2024 12 04 151/ШШ2024/00987

Хариуцагч нэхэмжлэлийн шаардлагыг хүлээн

зөвшөөрснийг баталж, хэргийг хэрэгсэхгүй болгох тухай

 

Төв аймаг дахь сум дундын иргэний хэргийн анхан шатны шүүхийн шүүгч Д.Мөнхбүрэн би,

Нэхэмжлэгч: ....... хот, ...... дүүрэг, ..... хороо, ..... байрлах Ж ХХК /гүйцэтгэх захирал ....../,

Хариуцагч: .... аймаг, ..... сум, ..... баг, ..... тоотод оршин суух Б овогт Б.У

Нэхэмжлэлийн шаардлага: Гэрээний үүрэгт 1,728,285.39 төгрөг гаргуулах тухай нэхэмжлэлийн шаардлага бүхий иргэний хэргийг хянаад,

ТОДОРХОЙЛОХ нь:

1.Нэхэмжлэгч ЖХК нь хариуцагч Б.У-т холбогдуулан нэхэмжлэл гаргаж, шаардлагын үндэслэлээ: 2023 оны 8 дугаар сарын 24-ний өдөр Гар утас, тоног төхөөрөмж зээлээр худалдах гэрээ байгуулан Самсунг А14 маркын гар утсыг ....... дугаарын хамт урьдчилгаа төлбөргүйгээр 12 сарын хугацаанд сар бүр 92,900 төгрөг төлөх нөхцөлтэй авсан. Гэрээний үүргээ сайн дураар биелүүлээгүй. Иймд үлдсэн төлбөр 1,152,190.26 төгрөг, 0,3 хувийн алданги 576,095.13 төгрөг, нийт 1,728,285.39 төгрөгийг гаргуулж өгнө үү гэжээ.

2.Хариуцагч Б.У шүүхэд ирүүлсэн хариу тайлбартаа: ...уг төлбөрийг 2024 оны 12 дугаар сарын 15-ны өдөр 600,000 төгрөг, 2024 оны 01 дүгээр сарын 15-ны өдөр 600,000 төгрөг, 2025 оны 02 дугаар сарын 15-ны өдөр 528,258.39 төгрөгөөр төлж барагдуулна гэжээ.

3.Нэхэмжлэгчээс: нэхэмжлэл (хх-1-3), итгэмжлэл (хх-4), улсын тэмдэгтийн хураамж төлсөн баримт (хх-5, 7), хуулийн этгээдийн улсын бүртгэлийн гэрчилээ (хх-6), зээлийн эргэн төлөлтийн график (хх-8-11) гар утас, төхөөрөмж зээлээр худалдан авах гэрээ (хх-12-13), хариуцагчийн хариу тайлбар (хх-19)-ыг шүүхэд гаргаж өгсөн байна.

ҮНДЭСЛЭХ нь:

1.Хариуцагч нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгох үндэслэлтэй гэж үзэв.

2.Нэхэмжлэгч Ж ХК нь хариуцагч Б.У-д холбогдуулан нэхэмжлэл гаргаж, шаардлагын үндэслэлээ дараах байдлаар тодорхойлсон. Үүнд: 2023 оны 8 дугаар сарын 24-ний өдөр Самсунг А14 маркын гар утсыг ...... дугаарын хамт урьдчилгаа төлбөргүйгээр 12 сарын хугацаанд авсан. Иймд үлдсэн төлбөр 1,152,190.26 төгрөг, 0,3 хувийн алданги 576,095.13 төгрөг, нийт 1,728,285.39 төгрөгийг гаргуулж өгнө үү гэжээ.

3.Иргэний хэрэг шүүхэд хянан шийдвэрлэх тухай хуулийн 36 дугаар зүйлийн 36.2-т зааснаар Ж ХХК нь 2024 оны 10 дугаар сарын 28-ны өдрийн 01/1617 дугаар итгэмжлэлээр шүүхэд төлөөлөх эрхийг Т.Т олгожээ. /хх-4/

4.Иргэний хэрэг шүүхэд хянан шийдвэрлэх тухай хуулийн 26 дугаар зүйлийн 26.3-т зааснаар хариуцагч нь нэхэмжлэлийн шаардлагыг хүлээн зөвшөөрөх эрхтэй.

Хариуцагч Б.У нь нэхэмжлэлийн шаардлага 1,728,285.39 төгрөгийг бүхэлд нь хүлээн зөвшөөрч, 2024 оны 12 дугаар сарын 15-ны өдөр 600,000 төгрөг, 2024 оны 01 дүгээр сарын 15-ны өдөр 600,000 төгрөг, 2025 оны 02 дугаар сарын 15-ны өдөр 528,258.39 төгрөгөөр төлж барагдуулахаар зөвшөөрсөн нь түүний хариу тайлбараар нотлогдож байна. /хх-19/

5.Хариуцагчийн зөвшөөрөл нь Иргэний хуульд нийцсэн, гуравдагч этгээдийн эрх ашгийг хөндөөгүй байх тул Иргэний хэрэг шүүхэд хянан шийдвэрлэх тухай хуулийн 74 дүгээр зүйлд зааснаар хэргийг хялбаршуулсан журмаар хянан шийдвэрлэх үндэслэлтэй гэж үзлээ.

6.Улсын тэмдэгтийн хураамжийн хэмжээг тал хувиар бууруулан тогтоож, нэхэмжлэгчийн улсын тэмдэгтийн хураамжид урьдчилан төлсөн 42,603 төгрөгөөс 21,301.50 төгрөгийг улсын орлогод хэвээр үлдээж, төрийн сангаас 21,301.50 төгрөг, хариуцагч Б.У-с 21,301.50 төгрөгийг гаргуулан нэхэмжлэгчид олгож шийдвэрлэв.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйл, 75⁸ дугаар зүйлийн 75⁸.1-д заасныг удирдлага болгон ЗАХИРАМЖЛАХ нь:

1.Хариуцагч Б.У нь 2024 оны 12 дугаар сарын 15-ны өдөр 600,000 төгрөг, 2024 оны 01 дүгээр сарын 15-ны өдөр 600,000 төгрөг, 2025 оны 02 дугаар сарын 15-ны өдөр 528,258.39 төгрөгийг нэхэмжлэгч Ж ХХК-д төлж барагдуулахаар хүлээн зөвшөөрснийг баталж, хэргийг хэрэгсэхгүй болгосугай.

2.Улсын тэмдэгтийн хураамжийн тухай хуулийн 7 дугаар зүйлийн 7.1.1, Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, 60 дугаар зүйлийн 60.1, 56 дугаар зүйлийн 56.1-д зааснаар нэхэмжлэгчийн улсын тэмдэгтийн хураамжид урьдчилан төлсөн 42,603 төгрөгөөс 21,301.50 төгрөгийг улсын орлогод хэвээр үлдээж, төрийн сангаас 21,301.50 төгрөг, хариуцагч Б.У-с 21,301.50 төгрөгийг гаргуулан нэхэмжлэгч Ж ХХК-д олгосугай.

3.Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч нь сайн дураар биелүүлээгүй бол шүүхийн шийдвэрийн нэгэн адил албадан гүйцэтгүүлэх эрхтэйг сануулсугай.

4.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-т зааснаар зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг тайлбарласугай.

 

 

 

 

ШҮҮГЧ Д.МӨНХБҮРЭН