Хариуцагчийн зөвшөөрлийг баталж, хэргийг

хэрэгсэхгүй болгох тухай

 

Х аймаг дахь сум дундын иргэний хэргийн анхан шатны шүүхийн Ерөнхий шүүгч Л.Эрдэнэбат би Х аймгийн М сумын Засаг даргын нэхэмжлэлтэй, Д.А, Б.М нарт холбогдох

Сум хөгжүүлэх сангийн үндсэн зээл, хүүгийн хамт нийт 15.471.502 /арван таван сая дөрвөн зуун далан нэгэн мянга таван зуун хоёр/ төгрөг гаргуулах тухай нэхэмжлэлийг 2015 оны 10 дугаар сарын 26-ны өдөр хүлээн авч хянаад

ТОДОРХОЙЛОХ нь

Нэхэмжлэгч Х аймгийн М сумын Засаг дарга Ц.Г шүүхэд гаргасан нэхэмжлэлдээ: Монгол улсын Засгийн газрын 2011 оны 134-р тогтоолоор батлагдсан сум бүрт олгогдож буй жижиг дунд үйлдвэрийг дэмжих Сум хөгжүүлэх сан-гаас иргэн Д.А нь 15.000.000 төгрөгийг 2014 оны 01 дүгээр сарын 08-ны өдөр 3 жилийн хугацаатай сарын 0.25 хувь, жилийн 3 хувийн хүүтэй цаасан уут үйлдвэрлэлийн чиглэлээр үйл ажиллагаа явуулахаар зээл авч 74 дугаартай гэрээг байгуулсан.

Зээлийн барьцаанд Х аймгийн М сумын 1 дүгээр багийн 24-12 тоотын үл хөдлөх хөрөнгийн 000063146 дугаартай 112 м кв талбай бүхий хувийн өвлийн сууцыг, газрын 0131223 дугаарт гэрчилгээний хамт барьцаалсан байна.

Зээлдэгч иргэн Д.А-д 2014, 2015 онуудад зээлийн гэрээний дагуу санхүүжилтийг зориулалтын дагуу зарцуулах, зээлийг хугацаанд нь төлөх талаар мэдэгдэл хүргүүлж байсан.

Мэдэгдэлд заасан хугацаанд үйл ажиллагаагаа эхлээгүй, зээлийн төлбөр хийгдээгүй тул журмын дагуу сумын Засаг даргын 2015 оны 7 дугаар сарын 27-ны өдрийн А/119 дугаарт Зээл цуцлах захирамж гарсан хэдий ч 2015 оны 9 дүгээр сарын 30-ны өдрийг хүртэл зээл, зээлийн төлбөр бүрэн төлөгдөөгүй болно. Зээлдэгч өнөөдрийг хүртэл Үндсэн зээл 0 төгрөг, зээлийн хүү 293.700 төгрөг төлсөн байна.

1. Зээлдэгч Д.А нь зээлийн гэрээний үүргээ зөрчиж санхүүжилтийг зориулалт бусаар ашигласан тул зээлийн гэрээний 4.3, сумын Засаг даргын 2015 оны 7 дугаар сарын 27-ны өдрийн А/119 дүгээр захирамжаар зээлийн гэрээг цуцлуулах,

2015 оны 10 дугаар сарын 01-ний байдлаар зээлдэгч иргэн Д.Агээс үндсэн зээл 15.000.000 төгрөг, үндсэн зээлийн хүү 412.552 төгрөг, нэмэгдүүлсэн хүү 58.950 төгрөг, нийт 15.471.502 төгрөгийг гаргуулж М сумын Засаг даргын Тамгын газрыг хохиролгүй болгож өгнө үү гэжээ.

Хариуцагч Д.А, Б.М нар шүүхэд ирүүлсэн хариу тайлбартаа: М сумын Засаг даргын тамгын газраас жижиг дунд үйлдвэрлэлийг дэмжих сангаас цаасан сав баглаа, боодлын төслөөр 15.000.000 төгрөг зээлж авсан. Уг үйлдвэрийг 63.000.000 төгрөгөөр оруулж ирсэн боловч зал зээл байхгүй учир үйл ажиллагаа зогсонги байдалд байгаа юм.

М сумын Засаг даргын тамгын газрын жижиг дунд үйлдвэрлэлийг дэмжих сангаас авсан 15.000.000 төгрөгийг хүүний хамт төлөх нь үнэн болно гэжээ.

Шүүх хуульд заасан журмын дагуу энэ хэрэгт цугларсан бичмэл нотлох баримтууд болон зохигчдын шүүхэд ирүүлсэн тайлбарыг шинжлэн судлаад ҮНДЭСЛЭХ нь:

Нэхэмжлэгч Х аймгийн М сумын Засаг дарга нь хариуцагч Д.А, Б.М нараас Сум хөгжүүлэх сангийн үндсэн зээл, хүүгийн хамт нийт 15.471.502 /арван таван сая дөрвөн зуун далан нэгэн мянга таван зуун хоёр/ төгрөг гаргуулахыг хүссэн нэхэмжлэлийн шаардлага гаргажээ.

Хариуцагч Д.А, Б.М нар ....15.000.000 төгрөгийг хүүний хамт төлөх нь үнэн болно.... гэх тайлбараа шүүхэд ирүүлсэн ба нэхэмжлэгчийн итгэмжлэгдсэн төлөөлөгч нь хариуцагчийн ирүүлсэн хариу тайлбар танилцуулсан энэ нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул хэргийг хялбаршуулсан журмаар хянан шийдвэрлэж, хариуцагч нарын зөвшөөрлийг баталж, хэргийг хэрэгсэхгүй болгох нь зүйтэй байна.

Улсын тэмдэгтийн хураамжийн тухай хуулийн 41 дүгээр зүйлийн 41.1.3-т төсвийн байгууллагын нэхэмжлэл улсын тэмдэгтийн хураамж төлөхөөс чөлөөлөгдөхөөр заасан, нэхэмжлэгч Х аймгийн М сумын Засаг даргын тамгын газар ба төсвийн байгууллага байх тул улсын тэмдэгтийн хураамжаас чөлөөлсөн болно.

Харин Сум хөгжлийн сангийн зээл 15.471.502 төгрөгийн улсын тэмдэгтийн хураамжинд төлөгдөх 235.307 төгрөгийн 50 хувь болох 117.654 төгрөгийг хариуцагч Д.А, Б.М нараас гаргуулж улсын орлогод оруулах нь зүйтэй байна гэж үзлээ.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйл, 123 дугаар зүйлийн 123.1-т заасныг удирдлага болгон ЗАХИРАМЖЛАХ нь

1. Нэхэмжлэгч Х аймгийн М сумын Засаг даргын нэхэмжлэлийн шаардлага Сум хөгжүүлэх сангийн зээл 15.471.502 /арван таван сая дөрвөн зуун далан нэгэн мянга таван зуун хоёр/ төгрөгийг хариуцагч Д.А, Д.М нар төлөхөөр хүлээн зөвшөөрснийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, 58 дугаар зүйлийн 58.3, Улсын тэмдэгтийн хураамжийн тухай хуулийн 41 дүгээр зүйлийн 41.1.3, 7 дугаар зүйлийн 7.1.1-д зааснаар нэхэмжлэгч нь улсын тэмдэгтийн хураамжаас чөлөөлөгдсөн, хариуцагч Д.А, Д.М нараас улсын тэмдэгтийн хураамжинд 117.654 /нэг зуун арван долоон мянга зургаан зуун тавин дөрөв/ төгрөг гаргуулан улсын орлогод оруулсугай.

3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч нь сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-д зааснаар хэргийг хялбаршуулсан журмаар хянан шийдвэрлэсэн тохиолдолд зохигч давж заалдах, хяналтын журмаар гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурьдсугай.

 

 

 

 

ЕРӨНХИЙ ШҮҮГЧ Л.ЭРДЭНЭБАТ