МОНГОЛ УЛСЫН НЭРИЙН ӨМНӨӨС

Баянхонгор аймаг дахь Захиргааны хэргийн анхан шатны шүүхийн шүүх хуралдааныг Ерөнхий шүүгч С.Сайнбилэг даргалж,  тус шүүхийн шүүх хуралдааны танхимд нээлттэй хийсэн хуралдаанаар

 Нэхэмжлэгч: *******,

 Хариуцагч: Баянхонгор аймгийн Засаг даргын Тамгын газрын дарга,

Хариуцагчийн итгэмжлэгдсэн төлөөлөгч ******* нарын хоорондын “Монгол Улсын Засгийн газрын 2024 оны 83 дугаар “Төрийн захиргааны албан хаагчид мөнгөн урамшуулал олгох журам”-д заасны дагуу төрийн захиргааны албан хаагчид 5 жилд тутам олгох мөнгөн урамшууллыг олгохгүй байгаа эс үйлдэхүй хууль бус болохыг тогтоож, 5 жил тутмын мөнгөн урамшууллыг олгохыг Баянхонгор аймгийн Засаг даргын Тамгын газарт даалгуулах” шаардлага бүхий захиргааны хэргийг хянан хэлэлцэв.

Шүүх хуралдаанд: Нэхэмжлэгч ******* /цахимаар/, хариуцагчийн итгэмжлэгдсэн төлөөлөгч *******, шүүх хуралдааны нарийн бичгийн даргаар Н.Бүжинлхам нар оролцов. 

ТОДОРХОЙЛОХ нь:

1. Нэхэмжлэгч ******* нь  “Төрийн захиргааны албан хаагчид мөнгөн урамшуулал олгох журам”-д заасны дагуу төрийн захиргааны албан хаагчид 5 жилд тутам олгох мөнгөн урамшууллыг олгохгүй байгаа эс үйлдэхүй хууль бус болохыг тогтоож, 5 жил тутмын мөнгөн урамшууллыг олгохыг Баянхонгор аймгийн Засаг даргын Тамгын газарт даалгуулах” -аар маргасан байна.

2. Нэхэмжлэгч *******  Монгол Улсын Засгийн газрын 2024 оны 83 дугаар тогтоолоор баталсан “Төрийн захиргааны албан хаагчид мөнгөн урамшуулал олгох журмын 2.1, 2.3, 4.2, 4.3-д заасны дагуу төрийн албанд ажилласан хугацааны 5 жилийн урамшуулал авахаар Баянхонгор аймгийн Засаг даргын Тамгын газрын даргад бичгээр хүсэлт гаргасан. Баянхонгор аймгийн Засаг даргын Тамгын газрын дарга ажлын хэсэг хуралдуулж хүсэлтийг хэлэлцүүлэх шийдвэр гаргасны дагуу “Төрийн захиргааны албан хаагчдад мөнгөн урамшуулал олгох ажлын хэсгийн хуралдаан 2024 оны 12 дугаар сарын 17-ны өдөр хуралдаж *******д мөнгөн урамшуулал олгохоос татгалзсан байна.

Нэхэмжлэгч үүнийг эс зөвшөөрч 2024 оны 12 дугаар сарын 24-ний өдөр шүүхэд нэхэмжлэл гаргасан.

3. Нэхэмжлэгч нэхэмжлэлийн шаардлагын үндэслэлдээ:

“Засгийн газрын 2024 оны 83 дугаар тогтоолоор батлагдсан “Төрийн захиргааны албан хаагчид мөнгөн урамшуулал олгох, журмын дагуу миний байгууллага төрийн албан хаагчиддаа мөнгөн урамшуулал олгосон. Миний бие төрийн захиргааны болон үйлчилгээний байгууллагад 32,5 жил ажилласан. Журамд сүүлийн 5 жил тасралтгүй ажилласан гэж заагаагүй. Миний бие 2000-2012 онуудад тасралтгүй Байгаль орчны алба газрын даргаа, 2021 оны 5 дугаар сарын 28-ны өдрөөс өнөөг хүртэл 3,7 жил аймгийн Засаг даргын Тамгын газрын хяналт шинжилгээ үнэлгээний хэлтсийн даргаар ажиллаж байна. Энэхүү мөнгөн урамшуулал олгох журам анх удаа хэрэгжиж байгаа тул ажилласан жилийг 2000-2012 оноос тооцож олгож өгөхийг хүсэж байна.” гэжээ.

Хариуцагчийн итгэмжлэгдсэн төлөөлөгч ******* шүүхэд ирүүлсэн хариу тайлбартаа: *******аас гаргасан төрийн захиргааны албан хаагчийн 5 жилийн мөнгөн урамшууллыг авах тухай нэхэмжлэлтэй танилцаад дараах тайлбарыг гаргаж байна.

******* нь 200-2012 онуудад тасралтгүй Байгаль орчны алба, газрын даргаар ажиллаж байсан бөгөөд 2021 оны 5 сараас аймгийн Засаг даргын Тамгын газарт 3.7 жил ажилласан байна.

Монгол Улсын Засгийн газрын 2024 оны 83 дугаар “Төрийн захиргааны албан хаагчид мөнгөн урамшуулал олгох журам”-ын 2.1-т “Сум болон нийслэлийн I Багахангай, Багануур, Налайх дүүрэгт Төрийн албаны тухай хуулийн 12 дугаар зүйлд заасан албан тушаалд томилогдон тасралтгүй 5 жил (60 сар), түүнээс дээш хугацаагаар ажилласан төрийн захиргааны албан хаагч мөнгөн урамшуулал авна” гэж заасан бөгөөд ******* нь Байгаль орчны газар тасралтгүй ажилласан байна.

Гэтэл журмын 2.3-т “Мөнгөн урамшууллын хэмжээг тодорхойлохдоо Төрийн албаны тухай хуулийн 51.3-т заасныг баримтлан тухайн төрийн захиргааны алба хаагчийн сүүлийн 12 сарын үндсэн цалингийн дунджийг 6 дахин нэмэгдүүлж тооцно” гэж заасан бөгөөд сүүлийн 5 жил тасралтгүй ажиллаж байж сүүлийн 12 сарын үндсэн цалингийн дунджийг 6 дахин нэмэгдүүлж олгохоор байна.

*******ын 2000-2012 онуудад ажилласан хугацаагаар 5 жилийн хугацааг  тооцлоо гэхэд сүүлийн 12 сарын цалингаар тооцохоор тасрах тул боломжгүй мөн аймгийн Засаг даргын тамгын газарт ажилласан хугацаагаар тооцохоор 5 жил хүрээгүй л ажлын хэсгээс олгох боломжгүй гэж үзсэн.

Иймээс *******ын гаргасан нэхэмжлэлийг бүхэлд нь хүлээн зөвшөөрөхгүй байгаа тул хэргийг хэрэгсэхгүй болгож өгнө үү.” гэжээ.

ҮНДЭСЛЭХ нь:

Нэхэмжлэгч ******* тус шүүхэд хандан Баянхонгор аймгийн Засаг даргын Тамгын газрын даргад холбогдуулан гаргасан “Монгол Улсын Засгийн газрын 2024 оны 83 дугаар “Төрийн захиргааны албан хаагчид мөнгөн урамшуулал олгох журам”-д заасны дагуу төрийн захиргааны албан хаагчид 5 жилд тутам олгох мөнгөн урамшууллыг олгохгүй байгаа эс үйлдэхүй хууль бус болохыг тогтоож, 5 жил тутмын мөнгөн урамшууллыг олгохыг Баянхонгор аймгийн Засаг даргын Тамгын газарт даалгуулах”  нэхэмжлэлийн шаардлагыг шүүх бүхэлд нь хангаж  шийдвэрлэв.

Нэхэмжлэгч шүүх хуралдаанд гаргасан тайлбартаа: “Би 2000 оноос 2012 онуудад Байгаль орчны алба, Байгаль орчин аялал жуулчлалын газрын даргаар тасралтгүй 12 жил, 2021 оны 5 сараас өнөөдрийг хүртэл Баянхонгор аймгийн засаг даргын Тамгын газрын Хяналт-шинжилгээ үнэлгээний хэлтсийн даргаар ажиллаж байна. Нийт төрийн захиргааны албан тушаалд 15 жил ажиллаж байна. Орон нутгийн төрийн захиргааны байгууллагад ажилласан төрийн захиргааны албан хаагчид 5 жил тутамд мөнгөн урамшуулал авах журмын дагуу тамгын газарт мөнгөн урамшууллыг авахаар хүсэлтээ гаргасан боловч миний хүсэлтийг хэрэгсэхгүй болгосон. Энэ 5 жил тутамд олгох мөнгөн урамшуулал олгохгүй  байгаа эс үйлдэхүйг тогтоож, урамшуулал олгохыг даалгаж өгнө үү гэв.

 Хариуцагчийн итгэмжлэгдсэн төлөөлөгч шүүх хуралдаанд гаргасан тайлбартаа: Нэхэмжлэгч нь Баянхонгор аймгийн Засаг даргын Тамгын газарт Хяналт-шинжилгээ үнэлгээний хэлтсийн даргын албан тушаал эрхэлдэг. 2000 оноос 2012 онуудад  Байгаль орчны алба, Байгаль орчин аялал жуулчлалын газрын даргаар  тасралтгүй 12 жил, 2021 оны 5 сараас өнөөдрийг хүртэл Баянхонгор аймгийн Засаг даргын Тамгын газрын Хяналт-шинжилгээ үнэлгээний хэлтсийн даргаар ажиллаж байгаа гэдэгтээ маргаагүй. Нэхэмжлэгч таван жил тутамд олгох мөнгөн урамшуулал авах хүсэлтээ гаргасан боловч сүүлийн таван  жил  тасралтгүй ажиллаагүй. Иймд энэ мөнгөн урамшууллыг олгох боломжгүй гэв.

Нэхэмжлэгч нь Баянхонгор аймгийн Засаг даргын тамгын газарт Байгаль орчны алба , Байгаль орчин аялал жуулчлалын газрын даргаар, Хяналт -шинжилгээ үнэлгээний хэлтсийн даргын албан тушаалыг тус тус  эрхэлж буй Төрийн албаны тухай хуулийн 10 дугаар зүйлийн  10.1.2.-т зааснаар төрийн төрийн захиргааны албан тушаалтан мөн гэдэгт  хэргийн оролцогч нар маргаагүй болно.

Нэхэмжлэгч нь 2000 оноос 2012 онуудад Байгаль орчны алба, газрын даргаар тасралтгүй 12 жил, 2021 оны 5 сараас өнөөдрийг хүртэл Баянхонгор аймгийн Засаг даргын Тамгын газрын Хяналт-шинжилгээ үнэлгээний хэлтсийн даргаар ажиллаж байна. Нийт төрийн захиргааны албан тушаалд 15 жил ажилласан.

Монгол Улсын Засгийн газрын 2024 оны 02 дугаар сарын 28-ны өдрийн 83 дугаартай “Төрийн захиргааны албан хаагчид мөнгөн урамшуулал олгох журмын 1.1-д “Хот, хөдөөгийн сэргэлтийн хүрээнд хотын төвлөрлийг сааруулах, төрийн албан хаагчид орон нутагт тогтвор, суурьшилтай ажиллах нөхцөлийг баталгаажуулах, төрийн үйлчилгээг саадгүй, хүртээмжтэй хүргэх зорилгоор сум болон нийслэлийн Багахангай, Багануур, Налайх дүүрэгт  төрийн захиргааны албан тушаалд тасралтгүй ажиллаж байгаа төрийн захиргааны албан хаагчид 5 жил тутамд нэг удаа 6 сарын үндсэн цалинтай нь тэнцэх хэмжээний мөнгөн урамшуулал олгоход энэ журмыг баримтална.” гэж зааснаар хотын төвлөрлийг сааруулах, хөдөө орон нутагт төрийн захиргааны байгууллагын мэргэшсэн байдлыг сайжруулах, төрийн захиргааны албан тушаалд тогтвор суурьшилтай ажиллуулах зорилготой гарсан журам юм.

Тус журмын 2 дугаар зүйлийн 2.1.Сум болон нийслэлийн Багахангай, Багануур, Налайх дүүрэгт Төрийн албаны тухай хуулийн 12 дугаар зүйлд заасан албан тушаалд томилогдон тасралтгүй 5 жил (60 сар), түүнээс дээш хугацаагаар ажилласан төрийн захиргааны албан хаагч мөнгөн урамшуулал авна.” гэж заасан байна. 

Нэхэмжлэгч нь 2000 оноос 2012 онуудад Байгаль орчны алба, газрын даргаар тасралтгүй 12 жил, 2021 оны 5 сараас өнөөдрийг хүртэл Баянхонгор аймгийн Засаг даргын Тамгын газрын Хяналт-шинжилгээ үнэлгээний хэлтсийн даргаар ажиллаж, нийт 15 жил төрийн захиргааны албан тушаалд ажилласан байна.

Монгол Улсын Засгийн газрын 2024 оны 02 дугаар сарын 28-ны өдрийн 83 дугаартай “Төрийн захиргааны албан хаагчид мөнгөн урамшуулал олгох журам”-д төрийн захиргааны алба хаагчийн сүүлийн 12 сарын үндсэн цалингийн дунджийг 6 дахин нэмэгдүүлж тооцно гэснээс төрийн захиргааны албан тушаалтныг тухайн албан тушаалд сүүлийн 5 жил тасралтгүй ажилласан байхыг шаардаагүй байна.

Нэхэмжлэгч нь Төрийн албаны тухай хуулийн 61 дүгээр зүйлийн 61.1.1-д зааснаар албан тушаалын цалин хөлс, нөхөх төлбөр, тусламж, шагнал, урамшуулал, тэтгэвэр, тэтгэмж авах эрхтэй гэж үзлээ.

Иймд Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.3.4-т зааснаар Баянхонгор аймгийн Засаг даргын Тамгын газрын даргын *******д Монгол Улсын Засгийн газрын 2024 оны 83 дугаар тогтоолоор баталсан “Төрийн захиргааны албан хаагчид мөнгөн урамшуулал олгох журам”-д заасны дагуу мөнгөн урамшуулал олгохгүй байгаа  нь хууль бус байх тул нэхэмжлэгчид төрийн захиргааны албан тушаалд 5 жил ажилласны урамшуулал олгохыг Баянхонгор аймгийн Засаг даргын Тамгын газрын даргад даалгах нь зүйтэй байна.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.3.4, 106.3.12, 107 дугаар зүйлийн 107.5-д заасныг тус тус удирдлага болгон  ТОГТООХ нь:

1. Төрийн албаны тухай хуулийн 10 дугаар зүйлийн 10.1.2,  12 дугаар зүйлийн 12.1.7, 61 дүгээр зүйлийн 61.1.1-д заасныг тус тус баримтлан нэхэмжлэлийн шаардлагыг бүхэлд нь хангаж, “Монгол Улсын Засгийн газрын 2024 оны 83 дугаар “Төрийн захиргааны албан хаагчид мөнгөн урамшуулал олгох журам”-д заасны дагуу төрийн захиргааны албан хаагчид 5 жилд тутам олгох мөнгөн урамшууллыг олгохгүй байгаа эс үйлдэхүй хууль бус болохыг тогтоож, 5 жил тутмын мөнгөн урамшууллыг олгохыг Баянхонгор аймгийн Засаг даргын Тамгын газарт даалгасугай.

2. Улсын тэмдэгтийн хураамжийн тухай хуулийн 7 дугаар зүйлийн 7.1.2, Захиргааны хэрэг шүүхэд хянан шийдвэрлэх тухай хуулийн 48 дугаар зүйлийн 48.1-д зааснаар нэхэмжлэгчийн улсын тэмдэгтийн хураамжид төлсөн 70200  төгрөгийг улсын орлогод хэвээр үлдээж, хариуцагч Баянхонгор аймгийн Засаг даргын Тамгын газраас гаргуулж нэхэмжлэгчид олгосугай.

3. Захиргааны хэрэг шүүхэд хянан шийдвэрлэх тухай хуулийн 108 дугаар зүйлийн 108.2, 114 дүгээр зүйлийн 114.1-д зааснаар шүүхийн шийдвэр танилцуулан сонсгосноор хүчинтэй болох ба хэргийн оролцогч, тэдгээрийн итгэмжлэгдсэн төлөөлөгч, өмгөөлөгч нар шийдвэрийг эс зөвшөөрвөл гардан авсан өдрөөс хойш 14 хоногийн дотор Захиргааны хэргийн давж заалдах шатны шүүхэд гомдол гаргах эрхтэйг дурдсугай.

 

ДАРГАЛАГЧ, ЕРӨНХИЙ ШҮҮГЧ                                 С.САЙНБИЛЭГ