Хариуцагч нарын зөвшөөрлийг баталж

хэргийг хэрэгсэхгүй болгох тухай

 

Хөвсгөл аймаг дахь сум дундын иргэний хэргийн анхан шатны шүүхийн шүүх хуралдааныг шүүгч Н.Бямбасүрэн даргалж тус шүүхийн шүүх хуралдааны танхимд нээлттэй явуулсан хуралдаанаар

Нэхэмжлэгч: Хаан банкны Хөвсгөл салбарын нэхэмжлэлтэй,

Хариуцагч: Улаанбаатар хотод **** оршин суух Б.А

Хариуцагч: Хөвсгөл аймгийн Мөрөн суманд ***оршин суух Б.А  нарт холбогдох,

Зээлийн төлбөр 45.330.425 /дөчин таван сая гурван зуун гучин мянга дөрвөн зуун хорин тав/ төгрөг гаргуулахыг хүссэн нэхэмжлэлийг 2016 оны 08 дугаар сарын 30-ны өдөр хүлээн авч, 2016 оны 09 дүгээр сарын 02-ны өдөр 155/2016/01085/И дугаар индекстэй иргэний хэрэг үүсгэн хянаад:

ТОДОРХОЙЛОХ нь:

Нэхэмжлэгч Хаан банкны Хөвсгөл салбар шүүхэд гаргасан нэхэмжлэл болон шүүх хуралдаанд гаргасан тайлбартаа: Г.Х нь Хаан банкны Хөвсгөл салбараас 44.000.000 /дөичн дөрвөн сая/ төгрөгийн зээлийг 2015 оны 07 сарын 06-ны өдөр ЗГ-15/1197 дугаартай Зээлийн болон барьцаа, баталгаат ипотекийн гэрээ байгуулан Эргэлтийн хөрөнгөө нэмэгдүүлэх зориулалтаар, шугамаар ашиглаж, төлөх хуваарьтай авсан. Зээлийн барьцаанд: Бизнесийн бараа материал /хүнс болон хувцас/, 2001 онд үйлдвэрлэгдсэн 66-88 ХӨВ улсын дугаартай Toyota Land Criuser-100 маркийн сувдан цагаан өнгийн суудлын автомашин, Мөрөн сумын 08 дугаар багт байрлах Ганзам ХҮТ-ийн Ү-1723001082 дугаартай, 328,2 м.кв талбай бүхий үйлчилгээний барилгыг 937 м.кв талбайтай, эзэмших эрхтэй газрын хамт барьцаалсан. Зээлийн гэрээний 2.5.1-д заасны дагуу 2015 оны 07-р сарын 25-ны өдрөөс 2016 оны 06-р сарын 25-ны өдрийг хүртэл хүүгийн төлбөрийг 1-4 хоног хугацаа хэтрүүлэн төлж байсан ба зээлийн гэрээний 2.5.2-т заасан нөхцөлөөр 2016 оны 06-р сарын 25-ны өдөр зээл бүрэн төлөгдөж дуусах байтал төлөлт хийгдэлгүй өнөөдрийг хүртэл 67 хоног хугацаа хэтрүүлэн, зээлдэгч зээлийн гэрээгээр хүлээсэн үүргээ биелүүлэхгүй, зээлийн төлбөрийг барагдуулаагүй байна. Иймээс зээлдэгч Г.Х , Г.Х  нараас 2016 оны 08 дугаар сарын 30-ны өдрийн байдлаар дараах хэмжээний төлбөрийг гаргуулахаар энэхүү нэхэмжлэлийн шаардлага гаргаж байна. Үүнд: Үндсэн зээлийн төлбөр 41,860,517.82 төгрөг, зээлийн хүүгийн төлбөр 2,865,483.52 төгрөг, нэмэгдүүлсэн хүүгийн төлбөр 575,748.26 төгрөг, коммитмент хүүгийн төлбөр 28,676.31 төгрөг, нийт 45,330,425.91 төгрөг гаргуулж өгнө үү гэв.

Хариуцагч Г.Х , Г.Х  нар шүүхэд гаргасан хариу тайлбартаа: Иргэн Г.Х миний бие 2015 оны 07 сарын 06-ны өдөр хөвсгөл Хаан банкнаас 44.000.000 /дөчин дөрвөн сая/ төгрөгний шугамын зээл авч эргэлтийн хөрөнгөө нэмэгдүүлж Турк улс болон Хятад улсаас бараа татан авчирсан юм. Уг зээлийг төлөх хугацаанд эдийн засгийн хямрал болж барааны гүйлгээ эрч муудаж, орлого орохгүй болж, зээлээ төлж чадахгүйд хүрсэн юм. Улс оронд эдийн засгийн хямрал гайгүй болоод орлого маань хуучин шигээ орвол зээлийг төлөх болно. Манай Ганзам дэлгүүр нь барааны үлдэгдэл маш ихтэй байгаа. Бараагаа зарж орлогоо оруулж байж л зээлийг төлнө гэжээ.

Хариуцагч Г.Х , Г.Х  нар шүүх хуралдаанд гаргасан тайлбартаа: Зээл авсан учир зээлийг төлж барагдуулна. Манайд 200.000.000 төгрөгийн бараа байгаа ба хямралын үе ирсэн учир зарагдахгүй байна. Хэрвээ бараа зарагдаж байсан бол зээлийг хугацаанд нь төлөх байсан гэв.

ҮНДЭСЛЭХ нь:

     Нэхэмжлэгч Хаан банкны Хөвсгөл салбар нь хариуцагч Г.Х , Г.Х  нарт холбогдох 45.330.425 /дөчин таван сая гурван зуун гучин мянга дөрвөн зуун хорин тав/ төгрөг гаргуулахыг хүссэн нэхэмжлэлийг шүүхэд гаргажээ.

Шүүх хуралдааны явцад хариуцагч Г.Х , Г.Х  нар нь нэхэмжлэгчийн нэхэмжлэлийн шаардлага болох 45.330.425 /дөчин таван сая гурван зуун гучин мянга дөрвөн зуун хорин тав/ төгрөгийг төлөхийг зөвшөөрсөн тайлбарыг шүүх хуралдаанд гаргаж байх ба энэ нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй байх тул хариуцагч нарын зөвшөөрлийг баталж, хэргийг хэрэгсэхгүй болгож шийдвэрлэх нь зүйтэй байна.

Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.6, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгч Хаан банкны Хөвсгөл салбарын улсын тэмдэгтийн хураамжид урьдчилан төлсөн 384.602 /гурван зуун наян дөрвөн мянга зургаан зуун хоёр/ төгрөгийг улсын орлогод хэвээр үлдээж, хариуцагч Г.Х , Г.Х  нараас 384.602 /гурван зуун наян дөрвөн мянга зургаан зуун хоёр/ төгрөгийг гаргуулж  нэхэмжлэгч Хаан банкны Хөвсгөл салбарт олгож шийдвэрлэв.

Иргэний хэрэг шүүхэд хянан шийдвэрлэх тухай хуулийн 123 дугаар зүйлийн 123.1-д заасныг удирдлага болгон

ЗАХИРАМЖЛАХ нь:

1. Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.5-д зааснаар нэхэмжлэгч Хаан банкны Хөвсгөл салбарын нэхэмжилсэн, 45.330.425 /дөчин таван сая гурван зуун гучин мянга дөрвөн зуун хорин тав/ төгрөг гаргуулах тухай нэхэмжлэлийн шаардлагыг хариуцагч Г.Х , Г.Х  нар зөвшөөрсөн хариуцагч нарын зөвшөөрлийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.6, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчийн улсын тэмдэгтийн хураамжид урьдчилан төлсөн 384.602 /гурван зуун наян дөрвөн мянга зургаан зуун хоёр/ төгрөгийг улсын орлогод хэвээр үлдээж хариуцагч Г.Х , Г.Х  нараас 384.602 /гурван зуун наян дөрвөн мянга зургаан зуун хоёр/ төгрөгийг гаргуулж нэхэмжлэгч Хаан банкны Хөвсгөл салбарт олгосугай.

3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг дурдсугай.

4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-т зааснаар зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

  

 

 

ДАРГАЛАГЧ, ШҮҮГЧ Н.БЯМБАСҮРЭН