Багануур дүүргийн Эрүүгийн хэргийн анхан шатны шүүхийн шүүх хуралдааныг шүүгч Н.Нарантуяа даргалж, тус шүүхийн танхимд нээлттэй явуулж, Нийслэлийн Багануур дүүргийн прокурорын газраас Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар яллах дүгнэлт үйлдэж, хэргийг хялбаршуулсан журмаар хянан шийдвэрлүүлэхээр ирүүлсэн Н.А-, Б.Д- нарт холбогдох эрүүгийн 1704000690039 дугаартай хэргийг 2017 оны 11 дүгээр сарын 13-ны өдөр хүлээн авч хянан хэлэлцэв.

            Шүүх хуралдаанд:

 Нарийн бичгийн дарга                              Б.Одгэрэл

 Улсын яллагч                                              Х.Эрдэнэтуяа

 Шүүгдэгч                                                Н.А-, Б.Д- /   шүүгдэгч нар өөрөө өөрийгөө өмгөөлсөн/    нар оролцов.

 Шүүгдэгч: Монгол улсын иргэн, 1977 оны 1 дүгээр сарын 19-ний өдөр Т аймгийн Б суманд төрсөн, .. настай, эрэгтэй, бүрэн дунд боловсролтой, мэргэжилгүй, Багануур дүүргийн .. дугаар хороо, Хөдөө хэсэгт оршин суудаг, Төв аймгийн шүүхийн 1998 оны 5 дугаар сарын 11-ний өдрийн 84 дүгээр тогтоолоор Эрүүгийн хуулийн 239 дүгээр зүйлийн 2 дахь хэсэгт зааснаар 1 жил 6 сарын хорих ялаар шийтгүүлж байсан, Б- овогт Б-ийн Д- /РД: /                                                                                                                                                                                                                                    

Шүүгдэгч: Монгол улсын иргэн, 1977 оны 8 дугаар сарын 20-ны өдөр Хэнтий аймгийн Хэрлэнбаян-Улаан суманд төрсөн, эрэгтэй, 40 настай, бүрэн дунд боловсролтой, жолооч мэргэжилтэй, Багануур ХК-ийн үйлчилгээний хэсэгт жолооч ажилтай, Багануур дүүргийн 5 дугаар хороо, Нарийны 19 дүгээр гудамжны 5 тоотод оршин суух, ял шийтгэлгүй, Б- овогт Н-гийн А-

/РД:СЧ77082075/ гэв.       

          

Прокурорын яллах дүгнэлтэд дурдсанаар шүүгдэгч Б.Д- нь 2017 оны 8 дугаар сарын 18-ны шөнө 03 цагийн үед Багануур дүүргийн 3 дугаар хороонд үйл ажиллагаа явуулдаг Багануур зоогийн газрын караокены өрөөнд байхдаа М.С-ыг согтуурхаж эхнэрийнх нь хөхийг барьж, пиво асгаж, микрофоныг нь булааж авч дуулуулахгүй байсанд уурлаж улмаар түүнийг караокены бие засах өрөөнд Н.А-тэй бүлэглэн зодож эрүүл мэндэд нь хөнгөн хохирол санаатай учруулсан,

Шүүгдэгч Н.А- 2017 оны 8 дугаар сарын 18-ны шөнө 03 цагийн үед Багануур дүүргийн 3 дугаар хороонд үйл ажиллагаа явуулдаг Багануур зоогийн газрын караокены бие засах өрөөнд Б.Д-тэй бүлэглэж М.С-ыг зодож эрүүл мэндэд нь хөнгөн хохирол санаатай учруулсан гэмт хэрэгт холбогджээ.

ТОДОРХОЙЛОХ нь:

 

   Шүүх хуралдааны хэлэлцүүлэгт дараах баримтуудыг хэлэлцүүлэв. Үүнд:

Шүүгдэгч Б.Д- шүүхийн хэлэлцүүлэгт мэдүүлэхдээ:

Дүү А-, Э- нар Багануур зоогийн газрын караокед хүрээд ир гэж дуудсан. Тэгээд караокед сууж байтал А-ын таньдаг хоёр залуу өрөөнд орж ирээд микрофон булааж, пиво асгаж, манай эхнэрийн хөхнөөс базаж, чангаагаад байсан. Тэгээд тэр хоёр залуу гараад явсан. Удалгүй намайг бие засах өрөөнд байхад тэр хоёр залуу бие засах өрөөний хаалга өшиглөөд би бөөлжмөөр байна, хурдан гар гэхээр нь гараад иртэл яасан уддаг юм бэ? гээд надтай муудалцсан. Тэгээд хамт явсан Амараа гэж хүнтэй нийлээд тэр хоёр залууг зодсон. Минийх увьд хийсэн хэрэгтээ гэмшиж байна. Тиймээс хөнгөн шийтгэл оногдуулж өгнө үү.

Шүүгдэгч Н.А- шүүхийн хэлэлцүүлэгт мэдүүлэхдээ:

Бид нарыг дуулаад сууж байтал гаднаас хоёр залуу орж ирээд Д-гийн эхнэрийн цамцнаас чангаагаад дуулуулахгүй микрофон булааж аваад байсан. Тэгээд бие засах өрөөнд тэр хоёр залуутай тааралдахад Б.Д-г цохьсон учраас зодоон эхэлсэн. Миний хувьд тэр хоёр залууг ганц нэг удаа цохисон. Д- хамт зодолдсон. Миний  хувьд хийсэн хэрэгтээ гэмшиж байна. Мөн хохирогчийн хохирол төлбөрийг барагдуулж эвлэрсэн.

Хохирогч М.С-ын мөрдөн байцаалтын шатанд мэдүүлсэн “...М- бид хоёр бие засах өрөөнд байж байтал хоёр залуу орж ирээд өндөр нуруутай залуу нь “Чи Багануурт цээжээ чангалж, цээж хаяж явдаг хэн бэ?” гэхээр нь уучлаарай гэхэд дэргэд нь зогсож байсан намхан залуу нь гараараа миний нүүр рүү нэг удаа цохьсон. Тэгээд гараараа нүүрээ хаахад өндөр нуруутай залуу нь над руу дайрч миний нүүр рүү хэд хэдэн удаа цохиж байхад манай найз М- хөөе юу болж байна гэхэд тэр хоёр залуу чи муу хэн бэ? гээд М- руу дайрч нүүр үү нь цохиход М- нүүрээ дараад доошоо суусан, би М-ын дээрээс нь дарж хамгаалсан. Намайг Б.Д-, Н.А- нар зодсон. Миний хувьд хохирол төлбөрөө бүрэн авсан учраас одоо гомдол санал ,нэхэмжлэх зүйлгүй.....” гэсэн мэдүүлэг

Ял шийтгэлийн талаар: Б.Д- нь 2017 оны 09 дүгээр сарын 02-ны өдрийн ял шийтгэгдсэн эсэхийг шалгах хуудсаар ял шийтгэлгүй гэх  /1998 оны 5 дугаар сарын 11-ний өдрийн 84 дүгээр тогтоолоор Эрүүгийн хуулийн 239 дүгээр зүйлийн 2 дахь хэсэгт зааснаар 1 жил 6 сарын хорих ялаар шийтгүүлж байсан хх-ийн 49 дүгээр хуудас/

Н.А- нь 2017 оны 9 дүгээр сарын 9-ний өдрийн ял шийтгэгдсэн эсэхийг шалгах хуудсаар ял шийтгэлгүй гэх  /хх-ийн 52 дугаар хуудас/

2017 оны 8 дугаар сарын 19-ний өдрийн 09шэ/210/ дугаартай Шинжээчийн дүгнэлт /хх-ийн 23-р хуудас/

Хохирогч М.С-ын хохирлыг төлсөн хаан банкны баримт / хх-ийн 87 дугаар хуудас/

Шүүхээс хэргийн талаар тогтоосон байдал болон тэдгээрт өгсөн шүүхийн дүгнэлтийн талаар  

                Шүүгдэгч Б.Д-, Н.А- нар нь хүний эрүүл мэндэд хөнгөн хохирол санаатай учруулсан болох нь шүүгдэгч нарын хэргээ хүлээн мэдүүлсэн мэдүүлэг,

Хохирогч М.С-ын мөрдөн байцаалтын шатанд мэдүүлэхдээ “...М- бид хоёр бие засах өрөөнд байж байтал хоёр залуу орж ирээд өндөр нуруутай залуу нь “Чи Багануурт цээжээ чангалж, цээж хаяж явдаг хэн бэ?” гэхээр нь уучлаарай гэхэд дэргэд нь зогсож байсан намхан залуу нь гараараа миний нүүр рүү нэг удаа цохьсон. Тэгээд гараараа нүүрээ хаахад өндөр нуруутай залуу нь над руу дайрч миний нүүр рүү хэд хэдэн удаа цохиж байхад манай найз М- хөөе юу болж байна гэхэд тэр хоёр залуу чи муу хэн бэ? гээд М- руу дайрч нүүр үү нь цохиход М- нүүрээ дараад доошоо суусан, би М-ын дээрээс нь дарж хамгаалсан. Намайг Б.Д-, Н.А- нар зодсон. Миний хувьд хохирол төлбөрөө бүрэн авсан учраас одоо гомдол санал ,нэхэмжлэх зүйлгүй гэх мэдүүлэг зэргээр тогтоогдож байна.

Шүүхийн хэлэлцүүлгийн үед шинжлэн судлагдсан дээрх шүүгдэгч, хохирогч, нарын мэдүүлгүүд нь хуульд заасан үндэслэл, журмын дагуу цуглуулж, бэхжүүлэгдсэн нотлох баримтын шаардлага хангажээ.

      Прокуророос Б.Д-, Н.А- нарт холбогдуулан Эрүүгийн хуулийн 11.6 дугаар зүйлийн 2 дэх хэсэгт зааснаар яллах дүгнэлт үйлдэж, хүний эрүүл мэндэд хөнгөн хохирол санаатай учруулсан гэмт хэрэг үйлдсэн гэм буруугаа болон хүлээлгэх эрүүгийн хариуцлагыг хүлээн зөвшөөрсөн, хохирол төлбөргүй, хохирогчтой  эвлэрсэн гэж Эрүүгийн хэрэг хянан шийдвэрлэх тухай хуулийн 17.4 дүгээр зүйлд зааснаар хялбаршуулсан журмаар хэргийг хянан шийдвэрлүүлэхээр шүүхэд ирүүлснийг хүлээн авч шийдвэрлэх хуулийн үндэслэлтэй байна.

 

Иймд Б.Д-, Н.А- нар нь “хүний эрүүл мэндэд хөнгөн хохирол санаатай учруулсан” гэмт хэргийг үйлдсэн гэм буруутайд тооцож, прокурорын саналыг харгалзан Эрүүгийн хуулийн 11.6 дугаар зүйлийн 2 дэх хэсэгт зааснаар шүүгдэгч нарыг тус тус 500 нэгжээр торгох ялаар шийтгэх нь зүйтэй гэж шүүх дүгнэв.

Шүүгдэгч нарт холбогдох иргэний бичиг баримт шүүхэд шилжиж ирээгүй, эд хөрөнгө битүүмжлээгүй, шүүгдэгч нь энэ хэрэгтээ цагдан хоригдоогүй, энэ хэрэгт гарсан байцаан шийтгэх ажиллагааны зардлыг тодорхойлж ирүүлээгүй болно.

      Эрүүгийн хэрэг хянан шийдвэрлэх тухай хуулийн 17.5 дугаар 8; 9 дэх хэсгүүд,  36.2 дугаар зүйлийн 1,2,3,4 хэсгүүд, 36.6 дугаар зүйл, 36.7 дугаар зүйл, 36.8 дугаар зүйл, 36.10 дугаар зүйлд тус тус заасныг удирдлага болгон

ТОГТООХ нь:

1. Б- овогт Б-ийн Д-, Б- овогт Н-гийн А- нарыг Монгол Улсын Эрүүгийн хуулийн тусгай ангийн 11.6 дугаар зүйлийн 2 дэх хэсэгт заасан бүлэглэж хүний эрүүл мэндэд хөнгөн хохирол санаатай учруулсан гэмт хэрэг үйлдсэн гэм буруутайд тооцсугай.
2. Монгол Улсын Эрүүгийн хуулийн тусгай ангийн 11.6 дугаар зүйлийн 2 дэх хэсэгт зааснаар Б- овогт Б-ийн Д-г 500 /таван зуун/ нэгж буюу 500.000 /таван зуун мянган/ төгрөгөөр торгох, Монгол Улсын Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар Б- овогт Н-гийн А-г 500 /таван зуун/ нэгж буюу 500.000 /таван зуун мянган/ төгрөгөөр торгох шийтгэлийг тус тус оногдуулсугай.
3. Эрүүгийн хуулийн ерөнхий ангийн 5.3 дугаар зүйлийн 4 дэх хэсэгт зааснаар торгох ялыг 2018 оны 11 дүгээр сарын 16-ны дотор хэсэгчлэн биелүүлэхийг Б.Д-, Н.А- нарт мэдэгдсүгэй.
4. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар торгох ялыг тогтоосон хугацаанд биелүүлээгүй бол хорих ялаар солихыг Б.Д-, Н.А- нарт мэдэгдсүгэй.
5. Шүүгдэгч нарт холбогдох иргэний бичиг баримт шүүхэд шилжиж ирээгүй, цагдан хоригдсон хоноггүй, эд хөрөнгө битүүмжлэгдээгүй, эд мөрийн баримтаар хураагдсан зүйлгүй, бусдад төлөх төлбөргүй болохыг тус тус дурдсугай.
6. Шийтгэх тогтоол нь уншиж сонсгосноор хүчинтэй болохыг дурдсугай.
7. Шийтгэх тогтоол хүчин төгөлдөр болтол Б.Д-, Н.А- нарт урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.
8. Эрүүгийн хэрэг хянан шийдвэрлэх тухай хуулийн 38.1 дүгээр зүйлийн 1 дэх хэсэг, 38.2 дугаар зүйлийн 1 дэх хэсэгт тус тус зааснаар прокурор, дээд шатны прокурор, ялтан, хохирогч, тэдгээрийн өмгөөлөгч, хууль ёсны төлөөлөгч нар шийтгэх тогтоолыг гардан авснаас эсхүл хүргүүлснээс хойш 14 хоногийн дотор давж заалдах гомдол, эсэргүүцлээ шийдвэр гаргасан анхан шатны шүүхэд бичгээр гаргах эрхтэй.
9. Эрүүгийн хэрэг хянан шийдвэрлэх тухай хуулийн 37.1 дүгээр зүйлийн 2 дахь хэсэгт зааснаар давж заалдах гомдол гаргах, эсэргүүцэл бичсэн тохиолдолд тогтоолын биелэлтийг түдгэлзүүлж, ялтанд урьд авсан таслан сэргийлэх арга хэмжээг хэвээр үргэлжлүүлсүгэй.

                            

ДАРГАЛАГЧ ШҮҮГЧ:                                  Н.НАРАНТУЯА