2025 02 18 197/ШШ2025/01338

 

 

 

Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн шүүгч А.Батмандах би

Нэхэмжлэгч: тоот ******* ******* ХХК /РД: *******/

Хариуцагч:  давхарын хэсэгт байрлах ******* ХХК /РД: *******/

Гэрээний үүрэгт 12.085.125 төгрөг гаргуулах нэхэмжлэлийг 2025 оны 02 дугаар сарын 03-ны өдөр хүлээн авч хянаад

ТОДОРХОЙЛОХ нь:

Нэхэмжлэгч ******* ******* ХХК шүүхэд гаргасан нэхэмжлэлдээ: ...Нэхэмжлэгч ******* ******* ХХК нь ******* ХХК /РД: *******/-д холбогдуулан дараах нэхэмжлэлийг гаргаж байна. ******* ХХК нь сүлжээ дэлгүүр ажиллуулдаг бөгөөд манай байгууллагын харилцагч билээ. ******* ХХК нь манай байгууллагатай 2020 оны 08 дугаар сарын 12-ны өдөр Худалдааны хамтран ажиллах гэрээ байгуулсан бөгөөд ******* сүлжээ дэлгүүртээ 2023.01.04-ний өдрөөс 2024.05.06-ны өдрийн хооронд 9.657.750 төгрөгийн бараа бүтээгдэхүүн худалдан авсан бөгөөд худалдан авсан бараа бүтээгдэхүүний төлбөрөөс 1.601.000 төгрөгийг төлж, 8.056.750 төгрөгийг төлөөгүй байна. Уг төлбөрийг төлөхийг баталгаажуулан 2024.09.01, 2024.11.01-ний өдрүүдэд Тооцооны үлдэгдлийн баталгаа үйлдсэн бөгөөд тооцооны үлүлдэгдлийн баталгаа үлдсэнээс хойш төлбөр тооцоо огт хийгээгүй тул гэрээний 11 дүгээр зүйлийн 11.2 дахь хэсэгт заасны дагуу шүүхийн байгууллагаар шийдвэрлүүлэхээр ийнхүү хандаж байна. ******* ХХК нь бараа бүтээгдэхүүний төлбөр 8.056.750 төгрөгийг төлөлгүй 2024.05.06-ны өдрөөс өнөөдрийг хүртэл буюу 2025.01.31-ны өдрийг хүртэл нийт 254 хоногийн хугацаа өнгөрсөн байна. Гэрээний 5 дугаар зүйлийн 5.6-д Борлуулагч нь нийлүүлэгч талын төлбөрийг гэрээнд заасан хугацаанд хүндэтгэн үзэх шалтгаангүйгээр төлөөгүй тохиолдолд хугацаа хэтэрсэн хоног тутамд 0.5 хувийн алданги тооцно. Гэж заасны дагуу 254 хоног хугацаа хэтэрсний алдангийг хоногийн 0.5 хувиар бодоход 127 хувь буюу мөнгөн дүнгээр 10.232.072 төгрөг болж байгаа ч Иргэний хуулийн 232 дугаар зүйлийн 232.4 дэх заалтыг баримтлан үндсэн төлбөрийн 50 хувиар тооцсон дүн болох 4.028.375 төгрөгийг үндсэн төлбөр дээр нэмж нэхэмжлэх нь хууль зүйн үндэслэлтэй гэж үзэн үндсэн төлбөрийн хамт гаргуулан авахаар ийнхүү хандаж байна. Иймд хариуцагчаас компанид төлөх шаардлагатай үндсэн төлбөр 8.056.750 төгрөг, алданги 4.028.375 төгрөг, нийт 12.085.125 төгрөгийг, улсын тэмдэгтийн хураамжийн хамт гаргуулан өгнө үү. гэжээ.

Хариуцагч ******* ХХК шүүхэд гаргасан хариу тайлбартаа: ...Миний бие Ж.Алтанцэцэг нь ******* ХХК-ийн ерөнхий нягтлан бодогчоор ажилладаг бөгөөд ******* ******* ХХК-ний нэхэмжилсэн 12.085.125 төгрөгийг бүрэн хүлээн зөвшөөрч байна. Манай байгууллага уг мөнгөн дүнг 4 сарын хугацаанд хэсэгчлэн төлөхөө илэрхийлж байна. Иймд манай байгууллагад холбогдох хэргийг хялбаршуулсан журмаар шийдвэрлэж өгнө үү гэжээ.

ҮНДЭСЛЭХ нь:

Нэхэмжлэгч ******* ******* ХХК нь хариуцагч ******* ХХК-д холбогдуулан гэрээний үүрэгт 12.085.125 төгрөг гаргуулах нэхэмжлэл гаргажээ.

Хэрэг хянан шийдвэрлэх ажиллагааны явцад хариуцагч ******* ХХК нэхэмжлэлийн шаардлага 12.085.125 төгрөгийг төлөхийг зөвшөөрсөн тул хариуцагчийн зөвшөөрлийг баталж хэргийг хэрэгсэхгүй болгох үндэслэлтэй.

Хариуцагчийн зөвшөөрөл нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул тэдний эвлэрлийг баталгаажуулж, хэргийг хэрэгсэхгүй болгох үндэслэлтэй.

Хэргийг хялбаршуулсан журмаар шийдвэрлэж байгаа тул хуульд зааснаар хариуцагчийн төлөх улсын тэмдэгтийн хураамжийг 50 хувиар бууруулах нь зүйтэй.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 123 дугаар зүйлийн 123.1 дэх хэсгийг удирдлага болгон

ЗАХИРАМЖЛАХ нь:

1. Нэхэмжлэгч ******* ******* ХХК-ийн нэхэмжлэлийн шаардлага 12.678.406,92 төгрөгийг төлөхийг зөвшөөрсөн хариуцагч ******* ХХК-г зөвшөөрлийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчээс улсын тэмдэгтийн хураамжид төлсөн 208.312.00 төгрөгийн 50 хувь болох 109.156 төгрөгийг улсын төсвөөс, 50 хувь болох 109.156 төгрөгийг хариуцагч ******* ХХК-аас гаргуулж ******* ******* ХХК-д олгосугай.

3.Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь хэсэгт зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг дурдсугай.

4. Хэргийг хялбаршуулсан журмаар хянан шийдвэрлэсэн тул зохигч давж заалдах, хяналтын журмаар гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

 

 

 

 

 

ШҮҮГЧ А.БАТМАНДАХ