2025 03 28 128/ШШ2025/0220

 

МОНГОЛ УЛСЫН НЭРИЙН ӨМНӨӨС

 

Нийслэл дэх Захиргааны хэргийн анхан шатны шүүхийн шүүгч Д.Чанцалням даргалж, тус шүүхийн шүүх хуралдааны нэгдүгээр танхимд нээлттэй хийсэн шүүх хуралдаанаар,

Нэхэмжлэгч: Т******* ХХК

Нэхэмжлэгчийн төлөөлөгч: Ж.У*******

Хариуцагч: Э******* ХК, Тендерийн үнэлгээний хороо

Хариуцагчийн итгэмжлэгдсэн төлөөлөгч: С.М*******, Б.Ц, А.А нарын хоорондын тендерийн Үнэлгээний хорооны шийдвэртэй холбогдох маргааныг хянан шийдвэрлэв.

Шүүх хуралдаанд: нэхэмжлэгчийн төлөөлөгч Ж.У*******, хариуцагчийн итгэмжлэгдсэн төлөөлөгч С.М*******, Б.Ц, А.А, шүүх хуралдааны нарийн бичгийн даргаар Н.А******* нар оролцов. 

ТОДОРХОЙЛОХ нь: 

  Нэхэмжлэгч Т******* ХХК нь нэхэмжлэлийн шаардлагаа: Эрдэнэс Таван толгой ХК-ын 2024 оны 12 дугаар сарын 13-ны ******* тоот мэдэгдэлд дурдсан Үнэлгээний хорооны дүгнэлтийг хүчингүй болгож, Т******* ХХК-ийг дугаар тендерийн 2 дугаар багцад гүйцэтгэгчээр шалгаруулж, гэрээ байгуулахыг даалгуулах гэж тодорхойлсон байна.

1. Нэхэмжлэгч Т******* ХХК нь тендерээс татгалзсан тухай 2024 оны 12 дугаар сарын 13-ны өдрийн ******* дугаар албан бичгийг эс зөвшөөрч Сангийн яаманд гомдол гаргаж, Сангийн яам гомдлыг хянан үзээд 2024 оны 12 дугаар сарын 31-ний өдрийн 03/10931 дүгээр албан бичгээр гомдлыг хангахаас татгалзсан тул шүүхэд 2025 оны 01 дүгээр сарын 06-ны өдөр нэхэмжлэл гаргасан байна.

2. Нэхэмжлэгч нэхэмжлэлийн шаардлагын үндэслэлдээ:

2.1. Маргаан бүхий акт нь дараах үндэслэлээр хууль бус. Үүнд:

2.1.1. Э******* ХК-ийн 2024 оны 12 дугаар сарын 13-ны өдрийн ******* дугаар албан бичиг болон Сангийн яамны 2024 оны 12 дугаар сарын 31-ний өдрийн 03/10931 дүгээр албан бичигт тус бүрд дурдагдсан ТШЗ-19.2-ын 1.4-т заасан ... (Тендерт оролцогч нь Төрийн үйлчилгээний нэгдсэн систем /e-mongolia/-д ажилтны дээд боловсролын дипломын мэдээлэл байршсан эсэхийг урьдчилан шалгах шаардлагатайг анхаарна уу) гэх шаардлагыг хангаагүй гэж үзсэн нь үндэслэлгүй,

2.1.2. Нийтийн мэдээллийн ил тод байдлын тухай хуулийн 5 дугаар зүйлийн 5.1.6-д нийтийн мэдээллийн дэд бүтэц нь харилцан уялдаатай, нэгдмэл бодлого, төлөвлөгөөтэй байх гэсэн зарчим хангагдаагүйгээс манай компанийн хууль ёсны эрх ашиг бид бүхнээс үл шалтгаалах байдлаар зөрчигдөөд байна.

3. Нэхэмжлэгчийн төлөөлөгч Ж.У******* шүүхэд гаргасан нэхэмжлэл болон шүүх хуралдаанд гаргасан тайлбартаа: Манай компани Эрдэнэс тавантолгой ХК-аас зарласан тендерийн катеринг үйлчилгээний тодорхой багцад оролцох санал өгсөн. Эрдэнэс тавантолгой ХК-аас 2024 оны 12 дугаар 13-ны өдөр 01-2703 дугаартай албан бичгээр манайд тендерийн шаардлагыг хангаагүй гэж ирүүлсэн. Тендерийн баримт бичиг дээр заасан ерөнхий тогооч Н.Ч******* нь хүнсний технологич биш, хүнсний инженер гэсэн мэдээлэл цахимаар ирсэн. Хүнсний эрүүл ахуйч гэж санал болгосон Ц.Ц******* нь Нийгмийн эрүүл мэндийн мэргэжилтэй байна. Манайх хүнсний эрүүл ахуйч мэргэжилтэй, дээд боловсролтой байхыг шаардаж байгаа гэсэн. Энэ асуудлыг тендерт санал болгохоосоо өмнө буюу 2024 оны 10 дугаар сар, 11 дүгээр сард цахимаар тендерт холбогдох журмын дагуу шалгаад е-mongolia-д Эрдэнэс тавантолгой ХК-ийн албан бичигт дурдагдсан байсан тэр мэргэжлээр бол бүртгэгдсэн байсан. Бид Боловсролын ерөнхий газарт холбогдох бичиг баримтуудаа өгөөд, Боловсролын ерөнхий газраас зохих өөрчлөлтүүдийг 2024 оны 10 дугаар 09, 2024 оны 11 дүгээр сарын 11-ний өдөр Н.Ч*******, Ц.Ц******* нарын мэдээлэлд зохих ёсоор хийгдээд, үүнтэй холбоотойгоор е-mongolia-с лавлагааг нь аваад, тендерийн баримт бичигтээ хавсаргаж явуулсан. Н.Ч*******гийн хувьд 1-р хавтасны 30 дугаар хуудас, Ц.Ц*******гийн хувьд 1-р хавтасны 50 дугаар хуудсанд кодоор баталгаажсан лавлагаануудыг явуулсан. Эрдэнэс тавантолгой ХК-аас албан бичиг хүлээж авсны дараа хууль тогтоомжийн дагуу Сангийн яаманд гомдол гаргасан. Сангийн яаманд энэ талаарх тайлбаруудаа хүргүүлсэн. Сангийн яамнаас 2024 оны 12 дугаар сарын 31-ний өдөр бид нарт албан бичгээр Эрдэнэс тавантолгой ХК-ийн Үнэлгээний хорооны шийдвэр үндэслэлтэй байна гэдэг хариуг өгсөн. Энэ хооронд бид нар Төрийн худалдан авах ажиллагааны газарт хандсан. Бид нар ингээд зохих өөрчлөлтүүдийг хүмүүс дээр хийлгэсэн. Гэтэл энэ захиалагч байгууллага өөрсдийн тэр ашигладаг системээрээ хандахад хуучин мэдээллүүд гарч ирсэн байна, энийг тодруулж лавлаж өгөөч гэсэн. Төрийн худалдан авах ажиллагааны газраас бид нарт албан бичиг ирэхэд та нар энэ асуудлаараа яг энэ асуудлыг хариуцсан мэргэжлийн байгууллага болох Боловсролын мэдээллийн технологийн төвд ханд гэдэг албан бичиг ирүүлсэн. Үүний дагуу бид нар Боловсролын мэдээллийн технологийн төвд хандаад, 2024 оны 12 дугаар сарын 31-ний өдөр буюу Сангийн яамны шийдвэр гардаг өдөртэй яг нэг өдөр давхцаад, бид нар албан бичгийг хүлээж авсан. Хавтаст хэргийн 12 дугаар хуудсанд байгаа. Нямхүү овогтой Ч******* нь 2018 онд Технологийн дээд сургуулийг 07210105 индексийн дугаартай Хоол үйлдвэрлэл үйлчилгээний технологийн бакалавр хөтөлбөрт сурсан бөгөөд уг мэдээллийг 2024 оны 10 дугаар сарын 09-ний өдрийн 09 цагт Боловсролын ерөнхий газрын ES3610760196 дугаартай хэрэглэгчийн эрхээр баталгаажуулан лавлагааны санд оруулсан байгаа. 2 дугаар догол мөрөнд Ц.Ц******* Анагаах Шинжлэх Ухааны Үндэсний Их Сургуулийг 720109 индексийн дугаартай Хүнсний эрүүл ахуйчийн бакалаврын хөтөлбөрт тус тус суралцаж төгссөн бөгөөд уг мэдээллийг 2024 оны 11 дүгээр сарын 12-ны өдрийн 06 цаг 11 минутад Боловсролын ерөнхий газрын ES3610760196 дугаартай хэрэглэгчийн эрхээр баталгаажуулж лавлагааны санд оруулсан болохыг үүгээр уламжилж байна гэж байгаа юм. Он шилжиж байгаа үед хөтөлбөрөө бид нар нотариатаар батлаад Сангийн яаманд өгсөн. Харамсалтай нь аль хэдийн Сангийн яамны шийдвэрээр энэ мэдээлэл гарчихсан байсан. Бид энэ ондоо Боловсролын мэдээллийн технологийн төвөөс авсан албан бичгээ бариад Төрийн худалдан авах ажиллагааны газар очсон. Төрийн байгууллагуудын мэдээлэл нь ингээд зөрүүтэй байгаад байна, энийг яах ёстой вэ, нэг цэгт нь оруулж өгөөч, бид нар юу болоод байгааг мэдэхгүй байна гээд хэлсэн. Үүний хариу болгоод 2025 оны 01 дүгээр сарын 21-ний өдрийн А-1/68 дугаартай Төрийн худалдан авах ажиллагааны газрын дарга Ц.Б*******ын албан бичиг ирсэн. Тус албан бичигт Н.Ч*******, Ц.Ц******* ажилчдын мэдээллийг 2024 оны 12 дугаар сарын 04-ний өдөр Хур системээс татаж авсан байна. Ц.Ц******* нь Нийгмийн эрүүл мэнд мэргэжилтэй гэж гарч ирсэн, Н.Ч******* Хүнсний инженерчлэл гэж гарч ирсэн байна. Энэ тодорхойлолт нь цахим үйлчилгээний нэгдсэн портал Е-Mongolia системээс гарсан тодорхойлолттой зөрүүтэй байгааг Боловсролын яамны холбогдох ажилтантай 2025 оны 01 дүгээр сарын 03-ны өдөр холбогдож, Хур системийн серверийн хуулбар хуучин буюу 0.3.0-с дуудаж байгаагаас шалтгаалан шинэчлэгдсэн мэдээлэл ирээгүй байгааг тогтоон Хур системийн сервисийн хуулбарыг 1.5.0 болгон шинэчилж хоёр системийн зөрүүтэй тодорхойлолт ирүүлж буйг засварласан болно гэж байгаа. Энэ бүгдээс харахад төрийн цахим мэдээллийн системийн цаг тухай бүрд хийгдээгүй шинэчлэлтээс үүдэж захиалагч Эрдэнэс таван толгой ХК-ийн үнэлгээний хороо дээр энэ мэдээллүүд зөрүүтэй буюу тендерийн шаардлага хангаагүй байдлаар очсон гэдэг. Сангийн яам болон захиалагч талаас ирүүлсэн тайлбарыг харахаар Сангийн сайдын цахим тендерийг зохион байгуулах журамд заасан, мөн тендерийн баримт бичиг дээр зааснаар оролцогч тал тендерт оролцохоосоо өмнө ажилчдынхаа мэдээллийг бүгдийг нь сайн лавлаж тодорхой болгох ёстой гэсэн. Үүний дагуу бид нар өөрсдөөс шалтгаалах бүх ажлуудаа хийсэн, бид нарын хувьд Хур систем байна уу, Дан систем байна уу тэдгээрт хандах эрх байхгүй, зөвхөн хандаж мэдээлэл авах боломжтой. Бидэнд зөвхөн Е-mongolia систем байдаг. Е-Mongolia систем рүү орчихсон байхад манай ажилчдын мэдээлэл бол үнэн зөв бүрэн гүйцэд оржээ гэсэн ойлголттой байсан. Харамсалтай нь Төрийн худалдан авах ажиллагааны газраас ирсэн бичгийг харахад шинэчлэлт, өөрчлөлт нь цаг тухай бүрдээ ороогүй байжээ гэдэг нь харагдаж байгаа юм. Хариуцагч талаас ирсэн тайлбар дээр нэхэмжлэгч мэдээллийн зөрүүтэй байдлаа бидний албан бичиг очсоны дараа мэдээд, залруулаад яваад байгаа юм биш үү гэсэн тайлбар хэлж байгаа. Е-Mongolia-с гаргасан лавлагаануудаас өмнө нь үйл ажиллагаагаа хийгээд, баталгаажуулаад явсан гэдэг нь харагдана. Төрийн захиргааны хоёр байгууллагын тодорхойлолт, лавлагаагаар энэ нөхцөл байдлууд маань тогтоогдож байгаа учраас Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.3.1-д заасны дагуу Эрдэнэс таван толгой ХК-ийн 2024 оны 12 дугаар сарын 13-ны өдрийн ******* мэдэгдэлд дурдсан Үнэлгээний хорооны дүгнэлтийг хүчингүй болгож, Т******* ХХК-ийг дугаар тендерийн 2 дугаар багцын гүйцэтгэгчээр шалгаруулж, гэрээ байгуулахыг даалгаж өгнө үү гэв.

4. Хариуцагчийн итгэмжлэгдсэн төлөөлөгч С.М******* шүүх хуралдаанд гаргасан тайлбартаа: Нэхэмжлэгчийн нэхэмжлэлийн шаардлагыг бүхэлд нь хүлээн зөвшөөрөхгүй. Катеринг үйлчилгээ үзүүлэх багц 2-ын гүйцэтгэгчийг сонгон шалгаруулах тендер сонгон шалгаруулалт зарласан. Уг тендерт шалгаруулалтад тендерт оролцох сонирхогч этгээдүүдээс Монополын эсрэг газарт гомдол гаргасан. Монополын эсрэг газраас 2024 оны 10 дугаар сарын 16-ны өдрийн 01/1770 дугаартай албан бичгээр ТШЗ-19.1.1-д Боловсрол, шинжлэх ухааны сайдын 2024 оны 03 дугаар сарын 20-ны өдрийн А/146 дугаар тушаалын хавсралтаар батлагдсан. Дээд боловсролын сургалтын байгууллагад мөрдөх мэргэжлийн чиглэл хөтөлбөрийн нэр индексийг оруулах шаардлагатай гэж үзээд тендерийн баримт бичгээ өөрчил гэж шийдвэрлэсэн. Үүний дагуу анх гаргасан тендерийн баримт бичигтээ өөрчлөлт оруулаад, бүх шаардаж байгаа мэргэжлүүдээ хөтөлбөрийн нэр, индекстэй болгож, индексээрээ зааж оруулсан. Энэ индекстэй нийцүүлж, тендерт оролцогч материалуудаа ирүүлэх ёстой. Тухай бүр тодруулгуудыг тендерт оролцогч нарт хүргүүлж байсан болохоор харсан байх гэж бодож байна. Энэхүү өөрчлөлт оруулсан тендерийн баримт бичгийнхээ дагуу материалаа хүлээж аваад, тендерийг нээсэн. Тендерийн 2-р багцад Рэд рок катеринг ХХК, Аримүн консалтинг групп ХХК, Т******* ХХК, Эколожикал технологи ХХК, Гурван ивээл од ХХК-ууд материалаа ирүүлсэн байсан. Тендерийн үнэлгээний хорооноос тендерт оролцогч нарын ирүүлсэн тендерийг хянаж, үнэлгээ хийгээд, тайлан зөвлөмжийг захиалагчид хүргүүлсэн. Шаардлагад нийцсэн тендер ирүүлээгүй учраас энэ компаниудад ямар ямар шаардлага хангаагүй вэ гэдэг талаар нь мэдэгдэл хүргүүлээд, дахин зарлах шийдвэр гаргасан. Нэхэмжлэгч Т******* ХХК-ийн тухайд хоёр дипломын асуудал байгаа. Тендерийн өгөгдлийн хүснэгтийн ТШЗ-19.1-д ерөнхий тогоочийг заасан. Хоол үйлдвэрлэл, үйлчилгээний технологи, Хүнс үйлдвэрлэлийн технологи, Хоол үйлдвэрлэл, үйлчилгээний технологи 072104, 072105 байх гэж заасан. Хүнсний эрүүл ахуйч 072103, 072104, 072105 зэрэг ийм индексээр дээд боловсролын дипломтой байх шаардлагыг оруулсан. Шалгуур үзүүлэлтийн тухайд Төрийн худалдан авах ажиллагааны Хур системээр шалгаж үзэх талаар тендерийн баримт бичигт оруулсан учраас Хур системээр дамжуулж диплом шалгаж үзсэн. Тендерээ цаасан байдлаар эсхүл өөрөө ирүүлээд байх шаардлага байхгүй. Яагаад гэвэл энийг үнэлгээнд харгалзаж үзэхгүй гэдгээ мөн адил тусгасан. Үнэлгээний хорооны зүгээс хуульд заасны дагуу болон тендерийн баримт бичигт заасны дагуу тендер шалгаруулалтын зааварчилгаанд заасан шаардлагаа тендерт оролцогч компаниуд хангаж байна уу, үгүй юу гэдгийг л үнэлдэг. Өөр нэгэн байдлаар дүйцүүлж ч юм уу, тендер шалгаруулалтын баримт бичигт заагаагүй асуудлаар шийдвэр гаргах эрх хэмжээ байхгүй. Хэрэв үнэлгээний хорооны зүгээс индексийн асуудал дээр ч юм уу, арай өөр байдлаар Хур системээс өөр байдлаар үнэлээд шийдвэр гаргасан тохиолдолд энэ өөрөө хуулиа зөрчиж байгаа хэрэг болно. Энэ үнэлгээний хороо тендерийн өгөгдлийн хүснэгтэд заагаагүй шаардлага, шалгуур үзүүлэлтээр компанийг тусгайлан авч үзээд, давуу байдал бий болгоод шалгаруулж байгаа юм биш үү гэсэн хардлага үүсэх учраас өөр аргаар, ямар нэгэн байдлаар үнэлгээ хийх боломж байхгүй. Бид нар тендерийн өгөгдлийн хүснэгтэд Хур системээс шалгаж үзнэ гэж заасан. Хур систем дээр Н.Ч*******гийн диплом нь хүнсний инженерчлэл мэргэжилтэй, 012101 кодтой байсан. Ц.Ц******* нь Нийгмийн эрүүл мэнд 091801 кодтой гарч ирж байгаа тул бид урдын хэлсэн аргачлалын дагуу үнэлсэн. Хур системээс ийм кодоор гарч ирсэн учраас индекс нь зөрсөн. Ингээд шаардлага хангахгүй гэж шийдвэрлэсэн. Үнэлгээний хорооны зүгээс тендерийн баримт бичиг, тендерийн шалгаруулалтын зааварчилгаанд заасныхаа дагуу заасан аргачлалаараа л үнэлсэн учраас ямар нэгэн хуулийг зөрчөөгүй гэж үзэж байна. Манай шийдвэр хууль ёсны гарсан гэж үзэж байгаа учраас нэхэмжлэлийн шаардлагыг бүхэлд нь хэрэгсэхгүй болгож өгнө үү гэв.

5. Хариуцагчийн итгэмжлэгдсэн төлөөлөгч Б.Ц шүүх хуралдаанд гаргасан тайлбартаа: Сангийн сайдын 2023 оны 12 дугаар сарын 25-ны өдрийн А/248 дугаар тушаалаар батлагдан Цахим системээр худалдан авах ажиллагаа зохион байгуулах, түүний тасралтгүй, аюулгүй ажиллагааг хангах журам-ын 4 дүгээр зүйлд тодорхой заасан. 4.5-д Аж ахуй эрхлэгч холбогдох цахим системээс дамжуулан авч буй өөрийн тендерт холбоотой мэдээлэл, өөрийн ирүүлсэн тендер, түүнд хавсаргасан аливаа баримт бичгийн үнэн зөв эсэхийг нягтлах, алдаатай тохиолдолд тендер хүлээж авах эцсийн хугацаанаас өмнө залруулах үүрэгтэй ба энэ үүргээ биелүүлээгүйтэй холбоотой хариуцлагыг дангаар хүлээнэ гэж заасны дагуу бид тендер шалгаруулах асуудлыг мэдэхгүй, төрийн байгууллагуудын мэдээллийг дамжуулах Хур системээр дамжуулан шалгаж байгаа байтал нэхэмжлэгч өөрөө дангаараа мэдээллийн үнэн зөвөө хариуцах ёстой байтал манайхаас мэдэгдлээ, ийм байна гээд алдаагаа дараа залруулсан мэтээр, ийм байдлаар материалаа дараа нь бүрдүүлсэн мэт харагдаж байна. Бидэнд тендер шалгаруулалтын зааварчилгаанаас өөрөөр үнэлэх ямар ч эрх хэмжээ байхгүй. Хэрвээ өөрөөр үнэлсэн бол бусдад давуу байдал олгосон зэрэг асуудалд орно. Тийм учраас манайхаас гаргасан Тендерийн үнэлгээний хорооны шийдвэр нь Сангийн сайдын баталсан журмын дагуу мөрдөж, үүргээ хэрэгжүүлээгүй байсан бол бид бүх тендерт оролцогчдоос татгалзаж, дахин тендерт орох эрхийг нээсэн. Нэхэмжлэлийн шаардлагын тухайд гэрээ байгуулахыг даалгах гэж байна. Энэ нэхэмжлэлийн шаардлагын хувьд Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд төсвийн хэмнэлттэй гэдэг зарчим байдаг. Энэхүү зарчмын тендерийн шалгуур бүрэн хангасан бол их үнийн дүнгээс бага үнийн дүнгээр үнэлэх гэсэн үнэлгээний зарчмын дагуу хийсэн. Нэхэмжлэгч этгээдийн ирүүлсэн үнийн саналыг харахаар хамгийн бага үнийн санал өгсөн ч биш, дээрээсээ дөрөвдүгээрт жагсаж байсан. Ийм байдалтай байхад шууд гэрээ байгуулахыг даалгах гэдэг нэхэмжлэлийн шаардлага гаргаж байгаа нь ямар ч хууль зүйн үндэслэлгүй байна. Журамд зааснаар тендерт материалаа ирүүлэгч этгээд өөрийн мэдээллийн үнэн зөвийг нягтлах үүрэгтэй. Түүнийгээ биелүүлээгүй байж, дараа нь биелүүлсэн гэдгээ шүүхээр үнэн зөвөө тогтоолгоод, шүүхээр тогтоолгосны эцэст гэрээ байгуулах эрх олгох нь ямар ч үндэслэлгүй, логикгүй юм.

Хуулийн зарчмаа дагавал их үнийн саналаас бага үнэ рүү гэдэг зарчмыг баримтлах ёстой. Иймд гэрээ шууд байгуулах нэхэмжлэлийн шаардлагууд нь ямар ч биелэгдэх боломжгүй болохоор нэхэмжлэгчийн гаргасан нэхэмжлэлийн шаардлагыг бүхэлд нь хэрэгсэхгүй болгож өгнө үү гэв.

ҮНДЭСЛЭХ нь:

Шүүх хэрэгт авагдсан бичгийн нотлох баримтууд болон хэргийн оролцогчдын шүүхэд ирүүлсэн шүүх хуралдаанд гаргасан тайлбарт үнэлэлт дүгнэлт өгөөд дараах үндэслэлээр нэхэмжлэлийн шаардлагыг бүхэлд нь хэрэгсэхгүй болгож шийдвэрлэв.

1. Э******* ХК-аас зарласан дугаартай Катерингийн үйлчилгээ тендер шалгаруулалтын 2 дугаар багцад оролцсон Т******* ХХК-ийн тендерээс ерөнхий тогоочид санал болгосон Н.Ч******* болон хүнсний эрүүл ахуйчаар санал болгосон Ц.Ц******* нарын сургууль төгссөн дипломыг Төрийн мэдээлэл солилцооны Хур системээр дамжуулан Боловсрол, шинжлэх ухааны яамны мэдээллийн сангаас шалгахад 072101 индекстэй Хүнсний инженерчлэл, 091801 индекстэй Нийгмийн эрүүл мэнд мэргэжилтэй байгаа нь шаардлага хангахгүй байна гэж үзэж татгалзсан захиалагчийн шийдвэрийг 2024 оны 12 дугаар сарын 13-ны өдрийн ******* дугаартай албан бичгээр нэхэмжлэгч компанид хүргүүлсэн байна.

2. Хавтаст хэрэгт авагдсан бичгийн нотлох баримтуудаар Т******* ХХК-ийн тендерийн худалдан авах ажиллагааны цахим системийн лавлагаа хэсэгт ерөнхий тогоочид санал болгосон Н.Ч*******гийн дипломын мэдээлэл хүнсний инженерчлэл мэргэжилтэй 0702101 индекстэй, хүнсний эрүүл ахуйчид санал болгосон Ц.Ц*******гийн дипломын мэдээлэл нийгмийн эрүүл мэнд мэргэжилтэй, 097801 индекстэй, тендер шалгаруулалтын баримт бичгийн өгөгдлийн хүснэгтийн ТШЗ-19.1-д Ерөнхий тогооч нь хоол үйлдвэрлэл үйлчилгээний технологич байх, хүнсний эрүүл ахуйч нь хүнсний технологич эсхүл хүнсний эрүүл ахуйч байх гэж заасан шаардлага болон ТШЗ-19.2-ын 1.3-т Ажил гүйцэтгэхэд шаардлагатай хүний нөөцийн мэдээллийг худалдан авах ажиллагааны цахим систем /www.tender.gov.mn/-ээр дамжуулан санал болгоно. Цахим системээр санал болгоогүй тохиолдолд хянан үзэхгүй. /Хүний нөөцийн мэдээллийг худалдан авах ажиллагааны цахим системээр дамжуулан илгээх зааварчилгааг хэрэглэгчийн хөтөч хэсэгт оруулж/, 1.4-т Сургууль төгссөн дипломын хуулбарыг ирүүлэх шаардлагагүй, төрийн мэдээлэл, солилцооны ХУР системээр дамжуулан Боловсрол, шинжлэх ухааны яамны мэдээллийн сангаас шалгана. /тендерт оролцогч нь Төрийн үйлчилгээний нэгдсэн систем e-mongolia-д ажилтны дээд боловсролын дипломын мэдээлэл байршсан эсэхийг урьдчилан шалгах шаардлагатайг анхаарна уу/ гэж заасан байх тул Сангийн сайдын 2023 оны А/248 дугаар тушаалыг хавсралтаар батлагдсан. Цахим системээр худалдан авах ажиллагааг зохион байгуулах, түүний тасралтгүй, аюулгүй ажиллагааг хангах журам-ын 4.5-д Аж ахуй эрхлэгч холбогдох цахим системээс дамжуулан авч буй өөрийн тендерт холбоотой мэдээлэл, өөрийн ирүүлсэн тендер, түүнд хавсаргасан аливаа баримт бичгийн үнэн зөв эсэхийг нягтлан, алдаатай тохиолдолд тендер хүлээж авах эцсийн хугацаанаас өмнө залруулах үүрэгтэй ба энэ үүргээ биелүүлээгүйтэй холбоотой хариуцлагыг дангаар хүлээнэ гэж.зааснаар холбогдох хууль журамд заасны дагуу нэхэмжлэгч компанийн ирүүлсэн тендерийг хянан үзэж, татгалзсан захиалагчийн шийдвэрийг буруутгах үндэслэл байхгүй байна.

3. Захиалагч байгууллагаас 2024 оны 12 дугаар сарын 04-ний өдрийн 16 цаг 22 минутад татаж авсан хүний нөөцийн лавлагааг үзвэл Н.Ч******* нь Технологийн дээд сургуулийг 072101 хүнсний инженерчлэл, мэргэжлийн индекс 072101-тэй төгссөн, Ц.Ц******* нь Анагаахын шинжлэх ухааны Үндэсний Их сургуулийг нийгмийн эрүүл мэнд мэргэжлээр, 091801 мэргэжлийн индекстэй гэж, Боловсролын мэдээллийн технологийн төвийн 2024 оны 12 дугаар сарын 31-ний өдрийн 1/518 дугаар албан бичгээр Н.Ч******* нь 2018 онд Технологийн дээд сургуулийг 07210105 индекстэй Хоол үйлдвэрлэл, үйлчилгээний технологийн бакалаврын хөтөлбөрт суралцаж төгссөн, уг мэдээллийг 2024 оны 10 дугаар сарын 09-ний өдрийн 09 цаг 10 минутад лавлагаа мэдээллийн санд оруулсан, Ц.Ц******* нь Анагаахын шинжлэх ухааны үндэсний их сургуулийн Нийгмийн эрүүл мэндийн сургуулийг 720109 индекстэй Хүнсний эрүүл ахуйч бакалаврын хөтөлбөрт суралцан төгссөн, уг мэдээллийг 2024 оны 11 дүгээр сарын 12-ны өдрийн 06 цаг 11 минутад лавлагааны мэдээллийн санд оруулсан болохыг Т******* ХХК-д уламжилсан байгаагаас үзвэл Төрийн үйлчилгээний нэгдсэн системд /e-mongolia/-д ажилтны дээд боловсролын дипломын мэдээлэл байршсан эсэхийг урьдчилан нягтлан шалгаагүй, тендерээс татгалзсаны дараа буюу захиалагчаас мэдэгдэл хүргүүлсний дараа өөрийн баримт бичгийн үнэн зөв эсэхийг шалгаж, боловсролын мэдээллийн технологийн төвд хандсан болох нь тогтоогдож байна.

4. Мөн нэхэмжлэгч Т******* ХХК нь боловсролын мэдээллийн технологийн төвийн лавлагаагаар тендерт санал болгосон ерөнхий тогооч, хүнсний эрүүл ахуйчийн мэргэжлийн индекс тендер шалгаруулалтын баримт бичгийн өгөгдлийн хүснэгтийн ТШЗ-19.1.1-т Ерөнхий тогооч нь хоол үйлдвэрлэл үйлчилгээний технологич-072104, 072105 индекстэй байх, Хүнсний эрүүл ахуйч нь Хүнсний технологич эсхүл Хүнсний эрүүл ахуйч-072103, 072104, 072105 индекстэй байх гэж заасан Боловсрол, шинжлэх ухааны сайдын 2024 оны А/146 дугаар тушаалыг хавсралтаар батлагдсан Дээд боловсролын сургалтын байгууллагад мөрдөх мэргэжлийн чиглэл, /хөтөлбөрийн нэр/ индекс тохироогүй гэдэгтэй маргаагүй болно.

5. Тендерийн үнэлгээний хорооны 2024 оны 09 дүгээр сарын 27-ны өдрийн 01 дүгээр тэмдэглэлд гишүүдийн 100 хувийн саналаар Катерингийн үйлчилгээ /уурхайн НБҮ, ТНАЛТ/ үзүүлэгчийг сонгон шалгаруулах тендерийн баримт бичгийг боловсруулсан боловч уг тендерийн баримт бичигт Хант хас катеринг ХХК-аас Монополын эсрэг газарт гомдол ирүүлж, тус газраас 2024 оны 10 дугаар сарын 16-ны өдрийн 01/1770 дугаартай албан бичгээр Тендерийн баримт бичгийн ТШЗ-19.1.1-т Технологич-2, Хүнсний технологич мэргэжилтэй, Хүнсний эрүүл ахуйч мэргэжилтэй гэж заасан нь Боловсрол, шинжлэх ухааны сайдын 2024 оны А/156 дугаар тушаалын хавсралтаар батлагдсан Дээд боловсролын сургалтын байгууллагад мөрдөх мэргэжлийн чиглэл, /хөтөлбөрийн нэр/ индекс-д нийцэхгүй байх тул эдгээр шалгуур үзүүлэлтүүд нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 5 дугаар зүйлийн 5.1, 17 дугаар зүйлийн 17.2.3 дахь хэсэгт заасныг зөрчсөн гэх үндэслэлтэй байх тул тендерийн баримт бичгийн ТШЗ-19.1.1-т холбогдох өөрчлөлт оруулан, хэрхэн шийдвэрлэсэн талаар эргэн мэдэгдэхийг Эрдэнэс Таван толгой ХХК-д даалгасан байна.

6. Монополын эсрэг газрын 2024 оны 01/1770 дугаартай албан бичгийн дагуу Үнэлгээний хорооны 2024 оны 10 дугаар сарын 30-ны өдрийн 02 дугаар хуралдаанаар гишүүдийн 100 хувийн саналаар Тендерийн баримт бичгийн ТШЗ-19.1.1-т Ерөнхий тогооч-Хоол үйлдвэрлэл үйлчилгээний технологич, Хүнс үйлдвэрлэлийн технологич, Хоол үйлдвэрлэл, үйлчилгээний технологич мэргэжлийн чиглэл /хөтөлбөрийн нэр/ индекс-072104, 072105 байхаар харин Хүнсний эрүүл ахуйч-2, Хүнсний технологич эсхүл Хүнсний эрүүл ахуйч, Хүнс үйлдвэрлэлийн технологич, Хоол үйлдвэрлэл үйлчилгээний технологич, Хүнсний чанар, аюулгүй байдал индекс-072103, 072104, 072105 гэж тендерт оролцохыг сонирхогч этгээдүүдэд хүргүүлэхээр шийдвэрлэсэн байна.

7. Дээрх нөхцөл байдлаас үзвэл шинэчилсэн ажлын даалгавраар нэхэмжлэгч Т******* ХХК-ийн ирүүлсэн тендерээс Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 26 дугаар зүйлийн 26.1 дэх хэсэг, тендерийн баримт бичгийн өгөгдлийн хүснэгтийн 19.1, 19.2 дахь заалтад заасны дагуу шаардлагад нийцээгүй гэж үзэж татгалзсан, Тендерийн үнэлгээний хорооны шийдвэр нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 5 дугаар зүйлийн 5.1-т Энэ хуулийг хэрэгжүүлэхэд өрсөлдөх тэгш боломжтой, ил тод, үр ашигтай, хэмнэлттэй, хариуцлагатай байх зарчмыг баримтална, 17 дугаар зүйлийн 17.1-т Захиалагч техникийн чадавх болон туршлагын шаардлагыг хангах нотлох баримт ирүүлэхийг оролцогчоос шаардаж болно, 17.2.3-д гэрээний үүргийн гүйцэтгэлийг хариуцах ажилтны нэр, боловсрол, мэргэжлийн ур чадварын мэдээлэл, 28 дугаар зүйлийн 28.1.3-д шаардлагад нийцээгүй тендер ирүүлсэн оролцогчийн тендерээс татгалзах, Боловсрол, шинжлэх ухааны сайдын 2024 оны 03 дугаар сарын 20-ны өдрийн А/146 дугаар тушаалын хавсралтаар батлагдсан Дээд боловсролын сургалтын байгууллагад мөрдөгдөх мэргэжлийн чиглэл, /хөтөлбөрийн нэр/ индекс-д 07-инженерчлэл, үйлдвэрлэл, барилга байгууламж, 072-үйлдвэрлэл, боловсруулалт, 0721-хүнс боловсруулалт, 072101- Хүнс судлал, 072102- Хоол зүй, шим судлал, 072103- Хүнсний чанар, аюулгүй байдал, 072104- Хүнс үйлдвэрлэлийн технологи, 072105-Хоол үйлдвэрлэл, үйлчилгээний технологи гэж заасныг зөрчөөгүй байна.

8. Учир нь нэхэмжлэгч Т******* ХХК-ийн тендерт ерөнхий тогоочид санал болгосон Н.Ч******* болон Хүнсний эрүүл ахуйчаар санал болгосон Ц.Ц*******гийн сургууль төгссөн дипломыг Төрийн мэдээлэл солилцооны Хур системээр дамжуулан шалгахад Н.Ч******* нь Хүнсний инженерчлэл мэргэжилтэй /072101/, Ц.Ц******* нь Нийгмийн эрүүл мэнд /091801/ мэргэжилтэй байсан бөгөөд тендер шалгаруулалтын үр дүн гарсны дараа буюу Боловсролын мэдээллийн технологийн төвийн 2024 оны 12 дугаар сарын 31-ний өдрийн 1/518 дугаартай албан бичгээр Н.Ч******* нь 07210105 индекстэй Хоол үйлдвэрлэл, үйлчилгээний технологи, Ц.Ц******* нь 720109 индекстэй Хүнсний эрүүл ахуйч мэргэжлээр лавлагааны санд оруулсан болох нь тогтоогдож байна.

9. Иймд дээрх үндэслэлүүдээр нэхэмжлэгч Т******* ХХК-ийг шаардлагад нийцсэн тендер ирүүлээгүй гэж үзэж Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 28 дугаар зүйлийн 28.1.3-д шаардлагад нийцээгүй тендер ирүүлсэн оролцогчийн тендерээс татгалзах, 26 дугаар зүйлийн 26.3-д Оролцогч тендерт холбогдох баримт бичиг болон ирүүлсэн мэдэгдлийн үнэн зөвийг хариуцна гэж зааснаар Эрдэнэс Таван толгой ХК-аас хүргүүлсэн 2024 оны 12 дугаар сарын 13-ны өдрийн ******* дугаартай мэдэгдэлд дурдсан Үнэлгээний хорооны шийдвэрийг хүчингүй болгох хууль зүйн үндэслэлгүй байна гэж үзлээ.

10. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 27 дугаар зүйлийн 27.5-д Тендерийг энэ хуулийн 11.4.1-д зааснаар үнэлэхэд харьцуулах үнийг, энэ хуулийн 11.4.2-т зааснаар үнэлэхэд санхүү, төсвийн асуудал эрхэлсэн Засгийн газрын гишүүний баталсан аргачлал, зааврын дагуу тооцсон үнийг тус тус өсөх дарааллаар эрэмбэлж, эхэнд эрэмбэлэгдсэн тендерийг хамгийн сайн тендер гэж үзнэ, 28 дугаар зүйлийн 28.1.1-т хамгийн сайн тендер ирүүлсэн оролцогчид гэрээ байгуулах эрх олгох, 51 дүгээр зүйлийн 51.2-д Үнэлгээний хороо тендер нээсэн өдөр тендер хянан үзэх, үнэлэх ажиллагааг эхлүүлнэ гэж зааснаас үзвэл Үнэлгээний хороо нэхэмжлэгч Т******* ХХК-ийн ирүүлсэн тендерийг хамгийн сайн тендер гэж үзэж шалгаруулаагүй, гэрээ байгуулах эрх олгоогүй харин тендерээс татгалзсан нөхцөл байдал тогтоогдож байхад шүүхээс Эрдэнэс Таван толгой ХК-аас зарласан дугаартай Катерингийн үйлчилгээ тендер шалгаруулалтын 2 дугаар багцад оролцсон Т******* ХХК-ийг гүйцэтгэгчээр шалгаруулж, захиалагчид гэрээ байгуулахыг даалгах хууль зүйн үндэслэлгүй, шүүхээс тендерийн Үнэлгээний хороо болон захиалагчийн эрх хэмжээг хэрэгжүүлэх боломжгүй гэж үзлээ.

Иймд нэхэмжлэгч Т******* ХХК-ийг Эрдэнэс Таван толгой ХК-аас зарласан дугаартай Катерингийн үйлчилгээ тендер шалгаруулалтын 2 дугаар багцад гүйцэтгэгчээр шалгаруулж, гэрээ байгуулахыг хариуцагчид даалгуулахыг хүссэн нэхэмжлэлийн шаардлагыг хэрэгсэхгүй болгох нь зүйтэй гэж үзлээ.

Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.1, 106.2, 106.3, 106.3.14 дэх хэсэгт заасныг удирдлага болгон ТОГТООХ нь:

1. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 17 дугаар зүйлийн 17.1, 17.2.3, 26 дугаар зүйлийн 26.3, 28 дугаар зүйлийн 28.1.1, 28.1.3, 51 дүгээр зүйлийн 51.2 дах хэсэгт заасныг тус тус баримтлан Т******* ХХК-аас Эрдэнэс таван толгой ХК-д холбогдуулан гаргасан Эрдэнэс таван толгой ХК-ийн 2024 оны 12 дугаар сарын 13-ны ******* тоот мэдэгдэлд дурдсан үнэлгээний хорооны дүгнэлтийг хүчингүй болгож, Т******* ХХК-г дугаар тендерийн 2 дугаар багцад гүйцэтгэгчээр шалгаруулж, гэрээ байгуулахыг даалгуулах-ыг хүссэн нэхэмжлэлийг бүхэлд нь хэрэгсэхгүй болгосугай.

2. Захиргааны хэрэг шүүхэд хянан шийдвэрлэх тухай хуулийн 48 дугаар зүйлийн 48.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-т заасныг тус тус баримтлан нэхэмжлэгчээс улсын тэмдэгтийн хураамжид төлсөн 70200 төгрөгийг орон нутгийн төсвийн орлогод хэвээр үлдээсүгэй.

Захиргааны хэрэг хянан шийдвэрлэх тухай хуулийн 113 дүгээр зүйлийн 113.2-д заасны дагуу хэргийн оролцогчид, тэдгээрийн итгэмжлэгдсэн төлөөлөгч, өмгөөлөгч нь шийдвэрийг эс зөвшөөрвөл шийдвэрийг гардан авсан өдрөөс хойш 5 хоногийн дотор давж заалдах журмаар гомдол гаргах эрхтэй. 

 

      

 

ШҮҮГЧ Д.ЧАНЦАЛНЯМ