МОНГОЛ УЛСЫН НЭРИЙН ӨМНӨӨС

 

Чингэлтэй дүүргийн Иргэний хэргийн анхан шатны шүүхийн шүүгч О.Аззаяа даргалж, тус шүүхийн шүүх хуралдааны танхимд хийсэн иргэний хэргийн шүүх хуралдаанаар:

 

Хүсэлт гаргагч: Ч хаягт байрлах, ******* /РД:*******/-ийн хүсэлттэй,

Иргэний эрх зүйн маргаанд хариуцагчаар оролцвол зохих этгээд болох ******* овогт *******ийн ******* /РД:*******/-г эрэн сурвалжлуулах тухай иргэний хэргийг хянан хэлэлцэв.

 

Шүүх хуралдаанд: Шүүх хуралдааны нарийн бичгийн дарга Б.Бадамцэцэг оролцов. (Нэхэмжлэгчийн эзгүйд хэргийг хянан хэлэлцэв.)

 

Тодорхойлох нь:

 

1.Хүсэлт гаргагч ******* нь шүүхэд гаргасан хүсэлтдээ: Л.******* нь 2022 оны 08 дугаар сарын 11-ний өдөр TENTECH-2 үйлчилгээний №ТТ03388 тоот Хэрэглэгчийн гэрээ байгуулсан. Энэхүү гэрээгээр ******* нь интернет, телевиз болон камер харах багцалсан үйлчилгээг үзүүлэх, хэрэглэгч нь сар бүрийн 05-ны өдрөөс 20-ны өдрийн дотор 29,500 төгрөгийн төлбөрийг төлөх үүргийг хүлээсэн. Мөн гэрээний дагуу шинээр хэрэглэгчид LITE-5, ROUTER, VOO тоног төхөөрөмжийг хүлээлгэн өгч үйлчилгээг гэрээ байгуулснаас хойш зохих ёсоор хүргэж ирсэн. Гэрээний 4.4-ийн дагуу хариуцагч нь сар бүрийн 20-ны өдрийн дотор төлбөрийг төлж барагдуулах үүргийг хүлээсэн боловч 5 сарын хугацаанд 110,824 төгрөгийг өнөөдрийг хүртэл төлөхгүй хугацаа хэтрэлттэй компанийг хохироосоор байна. Мөн түүнчлэн гэрээний 2 дугаар зүйлийн 2.6.1-д төлбөр төлөөгүй 2 сар болсон бол тоног төхөөрөмжийн төлбөрийг үйлчилгээ үзүүлэгчид бүрэн төлөхөөр талууд харилцан тохиролцсон байдаг. Нэхэмжлэгчийн зүгээс гэрээний дагуу төлбөрийг төлж барагдуулахыг 137778 тусгай дугаараас мессеж илгээх мөн 7777-7778 лавлах утаснаас хэд хэдэн удаа утасдаж шаардсан боловч төлбөр барагдаагүй болно. Нэхэмжлэгч нь TENTECH-2 үйлчилгээний хэрэглэгчийн гэрээний дагуу төлөх үүрэгтэй 2022 оны 09, 10 сарын төлбөр болох 110,824 төгрөг болон гэрээний 2 дугаар зүйлийн 2.6.1-ийн дагуу тоног төхөөрөмжийн төлбөр болох 394,000 төгрөг, нийт 504,824 төгрөгийг хариуцагч Л.*******гаас гаргуулахаар Хан-Уул дүүргийн Иргэний хэргийн анхан шатны шүүхэд хоёр удаа хандсан.

 

Хан-Уул дүүргийн Иргэний хэргийн анхан шатны шүүх 2023 оны 02 дугаар сарын 20-ны өдөр иргэний хэрэг үүсгэж, Л.*******д нэхэмжлэлийн хувийг гардуулахаар түүний иргэний үнэмлэхний хаяг болох Хан-Уул дүүрэг, 07 дугаар хороо, Жаргалант 141-349 тоот хаягаар мэдэгдэх хуудсыг хүргүүлэхэд ийм хүн оршин суудаггүй гэх тодорхойлолтыг тус хорооны Засаг дарга тодорхойлсон байх тул.... гэх үндэслэлээр хэргийг 2023 оны 03 дугаар сарын 15-ны өдрийн 183/ШЗ2023/04830 дугаар шүүгчийн захирамжаар хэрэгсэхгүй болгон шийдвэрлэсэн. Мөн Хан-Уул дүүргийн Иргэний хэргийн анхан шатны шүүх 2023 оны 03 дугаар сарын 31-ний өдөр иргэний хэрэг үүсгэж, Л.*******д нэхэмжлэлийн хувийг гардуулахаар түүний иргэний үнэмлэхний хаяг болох Х тоотод оршин суух хаягаар мэдэгдэх хуудсыг хүргүүлэхэд тус хаягт оршин суудаггүй гэх тодорхойлолтыг тус хорооны Засаг дарга тодорхойлсон байх тул.... гэх үндэслэлээр хэргийг 2023 оны 08 дугаар сарын 24-ний өдрийн 183/ШЗ2023/14911 дүгээр шүүгчийн захирамжаар хэрэгсэхгүй болгон шийдвэрлэсэн. Иймд хариуцагчаар оролцвол зохих этгээд болох Л.*******г эрэн сурвалжлуулах тухай шийдвэр гаргаж өгнө үү. гэжээ.

 

2.Нэхэмжлэгч *******-ийн итгэмжлэгдсэн төлөөлөгч ******* нь шүүх хуралд биечлэн оролцох боломжгүй тул шүүх хуралдааныг нэхэмжлэгчийн эзгүйд шийдвэрлэж өгнө үү гэх хүсэлтийг ирүүлсэн байна.

 

3.Нэхэмжлэгчээс улсын тэмдэгтийн хураамж төлсөн баримт, хуулийн этгээдийн улсын бүртгэлийн гэрчилгээ, итгэмжлэл, Хан-Уул дүүргийн Иргэний хэргийн анхан шатны шүүхийн шүүгчийн 2023 оны 03 дугаар сарын 15-ны өдрийн 183/ШЗ2023/04830 дугаар Хэргийг хэрэгсэхгүй болгох тухай захирамж, 2023 оны 08 дугаар сарын 24-ний өдрийн 183/ШЗ2023/14911 дугаар Хэргийг хэрэгсэхгүй болгох тухай захирамж, 2022 оны 08 дугаар сарын 11-ний өдрийн ТТ03388 дугаар TENTECH үйлчилгээний хэрэглэгчийн гэрээ, Л.*******гийн оршин суугаа газрын хаягийн бүртгэлийн лавлагаа, иргэний үнэмлэхийн лавлагаа, Зарлагын баримт зэрэг баримтуудыг шүүхэд гаргаж өгсөн байна.

 

Шүүх хуралдаанаар хавтаст хэрэгт цугларсан бичгийн нотлох баримтыг шинжлэн судлаад

Үндэслэх нь:

 

1. Нэхэмжлэлийн шаардлагыг хангах үндэслэлтэй гэж үзэв.

Хүсэлт гаргагч ******* нь иргэний эрх зүйн маргаанд хариуцагчаар оролцвол зохих этгээд болох ******* овогт *******ийн ******* /РД:*******/-г эрэн сурвалжлуулах хүсэлтийг шүүхэд гаргажээ.

 

2. Нэхэмжлэгч дараах үндэслэлээр хүсэлтээ тодорхойлсон. Үүнд:

2.1 ******* нь Л.*******тай 2022 оны 08 дугаар сарын 11-ний өдрийн ТТ03388 дугаар TENTECH үйлчилгээний хэрэглэгчийн гэрээ байгуулсан байх ба Л.******* нь гэрээгээр хүлээсэн үйлчилгээний төлбөр төлөх үүргээ биелүүлээгүй гэжээ.

2.2 Хэрэглэгч Л.*******гаас хэрэглэгчийн гэрээний үүрэг шаардсан нэхэмжлэлийг Хан-Уул дүүргийн Иргэний хэргийн анхан шатны шүүхийн шүүгчийн 2023 оны 03 дугаар сарын 15-ны өдрийн 183/ШЗ2023/04830 дугаар Хэргийг хэрэгсэхгүй болгох тухай захирамжаар Л.******* нь Хан-Уул дүүрэг, 07 дугаар хороо, Жаргалант 141-349 тоот хаягт бүртгэлтэй боловч оршин суудаггүй болох нь тогтоогдсон гэж, 2023 оны 08 дугаар сарын 24-ний өдрийн 183/ШЗ2023/14911 дугаар Хэргийг хэрэгсэхгүй болгох тухай захирамжаар Л.******* нь Х тоот хаягт бүртгэлгүй бөгөөд оршин суудаггүй болох нь тогтоогдсон гэж тус тус хэргийг хэрэгсэхгүй болгон шийдвэрлэсэн байна. Л.*******гийн хаяг тодорхойгүй гэнэ.

 

3.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.2 дахь хэсэгт Энэ хуулийн 155.1-д заасан хүсэлтийг өөрийн оршин суух газрын шүүхэд гаргана гэж зааснаар тус шүүхэд эрэн сурвалжлуулах тухай хүсэлт гаргасан нь дээрх хуулийн зохицуулалтад нийцсэн гэж үзнэ.

 

4.Энэхүү иргэний хэрэг нь Иргэний хэрэг шүүхэд хянан шийдвэрлэх тухай хуулийн 133 дугаар зүйлд заасан шүүх онцгой ажиллагааны журмаар хянан шийдвэрлэх маргааны төрөлд хамаарах тул хэргийг хянан шийдвэрлэхэд ач холбогдол бүхий нөхцөл байдлыг бүрэн дүүрэн тогтооход шаардлагатай баримт, лавлагааг шүүхийн журмаар гаргуулах эрхтэй.

Шүүхээс 2024 оны 08 дугаар сарын 20-ны өдрийн 182/ШЗ2024/13958 дугаар шүүгчийн захирамжийн дагуу Улсын бүртгэлийн газраас Л.*******гийн оршин суугаа газрын лавлагааг гаргуулсан ба лавлагаанд Хан-Уул дүүрэг, 07 дугаар хороо, Жаргалантын 14 гудамж, 349 тоот гэжээ.

 

5.Иргэний эрх зүйн маргаанд хариуцагчаар оролцвол зохих этгээд болох Л.*******гийн оршин суух газар нь мэдэгдэхгүй байгаа болох нь хүсэлт гаргагчийн тайлбар болон дээрх баримтуудаар тогтоогдож байх тул *******-ийн гаргасан иргэний эрх зүйн маргаанд хариуцагчаар оролцвол зохих этгээд болох ******* овогт *******ийн ******* /РД:*******/-г эрэн сурвалжлуулах хүсэлтийг хангах үндэстэй. 

 

 6. Хүсэлт гаргагчаас улсын тэмдэгтийн хураамжид төлсөн 70,200 төгрөгийг улсын орлогод хэвээр үлдээж шийдвэрлэх нь зүйтэй. 

 

Нэхэмжлэгч ******* нь нэхэмжлэгчийг байлцуулахгүйгээр, нотлох баримтын хүрээнд шийдвэрлүүлэх хүсэлт ирүүлсэн байх тул нэхэмжлэгчийн эзгүйд хэргийг хянан шийдвэрлэсэн болохыг дурдах нь зүйтэй байна.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 133 дугаар зүйлийн 133.1.9-д заасныг тус тус удирдлага болгон

 

Тогтоох нь:

 

1.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.3-т зааснаар иргэний эрх зүйн харилцаанд хариуцагчаар оролцвол зохих этгээд болох ******* овогт *******ийн ******* /РД:*******/-г эрэн сурвалжилсугай.

 

2.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4-т зааснаар иргэний эрх зүйн харилцаанд хариуцагчаар оролцвол зохих этгээд болох *******ийн ******* /РД:*******/-г эрэн сурвалжлах, түүний амьдарч байгаа газрыг тогтоох ажиллагааг хийж, энэ тухай хүсэлт гаргагч *******, түүний төлөөлөгч ******* /утас:*******/-д мэдэгдэхийг Хан-Уул дүүргийн Цагдаагийн газарт даалгасугай.

 

3.Улсын тэмдэгтийн хураамжийн тухай хуулийн 7 дугаар зүйлийн 7.1.2, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, 60 дугаар зүйлийн 60.1-д зааснаар нэхэмжлэгч *******-ийн тэмдэгтийн хураамжид төлсөн 70,200 төгрөгийг улсын төсөвт хэвээр үлдээсүгэй.

 

4.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4, 119.7-д зааснаар шийдвэр танилцуулан сонсгомогц хүчинтэй бөгөөд зохигч 14 хоногийн дотор шүүхэд хүрэлцэн ирж шийдвэрийг өөрөө гардан авах ба шийдвэрийг гарган аваагүй нь гомдол гаргах хугацааг хуульд заасан журмын дагуу тоолоход саад болохгүй болохыг дурдсугай.

 

5.Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигчид шийдвэрийг гардан авснаас хойш 14 хоногийн дотор Нийслэлийн Иргэний хэргийн давж заалдаж шатны шүүхэд давж заалдах гомдол гаргаж болохыг дурдсугай.

 

 

 

ДаргалагЧ, шҮҮГЧ О.АЗЗАЯА