Хариуцагчийн зөвшөөрлийг баталж, хэргийг

хэрэгсэхгүй болгох тухай

 

Х аймаг дахь сум дундын иргэний хэргийн анхан шатны шүүхийн Ерөнхий шүүгч Л.Эрдэнэбат би Х аймгийн М сумын Засаг даргын нэхэмжлэлтэй,  Б.П, С.С нарт холбогдох

Сум хөгжүүлэх сангийн үндсэн зээл, хүүгийн хамт нийт 3.904.246 /гурван сая есөн зуун дөрвөн мянга хоёр зуун дөчин зургаа/ төгрөг гаргуулах тухай нэхэмжлэлийг 2015 оны 10 дугаар сарын 26-ны өдөр хүлээн авч хянаад

ТОДОРХОЙЛОХ нь

Нэхэмжлэгч Х аймгийн М сумын Засаг дарга Ц.Г шүүхэд гаргасан нэхэмжлэлдээ: Монгол улсын Засгийн газрын 2011 оны 134-р тогтоолоор батлагдсан сум бүрт олгогдож буй жижиг дунд үйлдвэрийг дэмжих Сум хөгжүүлэх сан-гаас иргэн Б.П нь 10.000.000 төгрөгийг 2013 оны 3 дугаар сарын 15-ны өдөр 3 жилийн хугацаатай сарын 0.25 хувь, жилийн 3 хувийн хүүтэй Борц үйлдвэрлэлийн чиглэлээр үйл ажиллагаа явуулахаар зээл авч 40 дугаартай гэрээг байгуулсан.

Зээлийн барьцаанд Х аймгийн М сумын 5 дугаар багийн 41-02 тоотын үл хөдлөх хөрөнгийн 000128405 дугаартай 64 м кв талбай бүхий хувийн өвлийн сууцыг, газрын гэрчилгээний хамт барьцаалсан байна.

Зээлдэгч иргэн Б.П 2013, 2014, 2015 онуудад зээлийн гэрээний дагуу санхүүжилтийг зориулалтын дагуу зарцуулах, зээлийг хугацаанд нь төлөх талаар мэдэгдэл хүргүүлж байсан.

Мэдэгдэлд заасан хугацаанд үйл ажиллагаагаа эхлээгүй, зээлийн төлбөр хийгдээгүй тул журмын дагуу сумын Засаг даргын 2015 оны 7 дугаар сарын 27-ны өдрийн А/119 дугаарт Зээл цуцлах захирамж гарсан хэдий ч 2015 оны 9 дүгээр сарын 30-ны өдрийг хүртэл зээл, зээлийн төлбөр бүрэн төлөгдөөгүй болно. Зээлдэгч өнөөдрийг хүртэл Үндсэн зээл 6.453.124 төгрөг, зээлийн хүү 296.876 төгрөг төлсөн байна.

1. Зээлдэгч Б.П нь зээлийн гэрээний үүргээ зөрчиж санхүүжилтийг зориулалт бусаар ашигласан тул зээлийн гэрээний 4.3, сумын Засаг даргын 2015 оны 7 дугаар сарын 27-ны өдрийн А/119 дүгээр захирамжаар зээлийн гэрээг цуцлуулах,

2 2015 оны 10 дугаар сарын 01-ний байдлаар зээлдэгч иргэн Б.П үндсэн зээл 3.456.876 төгрөг, үндсэн зээлийн хүү 293.741 төгрөг, нэмэгдүүлсэн хүү 63.629 төгрөг, нийт 3.904.246 төгрөгийг гаргуулж М сумын Засаг даргын Тамгын газрыг хохиролгүй болгож өгнө үү гэжээ.

Хариуцагч Б.П, С.С нар шүүхэд ирүүлсэн хариу тайлбартаа: Одоо эргэн төлөгдөх үлдэгдэл мөнгө нь 3.904.246 төгрөгийн үлдэгдэл байгаа юм. Сум хөгжүүлэх сангийн мөнгөөр нарийн боовны тоног төхөөрөмж авсан байсан тул энэ үлдэгдэл мөнгөндөө тоног төхөөрөмжөө өгөх хүсэлтэй байна.

Иймд нарийн боовны шарах шүүгээ, гурил зуурагч, хэрчигч, гурил хөөлгөгч, гурил хайрагч эдгээр тоног төхөөрөмжийг хүлээн авч өрийг барагдуулж өгөхийг хүсч байна гэжээ.

Шүүх хуульд заасан журмын дагуу энэ хэрэгт цугларсан бичмэл нотлох баримтууд болон зохигчдын шүүхэд ирүүлсэн тайлбарыг шинжлэн судлаад ҮНДЭСЛЭХ нь:

Нэхэмжлэгч Х аймгийн М сумын Засаг дарга нь хариуцагч Б.П, С.С нараас Сум хөгжүүлэх сангийн үндсэн зээл, хүүгийн хамт нийт 3.904.246 /гурван сая есөн зуун дөрвөн мянга хоёр зуун дөчин зургаа/ төгрөг гаргуулахыг хүссэн нэхэмжлэлийн шаардлага гаргажээ.

Хариуцагч Б.П, С.С нар ....одоо эргэн төлөгдөх үлдэгдэл мөнгө нь 3.904.246 төгрөгийн үлдэгдэл байгаа юм. Сум хөгжүүлэх сангийн мөнгөөр нарийн боовны тоног төхөөрөмж авсан байсан тул энэ үлдэгдэл мөнгөндөө тоног төхөөрөмжөө өгөх хүсэлтэй байна.... гэх тайлбараа шүүхэд ирүүлсэн ба нэхэмжлэгчийн итгэмжлэгдсэн төлөөлөгч нь хариуцагчийн ирүүлсэн хариу тайлбар танилцуулсан энэ нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул хэргийг хялбаршуулсан журмаар хянан шийдвэрлэж, хариуцагч нарын зөвшөөрлийг баталж, хэргийг хэрэгсэхгүй болгох нь зүйтэй байна.

Улсын тэмдэгтийн хураамжийн тухай хуулийн 41 дүгээр зүйлийн 41.1.3-т төсвийн байгууллагын нэхэмжлэл улсын тэмдэгтийн хураамж төлөхөөс чөлөөлөгдөхөөр заасан, нэхэмжлэгч Х аймгийн М сумын Засаг даргын тамгын газар ба төсвийн байгууллага байх тул улсын тэмдэгтийн хураамжаас чөлөөлсөн болно.

Харин Сум хөгжлийн сангийн зээл 3.904.246 төгрөгийн улсын тэмдэгтийн хураамжинд төлөгдөх 77.417 төгрөгийн 50 хувь болох 38.709 төгрөгийг хариуцагч Б.П, С.С нараас гаргуулж улсын орлогод оруулах нь зүйтэй байна гэж үзлээ.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйл, 123 дугаар зүйлийн 123.1-т заасныг удирдлага болгон ЗАХИРАМЖЛАХ нь

1. Нэхэмжлэгч Х аймгийн М сумын Засаг даргын нэхэмжлэлийн шаардлага Сум хөгжүүлэх сангийн зээл 3.904.246 /гурван сая есөн зуун дөрвөн мянга хоёр зуун дөчин зургаа/ төгрөгийг хариуцагч Б.П, С.С нар төлөхөөр хүлээн зөвшөөрснийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, 58 дугаар зүйлийн 58.3, Улсын тэмдэгтийн хураамжийн тухай хуулийн 41 дүгээр зүйлийн 41.1.3, 7 дугаар зүйлийн 7.1.1-д зааснаар нэхэмжлэгч нь улсын тэмдэгтийн хураамжаас чөлөөлөгдсөн, хариуцагч Б.П, С.С нараас улсын тэмдэгтийн хураамжинд 38.709 /гучин найман мянга долоон зуун ес/ төгрөг гаргуулан улсын орлогод оруулсугай.

3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч нь сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-д зааснаар хэргийг хялбаршуулсан журмаар хянан шийдвэрлэсэн тохиолдолд зохигч давж заалдах, хяналтын журмаар гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурьдсугай.

 

 

 

 

ЕРӨНХИЙ ШҮҮГЧ Л.ЭРДЭНЭБАТ