна. Энэ гэмт хэрэг гарах болсон шалтгаан нөхцлийг шүүгдэгчийн согтууруулах ундааны зүйл хэрэглэсэнтэй, болон гэр бүлийн үл ойлголцолтой холбоотой гэж үзлээ.

Шүүгдэгч нь согтууруулах ундаа хэрэглэсний улмаас гэр бүлдээ үүссэн асуудлуудаар маргах явцдаа хохирогч, болон насанд хүрээгүй хохирогчийг алгадах, цохих, гэх мэт арга хэлбэрээр зодсон түүнчлэн хүүхдүүдээ хэл амаар доромжлох, агсам тавих, том дуугарах зэргээр айлган сүрдүүлсэн үйлдлүүдийг тодорхой завсарлагатайгаар үргэлжилсэн цаг хугацаанд хийсэн нь хохирогч нарт бие махбодийн болон сэтгэл санааны зовиур, шаналгаа, өвдөлтүүдийг учруулсан буюу гэр бүлийн хамаарал бүхий хүнийг байнга зодсон энэ гэмт хэргийг хүүхдийн эсрэг үйлдсэн гэж үзэх үндэслэл, шинжийг бүрэн хангасан гэж үзнэ.

• прокуророос зүйлчилж ирүүлсэн хэргийн зүйлчлэл тохирсон гэж үзэж, М.У-ыг Эрүүгийн хуулийн тусгай ангийн 11.7 дугаар зүйлийн 1 дэх хэсгийн 1.1 дэх заалтад заасан гэр бүлийн хамаарал бүхий хүнийг байнга зодсон, 11.7 дугаар зүйлийн 2 дахь хэсгийн 2.1 дэх заалтад заасан гэр бүлийн хамаарал бүхий хүнийг байнга зодсон гэмт хэргийг хүүхдийн эсрэг үйлдсэн гэм буруутайд тус тус тооцох үндэслэлтэй байна.

Шүүгдэгчийн үйлдсэн Эрүүгийн хуулийн тусгай ангийн 11.7 дугаар зүйлийн 1 дэх хэсгийн 1.1 дэх заалт, 11.7 дугаар зүйлийн 2 дахь хэсгийн 2.1 дэх заалтад заасан гэмт хэрэг нь Эрүүгийн хуулийн ерөнхий ангийн 2.6 дугаар зүйлийн 2 дахь хэсэгт зааснаар хөнгөн гэмт хэргийн ангилалд хамаарагдаж байна.

Хохирогч Н.Н-гийн “...Миний бие Н.Б-н хууль ёсны төлөөлөгчөөр шүүх хуралдаанд оролцож байна. М.У-аас нэхэмжлэх зүйл байхгүй. Учир нь Н.Б-д гэмтэл гараагүй учраас нэхэмжлэх зүйл байхгүй…” гэж мэдүүлсэн иргэний нэхэмжлэгчийн “…нэхэмжлэх зүйлгүй…” гэсэн мэдүүлэг зэргээр шүүгдэгчийг хохирол төлбөргүй гэж үзнэ.

      Шүүгдэгч М.Ууганбаярт эрүүгийн хариуцлагыг хүндрүүлэх нөхцөл байдал тогтоогдоогүй болно.

Шүүгдэгч М.У- гэм буруугаа хүлээн зөвшөөрсөн, хохирогчтой эвлэрсэн нь шүүгдэгчийн “…хамтран амьдрагч Н.Н-, түүний хүү Н.Б- нарыг зодсон нь үнэн. Би гэм буруугаа хүлээн зөвшөөрч байна…” гэсэн мэдүүлэг, хохирогч Н.Н-гийн “…гомдол саналгүй, Бид одоо эвлэрч нэг гэртээ амьдарч байгаа…” гэсэн мэдүүлгүүд зэргээр тогтоогдож байна. 

Иймд Шүүгдэгч М.У- гэм буруугаа хүлээн зөвшөөрсөн, хохирогчтой эвлэрсэн, шүүгдэгчийн гэмт хэрэг үйлдсэн нөхцөл байдал, учруулсан хохирол, хор уршгийн шинж чанар, хувийн байдал зэрэг  хөнгөрүүлэх нөхцөл байдлыг харгалзан Эрүүгийн хуулийн  ерөнхий ангийн 6.7 дугаар зүйлийн 1 дэх хэсгийн 1.1 дэх заалтад “…энэ хуулийн тусгай ангид хорих ялын дээд хэмжээг гурван жил хүртэл, түүнээс бага хугацаагаар тогтоосон гэмт хэрэг үйлдсэн хүн тухайн гэмт хэргийн улмаас учруулсан хохирлоо нөхөн төлж, эсхүл гэмт хэргийн улмаас учруулсан хохирлоо нөхөн төлөхөө илэрхийлсэн бол ялаас чөлөөлөх…” гэж зааснаар оногдуулсан хорих ялаас чөлөөлж шийдвэрлэх нь зүйтэй гэж дүгнэв.

Хэрэгт эд мөрийн баримтаар хураагдаж ирсэн улаан өнгөтэй, тавцан хэсгээрээ хар өнгөтэй сууриараа хугарч эвдэрсэн 2 ширхэг сандалыг хуульд зааснаар тогтоол хүчин төгөлдөр болмогц устгах, 7 минут 30 секунтын бичлэг бүхий 1 ширхэг CD-г хэрэгт хавсаргавал зохино.

Шүүгдэгчид холбогдох иргэний бичиг баримт шүүхэд шилжиж ирээгүй, цагдан хоригдсон хоноггүй, эд хөрөнгө битүүмжлээгүй, энэ хэрэгт гарсан байцаан шийтгэх ажиллагааны зардал тодорхойлж ирүүлээгүй болно.

Эрүүгийн хэрэг хянан шийдвэрлэх тухай  хуулийн  36.2 дугаар зүйлийн 4, 36.6 дугаар зүйл, 36.7 дугаар зүйл, 36.8 дугаар зүйлд заасныг тус тус

удирдлага болгон ТОГТООХ нь:

1. Шүүгдэгч Б- овгийн М-ы У-ыг гэр бүлийн хамаарал бүхий харьцаатай хүнийг байнга зодсон гэмт хэрэг үйлдсэн гэм буруутайд, гэр бүлийн хамаарал бүхий хүнийг байнга зодсон гэмт хэргийг хүүхдийн эсрэг үйлдсэн гэмт хэрэг үйлдсэн гэм буруутайд тус тус тооцсугай.
2. Шүүгдэгч  Б- овгийн М-ы У-т Эрүүгийн хуулийн тусгай ангийн 11.7 дугаар  зүйлийн 1 дэх хэсгийн 1.1 дэх заалтад зааснаар зургаан /6/  сарын  хугацаагаар хорих ял, Эрүүгийн хуулийн тусгай ангийн 11.7 дугаар  зүйлийн 2 дахь хэсгийн 2.1 дэх заалтад зааснаар нэг /1/  жилийн хугацаагаар хорих ял тус тус шийтгэсүгэй.
3. Эрүүгийн хуулийн ерөнхий ангийн 6.8 дугаар  зүйлийн 1 дэх хэсэгт зааснаар М.Ууганбаярт оногдуулсан хорих ялуудыг нэмж нэгтгэн эдлэх ялыг нэг /1/ жил зургаан /6/ сарын хугацаагаар тогтоосугай.
4. Эрүүгийн хуулийн ерөнхий ангийн 5.6 дугаар зүйлийн 3 дахь хэсэгт зааснаар шүүгдэгч М.Ууганбаярт оногдуулсан нэг /1/ жил зургаан /6/ сарын хорих ялыг нээлттэй хорих ангид эдлүүлсүгэй.
5. Эрүүгийн хуулийн  ерөнхий ангийн 6.7 дугаар зүйлийн 1 дэх хэсгийн 1.1 дэх заалтад зааснаар шүүгдэгч М.Ууганбаярт оногдуулсан нэг /1/ жил зургаан /6/  сарын  хорих ялаас чөлөөлсүгэй.
6. Шүүгдэгч М.Ууганбаяр нь энэ гэмт хэргийн улмаас бусдад төлөх төлбөргүй, цагдан хоригдсон хоноггүй болохыг тус тус дурьдсугай.
7. Эрүүгийн хэрэх хянан шийдвэрлэх тухай хуулийн 21.5 дугаар зүйлийн 6 дахь хэсэгт зааснаар хэрэгт хураагдаж ирсэн 7 минут 30 секунтын бичлэг бүхий 1 ширхэг CD-г тогтоол хүчин төгөлдөр болмогц хэрэгт хавсаргах, эд мөрийн баримтаар хураагдсан улаан өнгөтэй, тавцан хэсгээрээ хар өнгөтэй сууриараа хугарч эвдэрсэн 2 ширхэг сандал зэргийг тогтоол хүчин төгөлдөр болмогц устгасугай.
8. Шүүгдэгч М.У-т холбогдох иргэний бичиг баримт шүүхэд шилжиж ирээгүй, эд хөрөнгө битүүмжлээгүй, энэ хэрэгт гарсан байцаан шийтгэх  ажиллагааны зардал тодорхойлж ирүүлээгүй болохыг тус тус дурдсугай.
9. М.У-т урьд авсан хувийн баталгаа гаргах таслан сэргийлэх арга хэмжээг шүүхийн шийдвэр хүчин төгөлдөр болтол хэвээр үргэлжлүүлсүгэй.
10. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шийдвэрийг уншиж сонсгосноор хүчинтэй болохыг дурьдсугай.
11. Эрүүгийн хэрэг хянан шийдвэрлэх тухай хуулийн 38.1 дүгээр зүйлийн 1 дэх хэсэг, 38.2 дугаар зүйлийн 1 дэх хэсэгт тус тус зааснаар прокурор, дээд шатны прокурор, шүүгдэгч, хохирогч, тэдгээрийн өмгөөлөгч, хууль ёсны төлөөлөгч нар шийтгэх тогтоолыг гардан авснаас эсхүл хүргүүлснээс хойш 14 хоногийн дотор давж заалдах гомдол, эсэргүүцлээ шийдвэр гаргасан анхан шатны шүүхэд бичгээр гаргах эрхтэй болохыг мэдэгдсүгэй.
12. Эрүүгийн хэрэг хянан шийдвэрлэх тухай хуулийн 37.1 дугаар зүйлийн 2 дахь хэсэгт зааснаар анхан шатны шүүхийн шийдвэрт гомдол эсэргүүцэл гаргасан тохиолдолд шүүхийн шийдвэрийн биелэлтийг түдгэлзүүлсүгэй.

ДАРГАЛАГЧ, ШҮҮГЧ                                    А.БЯМБАЖАВ