Нэхэмжлэлийн шаардлагыг хариуцагч

биелүүлснийг баталж, хэргийг

хэрэгсэхгүй болгох тухай

 

         Баянгол дүүргийн Иргэний хэргийн анхан шатны шүүхийн шүүгч Г.Ариунаа би,

 

 

Нэхэмжлэлийн шаардлага: 2.140.504 төгрөг 33 мөнгийг гаргуулах тухай нэхэмжлэлийг 2024 оны 07 дугаар сарын 22-ны өдөр хүлээн авч хянаад      

 

ТОДОРХОЙЛОХ нь:

 

         Нэхэмжлэгч М даатгал ХК шүүхэд гаргасан нэхэмжлэлдээ:

Манай компанийн 0 дугаартай гэрээний даатгуулагч Г.Алтанзагас Баянгол дүүрэг, 0дүгээр хороолол, 0дугаарр хороо,0 дугаар байрны0 тоотод оршин суудаг бөгөөд 2024 оны 05 дугаар сарын 20-ны өдөр дээд айлаас ус алдсан тохиолдол үүсэн даатгуулагчид 2.140.504 төгрөг 33 мөнгийн хохирол учруулсан байдаг.

Даатгуулагчид учруулсан хохирол 2.140.504 төгрөг 33 мөнгийг компаниас төлсөн тул гаргуулж өгнө үү, гэжээ.

 

       Нэхэмжлэгчийн итгэмжлэгдсэн төлөөлөгч А.Ч шүүхэд гаргасан хүсэлтэндээ:

       Хариуцагч М.Д нэхэмжлэлийн шаардлага 2.140.504 төгрөг 33 мөнгийг бүрэн төлсөн тул хэргийг хялбаршуулсан журмаар шийдвэрлэж өгнө үү, гэжээ.

 

ҮНДЭСЛЭХ нь:

        

       Хэрэг хянан шийдвэрлэх ажиллагааны явцад нэхэмжлэгч М даатгал ХК-ийн нэхэмжлэлийн шаардлага 2.140.504 төгрөгийг хариуцагч М.Д төлсөн гэх тайлбарыг шүүхэд бичгээр ирүүлсэн бөгөөд нэхэмжлэлийн шаардлагыг биелүүлсэн нь хуульд харшлаагүй, гуравдагч этгээдийн хуулиар хамгаалагдсан эрх ашиг сонирхлыг хөндөөгүй байх тул Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1 дэх хэсэгт зааснаар нэхэмжлэлийн шаардлагыг хариуцагч биелүүлснийг баталж, хэргийг хэрэгсэхгүй болгож шийдвэрлэх нь зүйтэй байна. 

 

Хэргийг хялбаршуулсан журмаар шийдвэрлэсэн тул Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэгт зааснаар улсын  тэмдэгтийн хураамжийг тал хувиар бууруулж тогтоов.

 

         Иргэний хэрэг шүүхэд хянан шийдвэрлэх тухай хуулийн 123 дугаар зүйлийн

123.1, 74 дүгээр  зүйлийн 74.1, 74.2 дахь хэсэгт заасныг удирдлага  болгон

 

ЗАХИРАМЖЛАХ нь:

 

         1.Нэхэмжлэгч М даатгал ХК-ийн нэхэмжлэлийн шаардлага 2.140.504 төгрөг 33 мөнгийг хариуцагч М.Д төлж биелүүлснийг баталж хэргийг хэрэгсэхгүй болгосугай.

 

2.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэгт зааснаар нэхэмжлэгчийн улсын тэмдэгтийн хураамжид төлсөн 49.198 төгрөгийг улсын орлогод үлдээж, хариуцагчаас улсын тэмдэгтийн хураамж 24.599 төгрөг, улсын орлогоос улсын тэмдэгтийн хураамж 24.599 төгрөгийг гаргуулан нэхэмжлэгчид олгосугай.

 

3.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4 дэх хэсэгт зааснаар хэргийг хялбаршуулсан журмаар хянан шийдвэрлэсэн тохиолдолд зохигчид давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

 

 

 

 

 

            

ШҮҮГЧ                                             Г.АРИУНАА