Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Хөвсгөл аймаг дахь сум дундын иргэний хэргийн анхан шатны шүүхийн шүүгч Н.Бямбасүрэн би

Нэхэмжлэгч: ***т оршин суух, О Э-ийн М-ын нэхэмжлэлтэй,

Хариуцагч: : ***т оршин суух, Б А-ийн Б-д холбогдох,

Гэрээний бус үүргийн гүйцэтгэлд 720,000 (долоон зуун хорин мянга) төгрөг гаргуулах тухай нэхэмжлэлийг 2024 оны 10 дугаар сарын 09-ний өдөр хүлээн авч, 155/2024/01138/и дугаар индекстэй иргэний хэрэг үүсгэн хянаад,

ТОДОРХОЙЛОХ нь:

Нэхэмжлэгч Э.М- шүүхэд гаргасан нэхэмжлэлдээ: Миний бие Э.М- нь Хөвсгөл аймгийн Чандмань-Өндөр сумын нийгмийн даатгалын байцаагчаар ажиллаж байсан юм.

Намайг тус сумын нийгмийн даатгалын байцаагчаар ажиллаж байх хугацаандаа албан үүрэг, бүрэн эрх, албан тушаалын байдлаа урвуулан ашиглаж тус сумын тэтгэвэр тогтоогдоогүй нэр бүхий 38 иргэнд тэтгэвэр олгож, тэтгэвэр тогтоогдсон нэр бүхий 24 иргэнд илүү тэтгэврийг олгож, тэдгээрт давуу байдал бий болгосон гэм буруутайд тооцож, Хөвсгөл аймаг дахь сум дундын эрүүгийн хэргийн анхан шатны шүүхээс надад эрүүгийн хариуцлага оногдуулсан.

Би тус эрүүгийн хэрэг хянан шийдвэрлэх ажиллагааны явцад нийгмийн даатгалын санд учирсан 42,980,834 төгрөгийг төлсөн ба Хөвсгөл аймаг дахь сум дундын эрүүгийн хэргийн анхан шатны шүүхийн 2023 оны 6 дугаар сарын 29-ний өдрийн 2023/ШЦТ/209 дугаар шийтгэх тогтоолын тогтоох хэсгийн 6 дугаарт тэтгэвэр тогтоогдсон нэр бүхий 24 иргэнд илүү олгосон тэтгэврийн зөрүүг тэднээс иргэний хэрэг шүүхэд хянан шийдвэрлэх журмаар нэхэмжлэх эрхтэйг дурдаж шийдвэрлэсэн байдаг.

Иймд 2020 оны 6 дугаар сарын 14-ний өдрөөс 2021 оны 7 дугаар сарын 05-ны өдрийн хооронд Хөвсгөл аймгийн Чандмань-Өндөр сумын 1 дүгээр багийн иргэн А.Б-д илүү олгосон тэтгэвэр болох 720,000 төгрөгийг Иргэний хуулийн 492 дугаар зүйлийн 492.1-д заасныг үндэслэн түүнээс гаргуулж өгнө үү гэжээ.

Хариуцагч А.Б- шүүхэд ирүүлсэн тайлбартаа: Миний бие А.Б- нь Э.М-ын тус шүүхэд гаргасан нэхэмжлэлтэй танилцаад холбогдох хариу тайлбарыг гаргасан. Тус хариу тайлбарт холбогдох Хөвсгөл аймгийн Нийгмийн даатгалын газраас ирүүлсэн баримтуудтай танилцлаа.

Иймд нэхэмжлэлд дурдсан нэхэмжлэлийн шаардлага болох 720,000 (долоон зуун хорин мянга) төгрөгийг бүрэн төлж барагдуулахаа хүлээн зөвшөөрч байна гэжээ.

Шүүх нэхэмжлэгчийн нэхэмжлэл, хариуцагчийн тайлбар, хэрэгт авагдсан бичгийн нотлох баримтыг шинжлэн судлаад

ҮНДЭСЛЭХ нь:

Нэхэмжлэгч Э.М- нь хариуцагч А.Б-д холбогдуулан гэрээний бус үүргийн гүйцэтгэлд 720,000 (долоон зуун хорин мянга) төгрөг гаргуулах тухай нэхэмжлэлийн шаардлага шүүхэд гаргажээ.

Хэрэг хянан шийдвэрлэх ажиллагааны явцад хариуцагч А.Б- нь нэхэмжлэгчийн нэхэмжлэлийн нийт шаардлага болох 720,000 (долоон зуун хорин мянга) төгрөгийг төлж барагдуулахаар хүлээн зөвшөөрч тайлбар ирүүлсэн байх тул хариуцагчийн зөвшөөрлийг баталж хэргийг хялбаршуулсан журмаар шийдвэрлэх нь Иргэний хуульд нийцсэн, бусдын эрх, эрх чөлөө хуулиар хамгаалагдсан ашиг сонирхлыг хөндөөгүй гэж үзлээ.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгч Э.М-ын улсын тэмдэгтийн хураамжид урьдчилан төлсөн 21,830 (хорин нэгэн мянга найман зуун гуч) төгрөгийг улсын орлогод хэвээр үлдээж, хариуцагч А.Б-аас 10,915 (арван мянга есөн зуун арван тав) төгрөгийг, улсын орлогоос 10,915 (арван мянга есөн зуун арван тав) төгрөгийг тус тус гаргуулан нэхэмжлэгч Э.М-д олгох нь зүйтэй байна.

Иргэний хэрэг шүүхэд хянан шийдвэрлэх тухай хуулийн 75 дугаар зүйл, 74 дүгээр зүйлийн 74.2, 123 дугаар зүйлийн 123.1-т заасныг удирдлага болгон

ЗАХИРАМЖЛАХ нь:

1. Э.М-ын нэхэмжлэлтэй хариуцагч А.Б-д холбогдох гэрээний бус үүргийн гүйцэтгэлд 720,000 (долоон зуун хорин мянга) төгрөг гаргуулах тухай иргэний хэрэгт хариуцагч А.Б- нь нэхэмжлэлийн нийт шаардлага болох 720,000 (долоон зуун хорин мянга) төгрөгийг нэхэмжлэгч Э.М-д төлж барагдуулахаар хүлээн зөвшөөрсөн хариуцагчийн зөвшөөрлийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчийн улсын тэмдэгтийн хураамжид урьдчилан төлсөн 21,830 (хорин нэгэн мянга найман зуун гуч) төгрөгийг улсын орлогод хэвээр үлдээж, хариуцагч А.Б-аас 10,915 (арван мянга есөн зуун арван тав) төгрөгийг, улсын орлогоос 10,915 (арван мянга есөн зуун арван тав) төгрөгийг тус тус гаргуулан нэхэмжлэгч Э.М-д олгосугай.

3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь хэсэгт зааснаар энэхүү захирамжийг хариуцагч нь сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-д зааснаар зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

 

 

 

 

ШҮҮГЧ Н.БЯМБАСҮРЭН