2022 01 10 103/ШШ2022/00020

 

 

МОНГОЛ УЛСЫН НЭРИЙН ӨМНӨӨС

 

Багануур дүүргийн Иргэний хэргийн анхан шатны шүүхийн шүүгч Г.Солонго даргалж, тус шүүхийн шүүх хуралдааны танхимд хийсэн иргэний хэргийн шүүх хуралдаанаар

Нэхэмжлэгч: Багануур дүүргийн ..... дугаар хороо, Наран хороолол, .... байрны.... тоотод оршин суух, ******* ******* ******* *******ын нэхэмжлэлтэй,

Хариуцагч: Багануур дүүргийн .... дүгээр хороо, .... дүгээр гудамжны ..... тоотод оршин суух, ******* ******* ******* *******д холбогдох

Зээлийн гэрээний үүрэгт 3.130.000 төгрөг гаргуулах тухай иргэний хэргийг авч хянан хэлэлцэв.

Шүүх хуралдааны оролцогчид:

Нэхэмжлэгч Ц.*******,

Хариуцагч Ю.*******,

Хариуцагчийн өмгөөлөгч Д.Цолмон,

Шүүх хуралдааны нарийн бичгийн дарга Ж.Эрдэнэсувд нар оролцов.

 

ТОДОРХОЙЛОХ нь:

Нэхэмжлэгч Ц.******* Ю.*******д холбогдуулан зээлийн гэрээний үүрэгт 3.130.000 төгрөг гаргуулах тухай нэхэмжлэл гаргасан. Нэхэмжлэгч нэхэмжлэлийн шаардлагын үндэслэлээ дараах байдлаар тодорхойлж байна. Үүнд:

Миний бие 2019 оны 10 дугаар сарын 15-ны өдөр Ю.*******гийн хүсэлтээр зээлийн гэрээ байгуулж 1.000.000 төгрөгийг хоногийн 3 хувийн хүүтэй, нэг хоногийн хугацаатай зээлдүүлсэн. Зээлийн гэрээг 3 хувь үйлдэн нотариатаар гэрчлүүлж, нэг хувийг нотариатчид үлдээж, бид хоёр тус бүр зээлийн гэрээний нэг хувийг авсан. Зээлийн гэрээ байгуулсны дараа Ю.*******гийн Хаан банкны дансанд 1.000.000 төгрөгийг шилжүүлсэн. Ю.******* тухайн зээлийг гэрээний дагуу цагт нь буцаан төлж 2.000.000 төгрөг дахин зээлээч хэмээн гуйсан тул Ю.*******г эхний удаа зээлээ цаг тухайд нь төлсөнд итгэж зээлийн гэрээ байгуулахгүйгээр 2019 оны 10 дугаар сарын 17-ны өдөр 2.000.000 төгрөгийг хоногийн 3 хувийн хүүтэй нэг сарын хугацаатай зээлсэн. Хариуцагч хэлэхдээ Би Хэрлэн худалдааны төвд цүнхний болон бэлэг дурсгалын лангуу ажиллуулдаг. Надад 2.000.000 хэрэгтэй байна би танаас энэ мөнгийг хоногийн 3 хувийн хүүтэй зээлье... хэмээн хэлэхэд нь би ажил хийдэггүй, тэтгэвэр авдаггүй тул мөнгө зээлье хэдэн төгрөг нь хэрэгтэй юм гэж бодоод хүүхдүүдээсээ мөнгө авч өгсөн. Зээлийн хугацаа дуусахад Ю.******* зээл, зээлийн хүүг төлөөгүй. Түүнээс зээлийн гэрээний үүргээ биелүүлэхийг шаардахад Мөнгөгүй байна, лангуу орлогогүй, самарт явж ирээд төлье... гэх шалтаг хэлсээр хоёр жил боллоо. Хариуцагч 2019 оны 11 дүгээр сарын 28-нд 200.000 төгрөг, 2020 оны 01 дүгээр сарын 17-нд 200.000 төгрөг, 2020 оны 02 дугаар сарын 08-ны өдөр 170.000, 2020 оны 08 дугаар сарын 20-нд 50.000 төгрөг, 2020.10.21-нд 50.000 төгрөг, нийт 670.000 төгрөгийг надад өгсөн. Зээлийн төлбөр болох 3.800.000 төгрөгөөс хариуцагчийн өгсөн 670.000 төгрөгийг хасаад, 3.130.000 төгрөгийг Ю.*******гаас гаргуулж өгнө үү гэв.

Хариуцагч Ю.******* хариу тайлбартаа: Миний бие 2019 оны 10 дугаар сарын 18-ны өдөр Ц.*******аас 2.000.000 төгрөгийг бэлнээр авсан. Би Ц.*******т зээлийн хүү 60.000 төгрөг, үүнээс гадна нийт 970.000 төгрөгийг өгсөн. Нэхэмжлэгчээс энэ мөнгийг хүүтэй зээлгүй тул хүү төлөхгүй, түүнд өгсөн 970.000 төгрөгийг хасаад үлдэх 1.030.000 төгрөгийг төлнө гэв.

Нэхэмжлэгчээс өөрийн болон хариуцагч Ю.*******гийн иргэний үнэмлэхийн хуулбар, 2019 оны 10 дугаар сарын 15-ны өдрийн 1889 дугаартай 1.000.000 төгрөгийн зээлийн гэрээ, 1.000.000 төгрөг шилжүүлсэн Хаан банкны мөнгөн шилжүүлэгийн баримт, өөрийн Хаан банкны......тоот депозит дансны дэлгэрэнгүй хуулга зэрэг баримт /хх-ийн 5-10, 19-58 дугаар хуудас/,

Хариуцагчаас өөрийн Хаан банкны ..... тоот депозит дансны дэлгэрэнгүй хуулга, амбулторын карт, хууль зүйн туслалцаа үзүүлэх гэрээ, эмнэлгийн магадлагаа зэрэг баримт /хх-ийн 60-63, 70-71 дүгээр хуудас/,

Хариуцагчийн өмгөөлөгчийн хүсэлтээр нэхэмжлэгч Ц.******* нь Хаан банкинд хэдэн данс эзэмшдэг эсэх тодорхойлолт, түүний 2019 оны 10 дугаар сарын 17-ны өдрөөс 2020 оны 12 дугаар сарын 31-ний өдөр хүртэлх Хаан банкны орлого зарлагын гүйлгээний хуулга /хх-ийн 79-104 дүгээр хуудас/ баримтуудыг шүүх бүрдүүлсэн байна.

ҮНДЭСЛЭХ нь:

Нэхэмжлэгч Ц.*******ын нэхэмжлэлээс 1.330.000 төгрөгийг хангаж, 1.800.000 төгрөгийг хэрэгсэхгүй болгох үндэслэлтэй гэж үзэв.

Нэхэмжлэгч Ц.******* нэхэмжлэлийн шаардлагын үндэслэлээ 2.000.000 төгрөгийг хоногийн 3 хувийн хүүтэй, 1 сарын хугацаатай зээлсэн тул үндсэн зээл, хүүгээ буцаан гаргуулна гэж тодорхойлсон.

Хариуцагч зээлийн гэрээгээр хүү тохироогүй тул хүү төлөх үндэслэлгүй, нэхэмжлэгчид 970.000 төгрөгийг буцаан өгсөн, үлдэх 1.030.000 төгрөгийг төлнө гэж маргаж байна.

Хэрэгт авагдсан болон шүүх хуралдаанаар хэлэлцэгдсэн нотлох баримтаар дараах үйл баримт тогтоогдож байна.

Хариуцагч Ю.******* нь нэхэмжлэгч Ц.*******аас 2.000.000 төгрөг зээлж авсан талаар маргаагүй бөгөөд зохигчдын хооронд Иргэний хуулийн 281 дүгээр зүйлийн 281.1-д заасан зээлийн гэрээний харилцаа үүссэн. Мөн хуулийн дагуу зээлдүүлэгч зээлийн төлбөрөө шаардах эрхтэй байна.

Хавтаст хэрэгт 2.000.000 төгрөгийн зээлийн гэрээ авагдаагүй, талууд гэрээ байгуулаагүй гэж тайлбарлаж байгаа тул Иргэний хуулийн 282 дугаар зүйлийн 282.3.-т Хуульд өөрөөр заагаагүй бол хүү тогтоосон бол зээлийн гэрээг бичгээр хийнэ. Энэ шаардлагыг хангаагүй бол хүү авах эрхээ алдана гэж заасны дагуу Ц.******* зээлийн гэрээний дагуу хүү шаардах эрхгүй байна.

Зээлдүүлэгчийн Хаан банкны орлого, зарлагын гүйлгээний баримтаас үзэхэд зээлдэгч нь 2019 оны 11 дүгээр сарын 28-нд 200.000 төгрөг, 2020 оны 01 дүгээр сарын 17-нд 200.000 төгрөг, 2020 оны 02 дугаар сарын 18-нд 170.000 төгрөг, 2020 оны 8 дугаар сарын 20-нд 50.000 төгрөг, 2020 оны 10 дугаар сарын 21-нд 50.000 төгрөг, нийт 670.000 төгрөгийг зээлдүүлэгчид төлсөн байна. /хх-ийн 82, 84, 85, 95, 99 дүгээр тал/

Хариуцагч Ю.******* 970.000 төгрөгийг нэхэмжлэгч Ц.*******т өгсөн гэх боловч баримтаар 670.000 төгрөг өгсөн нь тогтоодсон, 300.000 төгрөгийг зээлдүүлэгчид өгсөн гэх боловч энэ талаар баримтаар нотлоогүй, Иргэний хэрэг шүүхэд хянан шийдвэрлэх тухай хуулийн 25 дугаар зүйлийн 25.2.2, 38 дугаар зүйлийн 38.1-д заасан үүргээ биелүүлээгүй байна.

Иймд хариуцагч Ю.*******гаас 1.330.000 төгрөг гаргуулж, нэхэмжлэгч Ц.*******т олгож, нэхэмжлэлийн шаардлагаас үлдэх 1.800.000 төгрөгийг хэрэгсэхгүй болгож шийдвэрлэв.

Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.2-т Нэхэмжлэлийн шаардлагын зарим хэсгийг хангасан бол шүүхийн зардлыг тэр хэмжээгээр хариуцагч буюу нэхэмжлэгчид хуваарилан хариуцуулна гэж заасны дагуу нэхэмжлэгчийн улсын тэмдэгтийн хураамжид төлсөн 75.750 төгрөгийг улсын орлогод хэвээр үлдээж, хариуцагч Ю.*******гаас 36.230 төгрөг гаргуулж, нэхэмжлэгч Ц.*******т олгож шийдвэрлэв.

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.2, 116, 118 дугаар зүйлүүдэд заасныг тус тус удирдлага болгон ТОГТООХ нь:

1 Иргэний хуулийн 281 дүгээр зүйлийн 281.1, 282 дугаар зүйлийн 282.3-т зааснаар хариуцагч Ю.*******гаас 1.330.000 төгрөг гаргуулж, нэхэмжлэгч Ц.*******т олгож, нэхэмжлэлийн шаардлагаас үлдэх 1.800.000 төгрөгийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.2, Улсын тэмдэгтийн хураамжийн тухай хуулийн 7 дугаар зүйлийн 7.1.1 дэх хэсэгт зааснаар нэхэмжлэгчээс улсын тэмдэгтийн хураамжид төлсөн 75.750 төгрөгийг улсын орлогод хэвээр үлдээж, 1.330.000 төгрөгт ноогдох тэмдэгтийн хураамж 36.230 төгрөгийг хариуцагч Ю.*******гаас гаргуулж, нэхэмжлэгч Ц.*******т олгосугай.

3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.2 дахь хэсэгт зааснаар шийдвэр нь танилцуулан сонсгомогц хүчинтэй болох бөгөөд зохигч анхан шатны шүүхийн шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргах эрхтэй болохыг дурдсугай.

 

 

 

 

ДАРГАЛАГЧ, ШҮҮГЧ Г.СОЛОНГО