МОНГОЛ УЛСЫН НЭРИЙН ӨМНӨӨС

            Төв аймаг дахь Захиргааны хэргийн анхан шатны шүүхийн шүүгч Л.Өлзийжаргал даргаж, тус шүүхийн шүүх хуралдааны танхимд нээлттэй хийсэн шүүх хуралдаанаар

            Нэхэмжлэгч: *******,

            Хариуцагч: Төв аймгийн******* сумын******* 2-р багийн иргэдийн Нийтийн Хурал,

            Гуравдагч этгээд:******* нарын хоорондын “Төв аймгийн******* сумын******* багийн иргэдийн Нийтийн Хурлын 2025 оны 01 дүгээр сарын 14-ний өдрийн 03 дугаар “Багийн Засаг даргаар томилуулахаар санал уламжлах тухай” тогтоолыг хүчингүй болгох” шаардлага бүхий нэхэмжлэлтэй захиргааны хэргийг хянан хэлэлцэв.

            Шүүх хуралдаанд: шүүх хуралдааны нарийн бичгийн даргаар Т.Будхүү, нэхэмжлэгч *******, хариуцагч  Төв аймгийн******* сумын******* багийн иргэдийн Нийтийн Хурлын дарга*******, гуравдагч этгээд******* нар оролцов.

ТОДОРХОЙЛОХ нь:

Нэг.Нэхэмжлэлийн шаардлага

1. 1. Нэхэмжлэгч ******* нь нэхэмжлэлийн шаардлагаа эцсийн байдлаар “Төв аймгийн******* сумын 2-р багийн иргэдийн Нийтийн Хурлын 2025 оны 01 дүгээр сарын 14-ний өдрийн 3 дугаар “Багийн Засаг даргаар томилуулахаар санал уламжлах тухай” тогтоолыг хүчингүй болгуулах”[1]  гэж тодорхойлжээ.

Хоёр. Хэргийн үйл баримт, процессын түүхийн талаар

2.1. Төв аймгийн******* сумын******* 2-р багийн иргэдийн Нийтийн Хурал 2025 оны 01 дүгээр сарын 14-ний өдөр хуралдаж багийн Засаг даргад*******, *******, О.Баттулга нарыг нэр дэвшүүлж санал хураажээ.

2.2.******* багийн иргэдийн Нийтийн Хурлын хуралдааны тооллогын комиссын 2025 оны 01 дүгээр сарын 14-ний өдрийн 01 дугаар “Багийн Засаг даргад нэр дэвшүүлэн санал хураасан дүнгийн тухай” тогтоолоор санал хураалтад оролцсон 158 иргэнээс авсан саналын хуудсыг тоолж*******ыг дэмжиж 78 санал буюу 49,7 хувь, *******ыг дэмжиж 53 санал буюу 33,7 хувь, О.Баттулгыг дэмжиж 26 санал буюу 16,6 хувийн саналыг тус тус авсан[2] байх ба нэр дэвшигчдээс аль нь олонхын санал аваагүй тул дахин санал хураалт явагджээ.   

2.3.******* багийн иргэдийн Нийтийн Хурлын хуралдааны тооллогын комиссын 2025 оны 01 дүгээр сарын 14-ний өдрийн 02 дугаар “Багийн Засаг даргад нэр дэвшүүлэн дахин санал хураасан дүнгийн тухай” тогтоолоор санал хураалтад оролцсон 134 иргэнээс*******ыг дэмжиж 70 санал буюу 52,2 хувь, *******ыг дэмжиж 64 санал буюу 47,7 хувийн саналыг тус тус авч, Төв аймгийн******* сумын 2 дугаар багийн иргэдийн Нийтийн Хурлын 2025 оны 01 дүгээр сарын 14-ний өдрийн 03 дугаар “Багийн Засаг даргаар томилуулахаар санал уламжлах тухай” тогтоолоор[3]*******ыг багийн Засаг даргаар томилуулах саналыг сумын Засаг даргад уламжилжээ.

2.4. Нэхэмжлэгч ******* нь 2025 оны 01 дүгээр сарын 21-ний өдөр Төв аймаг дахь Захиргааны хэргийн анхан шатны шүүхэд нэхэмжлэл гаргажээ.

Гурав. Хэргийн оролцогчдын тайлбар, түүний үндэслэл:

3.1. Нэхэмжлэгч ******* шүүхэд гаргасан нэхэмжлэл болон шүүх хуралдаанд гаргасан тайлбартаа: Төв аймгийн******* сумын******* 2-р багийн Засаг даргад нэр дэвшүүлэх ажиллагаа 2025 оны 01 дүгээр сарын 14-ны өдөр явагдсан билээ.******* 2-р багийн засаг даргад иргэн*******, иргэн О.Баттулга, иргэн ******* миний бие тус тус нэр дэвшсэн. Багийн хуралд оролцсон 158 иргэн санал өгснөөс, хүчингүй буюу илүү тэмдэглэсэн 1 ширхэг, хүчинтэй 157 ширхэг саналын хуудас байсан. Хүчинтэй 157 ширхэг саналын хуудаснаас нэр дэвшигч бүрийн авсан саналыг тоолоход*******ыг дэмжиж 78 санал буюу 49.7 хувь, *******ыг дэмжиж 53 санал буюу 33,7 хувь, О.Баттулгыг дэмжиж 26 санал буюу 16,6 хувийн санал тус тус өгсөн байна. Монгол улсын засаг захиргаа, нутаг дэвсгэрийн нэгж, түүний удирдлагын тухай хуулийн 56 дугаар зүйлийн 56.5.2-т зааснаар хуралд оролцсон иргэдийн өгсөн саналаар аль ч нэр дэвшигч олонхын санал аваагүй тул тус хуулийн 56 дугаар зүйлийн 56.5.3-т зааснаар хамгийн олон санал авсан хоёр хүний талаар дахин санал хураалт явуулсан. Дахин санал хураалт сунжирч, оройтсон тул сонгогчдын идэвх суларч 134 иргэн оролцсон ба эхний санал хураалтад оролцсон 24 иргэн дахин санал хураалтад оролцоогүй. Хүчинтэй 134 ширхэг саналын хуудаснаас нэр дэвшигч бүрийн авсан саналыг тоолоход*******ыг дэмжиж 70 санал буюу 52,2 хувь, *******ыг дэмжиж 64 санал буюу 47,7 хувийн санал тус тус авсан. Энэ нь Монгол улсын засаг захиргаа, нутаг дэвсгэрийн нэгж, түүний удирдлагын тухай хуулийн 56 дугаар зүйлийн 56.5.2-т заасан олонхын санал авсан хүнийг засаг даргад нэр дэвшүүлэх шаардлагыг хангаагүй болно. Багийн иргэдийн Нийтийн Хурлыг нээхэд 158 хүн гарын үсэг зурж хүчинтэй эхэлсэн. Олонхын санал авсан хүнийг Засаг даргад нэр дэвшүүлнэ гэсний дагуу 80 хүний санал авч байж Засаг дарга болно. Эхний удаад нь******* 78 хүний санал авсан. Хэдий хүмүүс цөөрч цөөхөн хүн үлдсэн ч анхны ирцээсээ тооцож 80 хүний санал авах ёстой. Өрхийн төлөөллөөс хамаарч хурал хүчинтэй болох ёстой боловч хүчинтэй байх өрх дутаж байна. Учир нь хуралд гарын үсэг зурж оролцсон 158 иргэний олонхын саналыг аль ч нэр дэвшигч нь авч чадаагүй байтал үлдсэн 134 иргэний саналаар иргэн*******ыг маргаан бүхий актад багийн засаг даргаар томилуулахаар санал уламжилсан байна.  Иймд миний эрх, хууль ёсны ашиг сонирхол зөрчигдөж байх тул захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.3.12 дахь заалтад зааснаар Төв аймгийн******* сумын 2-р багийн иргэдийн нийтийн хурлын 2025 оны 01 дүгээр сарын 14-ны өдрийн 3 дугаар тогтоолыг хүчингүй болгож, дахин санал хураалт явуулахыг даалгах нэхэмжлэлийн шаардлагыг бүхэлд нь хангаж өгнө үү гэжээ.

Хариуцагч Төв аймгийн******* сумын******* багийн иргэдийн Нийтийн Хурлын дарга******* шүүхэд болон шүүх хуралдаанд гаргасан тайлбартаа: Миний хувьд эхний 158 хүнээс санал хураахад багийн Засаг даргаар нэр дэвшсэн 3 хүн дээр санал хураасан. 3 хүнээс аль нь ч олонхын санал аваагүй тул дахин санал хураалт явуулсан. Тэр үед хүмүүс зарим нь мал хуй хэцүүдлээ гээд гарч явцгаасан. Иргэдэд сонгох эрх нь байгаа, саналаа өгөхгүй гээд явсан юм уу  тэрийг бол хорьж цагдаж чадахгүй. Дунд нь мөн олон зүйл болсон. Бид явах гэж байгаа хүмүүсийг хорьж чадахгүй яваад өгсөн. Нэг талдаа хуралд ирсэн хүмүүс саналаа бүрэн өгөх ёстой юм уу, эсвэл энэ хоёр хүний төлөө санал өгөхгүй гээд явсан юм уу мэдэхгүй. Миний хувьд хуралд ирсэн иргэдийг заавал байж сонгууль өг гэж болохгүй тийм хуулийн зохицуулалт ч байхгүй. Зарим нь явчихаад эргээд ирсэн хүмүүс ч байгаа. Хүмүүс яарсан малаа хотлуулна гэсэн хүмүүс байсан. Би тэр өдөр хурад даргалагчаар ирсэн. Би хүмүүсийг хорьж чадахгүй гэв.

Гуравдагч этгээд******* шүүхэд болон шүүх хуралдаанд гаргасан тайлбартаа: Би бол багийн иргэдийн Нийтийн Хурлыг хуулийн дагуу болсон гэж үзэж байна. Яагаад гэхээр Монгол улсын Засаг захиргаа нутаг дэвсгэрийн нэгж, түүний удирдлагын тухай хуульд нийт 172 өрхтэй үүний 1/3 нь ирсэн тохиолдолд багийн иргэдийн Нийтийн Хурлыг хүчинтэйд тооцох хуулийн заалттай. Энэ заалтаа биелүүлж багийн хуралд иргэдийн 1/3 хүмүүс ирсэн. Эхлээд багийн хурлаар Засаг даргад нэр дэвшсэн 3 хүн дээр санал хураалт явагдсан. Дараа нь ******* ах бид хоёр дээр дахин санал хураалт явагдсан. Миний хувьд хүнийг сонгууль өгөхийг шаардах хуульд заасан үндэслэл байхгүй. Манай баг хөдөөний баг. Ардаа мал ахуйгаа орхисон үлдэх боломжтой хүмүүс үлдэж, санал өгсөн. Иймд хуулийн зөрчил байхгүй гэж үзэж байна. Санал өгөх эрх нь тухайн иргэний өөрийн сонголт гэж үзэж байна. Миний хувьд хангалттай ирц бүрдсэн. Нийт манай багаас 84 өрхөөс иргэн ирсэн. Би ирцийг хангалттай ирсэн гэж үзэж байна гэв.

ҮНДЭСЛЭХ нь:

Шүүх нэхэмжлэгч, түүний төлөөлөгч, хариуцагч, гуравдагч этгээд, түүний өмгөөлөгч нараас гаргасан тайлбар, хавтаст хэрэгт цугларсан нотлох баримтуудыг судлан үзэж, дараах үндэслэлээр нэхэмжлэгч *******ын Төв аймгийн Баянцогт сумын******* багийн иргэдийн Нийтийн Хуралд холбогдуулан “Төв аймгийн******* сумын******* багийн иргэдийн Нийтийн Хурлын 2025 оны 01 дүгээр сарын 14-ний өдрийн 03 дугаар “Багийн Засаг даргаар томилуулахаар санал уламжлах тухай” тогтоолыг хүчингүй болгуулах” нэхэмжлэлийн шаардлагыг дараах үндэслэлээр хянан шийдвэрлэлээ.

1. Гуравдагч этгээдийн өмгөөлөгч******* нь  2025 оны 03 дугаар сарын 18-ны өдрийн 10 цаг 00 минутад товлосон шүүх хуралдааны товыг 2025 оны 03 дугаар сарын 12-ны өдрийн урьдчилсан хэлэлцүүлгийн хуралдаанд цахимаар оролцож шүүх хуралдааны товыг мэдсэн, түүнчлэн шүүх хуралдааны тов мэдэгдсэн  баримтад 2025 оны 03 дугаар сарын 13-ны өдөр гарын үсэг зурсан байх боловч шүүх хуралдаанд хүндэтгэн үзэх шалтгаангүйгээр ирээгүй байх бөгөөд гуравдагч этгээд*******аас өмгөөлөгч маань гадаад явсан гэж хүнээс сонссон, өмгөөлөгчгүй шүүх хуралдаанд оролцоход татгалзах зүйлгүй гэсэн тул гуравдагч этгээдийн өмгөөлөгчийг шүүх хуралдаанд оролцуулалгүй хэргийг хянан хэлэлцсэн болно.
2. Нэхэмжлэгч ******* нь Төв аймгийн******* сумын******* багийн иргэдийн Нийтийн Хуралд холбогдуулан “Төв аймгийн******* сумын******* багийн иргэдийн Нийтийн Хурлын 2025 оны 01 дүгээр сарын 14-ний өдрийн 02 дугаар “Багийн Засаг даргаар томилуулахаар санал уламжлах тухай” тогтоолыг хүчингүй болгох”[4] нэхэмжлэлийн шаардлага гаргасан боловч Төв аймгийн******* сумын иргэдийн Төлөөлөгчдийн Хурлын 2025 оны 02 дугаар сарын 17-ны өдрийн 09 дугаар албан бичигт[5] “Тус сумын******* 2-р багийн иргэдийн Нийтийн Хурлын багийн Засаг даргад уламжилсан 02, 03 тогтоол нь нэг тогтоол бөгөөд дугаарлахдаа дараалуулан дугаарлан алдаа гаргасан байна ...” гэж, түүнчлэн тус багийн явуулсан бичгийн дэвтрийн[6] 8 дугаарт “2025 оны 01 дүгээр сарын 14-ний өдөр 03 дугаар******* 2-р багийн Засаг даргаар томилуулахаар санал уламжлах тухай албан бичгийг хүргүүлсэн зэрэг баримтад үндэслэн нэхэмжлэгчээс Төв аймгийн******* сумын******* багийн иргэдийн Нийтийн Хуралд холбогдуулан “Төв аймгийн******* сумын******* багийн иргэдийн Нийтийн Хурлын 2025 оны 01 дүгээр сарын 14-ний өдрийн 03 дугаар “Багийн Засаг даргаар томилуулахаар санал уламжлах тухай” тогтоолыг хүчингүй болгох”[7] гэж нэхэмжлэлийн шаардлагаа өөрчилсөн тул өөрчилсөн нэхэмжлэлийн шаардлагын хүрээнд хэргийг хянан шийдвэрлэв.
3. Маргаан бүхий акттай холбогдуулан нэхэмжлэгч *******аас “ ... дахин санал хураалт явуулахад эхний санал хураалтад оролцсон 158 иргэнээс 134 иргэн санал өгсөн. 134 иргэн нь өрхийн төлөөлөл болоход хүрэхгүй ... Монгол улсын Засаг захиргаа нутаг дэвсгэрийн нэгж, түүний удирдлагын тухай хуулийн 56 дугаар зүйлийн 56.5.2 дахь заалтад “энэ хуулийн 56.5.1-д заасан хүний талаар санал хураалт явуулж, Хуралд оролцсон иргэдийн, түүнчлэн нийт төлөөлөгчдийн олонхын санал авсан хүнийг Засаг даргад нэр дэвшүүлэх” гэж заасны дагуу******* нь 80 иргэний санал авсан тохиолдолд түүнийг Засаг даргаар томилуулахаар санал уламжлах байсан ...” гэж,

хариуцагч Төв аймгийн******* сумын******* багийн иргэдийн Нийтийн Хурлын дарга*******оос “ ... эхний 158 хүнээс санал хураахад багийн Засаг даргаар нэр дэвшсэн 3 хүн дээр санал хураасан. 3 хүнээс аль нь ч олонхын санал аваагүй тул дахин санал хураалт явуулсан. Тэр үед хүмүүс зарим нь мал хуй хэцүүдлээ гээд гарч явцгаасан. Иргэдэд сонгох эрх нь байгаа, саналаа өгөхгүй гээд явсан иргэдийг хорьж цагдаж чадахгүй ...” гэж,

гуравдагч этгээд*******аас “... багийн иргэдийн Нийтийн Хурлыг хуулийн дагуу болсон гэж үзэж байна. Монгол улсын Засаг захиргаа, нутаг дэвсгэрийн нэгж, түүний удирдлагын тухай хуульд нийт 172 өрхтэй үүний 1/3 нь ирсэн тохиолдолд багийн иргэдийн Нийтийн Хурлыг хүчинтэйд тооцох хуулийн заалттай ... манай багаас 84 өрхөөс иргэн ирсэн ... Манай баг хөдөөний баг. Ардаа мал ахуйгаа орхисон хүмүүс явж, үлдэх боломжтой хүмүүс үлдэж, санал өгсөн ...” гэж тус тус маргажээ.

4. Монгол улсын Засаг захиргаа, нутаг дэвсгэрийн нэгж, түүний удирдлагын тухай хуулийн 32 дугаар зүйлийн 32.1 дэх хэсэгт “Иргэдийн Нийтийн Хурал нь шууд ардчиллын зарчмын үндсэн дээр үйл ажиллагаагаа явуулдаг, хуулиар олгогдсон бүрэн эрхийг хамтын удирдлагын зарчмын үндсэн дээр хэрэгжүүлдэг, иргэдийн өөрийн удирдлагын байгууллага мөн”, 32 дугаар зүйлийн 32.8 дахь хэсэгт “Баг, хорооны иргэдийн Нийтийн Хурал дараах нийтлэг бүрэн эрхтэй”, 32 дугаар зүйлийн 32.8.4 дэх заалтад “баг, хорооны Засаг даргад нэр дэвшүүлэх” эрхтэй, 56 дугаар зүйлийн 56.2 дахь хэсэгт “Засаг даргыг томилуулахаар тухайн иргэдийн Төлөөлөгчдийн Хурал болон иргэдийн Нийтийн Хурал нэр дэвшүүлнэ”, 56 дугаар зүйлийн 56.5.2 дахь заалтад “энэ хуулийн 56.5.1-д заасан хүний талаар санал хураалт явуулж, Хуралд оролцсон иргэдийн, түүнчлэн нийт төлөөлөгчдийн олонхын санал авсан хүнийг Засаг даргад нэр дэвшүүлэх”, 56.5.3 дахь заалтад “хэрэв санал хураалтаар хэн ч олонхын санал аваагүй бол хамгийн олон санал авсан хоёр хүний талаар дахин санал хураалт явуулж олонхын санал авсан хүнийг Засаг даргад нэр дэвшүүлэх” гэж тус тус хуульчилсан.
5. Дээрх хуулийн зохицуулалтаар багийн иргэдийн Нийтийн Хурлаар тухайн багийн Засаг даргад нэр дэвшүүлэх хүнийг багийн иргэдээс санал хураан нэр дэвшигчдээс олонхын санал авч чадаагүй тохиолдолд хамгийн олон санал авсан хоёр хүний талаар дахин санал хураалт явуулж, санал хураалтын дүнгээр олонхын санал авсан хүнийг багийн Засаг даргад нэр дэвшүүлэхээр сумын Засаг даргад саналыг уламжилна.
6. Төв аймгийн******* сумын******* багийн иргэдийн Нийтийн хурал 2025 оны 01 дүгээр сарын 14-ний өдөр нээхэд тус багийн 158 иргэн оролцсон бөгөөд******* багийн иргэдийн Нийтийн Хурлын хуралдааны тооллогын комиссын 2025 оны 01 дүгээр сарын 14-ний өдрийн 01 дугаар “Багийн Засаг даргад нэр дэвшүүлэн санал хураасан дүнгийн тухай” тогтоолоор[8]*******ыг дэмжиж 78 санал буюу 49,7 хувь, *******ыг дэмжиж 53 санал буюу 33,7 хувь, О.Баттулгыг дэмжиж 26 санал буюу 16,6 хувь тус тус санал өгсөн,  дээрх тооллогын комиссын 02 дугаар “Багийн Засаг даргад нэр дэвшүүлэн дахин санал хураасан дүнгийн тухай” тогтоолоор[9] 134 иргэн санал өгч түүнээс*******ыг дэмжиж 70 санал буюу 52,2 хувь, *******ыг дэмжиж 64 санал буюу 47.7 хувь тус тус санал өгчээ. 
7. Монгол улсын Засаг захиргаа, нутаг дэвсгэрийн нэгж, түүний удирдлагын тухай хуулийн 32 дугаар зүйлийн 32.6 дахь хэсэгт “Тухайн нутаг дэвсгэрийн иргэдийн болон хорооны хэсэг тус бүрийн төлөөллийг хангах зарчмаар багийн иргэдийн Нийтийн Хурлын хуралдаанд гурван өрх тутмаас, 400-аас дээш өрхтэй багт таван өрх тутмаас, ... тус бүр нэгээс доошгүй хүн хүрэлцэн ирсэн тохиолдолд хуралдааныг хүчинтэйд тооцно ...” гэж хуульчилсан.  Иймд Төв аймгийн******* сумын******* багийн хүн амын жагсаалтаас[10] үзвэл 172 өрх, 496 иргэнтэй байх тул гурван өрх тутмаас нэгээс доошгүй иргэн оролцсон буюу 57 өрхөөс нэгээс доошгүй иргэн оролцсон тохиолдолд тус багийн иргэдийн Нийтийн Хурлын хуралдааныг хүчинтэйд тооцно.
8. Эхний санал хураалтаас хамгийн олон санал авсан *******,******* нарт дахин санал хураалт явуулахад 82 өрхийн 134 иргэн санал өгсөн байх ба энэ нь дээрх хуулийн зохицуулалттай нийцэж байна. Тодруулбал тус багийн иргэдийн Нийтийн Хуралд 57 өрхийн нэгээс доошгүй төлөөлөл байхад хуралдааныг хүчинтэйд тооцох бөгөөд дахин санал хураалтад эхний санал хураалтад оролцсон 24 иргэн оролцоогүй ч 82 өрхийн 134 иргэн санал өгсөн нь тухайн багийн иргэдийн Нийтийн Хурлын ирц нь хангалттай буюу тухайн хуралдаан хүчинтэй байна.
9. Нэхэмжлэгч *******аас “Монгол улсын Засаг захиргаа нутаг дэвсгэрийн нэгж, түүний удирдлагын тухай хуулийн 56 дугаар зүйлийн 56.5.2 дахь заалтад “энэ хуулийн 56.5.1-д заасан хүний талаар санал хураалт явуулж, Хуралд оролцсон иргэдийн, түүнчлэн нийт төлөөлөгчдийн олонхын санал авсан хүнийг Засаг даргад нэр дэвшүүлэх” гэж заасны дагуу******* нь 80 иргэний санал авсан тохиолдолд түүнийг Засаг даргаар томилуулахаар санал уламжлах байсан” гэж маргаж байх бөгөөд дахин санал хураалтад оролцсон 134 иргэнээс 70 хүн*******ыг  дэмжиж 52,2 хувийн санал авчээ. Тодруулбал, дээрх хуулийн зохицуулалт нь тухайн иргэдийн Нийтийн Хуралд оролцсон иргэдийн буюу 134 иргэнээс олонхын санал авсан байхыг шаардах ба 82 өрхийн 134 иргэн оролцсон иргэдийн Нийтийн Хурал ирц хүрсэн тул******* нь тэдгээр иргэдээс 70 хүний санал буюу 52,2 хувийн санал авсныг олонхын санал авсан гэж үзнэ.

Иймд нэхэмжлэгч *******ын Төв аймгийн******* сумын******* багийн иргэдийн Нийтийн Хуралд холбогдуулан гаргасан “Төв аймгийн******* сумын******* багийн иргэдийн Нийтийн Хурлын 2025 оны 01 дүгээр сарын 14-ний өдрийн 03 дугаар “Багийн Засаг даргаар томилуулахаар санал уламжлах тухай” тогтоолыг хүчингүй болгуулах” нэхэмжлэлийн шаардлагыг бүхэлд нь хэрэгсэхгүй болгож шийдвэрлэлээ.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.3, 106.3.14 дэх хэсэгт заасныг тус тус удирдлага болгон ТОГТООХ нь:

1.   Монгол улсын Засаг захиргаа, нутаг дэвсгэрийн нэгж, түүний удирдлагын тухай хуулийн 32 дугаар зүйлийн 32.1, 32.6, 32.8.4, 56 дугаар зүйлийн 56.5.2, 56.5.3 дахь хэсэгт  заасныг тус тус баримтлан нэхэмжлэгч *******ын Төв аймгийн******* сумын******* багийн иргэдийн Нийтийн Хуралд холбогдуулан гаргасан “Төв аймгийн******* сумын******* багийн иргэдийн Нийтийн Хурлын 2025 оны 01 дүгээр сарын 14-ний өдрийн 03 дугаар “Багийн Засаг даргаар томилуулахаар санал уламжлах тухай” тогтоолыг хүчингүй болгуулах” нэхэмжлэлийн шаардлагыг бүхэлд нь хэрэгсэхгүй болгосугай.

2. Захиргааны хэрэг шүүхэд хянан шийдвэрлэх тухай хуулийн 47 дугаар зүйлийн 47.1 дэх хэсэгт зааснаар нэхэмжлэгчээс улсын тэмдэгтийн хураамжид урьдчилан төлсөн 70,200 төгрөгийг улсын төсвийн орлогод хэвээр үлдээсүгэй.

3. Захиргааны хэрэг шүүхэд хянан шийдвэрлэх тухай хуулийн 114 дүгээр зүйлийн 114.1 хэсэгт зааснаар хэргийн оролцогчид, тэдгээрийн итгэмжлэгдсэн төлөөлөгч, өмгөөлөгч нь шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор давж заалдах журмаар гомдол гаргах эрхтэй болохыг мэдэгдсүгэй.

 

 

ДАРГАЛАГЧ, ШҮҮГЧ                                       Л.ӨЛЗИЙЖАРГАЛ