2024 09 30 181/ШШ2024/03620

 

МОНГОЛ УЛСЫН НЭРИЙН ӨМНӨӨС

 

Сүхбаатар дүүргийн Иргэний хэргийн анхан шатны шүүхийн шүүгч Б.Билгүүн даргалж, тус шүүхийн танхимд хийсэн шүүх хуралдаанаар,

Нэхэмжлэгч: ............. хаягт оршин байх М ХХК /РД:...../-ийн хүсэлттэй,

иргэний эрх зүйн маргаанд хариуцагчаар оролцвол зохих этгээд болох Ж.Б /......./-ийг эрэн сурвалжлуулах тухай иргэний хэргийг хянан хэлэлцэв.

Шүүх хуралдаанд: шүүх хуралдааны нарийн бичгийн дарга Х.Отгонцэцэг оролцов.

(Нэхэмжлэгч талын хүсэлтээр Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.1 дэх хэсэгт зааснаар эзгүйд нь хэлэлцэв.)

 

ТОДОРХОЙЛОХ нь:

1.1. Нэхэмжлэгч М ХХК нь иргэний эрх зүйн маргаанд хариуцагчаар оролцвол зохих этгээд болох Ж.Бийг эрэн сурвалжлуулахыг хүссэн ба үндэслэлээ дараах байдлаар тодорхойлсон. Үүнд:

...Иргэн Ж.Б нь 2022 оны 2 дугаар сарын 07-ны өдөр М К-тай 2202-1256 тоот зээлийн гэрээг байгуулж, 1,099,900 төгрөгийг 24 сарын хугацаагаар сарын 3 хувийн хүүтэй, С ХХК-аас Samsung A52 маркийн гар утсыг худалдан авах зориулалтаар зээлэн авсан. Зээлдэгч нь зээлийг сар бүрийн 20-ны өдөр 65,000 төгрөгөөр эргэн төлж, зээлийг хуваарийн дагуу 2024 оны 2 дугаар сарын 07-ны өдөр төлж дуусгах ёстой ч зээлийн эргэн төлөлтийн хуваарийг зөрчиж, зээлийг төлж дуусгаагүй. Тодруулбал зээлдэгч Ж.Б нь 2022 оны 2-12 дугаар сарууд болон 2023 оны 1 дүгээр сард нийт 484,684.50 төгрөгийн үндсэн төлөлт, 295,285.93 төгрөгийн хүүгийн төлөлт, 29.57 төгрөгийн нэмэгдүүлсэн хүүгийн төлөлт хийсэн. 2024 оны 6 дугаар сарын 04-ний өдрийн байдлаар зээлдэгч Ж.Бийн үндсэн зээлийн үлдэгдэл 615,215.50 төгрөг, хүүгийн төлбөр 303,956.51 төгрөг, нэмэгдүүлсэн хүүгийн төлбөр 36,757.38 төгрөг нийт 955,929.39 төгрөгийн зээлийн төлбөрийг төлөөгүй байна. Зээлийн гэрээний 2.1.10-т зааснаар зээлдэгч нь зээлийн үндсэн төлбөр, хүүгийн төлбөрийг эргэн төлөх хуваарьт заасан хугацааг хэтрүүлж гэрээний үүргийг ноцтой зөрчиж, зээлийн гэрээний 7 дахь хэсэгт заасан нөхцөл байдлыг үүсгэсэн учир гэрээний 7.3 дахь хэсэгт заасны дагуу зээлдүүлэгч гэрээг дангаар цуцалж, Ж.Баас 2022 оны 2 дугаар сарын 07-ны өдөр байгуулсан 2202-1256 тоот Зээлийн гэрээний үүрэгт зээлийн үлдэгдэл 971,229.39 төгрөг гаргуулахаар ББСБ-д бүртгэлтэй хаягаар нь 2024 оны 6 дугаар сарын 12-ны өдөр Сонгинохайрхан дүүргийн Иргэний хэргийн анхан шатны шүүхэд нэхэмжлэл гаргасан боловч шүүхээс хариуцагчийг тус хаягт бүртгэлтэй боловч оршин суудаггүй, хаяг тодорхойгүй үндэслэлээр хэргийг хэрэгсэхгүй болгосон. Иймд Ж.Бийг эрэн сурвалжлуулахаар 2024 оны 7 дугаар сарын 31-ний өдөр Сүхбаатар дүүргийн Иргэний хэргийн анхан шүүхэд нэхэмжлэл гаргасан боловч тус шүүхээс зээл хүсэгчийн анкетаас гадна зээлийн гэрээнд Дархан-уул аймаг Дархан 9 дүгээр баг, 4 дүгээр хороолол, 1 дүгээр байр 214 тоот гэсэн хаяг тусгагдсанаас үзвэл нэхэмжлэгч нь иргэний эрх зүйн маргаанд оролцвол зохих этгээдийн оршин суугаа газрыг олж тогтооход бүхий л аpra хэмжээг авсан гэж үзэхээргүй байна гэх үндэслэлээр нэхэмжлэлийг хүлээн авахаас татгалзсан. Нэхэмжлэгчийн зүгээс Дархан-уул аймаг Дархан сумын 9 дүгээр багийн Засаг даргад хандаж хаягийн бүртгэлийн лавлагааг авахад Ж.Б нь тус хаягт бүртгэлтэй боловч оршин суудаггүй гэх тодорхойлолт бүхий хариу өгсөн болно. Нэхэмжлэгчийн зүгээс өөр ямар хаяг дээр байгааг мэдэх боломжгүй юм.

Иймд зээлийн гэрээний үүрэгтэй холбоотой иргэний эрх зүйн маргаанд хариуцагчаар оролцвол зохих этгээд болох Ж.Б /......./-ийг эрэн сурвалжилж өгнө үү. гэжээ.

 

1.2. Нэхэмжлэгчийн итгэмжлэгдсэн төлөөлөгч Н.Б шүүхэд бичгээр ирүүлсэн хүсэлтдээ: ...эзгүйд шийдвэрлэж өгнө үү. гэжээ.

2. Нэхэмжлэгчээс нотлох баримтаар: шүүхэд төлөөлөх эрх олгосон итгэмжлэл, улсын тэмдэгтийн хураамж төлсөн баримт, М -ийн улсын бүртгэлийн гэрчилгээний хуулбар, Сүхбаатар дүүргийн Иргэний хэргийн анхан шатны шүүхийн шүүгчийн 2024 оны 8 дугаар сарын 07-ны өдрийн 181/ШЗ024/14914 дүгээр Нэхэмжлэлийг хүлээн авахаас татгалзах тухай захирамжийн хувилсан хувь, Сонгинохайрхан дүүргийн Иргэний хэргийн анхан шатны шүүхийн шүүгчийн 2024 оны 7 дугаар сарын 08-ны өдрийн 184/ШЗ2024/15767 дугаар Хэргийг хэрэгсэхгүй болгох тухай захирамжийн хуулбар, Дархан-Уул аймгийн Дархан сумын 9 дүгээр багийн Засаг даргын тодорхойлолт, Зээл хүсэгчийн анкет, Ж.Бтай байгуулсан 2022 оны 2 дугаар сарын 07-ны өдрийн №2202-1256 дугаар Зээлийн гэрээний хуулбар /хх 3-13/ зэргийг шүүхэд гаргаж өгсөн.

Шүүхийн журмаар нотлох баримт бүрдүүлээгүй болно.

Хэрэгт цугларч, шүүх хуралдаанаар хэлэлцэгдсэн нотлох баримтуудыг судлаад

 

ҮНДЭСЛЭХ нь:

Шүүх хүсэлтийг хангах нь зүйтэй гэж үзэв.

Нэхэмжлэгч М ХХК нь иргэний эрх зүйн маргаанд хариуцагчаар оролцвол зохих этгээд болох Ж.Бийг эрэн сурвалжлуулах тухай хүсэлтийг тус шүүхэд гаргасан ба нэхэмжлэгчийн итгэмжлэгдсэн төлөөлөгч Н.Б нь өөрийгөө байлцуулахгүйгээр шүүх хуралдаан явуулахыг хүссэн байна.

Энэхүү хүсэлтийн дагуу шүүх нэхэмжлэгч талын эзгүйд хэргийг хянан шийдвэрлэх нь Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.1 дэх хэсэгт заасанд нийцнэ.

1. Ж.Б нь М -тай 2022 оны 2 дугаар сарын 07-ны өдрийн №2202-1256 дугаар Зээлийн гэрээний хуулбар хэрэгт авагдсан байх тул уг гэрээний үүрэг шаардсан нэхэмжлэлд хариуцагч болох үндэслэлтэй гэж үзлээ.

2. Нэхэмжлэгч гэрээний үүргийн биелэлт шаардаж хариуцагчид холбогдуулан Сонгинохайрхан дүүргийн Иргэний хэргийн анхан шатны шүүхэд нэхэмжлэл гаргасан байх ба тус шүүхийн шүүгчийн 2024 оны 7 дугаар сарын 08-ны өдрийн 183/ШЗ2024/15767 дугаар захирамжаар хариуцагч Сонгинохайрхан дүүрэг, 12 дугаар хороо, Өнөр хороолол, 2 дугаар байр, 221 тоот хаягт бүртгэлтэй боловч одоогоор оршин суудаггүй болох нь хорооны Засаг даргын тодорхойлолтоор тогтоогдсон, улмаар хариуцагчийн хаяг тодорхойгүй үндэслэлээр хэргийг хэрэгсэхгүй болгожээ.

3. Хариуцагчийн хаяг тодорхойгүй үндэслэлээр хэргийг хэрэгсэхгүй болгон шийдвэрлэсэн дээрх захирамж хуулийн хүчин төгөлдөр байх тул шүүх дахин нотлохгүй.

Иймд Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.1, 155.4 дэх хэсгүүдэд заасны дагуу нэхэмжлэгч М -ийн хүсэлтийг хангаж, иргэний эрх зүйн маргаанд хариуцагчаар оролцвол зохих этгээд болох Ж.Бийг эрэн сурвалжилж, оршин суугаа хаягийг нь тогтоох ажиллагааг түүний сүүлд оршин сууж байсан харьяа дүүргийн Цагдаагийн байгууллагаар гүйцэтгүүлэх нь зүйтэй гэж үзэв.

Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, Улсын тэмдэгтийн хураамжийн хуулийн 7 дугаар зүйлийн 7.1.2-т зааснаар нэхэмжлэгчээс улсын тэмдэгтийн хураамжид төлсөн 70,200 төгрөгийг улсын орлогод хэвээр үлдээв.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118 дугаар зүйлийг тус тус удирдлага болгон

 

ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.3 дахь хэсэгт зааснаар Ж.Б /......./-ийг эрэн сурвалжилсугай.

2. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4 дэх хэсэгт зааснаар Ж.Бийг эрэн сурвалжлах, оршин суугаа газрын хаягийг тогтоох ажиллагааг хийж гүйцэтгэхийг Сонгинохайрхан дүүргийн Цагдаагийн газарт даалгасугай.

3. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1, Улсын тэмдэгтийн хураамжийн хуулийн 7 дугаар зүйлийн 7.1.2-т зааснаар нэхэмжлэгчийн улсын тэмдэгтийн хураамжид урьдчилан төлсөн 70,200 төгрөгийг улсын орлогод хэвээр үлдээсүгэй.

4. Иргэний эрх зүйн маргаанд хариуцагчаар оролцвол зохих этгээд болох Г.Т гийн оршин суугаа хаягийг олж тогтоон М ХХК /итгэмжлэгдсэн төлөөлөгч Ө, Н.Б , Ө утас: ........., ......../-д мэдэгдсүгэй.

5. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2 дахь хэсэгт зааснаар шийдвэр танилцуулан сонсгомогц хүчинтэй болох бөгөөд зохигч, тэдгээрийн төлөөлөгч буюу өмгөөлөгч шийдвэрийг эс зөвшөөрвөл гардан авснаас хойш 14 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэйг дурдсугай.

 

 

 

 

ДАРГАЛАГЧ, ШҮҮГЧ Б.БИЛГҮҮН