МОНГОЛ УЛСЫН НЭРИЙН ӨМНӨӨС

 

 

Нийслэл дэх Захиргааны хэргийн анхан шатны шүүхийн шүүх хуралдааныг шүүгч Н.Дамдинсүрэн даргалж тус шүүхийн шүүх хуралдааны 2 дугаар танхимд нээлттэй хийсэн шүүх хуралдаанаар,

Нэхэмжлэгч: Т.*******,

Нэхэмжлэгчийн итгэмжлэгдсэн төлөөлөгч: Б.*******,

Хариуцагч: Нийслэлийн Засаг дарга,

Хариуцагчийн итгэмжлэгдсэн төлөөлөгч: Ц.*******,

Маргааны төрөл: Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжаар Т.*******ийн газар эзэмших эрхийн гэрчилгээг хүчингүй болгож шийдвэрлэсэн нь хуульд нийцсэн эсэх талаарх газрын маргааныг хянан хэлэлцэв.

Шүүх хуралдаанд: Нэхэмжлэгчийн өмгөөлөгч Э., хариуцагчийн итгэмжлэгдсэн төлөөлөгч Ц.*******, шүүх хуралдааны нарийн бичгийн дарга Б. нар оролцов.

ТОДОРХОЙЛОХ нь

 

1. Нэхэмжлэгч иргэн Т.*******ээс Нийслэлийн Засаг даргад холбогдуулан “Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжийг хүчингүй болгуулах” тухай нэхэмжлэл гаргажээ.
2. “*******” ХХК-ийн 2020 оны 04 дүгээр сарын 15-ны өдрийн **** дугаар албан бичгээр Нийслэлийн газар зохион байгуулалтын албанд хандан Хан-Уул дүүргийн 11 дүгээр хороо, Маршал таун хотхон, Их монгол улсын гудамж хаягт байрлах **** м.кв газраас иргэн Т.*******д 1000 м.кв газрын эрхийг шилжүүлэх хүсэлт гаргасан ба мөн иргэн Т.*******ээс газар эзэмших эрхийг шилжүүлэх хүсэлтийг тус тус гаргасан байна. 
3. Үүний дагуу Нийслэлийн Засаг даргын 2020 оны А/******* дугаар захирамжаар Хан-Уул дүүргийн 17 дугаар хорооны Маршал таун хотхон, Их монгол улсын гудамжид байрлах 1000 м.кв газрыг иргэн Т.*******д 15 жилийн хугацаатайгаар олгожээ.
4. Тус захирамжийг үндэслэн Нийслэлийн Газар зохион байгуулалтын албаны дарга иргэн Т.*******тэй 2021 оны 05 дугаар сарын 18-ны өдөр “Иргэн, хуулийн этгээдэд газар эзэмшүүлэх гэрээ”-г байгуулж, ******* дугаартай газар эзэмших эрхийн гэрчилгээ олгосон байна.
5. 2023 оны 08 дугаар сарын 15-ны өдөр Маршал таун хотхоны оршин суугчдаас Нийслэлийн Газар зохион байгуулалтын албанд гаргасан өргөдөлдөө “...иргэн Т.*******д олгогдсон газар эзэмших эрхийн гэрчилгээг хүчингүй болгох болон тус газрын зориулалтыг өөрчилж Ногоон байгууламж болгох шийдвэрийг гаргаж өгнө үү. ...” гэж, үүний хариуг Нийслэлийн Газар зохион байгуулалтын албаны 2023 оны 11 дүгээр сарын 21-ний өдрийн **** дугаар албан бичгээр “...газар эзэмшигч иргэн Т.*******ийн газрын эрхийн гэрчилгээг хүчингүй болгож, газар эзэмших эрхийг дуусгавар болгох тухай захирамжийн төсөл хянагдаж байна.” гэх хариуг хүргүүлжээ.
6. Нийслэлийн Газар зохион байгуулалтын албаны 2023 оны 10 дугаар сарын 30-ны өдрийн ***** дугаар албан бичгээр “ ...хүндэтгэн үзэх шалтгаангүйгээр гэрээнд заасан зориулалтын дагуу тухайн газраа 2 жил дараалан ашиглаагүй, газрын төлбөрөө хугацаанд нь бүрэн төлөөгүй ... газар эзэмших эрхийн гэрчилгээг хүчингүй болгох үндэслэл бүрдсэнийг үүгээр мэдэгдэж байна. … тайлбар, саналаа нотлох баримтын хамт 2023 оны 11 дүгээр сарын 10-ны өдрийн дотор тус албанд ирүүлнэ үү”, мөн тус албаны 2023 оны 12 дугаар сарын 11-ний өдрийн ***** дугаар албан бичгээр “...хүндэтгэн үзэх шалтгаангүйгээр газрын төлбөрөө хугацаанд бүрэн төлөөгүй байх тул ... газар эзэмших эрхийн гэрчилгээг хүчингүй болгох үндэслэл бүрдсэнийг үүгээр мэдэгдэж байна. ...тайлбар, саналаа нотлох баримтын хамт 2023 оны 12 дугаар сарын 15-ны өдрийн дотор тус албанд ирүүлнэ үү.” гэх мэдэгдлүүдийг нэхэмжлэгчид хүргүүлжээ. 
7. нэхэмжлэгчээс 2023 оны 12 дугаар сарын 15-ны өдөр Нийслэлийн Газар зохион байгуулалтын албанд тайлбар, төлбөр тушаасан баримтыг хүргүүлсэн байна.
8. Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжаар газрын төлбөрөө хугацаанд нь бүрэн төлөөгүй, газрын тухай хууль тогтоомж, газар эзэмших гэрээний нөхцөл, болзлыг удаа дараа зөрчсөн гэх үндэслэлээр нэхэмжлэгчийн дээрх газар эзэмших эрхийг хүчингүй болгожээ.
9. Иймд нэхэмжлэгчээс дээрх шийдвэрийг эс зөвшөөрч тус шүүхэд 2024 оны 02 дугаар сарын 02-ны өдөр нэхэмжлэл гаргасныг нэхэмжлэлийн бүрдүүлбэр хангуулах хугацаа тогтоож, 2024 оны 02 дугаар сарын 23-ны өдөр дахин нэхэмжлэл гаргасныг хүлээн авч тус шүүхийн шүүгчийн 2024 оны 03 дугаар сарын 01-ний өдрийн 2011 дүгээр захирамжаар захиргааны хэрэг үүссэн байна.
10. Нэхэмжлэгч нэхэмжлэлийн шаардлагын үндэслэлдээ: “Т.******* миний бие Нийслэлийн Засаг даргын 2020 оны А/******* дугаар захирамжаар Хан-Уул дүүргийн 17 дугаар хорооны нутаг дэвсгэрт худалдаа үйлчилгээний зориулалтаар 1000 м.кв газрыг эзэмшүүлэхээр шийдвэрлэж, 2021 оны 5 дугаар сарын 18-ны өдөр гэрээ байгуулж, ******* дугаартай гэрчилгээг авсан.

Нийслэлийн газар зохион байгуулалтын албанаас 2023 оны 12 дугаар сарын 11-ний өдрийн ***** дугаар мэдэгдлээр "Газрын тухай хуулийн 35 дугаар зүйлийн 35.3.1 дэх заалтад заасан үүргээ зөрчиж, хүндэтгэн үзэх шалтгаангүйгээр газрын толбороо хугацаанд бүрэн төлөөгүй тул газар эзэмших эрхийг холбогдох хууль тогтоомжийн дагуу цуцлах тухай" албан бичгийг хүлээн авсан даруйд нэхэмжлэгчийн зүгээс 2023 оны 12 дугаар сарын 15-ны газрын төлбөрийг төлж барагдуулж Нийслэлийн Газар зохин байгуулалтын албанд энэ тухайгаа мэдэгдэж бичгээр мэдэгдэж зөрчлийг арилгасан атал Нийслэлийн Засаг даргын 2023 оны 12 дугаар сарын 28-ны өдрийн А/******* дугаартай захирамжаар газар эзэмших эрхийн гэрчилгээг хүчингүй болгож, газар эзэмших эрхийг дуусгавар болгосон захирамж гарсан тухай 2024 оны 01 дүгээр сарын 11-ний өдөр мэдсэн ба уг захирамж нь нэхэмжлэгчийн хууль ёсны эрх, ашиг сонирхлыг хөндсөн байгаа, хуульд заасны дагуу Нийслэлийн Засаг даргын захирамжийг хянах дээд шатны байгууллага байхгүй тул урьдчилсан шийдвэрлэх ажиллагаа хийлгүйгээр шууд шүүхэд хандаж байна.

Иймд Нийслэлийн Засаг даргын 2023 оны 12 дугаар сарын 28-ны өдрийн А/******* дугаартай “Газар эзэмших эрхийн гэрчилгээг хүчингүй болгож, газар эзэмших эрхийг дуусгавар болгох тухай” захирамжийг хүчингүй болгуулах Захиргааны хэрэг хянан шийдвэрлэх тухай хуулийн 106 дугаар зүйлийн 106.3.1-д “захиргааны акт, захиргааны гэрээ хууль бус бөгөөд түүний улмаас нэхэмжлэгчийн эрх, хууль ёсны ашиг сонирхол нь зөрчигдсөн болох нь тогтоогдвол түүнийг хүчингүй болгох” гэж заасны дагуу хүчингүй болгох.

Тус шүүхийн 2024 оны 02 дугаар сарын 09-ний өдрийн 1415 дугаартай шүүгчийн захирамжаар “нэхэмжлэгч нь Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжийг хэрхэн мэдсэн, ямар байдлаар гардан авсан нь тодорхойгүй байх тул нэхэмжлэл гаргах хуульд заасан хугацааны дотор нэхэмжлэлээ гаргасан эсэхийг тогтоох боломжгүй байна” гэж заасан байна.

Нэхэмжлэгч Т.******* нь 2024 оны 01 дүгээр сарын 04-ний өдөр гадаад улсад зөрчиж, 2024 оны 01 дүгээр сарын 19-ний өдөр Монгол Улсад ирсний дараа буюу 2024 оны 01 дүгээр сарын 24-ний өдөр Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжийг *******гаар хүлээн авсан ба энэ талаарх баримтыг “*******” ХХК-аас авч хавсаргасан болно.” гэжээ.

11. Нэхэмжлэгчийн өмгөөлөгч Э. шүүх хуралдаанд гаргасан нэмэлт тайлбартаа: “Нэхэмжлэгч Т.******* нь Нийслэлийн Засаг даргын 2023 оны 12 дугаар сарын 28-ны өдрийн А/******* дугаартай газар эзэмших эрхийн гэрчилгээг хүчингүй болгох, газар эзэмших эрхийг дуусгавар болгох тухай захирамжийг Захиргааны хэрэг хянан шийдвэрлэх тухай хуулийн 106 дугаар зүйлийн 106.3.1-д заасны дагуу хүчингүй болгуулахаар нэхэмжлэлийн шаардлагаа тодорхойлсон. Нийслэлийн Засаг даргын 2020 оны А/******* дугаар захирамжаар Хан-Уул дүүргийн 17 дугаар хороонд байрлах худалдаа үйлчилгээний зориулалттай мянган м2 газрыг Т.*******д эзэмшүүлэхээр шийдвэрлэсэн. 2021 оны 05 дугаар сарын 18-ны өдөр гэрээ байгуулж гэрчилгээ гарсан. Газар зохион байгуулалтын албанаас 2023 оны 12 дугаар сарын 11-ний өдрийн 01-10/6842 мэдэгдлээр Газрын тухай хуулийн 35 дугаар зүйлийн 35.3.1 дэх заалтыг зөрчсөн. Хүндэтгэн үзэх шалтгаангүйгээр газрын төлбөрийг хугацаанд нь бүрэн төлөөгүй учраас холбогдох хууль тогтоомжийн дагуу цуцална гэдэг мэдэгдлийг өгсөн. Уг мэдэгдлийн дагуу Газар зохион байгуулалтын албаны **** дугаартай мэргэжилтэнтэй холбогдоход үлдэгдэл төлбөр болох 1 сая 280 мянган төгрөгийг төлчих гэдэг асуудлыг ярьсан. Бид мэдэгдлийн хариу өгөх өдөр буюу 2023 оны 12 дугаар сарын 15-ны өдөр төлж барагдуулсан. Хариуг мэйлээр нь явуулсан. Гэтэл маргаан бүхий захиргааны акт гарсан. Мэдэгдлийн зөрчлийг нь арилгасан байхад захирамж гарах ёсгүй байсан гэж үзэж байгаа учраас нэхэмжлэлийн шаардлагыг бүхэлд нь хангаж шийдвэрлэж өгнө үү” гэжээ.

12. Хариуцагч итгэмжлэгдсэн төлөөлөгч Ч.******* шүүхэд ирүүлсэн хариу тайлбартаа: “Иргэн Т.*******ээс Нийслэлийн Засаг даргад холбогдуулан гаргасан “Нийслэлийн Засаг даргын 2023 оны 12 дугаар сарын 28-ны өдрийн А/******* дугаартай “Газар эзэмших эрхийн гэрчилгээг хүчингүй болгож, газар эзэмших эрхийг дуусгавар болгох тухай” захирамжийг хүчингүй болгуулах шаардлага бүхий нэхэмжлэлтэй танилцаад Захиргааны хэрэг шүүхэд хянан шийдвэрлэх тухай хуулийн 57 дугаар зүйлийн 57.2 дахь хэсгийг үндэслэн нэхэмжлэлийн шаардлагыг бүхэлд нь хүлээн зөвшөөрөх боломжгүй тул дараах хариу тайлбарыг гаргаж байна.

Нийслэлийн Засаг даргын 2020 оны А/******* дугаар захирамжаар Хан-Уул дүүргийн 17 дугаар хорооны нутаг дэвсгэрт худалдаа, үйлчилгээний зориулалтаар 1000 м.кв газрыг иргэн Т.*******д эзэмшүүлэхээр шийдвэрлэж, газар эзэмших гэрээ байгуулан, гэрчилгээ олгосон боловч иргэн Т.******* нь тухайн газрыг эзэмшсэнээс хойш газрынхаа төлбөрийг гэрээнд заасан хугацаанд төлөх үүргээ зохих ёсоор биелүүлээгүй байна.

Иймд газар эзэмших эрхийн гэрчилгээг хүчингүй болгох тухай мэдэгдлийг иргэн Т.*******д Захиргааны ерөнхий хуульд заасны дагуу 2023 оны 10 дугаар сарын 30-ны өдрийн *** тоот мэдэгдэл, 2023 оны 12 дугаар сарын 11-ний өдрийн 01-*** тоот мэдэгдлийг тус тус хүргүүлж сонсох ажиллагааг хийсэн.

Иргэн Т.******* нь Газрын тухай хуульд зааснаар газрын төлбөрийг хугацаанд нь төлөөгүй, гэрээний үүргээ биелүүлээгүй байх тул Нийслэлийн Засаг даргын 2023 оны 12 дугаар сарын 28-ны өдрийн А/******* дугаар “Газар эзэмших эрхийн гэрчилгээг хүчингүй болгож, газар эзэмших эрхийг дуусгавар болгох тухай” захирамжаар газар эзэмших эрхийн гэрчилгээг хүчингүй болгосон.

Иймд Нийслэлийн Засаг даргын 2023 оны 12 дугаар сарын 28-ны өдрийн А/******* дугаартай захирамж нь хуульд нийцсэн үндэслэл бүхий захиргааны акт тул Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.3.14 дэх заалтын дагуу нэхэмжлэлийн шаардлагыг бүхэлд нь хэрэгсэхгүй болгож өгнө үү.” гэжээ.

13. Хариуцагчийн итгэмжлэгдсэн төлөөлөгч Ц.******* шүүх хуралдаанд гаргасан нэмэлт тайлбартаа: “Нийслэлийн Засаг даргын 2020 оны А/******* дугаар захирамжаар Хан-Уул дүүргийн 17 дугаар хорооны нутаг дэвсгэрт худалдаа, үйлчилгээний зориулалтаар мянган м2 газрыг иргэн Т.*******д эзэмшүүлэхээр шийдвэрлэж, газар эзэмших гэрээ байгуулан гэрчилгээ олгосон боловч Т.******* нь газар эзэмших эрхийн гэрээнд заасан үүргээ биелүүлээгүй буюу газрын төлбөрийг хугацаанд гэрээнд заасан хугацаанд төлөөгүй байх тул маргаан бүхий захиргааны актыг гаргасан. Ингэж гаргахдаа сонсох ажиллагааны мэдэгдлийг 2023 оны 10 дугаар сарын 30-ны өдөр, мөн 12 дугаар сарын 11-ний өдөр хүргүүлсэн боловч эхний сонсох ажиллагааны мэдэгдэлд хариу тайлбар ирүүлээгүй. 12 дугаар сарын 15-ны өдрийн дотор ирүүлнэ үү гэж 12 сард өгсөн сонсох ажиллагааны мэдэгдэлд хугацаа заасан бөгөөд мөн өдрийн ажлын цаг дууссан үед төлбөрөө төлж хариу тайлбараа хүргүүлсэн байдаг. Уг маргаан бүхий газрыг өмнө нь “*******” ХХК-д эзэмшүүлсэн бөгөөд Т.*******д мянган м2 газрыг үйлчилгээний зориулалттайгаар шилжүүлэн өгсөн байдаг. Уг газар дээр тухайн Маршал таун хотхоны оршин суугчид ногоон байгууламжийг нэмэгдүүлэх, амарч суух, нийтийн эзэмшлийн газрыг чөлөөлүүлэхээр Нийслэлийн Засаг даргад гомдол гаргасан байдаг. Оршин суугч иргэдийн гарын үсгийг цуглуулсан өргөдлийг 2023 оны 08 дугаар сарын 15-ны өдөр өгсөн. Уг өргөдөл, гомдлыг Хот байгуулалт хөгжлийн газар судалж үзээд нэхэмжлэгч Т.*******ийн барилга барих зөвшөөрөл болон архитектур төлөвлөлтийн даалгаврыг иргэдтэй зөвшилцөх хүртэлх хугацаагаар түдгэлзүүлсэн байдаг. Уг гомдол нь нийслэлийн Газар зохион байгуулалтын албанд мөн цохогдож ирсэн. Судалж үзэхэд газрын зөрчилтэй байсан учраас маргаан бүхий захиргааны актыг Газрын тухай хуулийн 40 дүгээр зүйлийн 40.1.5 дах заалтыг үндэслэн хүчингүй болгосон. Оршин суугч иргэдийн эрх ашиг хөндөгдөж байгаа учраас нэхэмжлэлийн шаардлагыг бүхэлд нь хэрэгсэхгүй болгож өгнө үү.” гэжээ.

 

                                                      ҮНДЭСЛЭХ нь:

Шүүх нэхэмжлэлийн шаардлагын хүрээнд хэргийн оролцогчид болон тэдгээрийн итгэмжлэгдсэн төлөөлөгч, өмгөөлөгч нарын шүүхэд болон шүүх хуралдаанд гаргасан тайлбар, хавтаст хэрэгт авагдан, шүүх хуралдаанаар хэлэлцсэн нотлох баримтуудад үндэслэн нэхэмжлэлийн шаардлагыг бүхэлд нь хангаж шийдвэрлэлээ.

1. Газрын тухай хуулийн 40 дүгээр зүйлийн 40.1.”Аймаг, сум, нийслэл, дүүргийн Засаг дарга дараахь тохиолдолд газар эзэмших эрхийн гэрчилгээг хүчингүй болгоно:”, 40.1.1.“эрхийн гэрчилгээ эзэмшигч газрын тухай хууль тогтоомж, газар эзэмших гэрээний нөхцөл, болзлыг удаа дараа буюу ноцтой зөрчсөн;”, 40.1.5.“эрхийн гэрчилгээ эзэмшигч газрын төлбөрөө хугацаанд нь бүрэн төлөөгүй;”, Захиргааны ерөнхий хуулийн 4 дүгээр зүйлийн 4.2.“Захиргааны үйл ажиллагаанд дараах тусгай зарчмыг баримтална”, 4.2.6.“бусдын эрх, хууль ёсны ашиг сонирхлыг хөндсөн захиргааны шийдвэр гаргах тохиолдолд тэдгээрт урьдчилан мэдэгдэх, оролцоог нь хангах”, 24 дүгээр зүйлийн 24.1.“Захиргааны байгууллага захиргааны шийдвэр гаргах ажиллагаанд хамаарах бодит нөхцөл байдлыг тогтооно”, 24.2.“Энэ хуулийн 24.1-д заасан бодит нөхцөл байдлыг тогтооход ач холбогдол бүхий шаардлагатай ажиллагаа хийх, нотлох баримтыг цуглуулах, үнэлэх үүргийг захиргааны байгууллага хүлээнэ”, 24.4.“Тухайн захиргааны шийдвэр гаргах ажиллагаанд хамааралтай тохиолдол бүрийн үндэслэлийг захиргааны байгууллага нарийвчлан шинжлэн судлах үүрэгтэй бөгөөд оролцогчийн хувьд ач холбогдол бүхий нөхцөл байдлыг тогтооно” гэж заажээ.

1.1. Нэхэмжлэгчид Нийслэлийн Засаг даргын 2020 оны А/******* дугаар захирамжаар нэхэмжлэгчид эзэмшүүлсэн газар эзэмших эрхийг Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжаар Газрын тухай хуулийн 40 дүгээр зүйлийн 40.1.1, 40.1.5 дахь заалтыг үндэслэн хүчингүй болгожээ.

2. Тодорхойлох хэсэгт дурдсанчлан Нийслэлийн Газар зохион байгуулалтын албаны 2023 оны 12 дугаар сарын 11-ний өдрийн 01-*** дугаар албан бичгийг хүлээн авч мэдэгдэлд заасан хугацаанд газрын төлбөрийг төлж, энэ талаарх тайлбарыг хариуцагч талд хүргүүлсэн болох нь хэрэгт авагдсан баримтаар тогтоогдож байна.  

2.1. Нэхэмжлэгч газрын төлбөрийг төлсөнөөр Газрын тухай хуульд заасан эрхийн гэрчилгээ эзэмшигч газрын төлбөрөө хугацаанд нь бүрэн төлөөгүй гэх үндэслэл арилсан байхад Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжаар гэрчилгээг хүчингүй болгож, газар эзэмших эрхийг дуусгавар болгосон нь Захиргааны ерөнхий хуульд заасан зорилгодоо нийцсэн, бодит нөхцөлд байдалд тохирсон, шийдвэр нь үндэслэл бүхий байх, урьдчилан мэдэгдэх зарчимд нийцээгүй, хууль бус болжээ. 

3. Нэхэмжлэгчийг газрын тухай хууль тогтоомж, газар эзэмших гэрээний нөхцөл, болзлыг удаа дараа буюу ноцтой зөрчсөн гэх үндэслэл хэрэгт авагдсан баримтаар тогтоогдохгүй байна. 

Мөн Газрын тухай хуулийн 40 дүгээр зүйлийн 40.1 дэх хэсэгт заасан газар эзэмших эрхийн гэрчилгээг хүчингүй болгох бусад үндэслэлээс өөр байдлаар газрын тухай хууль тогтоомж, газар эзэмших гэрээний нөхцөл, болзлыг удаа дараа буюу ноцтой зөрчсөн бол тус хуулийн 40.1.1 дэх  хэсгийг хэрэглэх юм. 

4. Хуульд заасан үндэслэл журмын дагуу “*******” ХХК-иас үйчилгээний зориулалттай 1000 га газрын эзэмших эрхийг Нийслэлийн Засаг даргын 2020 оны 09 дүгээр сарын 30-ны өдрийн А/******* дугаар захирамжаар нэхэмжлэгчид шилжүүлсэн ба өмнөх газар эзэмшигч “*******” ХХК-ийн газрын тухай хууль зөрчсөн үндэслэлээр нэхэмжлэгчийн газар эзэмших эрхийг хүчингүй болгох боломжгүй ба маргаан бүхий захирамжид энэ талаарх үндэслэл байхгүй байна. 
5. Хариуцагчийн итгэмжлэгдсэн төлөөлөгчөөс “... Уг газар дээр тухайн Маршал таун хотхоны оршин суугчид ногоон байгууламжийг нэмэгдүүлэх, амарч суух, нийтийн эзэмшлийн газрыг чөлөөлүүлэхээр Нийслэлийн Засаг даргад гомдол гаргасан байдаг. … Уг өргөдөл, гомдлыг Хот байгуулалт хөгжлийн газар судалж үзээд нэхэмжлэгч Т.*******ийн барилга барих зөвшөөрөл болон архитектур төлөвлөлтийн даалгаврыг иргэдтэй зөвшилцөх хүртэлх хугацаагаар түдгэлзүүлсэн байдаг. Уг гомдол нь нийслэлийн Газар зохион байгуулалтын албанд мөн цохогдож ирсэн. Судалж үзэхэд газрын зөрчилтэй байсан учраас маргаан бүхий захиргааны актыг Газрын тухай хуулийн 40 дүгээр зүйлийн 40.1.5 дах заалтыг үндэслэн хүчингүй болгосон.” гэж тайлбарлах боловч Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжаар газар эзэмших эрхийн гэрчилгээг хүчингүй болгож, газар эзэмших эрхийг дуусгавар болгохдоо иргэдээс ирүүлсэн гомдол, бусад ногоон байгууламж байгуулах талаар үндэслээгүй тул энэ талаарх тайлбарыг хүлээн авах боломжгүй юм.
6. Иймд нэхэмжлэлийн шаардлагыг хангаж, Газрын тухай хуулийн 61 дүгээр зүйлийн 61.1-д зааснаар Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжийг  хүчингүй болгож шийдвэрлэв.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.3, 106.3.1, 106.3.12-д заасныг удирдлага болгон ТОГТООХ нь:

1. Газрын тухай хуулийн 40 дүгээр зүйлийн 40.1.5, 61 дүгээр зүйлийн 61.1, Захиргааны ерөнхий хуулийн 24 дүгээр зүйлийн 24.4-д заасныг тус тус баримтлан иргэн Т.*******ийн нэхэмжлэлийн шаардлагыг бүхэлд нь хангаж, Нийслэлийн Засаг даргын 2023 оны 12 дугаар сарын 28-ны өдрийн А/******* дугаар захирамжийг хүчингүй болгосугай.

2. Захиргааны хэрэг шүүхэд хянан шийдвэрлэх тухай хуулийн 48 дугаар зүйлийн 48.1-д заасны дагуу нэхэмжлэгчийн улсын тэмдэгтийн хураамжид урьдчилан төлсөн 70200 төгрөгийг улсын төсвийн орлогод хэвээр үлдээж, хариуцагчаас 70200 төгрөгийг гаргуулан нэхэмжлэгчид олгосугай.

Захиргааны хэрэг хянан шийдвэрлэх тухай хуулийн 114 дүгээр зүйлийн 114.1-д заасны дагуу хэргийн оролцогчид, тэдгээрийн итгэмжлэгдсэн төлөөлөгч, өмгөөлөгч нь шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор давж заалдах журмаар гомдол гаргах эрхтэй.

 

 

 

ДАРГАЛАГЧ, ШҮҮГЧ                                        Н.ДАМДИНСҮРЭН