Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Дорнод аймаг дахь сум дундын анхан шатны шүүхийн шүүгч П.Пагма би,

Нэхэмжлэгч:  “******* ******* *******” ХХК-ийн нэхэмжлэлтэй,

Хариуцагч:  ******* овогт *******ын *******т холбогдох,

            “Зээлийн гэрээний үүрэгт 8,218,204 төгрөг гаргуулах тухай” нэхэмжлэлийг 2025 оны 03 дугаар сарын 28-ны өдөр тусгайлсан журмаар хүлээн авч, иргэний хэрэг үүсгэн хянаад ТОДОРХОЙЛОХ нь:

Нэхэмжлэгч “******* ******* *******” ХХК-ийн итгэмжлэгдсэн төлөөлөгч Г.Ууганбилэг шүүхэд гаргасан нэхэмжлэлдээ: Ж.******* нь 2023.09.04-ний өдөр ******* дугаартай барьцаат зээлийн гэрээ байгуулан 4,525,000 төгрөгийн үнэ бүхий үнэт эдлэлийг зээлээр авсан боловч гэрээгээр хүлээсэн үүргээ биелүүлэхгүй байгаа тул үндсэн зээл 4,525,000 төгрөг, хуримтлагдсан хүү 3,307,093 төгрөг, нэмэгдүүлсэн хүү 382,111 төгрөг, нотариат үйлчилгээний хураамж 4,000 төгрөг, нийт 8,218,204 төгрөгийг гаргуулж өгнө үү гэжээ.

Хариуцагч Ж.*******ын итгэмжлэгдсэн төлөөлөгч ******* нь шүүхэд ирүүлсэн хариу тайлбартаа: Хаан монгол ******* *******-ийн нэхэмжилсэн 8,218,204 төгрөгийг төлөхийг зөвшөөрч байна гэжээ.

            Хэргийн материалыг шүүх хянаад ҮНДЭСЛЭХ нь:

            Нэхэмжлэгч “******* ******* *******” ХХК нь хариуцагч Ж.*******т холбогдуулан “Зээлийн гэрээний үүрэгт 8,218,204 төгрөг гаргуулах тухай” нэхэмжлэлийг тус шүүхэд гаргажээ.

            Хэрэг хянан шийдвэрлэх ажиллагааны явцад дээрх нэхэмжлэлийн шаардлагыг хариуцагч Ж.******* нь хүлээн зөвшөөрч, энэ талаарх тайлбараа итгэмжлэгдсэн төлөөлөгчөөрөө дамжуулан шүүхэд бичгээр ирүүлжээ.  

Хариуцагчийн зөвшөөрөл нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул хариуцагчийн зөвшөөрлийг баталж, хэргийг хэрэгсэхгүй болгон хялбаршуулсан журмаар хянан шийдвэрлэх нь зүйтэй гэж үзлээ.

            Иргэний хэрэг шүүхэд хянан шийдвэрлэх тухай хуулийн 74, 75 дугаар зүйл, 75⁸ дугаар зүйлийн 75⁸.1, 123 дугаар зүйлийн 123.1-д тус тус заасныг удирдлага болгон ЗАХИРАМЖЛАХ нь:

            1. Нэхэмжлэгч “******* ******* *******” ХХК-ийн “Зээлийн гэрээний үүрэгт 8,218,204 /найман сая хоёр зуун арван найман мянга хоёр зуун дөрөв/ төгрөг гаргуулах тухай” нэхэмжлэлийн шаардлагыг хариуцагч Ж.******* нь хүлээн зөвшөөрснийг баталж, хэргийг хэрэгсэхгүй болгосугай. 

            2. Иргэний хэрэг шүүхэд хянан шийдвэрлэх тухай хуулийн 60 дугаар зүйлийн 60.1, 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-д тус тус зааснаар нэхэмжлэгчээс улсын тэмдэгтийн хураамжид төлсөн 146,445 төгрөгөөс нэхэмжлэлийн шаардлагад ногдох хэсгийн 50 хувь болох 73,220.5 төгрөгийг Хэрлэн сумын төсвийн орлогод хэвээр үлдээж, 73,220.5 төгрөг, илүү төлсөн 4 төгрөг, нийт 73,224.5 төгрөгийг Хэрлэн сумын төсвийн орлогоос, 73,220.5 төгрөгийг хариуцагч Ж.*******аас тус тус гаргуулж нэхэмжлэгч “******* ******* *******” ХХК-д олгосугай.

            3. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-т зааснаар зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

            4. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг зохигч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

 

 

 

ШҮҮГЧ                         П.ПАГМА