Хариуцагч нэхэмжлэлийн шаардлагыг

хүлээн зөвшөөрснийг баталж, хэргийг

хэрэгсэхгүй болгох тухай

 

Төв аймаг дахь Захиргааны хэргийн анхан шатны шүүхийн Ерөнхий шүүгч Д.Зоригтбаатар би Тээврийн прокурорын газрын хяналтын прокурорын дүгнэлтээр Чингис хаан олон улсын нисэх буудал, Гаалийн газрын хяналт шалгалтын албаны гаалийн улсын байцаагч Ч.Уранчимэгт холбогдох прокурорын дүгнэлтээр үүссэн захиргааны хэргийг хянаад

ТОДОРХОЙЛОХ нь:

Хариуцагч Ч.Уранчимэг нь шүүхэд ирүүлсэн хариу тайлбартаа:

Чадраабашид овогтой Уранчимэг миний бие Чингис хаан олон улсын нисэх буудал дахь Гаалийн газрын хяналт шалгалтын албаны гаалийн улсын байцаагчаар ажилладаг.

0091183 дугаартай шийтгэлийн хуудас (маягт 2) холбогдогч Ивээлт талим ХХК-ийн илэрсэн зөрчилд Зөрчлийн тухай хуулийн 11.21 дүгээр зүйлийн 1 дэх хэсгийн 1.1 дэх заалтад заасны дагуу шийтгэл оногдуулахдаа шийтгэлийн хуудсанд хуулийн заалтны бичиглэлийн алдаа гаргаж бичсэнээ хүлээн зөвшөөрч байна.

Тиймээс шийтгэлийн хуудсанд өөрчлөлт оруулахад татгалзах зүйлгүй болно. Тухайн захиргааны хэргийг хялбаршуулсан журмаар шийдвэрлэхэд татгалзах зүйлгүй гэж хариу тайлбар гаргажээ.

ҮНДЭСЛЭХ нь:

Хариуцагч Чингис Хаан олон улсын нисэх буудал, Гаалийн газрын хяналт шалгалтын албаны гаалийн улсын байцаагч Ч.Уранчимэг нь 2023 оны 12 дугаар сарын 27-ны өдрийн хуулийн этгээд Ивээлт талим ХХК-д оногдуулсан 0091183 дугаартай шийтгэлийн хуудсанд хуулийн зүйл заалтыг Зөрчлийн тухай хуулийн 11.21.1.1 гэж бичсэн байна.

Тээврийн прокурорын газрын хяналтын прокурор дээрх хуулийн заалтыг Зөрчлийн тухай хуулийн 11.21 дүгээр зүйлийн 1 дэх хэсгийн 1.1 дэх заалт гэж өөрчлөлт оруулах прокурорын дүгнэлт бичжээ.

Хариуцагч Ч.Уранчимэг нь уг шаардлагыг хүлээн зөвшөөрсөн байх тул Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1 дэх хэсэгт Хариуцагч нэхэмжлэлийн шаардлагыг бүхэлд нь хүлээн зөвшөөрсөн нь бусад этгээдийн эрх, эрх чөлөө, хууль ёсны ашиг сонирхлыг хөндөхөөргүй, хуульд харшлаагүй байвал шүүх хариуцагчийн зөвшөөрлийг баталж, хэргийг хэрэгсэхгүй болгоно гэж заасны дагуу хариуцагчийн зөвшөөрлийг баталж, холбогдох хэргийг хэрэгсэхгүй болгож шийдвэрлэх нь зүйтэй гэж шүүх үзлээ.

 Захиргааны хэрэг шүүхэд хянан шийдвэрлэх тухай хуулийн 111 дүгээр зүйлийн 111.1 дэх хэсэгт заасныг удирдлага болгон ЗАХИРАМЖЛАХ нь:

1. Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1 дэх хэсэгт заасныг баримтлан Тээврийн прокурорын газрын хяналтын прокурор В.Батдэлгэрийн дүгнэлттэй Чингис Хаан олон улсын нисэх буудал, Гаалийн газрын хяналт шалгалтын албаны гаалийн улсын байцаагч Ч.Уранчимэгт холбогдох захиргааны хэргийн прокурорын дүгнэлтийн шаардлага болох Чингис Хаан олон улсын нисэх буудал, Гаалийн газрын хяналт шалгалтын албаны гаалийн улсын байцаагчийн 2023 оны 12 дугаар сарын 17-ны өдрийн 0091183 дугаартай шийтгэлийн хуудсанд 11.21.1.1 гэж бичсэнийг Зөрчлийн тухай хуулийн 11.21 дүгээр зүйлийн 1 дэх хэсгийн 1.1 дэх заалт гэж өөрчлөлт оруулах шаардлагыг хариуцагч хүлээн зөвшөөрснийг баталж, холбогдох хэргийг хэрэгсэхгүй болгосугай.

2. Улсын тэмдэгтийн хураамжийн тухай хуулийн 41 дүгээр зүйлийн 41.1.14 дэх заалтад заасны дагуу Тээврийн прокурорын газрын хяналтын прокурорын дүгнэлт улсын тэмдэгтийн хураамжаас чөлөөлөгдсөн болохыг дурдсугай.

3. Захиргааны хэрэг шүүхэд хянан шийдвэрлэх тухай хуулийн 66 дугаар зүйлийн 66.4 дэх хэсэгт зааснаар нэхэмжлэгч болон хариуцагч нар шүүгчийн захирамжид гомдол гаргах эрхгүй бөгөөд шүүгчийн захирамж нь шүүхийн шийдвэрийн нэгэн адил биелэгдэхийг мэдэгдсүгэй. 

 

 

 

 

ЕРӨНХИЙ ШҮҮГЧ Д.ЗОРИГТБААТАР