2024      06           18                                        151/ШШ2024/00584                                         

 

Нэхэмжлэгч нэхэмжлэлээсээ татгалзсаныг

 баталж, хэргийг хэрэгсэхгүй болгох тухай

 

Төв аймаг дахь сум  дундын иргэний хэргийн анхан шатны шүүхийн Ерөнхий шүүгч Б.Түвшинжаргал би,

Нэхэмжлэгч: тоотод оршин суух Тангууд овогт Батдоржийн Бын  нэхэмжлэлтэй,

Нэхэмжлэлийн шаардлага: Хариуцагчийг эрэн сурвалжлуулах тухай нэхэмжлэлийг 2024 оны 05 дугаар сарын 29-ний өдөр хүлээн авч, 2024 оны 06 дугаар сарын 05-ны өдөр иргэний хэрэг үүсгэснээр хянаад

ТОДОРХОЙЛОХ нь:

1. Нэхэмжлэгч Б.Б нь шүүхэд гаргасан нэхэмжлэлдээ: “Миний бие 2023 оны 06 дугаар сарын 28-ны өдөр У.Бд 7.000.000 төгрөгийг 10 хувийн хүүтэй, 14 хоногийн хугацаатай, аман гэрээ байгуулж зээлдүүлсэн. Гэтэл У.Б нь өгөхгүй удаж байгаад 2023 оны 09 дүгээр сарын 27-ны өдөр 4.000.000 төгрөг өгсөн, үлдэгдэл 3.000.000 төгрөгийг одоо болтол өгөөгүй би мөнгө нэхэж залгахаар утсаа авдаггүй. Одоо утас нь холбогдохгүй, хаана байгаа нь мэдэгдэхгүй, хаана байгааг нь аав, ээж, ах, дүү нар нь хэлж өгөхгүй байгаа тул эрэн сурвалжилж өгнө үү” гэжээ.

2. Нэхэмжлэгч Б.Б нь шүүхэд гаргасан тайлбартаа: “Б.Б миний бие хариуцагчаар оролцвол зохих этгээд У.Бийг эрэн сурвалжлуулах тухай нэхэмжлэлийн шаардлагыг шүүхэд гаргасан. Хариуцагчаар оролцвол зохих этгээд У.Б нь тоотод оршин сууж байгаа нь тодорхой болсон тул нэхэмжлэлийн шаардлагаас татгалзаж байна. Иймд хэргийг хялбаршуулсан журмаар шийдвэрлэж өгнө үү” гэжээ.

ҮНДЭСЛЭХ нь:

1. Хэрэг хянан шийдвэрлэх ажиллагааны явцад нэхэмжлэгч Б.Б нь хуульд заасан эрхийнхээ дагуу нэхэмжлэлээсээ татгалзаж байгаа болох нь шүүхэд ирүүлсэн тайлбараар тогтоогдож байна.

2. Иргэний хэрэг шүүхэд хянан шийдвэрлэх тухай хуулийн 26 дугаар зүйлийн 26.2-т зааснаар “нэхэмжлэгч нь ...нэхэмжлэлийн шаардлагын хэмжээг ихэсгэх, багасгах, нэхэмжлэлээс татгалзах, эвлэрэх эрхтэй”, 26 дугаар зүйлийн 26.3-т “хариуцагч нь нэхэмжлэлийн шаардлагыг бүхэлд нь болон хэсэгчлэн хүлээн зөвшөөрөх, нэхэмжлэгч нь нэхэмжлэлийн шаардлагыг багасгах, өөрчлөх, зохигч талууд эвлэрэн хэлэлцэх эрхтэй” гэж заажээ.

3. Иймд Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2-д зааснаар нэхэмжлэгчийн татгалзлыг баталж, хэргийг хэрэгсэхгүй болгож шийдвэрлэх нь зүйтэй гэж шүүх дүгнэлээ.

4. Иргэний хэрэг шүүхэд хянан шийдвэрлэх тухай хуулийн 59 дүгээр зүйлийн 59.5, 74 дүгээр зүйлийн 74.5-д тус тус зааснаар нэхэмжлэгчээс улсын тэмдэгтийн хураамжид урьдчилан төлсөн 70,200 төгрөгийг улсын орлогод хэвээр үлдээж шийдвэрлэв.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1, 74.2, 75 дугаар зүйлд заасныг тус тус удирдлага болгон ЗАХИРАМЖЛАХ нь:

1. Б.Бын нэхэмжлэлтэй, хариуцагчийг эрэн сурвалжлуулах тухай иргэний хэрэгт нэхэмжлэгч нэхэмжлэлээсээ татгалзсаныг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 59 дүгээр зүйлийн 59.5, 74 дүгээр зүйлийн 74.5-д тус тус  зааснаар нэхэмжлэгчийн улсын тэмдэгтийн хураамжид урьдчилан төлсөн 70,200 төгрөгийг улсын орлогод хэвээр үлдээсүгэй.

3. Иргэний хэрэг шүүхэд хянан шийдвэрлэх тухай хуулийн 59 дүгээр зүйлийн 59.5, 74 дүгээр зүйлийн 74.4 дэх хэсэгт зааснаар хэргийг хялбаршуулсан журмаар хянан шийдвэрлэсэн тохиолдолд зохигч давж заалдах, хяналтын журмаар гомдол гаргах, тухайн асуудлаар анхан шатны шүүхэд дахин шийдвэрлүүлэхээр нэхэмжлэл гаргах эрхгүй болохыг дурдсугай.

 

 

              ЕРӨНХИЙ ШҮҮГЧ                                     Б.ТҮВШИНЖАРГАЛ