Өвөрхангай аймгийн Хархорин сум дахь Сум дундын шүүхийн Эрүүгийн хэргийн шүүх хуралдааныг шүүгч Ц.Дагиймаа даргалж,

Нарийн бичгийн дарга Б.Сосорбарам,

Улсын яллагч: Д.Бат-Өлзий,

Шүүгдэгч: Н.Д нарыг оролцуулан тус шүүхийн шүүх хуралдааны танхимд нээлттэй хийсэн шүүх хуралдаанаар

Өвөрхангай аймгийн Хархорин сум дахь Сум дундын прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэгт ял сонсгож, яллах дүгнэлт үйлдэж ирүүлсэн Ч овгийн Н.Д-д холбогдох эрүүгийн 1727001030007 дугаартай хэргийг хянан хэлэлцэв.

                            Шүүгдэгчийн биеийн байцаалт:

Шүүгдэгч: Монгол Улсын иргэн, 1972 оны 10 дугаар сарын 21-ний өдөр төрсөн, 46 настай, бүрэн дунд боловсролтой, мэргэжилгүй, эрхэлсэн тодорхой ажилгүй, ам бүл 2, хүүхдийн хамт амьдардаг, улсаас авсан гавъяа шагналгүй, урьд ял шийтгэлгүй, Ч овгийн Н.Д

                                Холбогдсон хэргийн талаар:

Шүүгдэгч Н.Д нь Өвөрхангай аймгийн Хархорин сумын Вангийн-Овоо багийн нутаг Сансарын 7-14 тоот хашаанд 2017 оны 12 дугаар сарын 14-ний өдөр хохирогч О.Быг зодож эрүүл мэндэд нь хөнгөн хохирол учруулсан гэмт хэрэгт холбогдсон. /яллах дүгнэлтэнд дурдсанаар/

                                        ТОДОРХОЙЛОХ нь:

Шүүх хуралдааны хэлэлцүүлэгт дараах нотлох баримтуудыг шинжлэн судлав.

Шүүгдэгч Н.Д шүүхийн хэлэлцүүлэгт мэдүүлэхдээ: “...Би орой 3 хүүхэд дээрээ очих гэж хадмындаа очсон юм. Тэгсэн хуучин эхнэр нөхөртэйгээ ирсэн. Тэгэхээр нь би гар утсаар толгой руу цохьсон. Тэгээд гэртээ очсон чинь цагдаа нар ирсэн...” гэсэн мэдүүлэг,

 Хохирогч О.Бын өгсөн “...2017.12.14-ний өдөр Хархорин суманд ирээд хадмындаа байж байтал орой 21 цагийн орчим манай эхнэрийн хуучин нөхөр Н.Д гаднаас орж ирээд орон дээр миний хажууд суугаад ямар нэгэн юм ярихгүй шууд толгой руу ямар нэг хатуу зүйлээр цохисон. Согтуу орж ирсэн. 1 хатуу юмаар нэг удаа цохисон. Толгойдоо 3 оёдол тавиулсан. Гомдол санал байхгүй. Шинжээч эмчид үзүүлэх гэж явсаны бензины зардал болон нааш, цааш явсан бензиний зардал, эмийн сангаас эм авсан зэрэг зардлуудыг нэхэмжилнэ. Шүүх хуралд суухгүй...” гэсэн мэдүүлэг /хх-ийн 07-08 дугаар хуудас/,

Гэрч Ч.Жанчивын өгсөн: “...Хуучин нөхөр Н.Д орж ирсэн. Тэгээд О.Б орон дээр сууж байсан чинь О.Бын хажууд очиж суугаад ямар нэгэн зүйл ярихгүй гэнэт халааснаасаа нэг юм гаргаж ирээд толгой руу нь цохиод авсан. Хэрэлдэж маргалдсан асуудал байхгүй...” гэсэн мэдүүлэг /хх-ийн 10 дугаар хуудас/,

Гэрч Э.Чимэдцэрэнгийн өгсөн: “...хажууд нь сууснаа гэнэт толгой руу нь ямар нэгэн зүйлээр цохисон...” гэсэн мэдүүлэг /хх-ийн 11 дүгээр хуудас/,

• Эрүүгийн хэрэг үүсгэж, яллагдагчаар татах тогтоол /хх-ийн 01 дүгээр хуудас/,
• Гэмт хэргийн талаарх гомдол мэдээлэл хүлээн авсан тэмдэглэл /хх-ийн 05 дугаар хуудас/,
• Хохирогч О.Б-ын эрүүл мэндэд хөнгөн хохирол учруулсан болохыг нотолсон шүүх шинжилгээний албаны шинжээч эмч Э.Хүрэлсүхийн 2018 оны 01 дүгээр сарын 16-ны өдрийн 55 дугаартай дүгнэлт /хх-ийн 15 дугаар хуудас/,
• Н.Д-гийн гэмт хэрэг үйлдэхдээ ашигласан БНХАУ-д үйлдвэрлэгдсэн “HODOO” гэсэн бичигтэй хар өнгийн утсыг эд мөрийн баримтаар хураан авах тухай мөрдөгчийн санал, прокурорын зөвшөөрөл, эд мөрийн баримтаар тооцсон мөрдөгчийн тогтоол, тэмдэглэл, гэрэл зураг  /хх-ийн 22-26 дугаар хуудас/,

-      Ял шийтгэгдсэн эсэхийг шалгах хуудас /хх-ийн 32, 33 дугаар хуудас/ зэрэг хавтаст хэрэгт хуульд заасан журмын дагуу авагдаж бэхжигдсэн яллах, өмгөөлөх талын хүсэлтээр шүүхийн хэлэлцүүлэгт хэлэлцэгдсэн нотлох баримтуудаар нотлогдон тогтоогдож байна гэж шүүх дүгнэлээ.

Шүүгдэгч Н.Д нь Өвөрхангай аймгийн Хархорин сумын Вангийн-Овоо багийн нутаг Сансарын 7-14 тоот хашаанд 2017 оны 12 дугаар сарын 14-ний өдөр хохирогч О.Б-ыг зодож эрүүл мэндэд нь хөнгөн хохирол учруулсан гэмт хэрэг үйлдсэн гэм буруутайд тооцож, хуульд заасан эрүүгийн хариуцлага хүлээлгэх үндэслэлтэй байна.

Иймд Н.Д-д Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар Хархорин сум дахь Сум дундын прокурорын газраас зүйлчилж ирүүлсэн хэргийн зүйлчлэл тохирсон байна.

Шүүгдэгч Н.Д-д Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар зүйлчилж ирүүлсэн нь Эрүүгийн хуулийн хууль ёсны, шударга ёсны, эрүүгийн хариуцлага гарцаагүй байх зарчмыг баримтлан үйлдсэн хэргийн нийгмийн аюулын шинж чанар, учруулсан хор уршиг, хохирлын хэр хэмжээ, шүүгдэгч нь анх удаа хөнгөн гэмт хэрэг үйлдсэн, хохирол төлбөрөө төлж барагдуулсан байдал зэрэгт нь тохирсон ял, эрүүгийн хариуцлага хүлээлгэх нь зүйтэй гэж үзлээ.

Шүүгдэгч Нямдоржийн Доржсүрэн нь цагдан хоригдсон хоноггүй, бусдад төлөх төлбөргүй, түүний бичгийн баримт шүүхэд ирээгүй болохыг дурдаж байна.

Эрүүгийн хэрэг хянан шийдвэрлэх тухай хуулийн 36.2 дугаар зүйлийн 1,2,3,4, 36.7 дугаар зүйлийн 2 дахь хэсгийн   2.1, 2.3, 2.4, 36.7 дугаар зүйлийн 3 дахь хэсгийн 3.1, 3.2, 36.8 дугаар зүйлийн 1 дэх хэсгийн 1.1, 1.2, 1.3, 1.4, 36.8 дугаар зүйлийн 4, 5 дахь хэсэг, 36.10 дугаар зүйлийн 1 дэх хэсэг, 38.1 дүгээр зүйлийн 1-д заасныг тус тус удирдлага болгон

                                              ТОГТООХ нь:

1. Шүүгдэгч Ч овгийн Н.Д-г хүний эрүүл мэндэд хөнгөн хохирол учруулсан гэмт хэрэг үйлдсэн гэм буруутайд тооцсугай.
2. Эрүүгийн хуулийн 11.6 дугаар зүйлийн 1 дэх хэсэгт зааснаар шүүгдэгч Н.Д-г 450 /дөрвөн зуун тавин/  нэгжтэй тэнцэх хэмжээний буюу 450.000 /дөрвөн зуун тавин мянган/ төгрөгөөр торгох ялаар шийтгэсүгэй. 

3.   Эрүүгийн хуулийн Ерөнхий ангийн 5.3 дугаар зүйлийн 4 дэх хэсэгт зааснаар шүүгдэгч Н.Д-д оногдуулсан торгох ялыг шийтгэх тогтоол хүчин төгөлдөр болсон өдрөөс хойш 1 сарын дотор төлж барагдуулах хугацаа тогтоосугай.

4.  Эрүүгийн хуулийн Ерөнхий ангийн 5.4 дүгээр зүйлийн 4 дэх хэсэгт зааснаар шүүгдэгч Н.Д нь торгох ялыг биелүүлээгүй бол шүүх биелэгдээгүй торгох ялын 15 /арван тав/ нэгжтэй тэнцэх хэмжээний төгрөгийг 1 /нэг/ хоногоор тооцож хорих ялаар солихыг мэдэгдсүгэй.

5. Шүүгдэгч Н.Д нь цагдан хоригдсон хоноггүй, хилийн хориг тавигдаагүй, бусдад төлөх төлбөргүй, хохирогч нь гомдол саналгүй, битүүмжлэгдсэн зүйлгүй болохыг тус тус дурдсугай.

6.    Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1.8-д зааснаар эд мөрийн баримтаар хураагдан ирсэн 40.000 төгрөгийн үнэ бүхий “HODOO” гэсэн бичигтэй хар өнгийн гар утсыг шийтгэх тогтоол хүчин төгөлдөр болмогц шүүгдэгч Н.Д-д буцаан олгосугай.

7.    Эрүүгийн хэрэг хянан шийдвэрлэх тухай хуулийн 36.8 дугаар зүйлийн 1 дэх хэсгийн 1.5, 36.10 дугаар зүйлийн 4, 36.12 дугаар зүйлийн 1 дэх хэсэгт зааснаар шийтгэх тогтоол нь уншиж сонсгосноор хүчинтэй болох бөгөөд шүүгдэгч Н.Д-д урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8.   Эрүүгийн хэрэг хянан шийдвэрлэх тухай хуулийн 38.2 дугаар зүйлийн 1 дэх хэсэгт зааснаар шийтгэх тогтоолыг гардан авснаас хойш, эсхүл энэ хуулийн 11.9 дүгээр зүйлд заасны дагуу хүргүүлснээс хойш 14 хоногийн дотор Өвөрхангай аймгийн Эрүү, Иргэний хэргийн давж заалдах шатны шүүхэд шүүгдэгч, хохирогч, тэдгээрийн өмгөөлөгч давж заалдах гомдол, иргэний нэхэмжлэгч, иргэний хариуцагч нар иргэний нэхэмжлэлтэй холбоотой хэсэгт давж заалдах гомдол гаргах, улсын яллагч дээд шатны прокурор эсэргүүцэл бичих эрхтэй болохыг дурьдсугай.

9.  Эрүүгийн хэрэг хянан шийдвэрлэх тухай хуулийн 37.1 дүгээр зүйлийн 2 дахь хэсэгт зааснаар давж заалдах гомдол гаргасан буюу эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол биелүүлэх хүртэл шүүгдэгч Н.Д-д урьд авсан таслан сэргийлэх арга хэмжээг хэвээр үргэлжлүүлсүгэй.     

 

 ДАРГАЛАГЧ, ШҮҮГЧ                               Ц.ДАГИЙМАА