Нийслэл дэх Захиргааны хэргийн анхан шатны шүүхийн шүүгч Ц.Сайхантуяа би, С.Б*******ы нэхэмжлэлтэй, Гаалийн ерөнхий газрын даргад холбогдох захиргааны хэргийг хянаад,

ТОДОРХОЙЛОХ нь:

Нэхэмжлэгч С.Б******* нь шүүхэд бичгээр гаргасан хүсэлтдээ:  

“...С*******гийн Б******* миний бие Гаалийн ерөнхий газрын даргад холбогдуулан гаргасан өмнө эрхлэж байсан албан тушаалд эргүүлэн томилуулах, тушаал хүчингүй болгуулах, сар бүрийн цалингийн болон улирлын үр дүнгийн урамшуулалын мөнгөн зөрүүг нөхөн төлүүлэх зэрэг нэхэмжлэлийн шаардлагаасаа татгалзаж байна” гэв. 

ҮНДЭСЛЭХ нь:

Нэхэмжлэгч С.Б******* нь Гаалийн ерөнхий газрын даргад холбогдуулан гаргасан “...Гааль татварын ерөнхий газрын даргын 2016 оны Б/456 дугаар тушаалыг хүчингүй болгох, өмнө эрхлэж байсан албан тушаалд эргүүлэн томилж, сар бүр авч байсан цалин болох 1.231.871,10 төгрөгийг бууруулан 1.135.232,6 төгрөг болгон зөрүү 96.943,3 төгрөгийн хохирлын мөнгийг нөхөн төлүүлж улирлын үр дүнгийн урамшууллын зөрүү зэргийг нөхөн олгуулах” тухай нэхэмжлэлээсээ татгалзах хүсэлтийг шүүхэд бичгээр гаргасан байна.

Захиргааны хэрэг шүүхэд хянан шийдвэрлэх тухай хуулийн 20 дугаар зүйлийн 20.1.1-д “...нэхэмжлэгч нь нэхэмжлэлээ өөрчлөх, түүний шаардлагын хэмжээг ихэсгэх буюу багасгах, нэхэмжлэлээсээ бүхэлд нь эсхүл хэсэгчлэн татгалзах, хариуцагчтай эвлэрэх эрхтэй”, мөн хуулийн 66 дугаар зүйлийн 66.1-д “нэхэмжлэгч хэрэг хянан шийдвэрлэх ажиллагааны аль ч үе шатанд нэхэмжлэлээсээ бүхэлд нь, эсхүл хэсэгчлэн татгалзаж болно”, 66.2-т “...Нэхэмжлэгч нь нэхэмжлэлээсээ татгалзсанаа бичгээр илэрхийлэх...” гэж тус тус заасны дагуу С.Б******* нь нэхэмжлэлээсээ татгалзсанаа шүүхэд бичгээр хүсэлт гаргаж, илэрхийлсэн байх тул нэхэмжлэгчийн нэхэмжлэлээсээ татгалзсаныг баталж, хэргийг хэрэгсэхгүй болгож шийдвэрлэх нь зүйтэй гэж шүүх үзлээ. 

Мөн нэхэмжлэгч С.Б*******д Захиргааны хэрэг шүүхэд хянан шийдвэрлэх тухай хуулийн 66 дугаар зүйлийн 66.4-д зааснаар “нэхэмжлэгч нэхэмжлэлээсээ татгалзсан бол уг асуудлаар дахин шүүхэд нэхэмжлэл гаргах эрхээ алдах”, 69 дүгээр зүйлийн 69.2-т зааснаар “...хэргийг хэрэгсэхгүй болгосон шүүгчийн захирамжид гомдол гаргах эрхгүй” талаар тайлбарласан бөгөөд нэхэмжлэгч нь ойлгож, түүнийг зөвшөөрч байгаагаа илэрхийлсэн болно.

 

Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1-д заасныг удирдлага болгон ЗАХИРАМЖЛАХ нь:

 

1. Захиргааны хэрэг шүүхэд хянан шийдвэрлэх тухай хуулийн 66 дугаар зүйлийн 66.1 дэх хэсэгт заасныг баримтлан С.Б*******ы нэхэмжлэлтэй Гаалийн ерөнхий газрын даргад холбогдох захиргааны хэргийн нэхэмжлэгч нь “...Гааль татварын ерөнхий газрын даргын 2016 оны Б/456 дугаар тушаалыг хүчингүй болгох, өмнө эрхлэж байсан албан тушаалд эргүүлэн томилж, сар бүр авч байсан цалин болох 1.231.871,10 төгрөгийг бууруулан 1.135.232,6 төгрөг болгон зөрүү 96.943,3 төгрөгийн хохирлын мөнгийг нөхөн төлүүлж улирлын үр дүнгийн урамшууллын зөрүү зэргийг нөхөн олгуулах” тухай нэхэмжлэлээсээ татгалзсаныг баталж, хэргийг хэрэгсэхгүй болгосугай.

2. Захиргааны хэрэг шүүхэд хянан шийдвэрлэх тухай хуулийн 50 дугаар зүйлийн 50.5, 69 дүгээр зүйлийн 69.1-д заасны дагуу нэхэмжлэгч С.Б*******ы улсын тэмдэгтийн хураамжид төлсөн 70200 төгрөгийг улсын орлогод хэвээр үлдээсүгэй. 

Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2-т зааснаар хэргийн оролцогч, тэдгээрийн төлөөлөгч буюу өмгөөлөгч хэргийг хэрэгсэхгүй болгосон шүүгчийн захирамжид давж заалдах журмаар гомдол гаргах эрхгүй бөгөөд энэхүү шүүгчийн захирамжийг шүүхийн шийдвэрийн нэгэн адил биелүүлэхийг дурдсугай.  

 

 

ШҮҮГЧ                                     Ц.САЙХАНТУЯА