Нэхэмжлэгч нэхэмжлэлээсээ татгалзсаныг баталж,

хэргийг хэрэгсэхгүй болгох тухай

 

Баян-Өлгий аймаг дахь Захиргааны хэргийн анхан шатны шүүхийн шүүгч М.Риза би,  Ш.С нэхэмжлэлтэй, Буянт сумын Засаг даргад холбогдох “Буянт тус сумын Засаг даргын 2024 оны 3 дугаар сарын 11-ний өдрийн А/20 дугаартай захирамжийг хүчингүй болгуулах” нэхэмжлэлийн шаардлага  бүхий захиргааны хэрэгт хянан шийдвэрлэх ажиллагаа явуулаад,

 

ТОДОРХОЙЛОХ нь:

            Нэхэмжлэгч Ш.С шүүхэд гаргасан хүсэлтдээ:

 

“Миний бие захиргааны  шүүхэд 2024 оны 4 дүгээр сарын 11-ний өдөр Буянт сумын Засаг даргын 2024 оны 3 дугаар сарын 11-ний өдрийн А/20 дугаартай захирамжийг хүчингүй болгуулахаар нэхэмжлэл гаргасан. Гэвч Засаг дарга Н.Х нь 2024 оны оны 4 дүгээр сарын 11-нд өмнөх А/20 дугаартай захирамжийг хүчингүй болгосон байна.

Иймд миний бие шүүхэд гаргасан нэхэмжлэлээсээ татгалзаж байгаа болно” гэжээ.

 

ҮНДЭСЛЭХ нь:

Захиргааны хэрэг шүүхэд хянан шийдвэрлэх тухай хуулийн 66 дугаар зүйлийн  66.1-д зааснаар нэхэмжлэгч хэрэг хянан шийдвэрлэх ажиллагааны аль ч үе шатанд нэхэмжлэлээсээ бүхэлд нь, эсхүл хэсэгчлэн татгалзах эрхтэй.

Уг хэргийг хянан шийдвэрлэх ажиллагааны явцад нэхэмжлэгчээс   “Буянт тус сумын Засаг даргын 2024 оны 3 дугаар сарын 11-ний өдрийн А/20 дугаартай захирамжийг хүчингүй болгуулах” шаардлага бүхий нэхэмжлэлээсээ бүхэлд нь татгалзсанаа шүүхэд бичгээр илэрхийлсэн тул нэхэмжлэгч нэхэмжлэлээсээ татгалзсаныг баталж, уг захиргааны хэргийг хэрэгсэхгүй болгож шийдвэрлэх үндэслэлтэй байна.        

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1, 69 дүгээр зүйлийн 69.2-т заасныг тус тус удирдлага болгон

ЗАХИРАМЖЛАХ нь:

1. Захиргааны хэрэг шүүхэд хянан шийдвэрлэх тухай хуулийн 66 дугаар зүйлийн 66.1-д заасныг баримтлан нэхэмжлэгч Ш.С  “Буянт тус сумын Засаг даргын 2024 оны 3 дугаар сарын 11-ний өдрийн А/20 дугаартай захирамжийг хүчингүй болгуулах” шаардлага бүхий нэхэмжлэлээсээ татгалзсаныг баталж, Ш.С нэхэмжлэлтэй, Буянт сумын Засаг даргад холбогдох захиргааны хэргийг хэрэгсэхгүй болгосугай.        

2. Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.1, 47 дугаар зүйлийн 47.5, 50 дугаар зүйлийн 50.5-д  тус тус зааснаар нэхэмжлэгчээс  улсын тэмдэгтийн хураамжид  урьдчилан төлсөн 70200 /далан мянга хоёр зуу/ төгрөгийг улсын орлогод хэвээр үлдээсүгэй. 

3. Захиргааны хэрэг шүүхэд хянан шийдвэрлэх тухай хуулийн 66 дугаар зүйлийн 66.4-т зааснаар нэхэмжлэгч уг асуудлаар дахин нэхэмжлэл гаргах эрхгүй болохыг дурдсугай.

4. Хэргийн оролцогчид энэ захирамжид гомдол гаргах эрхгүй болохыг тайлбарласугай.

 

 

 

 

                                            ШҮҮГЧ                              М.РИЗА